Dirava Ena Hereva Abidadama Henia Karana Ita Hagoadaia

TAUNIMANIMA momo ese Baibel idia duahia, buka ma ta be unai bamona idia duahia lasi. To hida ese iena hereva idia abidadama henia? Baibel be sibona ia gwau “taunimanima haida sibona be mai edia abidadama.” (2 Tesalonika 3:⁠2) Ia hedinarai goevagoeva, ita be abidadama ida ita vara lasi. Ita havaraia be namo. Mai edia abidadama taudia danu ese edia abidadama idia laloa bada be namo. Abidadama be ia dika ia lao bona ia mase diba. Unai dainai, do ita hekwarahi ‘abidadama dekenai do ita gini goada’ totona.​—⁠Tito 2:⁠2.

Badina namona dainai, Iehova ena Witness taudia edia Hakaua Oreana ese lagani 1997/98 ena distrik hebouhebou totona inai sinado idia abia hidi: “Dirava Ena Hereva Abidadama Henia.” Witness taudia milioni momo bona taunimanima ma haida idia hebou edia abidadama Dirava ena Hereva dekenai idia hagoadaia totona.

Dirava Ena Hereva be Hereva Momokani ​—⁠Iseda Abidadama Ena Badina

Unai be hebouhebou ena dina ginigunana ena sinado. Hebou idia lao taudia dekenai hanamoa herevadia amo unai dina ia hamatamaia. Hebouhebou dekenai idia mai ese ia hahedinaraia idia be Baibel idia matauraia. To, lalona veria henanadai iseda abidadama ena goada tahua totona idia henia: ‘Ita hegeregere ita abia dae gaudia edia maoro ita hamomokania, Dirava ena Hereva ena siahu amo, a? Lauma gaudia ita laloa bada, bona Baibel, kongregesen hebou, bona Baibel idia gwauraia buka ita lalodia bada danu, a? Iseda lalokau, diba maoromaoro, bona lalo-parara ita habadaia, a?’ Hereva henia tadikaka ese ibounai ia hagoadaia idia kamonai namonamo totona, ia gwau “inai ‘Dirava Ena Hereva Abidadama Henia’ Distrik Hebouhebouna idia hegaegaelaia ita sibona eda lalona ita tahua bona ita ta ta eda abidadama ena bada bona ena goada ita laloa totona.”

Hebouhebou ena sinado herevana ena ladana be “Matana amo Lasi, to Abidadama amo Ita Raka.” (2 Korinto 5:⁠7) Hereva ia henia tadikaka ia gwau: “Iehova ena Witness taudia ai idia lao taudia edia abidadama be idia abia dae kava gauna lasi.” Unai be momokani! Abidadama korikorina be ia kepulu lasi. Gau korikori latanai ena badina ia haginia. Heberu 11:1 ia gwau: “Abidadama ena anina be inai bamona: Ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” Hereva ia henia tadikaka ia gwau: “Bema ita be abidadama dekenai do ita raka momokani, namona be iseda abidadama be mai ena badina aukana.” Badina ita be abidadama amo ita raka, bona matana amo ita raka lasi, Iehova ese edena negai bona edena dala ai iena ura ibounai do ia hagugurua ita diba lasi be gau badana lasi. Iena kara, ita diba vadaeni karadia unai, ese ita idia hagoadaia bona ita abiadae vaitani iena siahu be hegeregere iena gwauhamata gaudia do ia hagugurua mai lalokau bona maoromaoro ida.

Hereva ladana “Keristani Memero Kekeni​—⁠Mai Edia Anina Bada Kongregesen Lalonai” ese matamata taudia ia hadibaia lou idia be mai anina bada Iehova dekenai. Idia ia hagoadaia lauma dalanai idia goada totona tahua gaudia, hegeregere Baibel ibounai do idia duahia karana bona idia hegeregere gwauhamata bona bapatiso totona do idia hekwarahi. Edukeisini bada tahua karana be edia tama sina ida do idia abia hidi gauna ta, to bema idia abia hidi, namona be iena badina be diba do idia abia Dirava hesiai henia namonamo totona. Edukeisini ese namo bada ia havaraia diba bema “gau namodia,” iseda abidadama idia durua gaudia ita laloa bada.​—⁠Filipi 1:​9, 10.

