Gwauhamata Bona Abia Hidi Karana Ena Ura Kwalimu
“Keriso ese . . . ita ia ruhaia vadaeni. Ura kwalimu ita abia vadaeni.”—GALATIA 5:1.
1. Heberu bona Greek herevadia, idia hahanaia “Lohiabada ena” eiava “hahelagaia,” be dahaka idia herevalaia neganai idia gaukaralaia momo?
BAIBEL toretore taudia ese Heberu bona Greek herevadia haida idia gaukaralaia, hesiai gaukara helagana totona noho siri, eiava atoa siri, lalohadaina idia hahedinaraia totona. Motu gado Baibel ai, unai hereva idia hahanaidia neganai, inai hereva “Lohiabada ena,” “hahelagaia,” eiava unai bamona hereva ma haida idia gaukaralaia. Nega haida, unai hereva idia gaukaralaidia idia haginia gauna ta—hegeregere, Dirava ena dubu helaga idaunegai Ierusalema dekenai bona ia lalonai idia karaia tomadiho karadia—idia herevalaia neganai. Nega ta ta sibona tomadiho lasi karadia gwauraia totona idia gaukaralaidia.
“Israela Ena Dirava” Dekenai Sibona Idia Gwauhamatalaia
2. Dahaka dainai ia maoro Iehova idia gwauraia “Israela ena Dirava”?
2 Lagani 1513 B.C.E. ai, Dirava ese Aigupito ena igui amo Israela taudia ia ruhaia. Nega sisina murinai, ia ida gwauhamata ta lalonai idia vareai, unai amo idia ia atoa siri bona iena bese korikori ai idia lao. Idia ia hamaoroa: “Harihari bema lauegu hereva do umui kamonai henia, bona lauegu taravatu do umui badinaia neganai, umui be lauegu bese korikori do umui lao. Tanobada besedia ibounai be lauegu, to bese ibounai edia huanai umui be lauegu abia hidi besena.” (Esodo 19:5; Salamo 135:4) Iehova ese Israela taudia be ena bese korikori ai ia halaoa dainai, ia maoro ia idia gwauraia “Israela ena Dirava.”—Iosua 24:23.
3. Iehova ese Israela taudia be ena bese taudia ai ia abia hidi neganai, dahaka dainai unai be taunimanima edia toana laloa karana lasi?
3 Iehova ese Israela taudia be ena gwauhamata besena ai ia halaoa neganai, ia ese taunimanima edia toana ia laloa lasi, badina mai ena lalokau ida idau bese taudia ia laloa danu. Iena taunimanima ia hamaorodia, ia gwau: “Umui huanai idia noho idau taudia do umui dagedage henia lasi. Idau taudia be emui bese korikori hegeregerena umui emui huanai do idia noho. Do umui lalokau henidia, umui sibona umui lalokau henia hegeregerena. Do umui laloaboio lasi, umui danu be Aigupito tano dekenai idau taudia bamona umui noho guna. Lau inai Lohiabada, emui Dirava.” (Levitiko 19:33, 34) Lagani handred haida murinai, Dirava ese Petero dekenai iena lalohadai ia hahedinaraia goevagoeva, bena Petero ia gwau: “Hari lau diba momokani Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.”—Kara 10:34, 35.
4. Dirava bona Israela besena edia turana karana ena taravatu be dahaka dahaka, bona Israela taudia ese unai taravatu idia badinaia, a?
4 Mani oi laloa danu, Dirava ena gwauhamata taudia bamona idia noho be mai ena taravatu. Bema Dirava ena hereva idia kamonai henia bona ena Taravatu gwauhamatana idia badinaia namonamo, unai neganai sibona idia be ena “bese korikori” taudia. Madi, Israela taudia be unai taravatu idia badinaia lasi. Aposetolo taudia edia negai, Dirava ia siaia Mesiana idia dadaraia murinai, edia hahenamo idia haboioa. Unai nega amo, Iehova be “Israela ena Dirava” lasi. Bona Israela taudia korikoridia be Dirava ena gwauhamata besena lasi.—Mataio 23:23 itaia.
