Doketa Taudia, Diadi Taudia, Bona Iehova Ena Witness Taudia

GUNA, March 1995 ai, Iehova ena Witness taudia ese hebou rua idia karaia Brazil dekenai. Dahaka dainai? Idia ura medikol bona loea taudia edia heduru idia tahua, hospital dekenai ia noho gorere tauna be Iehova ena Witness tauna ta bona rara ia abia dae diba lasi neganai.​—Kara 15:29.

Madi, nega haida doketa taudia ese Witness gorere taudia edia ura idia matauraia lasi bona kota oda idia tahua, rara do idia henia hanai totona. Unai negadiai, Witness taudia ese kota ena heduru daladia ibounai idia gaukaralaia, sibona idia naria totona. To, idia ese gaukara hebou karana idia ura henia, hepapahuahu idia ura lasi. Unai dainai, unai hebou rua ese idia hahedinaraia homologous rara henia hanai karana ena gabu ai kara ma haida idia karaia diba, bona Iehova ena Witness taudia be unai idia abia dae mai edia moale ida.a

São Paulo ena Regional Council of Medicine edia hebou ta be Witness taudia edia abia hidi ia abia dae vadaeni. January 1995 ai, edia lalona idia hadaia bema gorere tauna ese doketa ia gwauraia hanamoa dalana ia abia dae diba lasi, ia be mai ena maoro ia dadaraia bona ma doketa ta ia abia hidi diba.

Hari Brazil ena medikol taudia handred momo be gorere taudia idia noinoi neganai, rara lasi hanamoa daladia idia gaukaralaia, unai dainai idia ita hanamoa. March 1995 ena heboudia murinai, Brazil dekenai, doketa taudia, diadi taudia, bona Iehova ena Witness taudia edia gaukara hebou dalana be ia namo ia lao. Lagani 1997 ai, Brazil ena medikol magasin Âmbito Hospitalar ese ia halasia herevana lalonai ia gwau Iehova ena Witness taudia edia maoro be taunimanima ese edia lalohadai rara dekenai idia matauraia. Hari momo idia abia dae, Rio de Janeiro bona São Paulo edia Regional Council of Medicine idia gwauraia bamona, “doketa tauna ena maduna gorere tauna durua totona, ese gorere tauna ena maoro hanamoa dalana abia hidi totona ia hanaia lasi be namo.”

[Footnote]