Unai murinai be hereva toi edia sinado be “Daika Ena Dala Oi Badinaia?” Dirava ena Hereva abidadama henia ese ita ia doria Baibel ena taravatu ita badinaia totona. Keristani taudia ese Iehova ena taravatu bona hakaua herevadia idia badinaia. Hegeregere, Baibel ese ita ia oda henia hereva mirodia bona hereva dikadia do ita gwauraia lasi. (Efeso 4:​31, 32) Hereva ia henia tadikaka ia henanadai: “Oi badu o emu lalona ia dika neganai, hereva dikadia amo oiemu adavana eiava natudia oi gwau henia, a?” Momokani, unai be Keristani kara lasi. Dirava be mai ena taravatu iseda toana dekenai danu. Namona be Keristani taudia be “manau bona mai mataurai” danu dabua do idia karaia. (1 Timoteo 2:​9, 10) Unai hereva “manau” ese sibona matauraia karana, hematauraia, bona laloa maoromaoro karana ia hahedinaraia. Ma haida ita lalokau henia karana ese ita ia doria, bona Baibel ena hakaua herevadia bona dahaka be maoro ese ita idia biagua.

Murinai hereva rua be Heberu 3:​7-15 bona 4:​1-16 edia siri ta ta idia herevalaia. Unai Baibel siri ese ita idia hamaoroa do ita naria namonamo ‘kara dika ese iseda lalona be Dirava dekena amo do ia koua garina.’ (Heberu 3:13) Edena bamona ita kwalimu diba kara dika inai henia ena heai lalonai? Iehova ese iena Hereva amo ita ia durua. Oibe, “Dirava ena hereva be ia mauri noho, bona ia be mai ena siahu . . . iseda lalona bona iseda kudouna ena ura ibounai ia tahua diba.”​—⁠Heberu 4:⁠12.

Hebouhebou ena dina ginigunana ena hereva dokona be “Buka ta, Taunimanima Iboudiai Edia.” Ia hahedinaraia Baibel ena hereva be momokani, maoro, bona namo bada ia havaraia. Ibounai idia moale bada herea hereva ia henia tauna ese rau 32 buklet matamatana ladana A Book for All People ia halasia neganai! Unai buklet matamatana idia hegaegaelaia Baibel idia diba namonamo lasi diba bada taudia totona. Unai hereva be inai hereva amo ia doko: “Oibe, taunimanima sibodia ese Dirava ena Hereva do idia tahua be namo. Ita diba, bema idia sibodia ese idia tahua, do idia diba hari buka idau hereana, Baibel, be momokani buka ta taunimanima iboudiai edia!”

‘Iseda Abidadama Durua Tauna’ Tohotohoa

Unai be dina iharuana ena sinado bona ia be Iesu Keriso, ‘Iseda Abidadama Durua Tauna’ ia herevalaia. Namona be ‘iena aena gabudia dekenai do ita raka.’ (Heberu 12:2; 1 Petero 2:21) Kerisendom dubu lalodiai taunimanima momo idia hamaorodia: ‘Lohiabada Iesu oi abia dae, bona do oi mauri!’ To abidadama ena anina be unai sibona, a? Baibel ia gwau “abidadama mai ena kara namodia lasi, be mase gauna.” (Iamesi 2:26) Vadaeni, namona be Iesu ita abia dae sibona lasi, to ia karaia gaukarana do ita karaia danu, unai be Dirava ena Basileia ena sivarai namona do ita harorolaia.

Daba ena program be haroro gaukara idia herevalaia momo. Paulo bamona, mai ura bada ida hahemauri ena sivarai namona ita harorolaia be namo. (Roma 1:​14-16) Iesu be gabu ibounai taunimanima ia haroro henidia. Ena be iseda ruma-ta-ruma-ta haroro gaukara be anina ia havaraia, to taunimanima momo be ruma dekenai idia noho lasi ita lao neganai. (Kara 20:20) Momo be idia sikuli, idia gaukara, sitoa dekenai idia lao eiava idia laolao. Unai dainai, taunimanima idia loaloa gabudia bona edeseniai taunimanima ita davaria diba ita haroro henidia be namo.

Inai hereva “Hereva Momokani Lalonai Oi Gini Auka Bona Oi Marere Lasi” ese ita ia durua idia bapatiso hahediba matamata taudia momo herea ita laloa totona​—⁠dina ta ta ai edia averes be 1,000 ia hanaia! Unai matamata taudia be hereva momokani lalonai idia gini auka bona idia marere lasi be gau badana. (Kolose 2:​6, 7) Hereva henia tauna ia gwau tubutubu gaudia edia ramuna ese ranu bona aniani idia abia vareai bona danu idia be dogo bamona tubutubu gauna ia gini goada totona. Unai hegeregerena, stadi namonamo karadia bona hebamo namodia amo, hahediba taudia matamatadia be hereva momokani lalonai idia gini auka diba.