“Dirava Ena Israela” Ena Gwauhamata
5 Unai ena anina be Iehova be mai ena gwauhamata besena lasi, a? Lasi. Iesu Keriso ese salamo ia torea tauna ena hereva ia gwauraia neganai, ia peroveta: “Inai Buka Helaga ena revareva umui duahia lasi, a? ‘Ruma haginia taudia ese idia ura henia lasi nadi be, ruma ena kona nadi ia halaoa vadaeni. Inai be Lohiabada ena kara. Ita itaia, ita hoa.’ Unai dainai umui lau hamaoroa, Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.”—Mataio 21:42, 43.
5, 6. (a) Iesu ena peroveta herevana Mataio 21:42, 43 ai, ena anina be dahaka? (b) Edena nega ai bona edena dala ai “Dirava ena Israela” ia vara?
6 Ia hedinarai “ena huahua do ia havaraia besena” be Keristani kongregesen. Iesu be tanobada dekenai ia noho neganai, ia ese unai kongregesen taudia ginigunadia ai do idia lao taudia ia abia hidi. To Pentekoste 33 C.E. ai, Iehova Dirava ese unai taudia ginigunadia 120 latanai ena lauma helaga ia bubua karana amo, unai Keristani kongregesen ia havaraia. (Kara 1:15; 2:1-4) Aposetolo Petero be gabeai ia torea hegeregerena, unai kongregesen matamatana be “ia abia hidi besena, pavapava bona hahelaga taudia, bese helagana, iena orea korikori taudia” ai idia lao. Dahaka totona idia ia abia hidi? ‘Dibura amo idia ia boiria bena ena diari hereadaena lalonai idia ia hakaua vareai tauna ena kara namodia do idia gwauraia hedinarai’ totona. (1 Petero 2:9, NW) Keriso murinai idia raka taudia, Dirava ese ena lauma amo ia horoa taudia unai, be gwauhamata besena, “Dirava ena Israela,” ai idia lao vadaeni.—Galatia 6:16.
7 Ena be bese helagana taudia be “iena orea korikori taudia,” to ta ese ia guidia lasi. Idia moalelaia ura kwalimu ese gwauhamata besena, Israela, ena ura kwalimu ia hereaia. Iesu be unai bese matamatana ai idia lao taudia dekenai ia gwauhamata: “Hereva momokani be do umui diba, bona hereva momokani ese umui do ia ruhaia.” (Ioane 8:32) Aposetolo Paulo ese ia hahedinaraia Keristani taudia be Taravatu gwauhamatana ena hahegani idauidau amo idia ruhaia vadaeni. Unai hegeregerena ena Galatia tadikaka ia hagoadadia, ia gwau: “Keriso ese Taravatu ena metau bona ena guia dekena amo ita ia ruhaia vadaeni. Ura kwalimu ita abia vadaeni. Inai ura kwalimu do umui dogoatao noho, tau haida ese umui do idia guia lou garina.”—Galatia 5:1.
8. Edena dala ai Keristani dalana henunai ia noho ura kwalimu ese Taravatu gwauhamatana lalonai idia abia ura kwalimu ia hereaia?
8 Israela gunana ese ena gwauhamata ia badinaia lasi, to ema bona hari Dirava ena Israela ese ena gwauhamata ena taravatu idauidau ia badinaia namonamo. Unai ita hoalaia lasi, badina Dirava ena Israela taudia ese edia ura hegeregerena kamonai karana idia abia hidi. Israela gunana taudia be edia vara amo gwauhamata lalonai idia vareai, to Dirava ena Israela taudia be unai bamona gwauhamata henunai idia noho dalana idia abia hidi. Keristani dala be Iuda taudia edia Taravatu gwauhamatana amo ia idau, badina unai Taravatu ese gwauhamata henunai taunimanima ia abidia vareai, idia dekenai abia hidi ena ura kwalimu be lasi.
