Siti amo Ia Lao Taunimanima Momo Lasi Gabuna—Taunimanima Dekenai Umui Lao

MEDU, sinou, aisi nadi, uda sisia, ororo laiona, eiava dagedage taudia edia gabu ese edia goada ia hamanokaia lasi. Idia ese edia hosi ida kilomita 3,000 idia laolao haraga, ava sibona ia tubu taora, ranu ia aru goadagoada sinavai, bona koura badadia idia hanaia, West Kone kahana dekenai revareva do idia abia lao haraga totona. Idia be daidia?

Idia be hosi guia taudia, gari lasi pony express uhau.a Dahaka ese unai tau matamatadia ia doria unai bamona goada idia hahedinaraia totona? Reana idia ura henia badina ia be gaukara aukana, bona taunimanima dekenai revareva idia abia lao idia moalelaia. Hoa gauna be, hosi idia guia taudia ta ta be edia anina bada revarevadia edia baege lalonai Baibel idia abia loaloa danu.

Lagani 100 mai kahana murinai, Canada dekenai Basileia harorolaia taudia 113,000 mai kahana ese edia goada bona ura ibounai ida idia gaukara noho. Dahaka ese ia doridia? Edia lalokau Dirava bona edia dekena taudia totona ese ia doridia Basileia ena hereva momokani be buka bona magasin amo bona edia uduna amo idia harorolaia. Unai mauri ia henia hereva momokanina ena anina ese pony express ia abia lao revarevana ena anina ia hanaia. Oibe, ia be Basileia ena sivarai, mai anina bada gauna, Buka Helaga, ese ia herevalaia gauna. Unai buka be pony express uhau ese edia baege lalonai idia abia loaloa.​—⁠Aonega Herevadia 2:​21, 22; Isaia 2:​2-4; 61:2; Mataio 22:​37-39; 24:⁠14.

Iehova Bona Taunimanima Lalokau Henia Karana ese Ia Doridia

Iehova ena Witness taudia idia ura dikadika taunimanima dekenai Basileia idia kikilaia. Idia be siti ena ruma latadia lalonai, sinou gabudia, peleini diho gabudia, dala dekenai, bona taunimanima idia noho gabudia ma haida dekenai unai idia karaia, bona telefon danu idia gaukaralaia. Dahaka dainai gabu idauidau ai idia haroro?

Taunimanima edia noho dalana bona edia moni gaukara dainai, edia ruma dekenai davaridia be auka. Nega momo, tau bona hahine idia gaukara ruma bese durua gaudia abia totona, unai dainai lauma gaudia idia laloa momo lasi. Inai hekwarahi bona lalo-metau negana lalonai, edia kudouna do ia hamoalea helarona ena sivarai idia kamonai be namo. Iehova ena Witness taudia be mai moale ida unai idia karaia. Aonega bona manau dalanai, idia ese dala idauidau idia gaukaralaia taunimanima idauidau dekenai sivarai namona be lalona veria dalana ai idia laohaia.​—⁠1 Timoteo 2:​3, 4.

Gado Ma Haida Dekenai: Iesu be iena hahediba taudia ia oda henia do ‘idia lao hahediba taudia idia karaia’ neganai, dala ia kehoa gado idauidau taudia dekenai helaro ena sivarai idia harorolaia gaukara lalonai haroro daladia idia abia hidi bona lalo-goada idia hahedinaraia totona. (Mataio 28:19) Tano ma haida dekenai bamona, Canada be mauri daladia idauidau bona gado idauidau gabuna ai ia lao, bona unai taudia haroro henidia totona Basileia harorolaia taudia momo be gado matamatadia idia dibaia.

Hegeregere, Edmonton, Alberta dekenai, ful-taim hesiai tauna mai ena adavana danu idia itaia edia siti dekenai Mandarin Chinese idia veria taudia idia durua be namo. To, gau ginigunana be idia ruaosi ese unai gado do idia dibaia, unai dainai idia ese iunivesiti stiuden ta, Mandarin gado ia diba tau matamata idia hereva henia. Ia gwau ia ese unai gado ia hadibadia diba bona nega tamona ai idia amo Baibel ena hereva momokani do ia dibaia. Unai be dala hereadaena! Hua 24 lalonai unai Basileia harorolaia taudia goadadia rua be idia hegeregere Mandarin gado dekenai hadibaia gaukara idia karaia totona. Bona unai nega tamona ai, edia tisa/stiuden tauna be ia hegeregere Keristani bapatiso ia abia totona.