Unai sisiba be mai anina bada bapatiso abia gwauraia taudia dekenai. Oibe, hebouhebou ena dina iharuana ai, Iesu ena haheitalai hegeregerena hahediba taudia matamatadia momo herea idia bapatiso. Hereva ladana “Dirava Ena Hereva Abidadama Henia ese Ita Ia Hakaua Bapatiso Dekenai” ese bapatiso abia taudia ia hadibaia lou ranu henunai idia diho momokani karana be haheitalai namona, ia ese guna sibodia edia ura idia tahua mauri dalana ia mase toana ia hahedinaraia. Ranu amo idia daekau ia hahedinaraia idia mauri lou Dirava ena ura karaia totona.

Hereva ladana “Emui Abidadama Lalonai Do Umui Gini Goada Noho” be Baibel ena buka, Iuda, amo idia karaia. Ita idia hagoadaia iseda abidadama do ita naria totona, namona be kara bodaga, gwau-edeede karana, bona hereva momokani negea karana amo do ita gini siri. Gabeai, tama sina ese mai anina​—⁠ia be mai anina bada tama dekenai​—⁠herevana ta ladana “Oiemu Ruma Bese Durua Gaudia Oi Henia” idia kamonai. Ruma bese durua lauma dalanai, tauanina dalanai, bona hemami dalanai be Baibel ena taravatu ta. (1 Timoteo 5:⁠8) Unai karaia totona nega do idia atoa, do idia herevahereva namonamo, bona idia noho hebou. Iehova Dirava be Keristani tama sina idia gaukara goada edia natudia be hereva momokani lalonai do idia tubu totona ia moalelaia bada.

Unai murinai idia henia hereva toi edia sinado “Iehova Ena Ruma Dekenai Do Ita Lao” ese Keristani hebou laloa bada karana ia habadaia. Idia be tanobada ena hekwarahi amo laga-ani idia henia. Hebou dekenai hahegoada daladia idia noho, bona iseda tadikaka dekenai iseda lalokau ita hahedinaraia diba. (Heberu 10:​24, 25) Hebou ese ita idia durua danu iseda hahediba dalana ita hanamoa totona, bona iseda lalo-parara karana Dirava ena ura dekenai idia habadaia. (Aonega Herevadia 27:17) Namona be kongregesen amo ita raka siri lasi, bona Iesu ena hereva ita laloatao: “Bema lauegu ladanai tau rua o toi idia hebou gabu ta dekenai, lau danu be idia dekenai lau noho.”​—⁠Mataio 18:⁠20.

Unai dina ena hereva dokona be “Oiemu Abidadama Ena Goada​—⁠Hari Idia Tohoa.” Idia do tohoa lasi abidadama ena goada ita diba lasi. Ia be banika dekenai ita do atoa lasi seke ta bamona. Momokani ena davana be idia torea davana hegeregerena, a? Unai hegeregerena, iseda abidadama idia tohoa be namo ena goada bona namo hamomokania totona. (1 Petero 1:​6, 7) Hereva henia tauna ia gwau: “Nega haida, pasto taudia bona hereva momokani negea taudia ese nius halasia taudia bona gavamani siahu taudia edia lalona idia veria iseda Keristani hahediba herevadia bona mauri dalana idia laloa kerere totona. . . . Satani ese edia matana ia koua taudia dainai ita gari bona sivarai namona ita hemarailaia, a? Hereva momokani idia hakoikoia herevadia dainai hanaihanai hebou lao henia karana bona haroro gaukarana ita rakatania, a? Eiava do ita gini goada bona mai gari lasi ida Iehova bona ena Basileia ena hereva momokani do ita harorolaia goadagoada?”

Abidadama Dainai Ita Mauri

Hebouhebou ena dina ihatoina ena sinado be Paulo ena hereva amo idia abia: “Tau ta be Dirava ena vairanai ia maoromaoro diba lasi Taravatu ia badinaia dekena amo. Badina be Buka Helaga inai bamona ia torea: ‘Abidadama dainai Dirava ena vairanai ia maoromaoro tauna, inai tau sibona ia mauri diba.’ ” (Galatia 3:11) Hereva toi edia sinado, “Ioela Ena Peroveta Herevana Iseda Nega Totona,” be unai daba ena hereva badadia. Ioela ena buka be iseda nega ia perovetalaia bona mai karaharaga danu ia gwau: “Lohiabada ena dina be kahirakahira. Unai dina dekenai ia ese ita do ia hadikaia bada. Unai dina ese gari bada do ia havaraia.” (Ioela 1:15) Idia hesiku lasi kwadi bamona, gau ta ese horoa Keristani taudia ia koudia lasi inai nega dokona ai Basileia idia harorolaia neganai.