9, 10. (a) Edena dala ai Ieremia ia hahedinaraia gwauhamata dalana be do ia idau? (b) Dahaka dainai oi gwau diba hari inai negai gwauhamata Keristani taudia ibounai be Dirava ena Israela taudia lasi?
9 Peroveta tauna Ieremia ia gwau gwauhamata be do ia idau, ia torea: “Lohiabada ia gwau, ‘Nega be ia mai noho, lau ese Israela bona Iuda danu gwauhamata taravatu matamatana do lau karaia. Inai gwauhamata be edia sene taudia danu lau karaia gwauhamata taravatuna bamona lasi, unai be Aigupito dekena amo lauegu imana dekena amo idia lau hakaua neganai. Unai neganai lau be adavana bamona idia dekenai, to idia ese unai gwauhamata idia hamakohia. To gwauhamata taravatu matamatana, Israela taudia danu do lau karaia gauna be inai bamona: Lau ese lauegu taravatu edia lalodia dekenai do lau atoa, bona edia kudouna dekenai do lau torea. Lau be edia Dirava do lau lao, bona idia be lauegu bese do idia lao.’ ”—Ieremia 31:31-33.
10 Dirava ena taravatu be Dirava ena Israela taudia “edia lalodia dekenai” ia noho, ia be “edia kudouna dekenai” ia torea bamona, unai dainai idia ese edia gwauhamata idia hamomokania. Edia ura ena goada ese Israela gunana taudia, abia hidi karana dainai lasi to vara dainai gwauhamata henunai idia noho taudia, edia ura ia hanaia. Hari inai negai, Dirava ena Israela ese Dirava ena ura karaia totona ia hahedinaraia ura goadana, be ia ida Dirava idia tomadiho henia taudia milioni ima mai kahana tanobada hegegemadai ese idia hahedinaraia danu. Idia danu be Iehova Dirava dekenai edia mauri idia gwauhamatalaia, iena ura idia karaia totona. Ena be idia ese Dirava ena Israela taudia idia abia guba helarona idia abia lasi, to idia moale badina Dirava ena guba Basileiana henunai tanobada dekenai mauri hanaihanai do idia abia. Idia ese lauma Israela idia laloa bada dainai, ena orena taudia edia gaukara, ‘dibura amo idia ia boiria bena ena diari hereadaena lalonai idia ia hakaua vareai tauna ena kara namodia do idia gwauraia hedinarai’ gaukarana, idia durua.
Dirava Ia Henia Ura Kwalimu Idia Gaukaralaia Namonamo
11. Dirava ese taunimanima ia havaraia neganai, dahaka gwaumaoro ia henia, bona edena dala ai unai idia gaukaralaia be namo?
11 Dirava ese taunimanima ia havaraia neganai, ia ura edia ura kwalimu do idia laloa bada. Gwaumaoro ia henia sibodia edia ura idia abia hidi totona. Taunimanima ginigunadia ruaosi ese unai ura kwalimu idia gaukaralaia. To, aonega bona lalokau lasi dalanai idia gaukaralaia dainai, idia abia hidi dalana ese idia bona edia natudia dekenai dika ia havaraia. To ia hedinarai goevagoeva, Iehova ese ia havaraia aonega taudia ia doria lasi, dala ta do idia badinaia, bema edia ura korikoridia be idia idau. Bona, badina Dirava ese “mai moale danu ia henia tauna . . . ia lalokau henia,” ta ese lalokau dainai, mai moale ida ia ura dainai, bona abia hidi karana ena ura kwalimu dainai ia karaia gwauhamatana sibona ia abia dae. (2 Korinto 9:7) Ma gwauhamata ta ia abia dae lasi.
