Idia be “Taunimanima Sibona, Ita Bamona”
IA BE king ta bona peroveta tauna ta, to danu ia be lalokau tamana ta. Iena natuna mero ta ia bada neganai, kavakava bona hekokoroku tauna ai ia lao. Unai natuna ia ura king dagina ia abia dainai, bese lalonai tuari ia havaraia, ena tamana do idia hamasea totona. To ia vara tuari lalonai, unai natuna idia hamasea. Tamana be ena natuna ia mase ena sivarai ia kamonai neganai, sibona ia daekau lao guhi ena daiutu ta lalonai bona ia taitai: “Natugu Abesaloma o! Natugu Abesaloma o! Bema oiemu gabuna dekenai lau mase be namo! Abesaloma o, natugu, Abesaloma o!” (2 Samuela 18:33) Unai tama be King Davida. Iehova ena peroveta taudia ma haida bamona, ia be “taunimanima sibona, ita bamona.”—Iamesi 5:17.
Baibel negadiai Iehova ena hesiai tatau bona hahine be mauri idauidau idia noholaia taudia bona idia be taunimanima sibona. Ita bamona, hekwakwanai idia davaria bona idia goevadae lasi dainai hisihisi idia davaria. Unai peroveta taudia haida be daidia, bona edena bamona edia hemami be ita eda bamona?
Mose—Hekokoroku amo Ia Lao Manau
Keriso ia do mai lasi neganai ia noho peroveta tauna badana ta be Mose. Ena be iena mauri lagani be 40, to ia do hegeregere lasi Iehova ena peroveta tauna bamona ai ia gaukara totona. Dahaka dainai? Iena varavara be Aigupito ena Farao ese ia guidia lalonai, Mose be Farao ena ruma bese lalonai ia tubu daekau bona ena “hereva bona kara dekenai ia be mai siahuna.” Baibel ia gwau: “Ia laloa iena varavara taudia be inai bamona dohore idia laloa, ‘Dirava ese Mose ena imana dekena amo ita dohore ia hamauria.’ ” Mai hekokoroku ida, ia ese Heberu igui hesiai tauna ia durua totona, Aigupito tauna ta ia hamasea.—Kara 7:22-25; Esodo 2:11-14.
Vadaeni Mose ia heau boio, bona mamoe naria tauna bamona lagani 40 Midiana tanona dekenai ia noho. (Esodo 2:15) Unai nega dokonai, Mose, hari ena mauri lagani be 80, be Iehova ese peroveta tauna bamona ia siaia. To unai neganai Mose be ia hekokoroku lasi. Ia laloa ia hegeregere lasi bona Iehova ese peroveta tauna ai ia halaoa ia daradaralaia. Ia gwau: “Lau be daika, dohore Farao dekenai lau lao?” bona, “Lau be edena bamona dohore lau haere?” (Esodo 3:11, 13) Iehova ese mai lalokau ida ia hagoadaia bona ia durua murinai, Mose ese mai kwalimu bada ida ena gaukara ia karaia.
Oi danu be Mose bamona, hekokoroku karana ese oi ia veria ia maoro lasi karana ta oi karaia eiava hereva ta oi gwauraia totona, a? Bema unai ia vara, namona be mai manau ida sisiba ma haida oi abia dae be namo. Eiava oi laloa oi hegeregere lasi Keristani maduna haida huaia totona, a? Namo lasi unai maduna oi dadaraia, to namona be Iehova bona iena orea ese idia henia heduru oi abia dae. Mose ia durua Tauna ese oi danu ia durua diba.
Elia—Matahakani Ia Henia Neganai, Ena Hemami be Ita Eda Bamona
“Elia be taunimanima sibona, ita bamona. To ia ese Dirava dekenai ia guriguri goadagoada, medu do ia diho lasi. Vadaeni lagani toi bona hua 6 lalonai medu ia diho lasi.” (Iamesi 5:17) Elia ena guriguri be Iehova ena ura hegeregerena, Ia idia rakatania besena ia ura ia matahakani henia. To, Elia ia diba ia gurigurilaia medu lasi negana ese taunimanima do ia hadikaia. Israela taudia be biru taudia; hanuaboi ena paripari bona medu ese taunimanima edia mauri ia durua. Nega daudau lalonai medu ia diho lasi ese hekwakwanai badana do ia mailaia. Tubutubu gaudia do idia mase; aniani do idia tubu lasi. Gaukara totona bona aniani totona idia ubua animal do idia mase, bona famili haida do idia hitolo bada. Daidia be hisihisi do idia mamia badabada? Ogogami taudia. Vabu ta be gabeai Elia ia hamaoroa ia be aniani lasi, paraoa sisina bona dehoro sisina sibona. Ia laloa momokani, ia bona iena natuna be kahirakahira hitolo amo do idia mase. (1 King Taudia 17:12) Elia be unai guriguri ia gwauraia ese ia hahedinaraia, ia abidadama momokani Iehova ese iena hesiai taudia—taga eiava ogogami taudia—tomadiho momokani idia rakatania lasi taudia unai, do ia naridia. Baibel ia hahedinaraia hegeregerena, Elia ia abidadama gauna ia vara momokani.—1 King Taudia 17:13-16; 18:3-5.