Ioela bukana ese helaro ia henia danu, ia gwau: “Lohiabada idia noia taudia ibounai, ese mauri do idia davaria.” (Ioela 2:32) Unai ena anina be Iehova ena ladana ita gaukaralaia sibona lasi. Iseda kudouna ibounai ida ita helalo-kerehai be namo, bona danu ita be kara dika ita dadaraia. (Ioela 2:​12, 13) Nega be lasi badina Iehova ese kahirakahira dika do ia mailaia tanobada besedia latanai, Moaba, Amono, bona Iuda ena King Iehosapata ena negai ororo dekenai idia noho Edoma taudia ia hadikaia hegeregerena.​—⁠2 Sivarai 20:​1-30; Ioela 3:​2, 12.

Inai hereva “Iehova Naria Karana amo Abidadama Hahedinaraia” ese ibounai ia hagoadaia. Hari, ita be nega dokona momokani dekenai ita noho, Iehova ena gwauhamata momo idia guguru vadaeni ita itaia diba, bona do idia guguru gaudia be mai ura bada ida ita naria noho. Iehova ena taunimanima ese haheauka karana do idia badinaia noho, idia laloatao Dirava ese ia gwauhamatalaia gaudia ibounai be do idia vara.​—⁠Tito 2:13; 2 Petero 3:​9, 10.

Daba ena program dokona ai drama ladana “Emu Matana Do Ia Namo” idia karaia. Unai mauri lalonai ia vara momokani gauna ia hahedinaraia drama ese ita ia durua tauanina gaudia dekenai iseda lalohadai ita tahua namonamo totona. Herevana edeseniai ita noho, bema ita ura lasi hekwakwanai momo ese iseda mauri ia hahonua, namona be Iesu ena sisiba iseda matana do ia namo ita badinaia, namona be iseda matana be Dirava ena Basileia ia itaia goevagoeva.​—⁠Mataio 6:⁠22.

Pablik tok ena ladana “Abidadama Bona Emu Vaira Negana” ese kamonai taudia edia lalona ia veria. Ia hahedinaraia tanobada lohia taudia be idia hegeregere lasi tanobada ena hekwakwanai idia hanamoa totona. (Ieremia 10:23) Tanobada ese guna idia karaia kerere idia karaia lou noho​—⁠idia karaia badabada bona dika bada herea idia havaraia noho. Iehova ena Witness taudia ese nega vaira be edena bamona idia laloa? Ita abia dae idia kamonai taudia be mai edia vaira negana namona Dirava ena Basileia henunai. (Mataio 5:⁠5) Ena Hereva idia abidadama henia taudia ibounai totona Dirava ese iena gwauhamata do ia hagugurua. Iena Hereva ia gwau: “Lohiabada do umui tahua, umui do davaria diba neganai. Ia dekenai do umui noinoi, ia be do kahirakahira ia noho neganai.”​—⁠Isaia 55:⁠6.

Iesu ese iseda nega ia laloa neganai, mai anina bada henanadai ta ia gwauraia. Ia henanadai: “Taunimanima ena Natuna do ia mai neganai, tanobada dekenai abidadama do ia davaria o?” (Luka 18:⁠8) Hereva dokona ese hebouhebou ena program ia riviulaia bona ia hahedinaraia program ese ia hamomokania taunimanima ese Dirava ena Hereva idia abidadama henia, ena be inai abidadama lasi bona kohu sibona ura henia tanobada lalonai ita noho.

To, ita ta ta be sibona ita henanadai be namo, ‘Lau be Dirava bona iena Hereva idia abidadama henia taudia ta, a?’ “Dirava Ena Hereva Abidadama Henia” Distrik Hebouhebou ese ita ia durua unai henanadai dekenai, oibe, ita haere totona. Bona Iehova ita tanikiu henia bada badina ia bona iena Hereva, Baibel dekenai, iseda abidadama ia hagoadaia!

[Pictures on page 24]

Volantia taudia momo be mai moale ida hebouhebou idia lao taudia tausen momo dekenai helai gabudia idia hahedinaraia

[Picture on page 25]

Tanobada hegegemadai steidiam badadia idia gaukaralaia

[Pctures on page 25]

Hakaua Orea tauna, L. A. Swingle ese buklet matamatana ia halasia noho

[Picture on page 26]

Momo ese bapatiso amo edia gwauhamata Iehova dekenai idia hahedinaraia

[Picture on page 27]

Hebouhebou idia lao taudia ese mai moale ida Basileia ane idia abidia. Laulau maragina: drama ladana “Emu Matana Do Ia Namo”