12 Iehova ena Witness taudia ese unai idia lalo-pararalaia dainai, Dirava dekenai sibona edia mauri idia gwauhamatalaia, to unai gwauhamata karaia totona taunimanima ta, sibona edia natudia danu, idia doria lasi. Dubu oreadia momo amo Witness taudia idia idau, edia natudia be idia beibi neganai idia bapatisoa lasi. Beibi bapatisoa karana be hegeregere gwauhamata totona idia ita doria, ena be idia sibona ese unai idia abia hidi lasi. Baibel ia hahedinaraia dalana be tau matamata Timoteo ese ia badinaia dalana. Ia be tau badana vadaeni neganai, aposetolo Paulo be ia dekenai ia gwau: “Oi ese oi abia dae, bona oi abidadama henia hereva momokani, be do oi badinaia namonamo noho. Inai hereva momokani oi dekenai ai hadibaia taudia ibounai oi diba noho, ani? Bona inai danu oi diba noho, oi be mero maragi neganai, Buka Helagadia dekenai oi manada momokani. Inai Buka Helagadia ese oi dekenai aonega idia henia noho diba, ela bona hamauria do oi davaria, Keriso Iesu oi abidadama henia dainai.”—2 Timoteo 3:14, 15.
12, 13. Edena dala ai Timoteo ena haheitalai be natudia hadibaia dalana maorona ia hahedinaraia, bona ena haheitalai dainai matamata taudia momo ese dahaka idia karaia?
13 Namona be oi lalo-parara Timoteo be revareva helagadia ia diba, badina ia be mero maragi negana amo idia hadibaia. Ena sinana bona ena tubuna hahine ese idia hadibaia dainai—idia doria dainai lasi—Keristani hahediba herevadia ia abidadama henia. (2 Timoteo 1:5) Unai bamona idia karaia dainai, Timoteo ia itaia Keriso murinai do ia raka be aonega dalana, bena ia sibona ese Keristani gwauhamatana ia abia hidi. Hari iseda negai, uhau bona ulato tausen momo, edia tama sina be Iehova ena Witness taudia, be unai haheitalai idia badinaia. (Salamo 110:3, NW) Haida ese idia badinaia lasi. Unai be ta sibona ena ura hegeregerena ia abia hidi diba gauna.
Daika Ena Hesiai Gaukara Oi Abia Hidi?
14 Taunimanima ta lasi ese ura kwalimu momokanina ia abia. Iboudiai edia ura kwalimu be mai ena hetoana, badina taravatu haida, hegeregere gravity taravatuna, ese iboudiai idia guia, bona ita utua neganai dika do ita davaria. Lauma dalanai danu, ta ena ura kwalimu be mai ena hetoana. Paulo ia gwau: “Umui diba lasi, a? Bema umui ese emui tauanina umui henia tau ta dekenai, bona iena hereva umui kamonai henia neganai, umui be iena hesiai gaukara umui karaia noho taudia. Vadaeni, bema umui be kara dika ena hesiai gaukara taudia neganai, umui be mase do umui davaria. To bema umui be Dirava umui kamonai henia neganai, Dirava ese umui do ia gwauraia maoromaoro.”—Roma 6:16.
15. (a) Taunimanima be edena bamona ta ena hesiai tauna ai idia lao karana idia laloa, to idia momo be dahaka idia karaia? (b) Dahaka henanadai maorodia be ita sibona ita henia be namo?
15 Taunimanima momo idia ura lasi momokani tau ta ena hesiai taudia ai idia lao. To, hari inai tanobada dekenai, nega momo ma haida ese dala hehunidia amo taunimanima idia biagudia bona veridia, bena dokonai ena be idia ura lasi to unai taudia edia ura hegeregerena idia kara. Hegeregere, hoihoi gaudia idia hahedinaraia bisinesi bona moale karadia bisinesi ese dala idia haginia taunimanima idia badinaia totona, unai amo iboudiai edia kara do ia tamona. Politikol bona tomadiho oreadia ese taunimanima idia veria edia lalohadai bona edia tahua gaudia idia durua totona, bona nega momo unai orea edia lalohadai namodia amo idia veria lasi, to taunimanima edia lalo-tamona eiava ma haida badinaia lalohadaidia idia hagoadaia karana amo idia veridia. Paulo ia gwau ‘ita be edia hereva ita kamonai henia taudia edia hesiai taudia’ dainai, namona be ita ta ta sibona ita henanadai, ‘Lau be daika ena hesiai tauna? Daika ena siahu be bada egu lalohadai bona mauri dekenai? Tomadiho gunalaia taudia, politikol gunalaia taudia, bisinesi taudia, eiava moale karadia hahedinaraia taudia, a? Daika ena hereva lau kamonai henia—Dirava ena eiava taunimanima edia?’