Lagani toi murinai, Iehova ia hahedinaraia kahirakahira medu do ia mailaia neganai, Elia ena ura medu lasi negana do ia doko be ena guriguri loulou karana amo ia hedinarai, “ia tui diho tano dekenai, bona iena kwarana be iena tuina edia huanai ia atoa” bona ia guriguri goadagoada. (1 King Taudia 18:42) Iena hesiai tauna ia hamaoroa loulou: “Oi lao, davara kahanai do oi itaia noho,” bema gau ta ia hahedinaraia Iehova ese iena guriguri ia kamonai. (1 King Taudia 18:43) Iena guriguri hegeregerena, “medu be guba dekena amo ia diho, bona tano ese iena anina ia havaraia” neganai, ia moale bada herea!—Iamesi 5:18.
Bema oi be tama o sina ta eiava elda ta Keristani kongregesen lalonai, matahakani oi henia neganai, reana oi hekwarahi oiemu hemami oi biagua totona. To, unai bamona hemami ita biagua be namo badina nega haida matahakani ita henia be maoro bona bema ia be lalokau ida ita karaia, “kara maoromaoro ena davana namona, mai maino danu do” ia havaraia. (Heberu 12:11) Nega ibounai Iehova ena taravatu ita badinaia dainai gau namodia idia vara. Elia bamona, iseda kudouna amo ita guriguri unai gaudia do idia vara.
Ieremia—Goada Ia Hahedinaraia Ena be Idia Dagedage Henia
Baibel torea taudia iboudiai amo, reana Ieremia be ena hemami ia torea momo tauna. Ia be tau matamata bona ia ura lasi iena gaukara do ia abia dae. (Ieremia 1:6) To ena be unai bamona ia laloa, mai gari lasi ida Dirava ena hereva ia harorolaia, bona Israela taudia—king ela bona hanua taudia—ese idia dagedage henia. Unai kara dainai nega haida ia badu bona ia tai. (Ieremia 9:3; 18:20-23; 20:7-18) Nega idauidau ai hutuma ese idia dagedage henia, idia botaia, aiona bona aena be au dekenai idia lokaia, dibura dekenai idia atoa, mase herevana amo idia hagaria, bona ranu guri ena kopukopu lalonai idia rakatania ia mase totona. Nega haida Iehova ena hereva ese ia hahisia danu, sibona ena hereva amo ia gwau: “Hisihisi bada! Inai hisihisi ena metau, be lau huaia diba lasi! Egu kudouna e! Egu kudouna ia gari!”—Ieremia 4:19.
To, ia ese Iehova ena hereva ia lalokau henia, ia gwau: “Oiemu hereva ese lau ia hamoalea momokani.” (Ieremia 15:16) To unai nega tamona lalonai, ia moale lasi dainai Iehova dekenai ia boiboi, ia gwau: “Momokani oi ese lau oi durua lasi. Lau be ranu dekenai inua totona lau lao bamona, ranu lau itaia ia kaukau, vadaeni lau inua diba lasi,” ranu sisina ia heau gabuna bamona ia kaukau haraga. (Ieremia 15:18) Ena be ena mamina be unai bamona, Iehova ese iena hemami ia lalo-pararalaia bona ia durua noho, iena gaukara ia hagugurua totona.—Ieremia 15:20; ma danu 20:7-9 itaia.
Ieremia bamona, oi be haroro gaukara lalonai lalohisihisi bona dagedage oi haheaukalaia, a? Iehova ena heduru oi noia. Iena hakaua herevadia oi badinaia, bona Iehova ese emu hekwarahi davana do ia henia danu.