16. Edena dala ai Keristani taudia be Dirava ena hesiai taudia, bona unai hesiai gaukara ita laloa dalana maorona be dahaka?
16 Keristani taudia idia laloa lasi Dirava idia kamonai henia ese edia ura kwalimu ia hadikaia. Mai edia moale ida edia ura kwalimu idia gaukaralaia dalana be edia Haheitalai Tauna, Iesu Keriso, ia gaukaralaia dalana bamona, sibona edia ura bona idia atoa guna gaudia be idia haidaua idia be Dirava ena ura ida idia hegeregere. (Ioane 5:30; 6:38) Keriso be kongregesen ena Kwarana dainai, ia henunai sibodia idia atoa, bona unai amo “Keriso ena laloa” idia abia. (1 Korinto 2:14-16; Kolose 1:15-18) Unai be hegeregere hahine ta ese ena lalokau tauna ia adavaia bona ia danu mai ena moale ida ia gaukara hebou. Momokani, Baibel ese horoa Keristani taudia edia orea ia gwauraia Keriso ena rami hebou maoheni kekenina.—2 Korinto 11:2; Efeso 5:23, 24; Apokalupo 19:7, 8.
17. Iehova ena Witness taudia ibounai be dahaka idia abia hidi?
17 Iehova ena Witness taudia ta ta, herevana guba helarona eiava tanobada helarona idia abia, be sibodia edia ura hegeregerena Dirava dekenai edia mauri idia gwauhamatalaia, ena ura idia karaia bona do idia badinaia ia be edia Lohia dainai. Witness taudia ta ta dekenai, gwauhamata be idia sibodia ese idia abia hidi gauna, taunimanima edia hesiai taudia lasi to Dirava ena hesiai taudia ai idia lao totona. Unai be aposetolo Paulo ena sisiba hegeregerena, ia gwau: “Dirava ese umui ia hoia, mai davana, unai dainai taunimanima edia hesiai mai guia taudia umui lao lasi.”—1 Korinto 7:23.
Iseda Namo Habadaia Dalana Ita Dibaia
18. Edena nega ai Witness tauna ta ai ia lao gwauraia tauna ia hegeregere bapatiso do ia abia?
18 Ta be Iehova ena Witness tauna ai ia lao totona, gau badana be Baibel ena taravatu ia badinaia guna. Elda taudia idia tahua namonamo Witness tauna ta ai ia ura ia lao tauna ese Keristani gwauhamatana ena anina ia lalo-pararalaia momokani, eiava. Ia ura momokani Iehova ena Witness tauna ta ai do ia lao, a? Ia ura unai ena anina hegeregerena do ia noho, a? Bema lasi, ia hegeregere lasi bapatiso do ia abia.
19 To, bema ta ese unai taravatu ibounai ia badinaia bona sibona ena ura hegeregerena Dirava bona ena lauma amo ia havaraia Herevana edia siahu henunai do ia noho dalana ia abia hidi, badina be dahaka haida ese ia idia gwauraia dika? Ta be taunimanima edia siahu henunai ia noho be hegeregere to Dirava ena siahu henunai ia noho be hegeregere lasi, a? Eiava unai dala amo namo do ia abia lasi, a? Iehova ena Witness taudia be unai bamona idia laloa lasi. Mai edia kudouna ibounai ida Dirava ena hereva, Isaia ia torea, be idia abia dae, ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.”—Isaia 48:17.