Iesu Ena Hemami be Ita Eda Bamona
Peroveta tauna badana be Dirava sibona ena natuna, Iesu Keriso. Ena be ia be tau goevadaena, ia ese ena hemami ia hunia lasi. Nega momo iena hemami idia hahedinaraia sivaraidia ita duahia bona reana ena hemami be ena vairana bona ena kara amo ia hahedinaraia haida ia kara henidia neganai. Iesu be nega momo ia ‘hebogahisi,’ bona ena parabole lalodiai ia herevalaia taudia ia gwauraia neganai unai hereva ia gaukaralaia.—Mareko 1:41; 6:34; Luka 10:33.
Dubu helaga amo hoihoi taudia bona animal ia luludia neganai, reana inai hereva ida ia boiboi badabada: “Unai be umui kokia lao.” (Ioane 2:14-16) Petero ese ia hamaoroa: “Lohiabada e, unai bamona lasi” neganai, Iesu be mai goada ida ia gwau, “Satani e, lauegu murina kahana oi lao.”—Mataio 16:22, 23.
Iesu ese ia idia tura henia taudia ta ta ia lalodia bada. Aposetolo Ioane idia gwauraia “Iesu ena lalokau diba tahua tauna.” (Ioane 21:7, 20) Bona ita duahia danu: “Iesu ese Mareta mai ena tadina Maria danu, bona Lasaro danu, ia lalokau henia.”—Ioane 11:5.
Iesu be ia lalohisihisi diba danu. Lasaro ena mase ena hisihisi ia mamia neganai, “Iesu ia tai.” (Ioane 11:32-36) Ia hahedinaraia Iuda Iskariote ese ia hadikaia karana dainai ia lalohisihisi, Iesu be Salamo herevana ta ia gwauraia: “Egu aniani lau danu ia ania noho tauna ese lau ia hadikaia inai.”—Ioane 13:18; Salamo 41:9.
Au dekenai idia hasatauroa bona hisihisi bada ia abia noho neganai, iena hebogahisi ena bada ia hahedinaraia. Mai lalokau ida “ia lalokau henia diba tahua tauna” dekenai ena sinana ia rakatania. (Ioane 19:26, 27) Ia badinai ia noho kara dika tauna ena helalo-kerehai karana ia itaia neganai, Iesu be mai hebogahisi ida ia gwau: “Oi be lau danu Paradaiso dekenai do ita noho.” (Luka 23:43, NW) Ia tai neganai ena lalohisihisi bada ena mamina ita mamia diba: “Egu Dirava e, egu Dirava e, dahaka dainai lau oi rakatania?” (Mataio 27:46) Bona ia mase neganai ena hereva ese kudouna amo ia mai lalokau bona abidadama ia hahedinaraia: “Egu Tamana e, egu lauma be oiemu imana dekenai lau atoa inai.”—Luka 23:46.
Unai kara ibounai ese ita ia hagoadaia bada! “Ita be manoka dainai kara dika ese nega momo ita ia hamorua. To iseda Hahelagaia Tauna Badana ese ita ia bogahisihisi henia diba. Badina be ia danu ese dibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi.”—Heberu 4:15.
Iehova Ena Daradara Lasi Karana
Iehova be ia abia hidi peroveta taudia dainai ia lalohisihisi lasi. Edia badinaia karana ia dekenai ia diba, bona mai hebogahisi ida idia goevadae lasi taudia edia manoka karadia ia laloa lasi. To ia ura edia gaukara do idia hagugurua. Ena heduru amo unai idia karaia diba.
Namona be mai haheauka ida iseda Dirava badinaia tadikaka bona taihu dekenai abidadama henia karana do ita hahedinaraia. Hari inai nega lalonai, ita bamona, idia be do idia goevadae lasi. To, namo lasi ita gwau idia be hegeregere lasi ita lalokau henidia bona ita lalodia bada totona. Paulo ia gwau: “Ita abidadama goada taudia be namo manoka taudia ita durudia edia abidadama do ia gini totona. Ita sibona iseda moale do ita tahua lasi.”—Roma 15:1; Kolose 3:13, 14.
Iehova ena peroveta taudia ese ita mamia gaudia ibounai idia mamia danu. To, idia ese Iehova idia abidadama henia, bona Iehova ese idia ia durua. Unai sibona lasi, Iehova ese idia moale ena badina ia henidia—edia lalona ia goeva, ia lalodia bada, heduru idia henia tura korikoridia, bona helaro namona nega vaira totona. (Heberu 12:1-3) Ita danu, namona be Iehova dekenai ita tabekau vaitani mai iseda abidadama ibounai ida, peroveta taudia gunadia, “taunimanima sibona, ita bamona” edia abidadama ita tohotohoa neganai.