20. Edena dala idauidau ai Baibel ena hereva momokani ese taunimanima ia ruhaia?
20 Baibel ena hereva momokanina ese tomadiho hahediba hereva koikoidia abia dae karana amo taunimanima ia ruhaia, hegeregere hel lahina ena hisihisi hanaihanai herevana amo. (Hadibaia Tauna 9:5, 10) To, ia ese mase taudia totona ia noho helaro momokanina—Iesu ena mauri davalaia boubouna dainai do ia vara toreisi lou—ena moale amo edia kudouna ia hahonua. (Mataio 20:28; Kara 24:15; Roma 6:23) Baibel ena hereva momokani ese idia guguru lasi politikol gwauhamatadia tabekau henia karana dainai ia vara lalohisihisi amo taunimanima ia ruhaia. To, hereva momokani dainai idia moale momokani, badina idia diba Iehova ena Basileia be guba dekenai ia lohia vadaeni bona nega sisina murinai tanobada ibounai do ia lohiaia. Baibel ena hereva momokani ese tauanina ena ura dikadia amo taunimanima ia ruhaia, unai kara ese Dirava ena ladana idia hadikaia bona idia dainai taunimanima edia turana karana idia dika, idia gorere, bona idia do matamata neganai idia mase. Vadaeni ita gwau diba, Dirava ena hesiai taudia ai ita lao ena namo be bada herea, taunimanima hesiai henia bamona lasi. Oibe, Dirava dekenai iseda mauri ita gwauhamatalaia amo namo be “hari inai mauri neganai” bona “vaira neganai, mauri hanaihanai” do ita abia.—Mareko 10:29, 30.
21. Iehova ena Witness taudia ese Dirava dekenai mauri gwauhamatalaia karana be edena bamona idia laloa, bona edia ura be dahaka?
21 Hari inai negai, Iehova ena Witness taudia be gwauhamata besena lalonai idia vara lasi, idaunegai Israela taudia idia vara bamona. Witness taudia be gwauhamata Keristani taudia edia kongregesen lalonai idia noho. Bapatiso Witness taudia ta ta be abia hidi karana ena ura kwalimu idia gaukaralaia bena Dirava dekenai edia mauri idia gwauhamatalaia amo, kongregesen lalonai idia vareai. Momokani, Iehova ena Witness taudia idia laloa, gwauhamata amo Dirava tura henia karana namona ia vara bona mai edia ura ida ena hesiai gaukara idia karaia be ena kahana badana. Mai edia kudouna ibounai ida idia ura ena turana namodia ai idia noho, bona Iesu Keriso ese idia ia ruhaia dainai idia abia ura kwalimu do idia dogoatao noho ela bona hanaihanai.
Edena Bamona Do Oi Haere?
◻ Dirava ese ena “bese korikori” ai Israela taudia ia abia hidi neganai, dahaka dainai unai be taunimanima edia toana laloa karana lasi?
◻ Dahaka dainai oi gwau diba Keristani gwauhamatana ese ura kwalimu ia hadikaia lasi?
◻ Iehova Dirava dekenai iseda mauri ita gwauhamatalaia dainai, dahaka namo do ita abia?
◻ Dahaka dainai Iehova hesiai henia karana ese taunimanima hesiai henia karana ia hereaia?
7. Dirava ena Israela taudia be dahaka idia moalelaia, bona unai dainai dahaka do idia karaia lasi be namo?
14. Roma 6:16 ese edena dala ai ura kwalimu momokanina ia herevalaia?
19. Ta be Dirava ena gwauhamata hesiai tauna ena mauri ia abia hidi neganai, dahaka dainai badina ta be lasi haida ese ia idia gwauraia dika?
[Picture on page 15]
Idaunegai Israela ai, vara neganai Dirava ena gwauhamata taudia ai idia lao
[Picture on page 16]
Keristani gwauhamatana be idia ta ta idia abia hidi gauna