Siti haida dekenai Basileia harorolaia taudia be lalokau dainai idia ese Poland, Russia, bona Vietnam gado idia dibaia bona unai bamona ekspiriens idia davaria noho.

Dala Dekenai: Lagani 1860 ia lao 1861 lalonai, sibodia idia gaukara pony express uhau bamodia, British Columbia dekenai idia gaukara Basileia harorolaia taudia haida be sibodia idia gaukara. Edia moni gaukara lalonai nega badana idia gaukaralaia uda gabudia amo au idia huaia taraka badadia be temeba utua gabuna dekenai idia taria lao totona. Unai idia karaia lalonai idia be taraka idia taria taudia ma haida idia hereva henidia CB (citizens band) reidio amo, ta ta dekenai motuka edia heau dalana bona dala dekenai hekwakwanai gaudia idia hadibaia.

Mai aonega ida, unai Basileia harorolaia taudia ese edia CB reidio be dala idauna ai idia gaukaralaia. CB reidio dekenai vanegai idia vara gaudia idia kikilaia amo herevahereva dalana idia hamatamaia. Bena mai aonega ida Baibel ena siri idia gwauraia. Nega ta, taraka taria tauna ta ese Baibel ena helaro mase taudia totona ia abia dae. (Ioane 5:​28, 29; Kara 24:15) Aksiden dekenai ena taraka taria turana ta ena mase ese ia hagaria bada. Mai moale ida Baibel stadi ia abia dae bona hari oi kamonai diba ena gaukara tamona taudia bona ena turadia dekenai sivarai namona ia harorolaia. Ma danu iena moale ia bada, badina iena mase turana ena adavana ida Baibel stadi idia hamatamaia. Unai be hahenamo namo herea, mauri ia havaraia hereva momokanina be unai dala idauna amo idia harorolaia dainai!

Peleini Amo: Mai anina bada hereva momokanina be haida dekenai idia laohaia gaukarana lalonai, Basileia idia harorolaia goadagoada taudia be taunimanima idia noho gabudia dekenai idia lao, peleini maragidia amo ‘hanua dekenai idia vareai.’ (Mataio 10:​11, 12) Guna, peleini rua dekenai idia guia taudia be idia ura dikadika sivarai namona idia harorolaia dainai, sibodia edia moni amo davana idia henia bona taunimanima momo idia noho lasi sinou gabuna badana dekenai idia lao. Peleini ta ta dekenai idia guia grup be kilomita 3,000 idia roho bona hanua idauidau 14 dekenai idia diho, kilomita 250 bamona Arctic Circle amo. Unai hesiku lasi haroro taudia be unai gabu daudaudia dekenai sibodia idia noho taudia davaridia totona dina 7 ibounai idia gaukara.

Edia gaukara ese gau namona ta ia havaraia, a? Baibel ena sivarai ese unai hanua taudia ia durua bada dalana mani oi laloa. Idia vadivadi haroro taudia ese Iehova ena gwauhamata, nega vaira ai tanobada dekenai paradaiso do ia havaraia sivaraina, idia gwauraia neganai, lauma dalanai unai taudia idia durua. (Mataio 5:⁠3) Unai sivarai idia harorolaia taudia be unai gabu idia rakatania murinai, kudou-maoro taudia unai hanua lalodiai ese idia abia Baibel bona Baibel stadi durua gaudia 542 bona magasin 3,000 idia duahia diba.​—⁠Kara 12:24 itaia.

Telefon Amo: Siti dekenai idia noho taudia tausen momo be mai edia sekuriti dala aukadia matamata ruma latadia dekenai idia noho. To, Basileia harorolaia goadagoada taudia be mai lalo-goada bona aonega ida idia gaukara. Unai taudia idia noho gabuna dekenai edena bamona idia lao diba? Ena be idia ura taunimanima idia vaira henidia bona idia kiki, to nega momo mai kwalimu ida foloa ginigunana dekenai ia noho herevahereva gauna amo taunimanima idia hereva henidia. Bema unai idia karaia diba lasi, telefon idia gaukaralaia.

Daba ta hahine ta ese ena telefon ia haere. Hanamoa hereva namona murinai, Witness taihu ese ia nanadaia bema ia laloa taunimanima be gari lasi ida hanuaboi ai dala dekenai do idia loaloa diba negana ta do ia vara. Baibel siri amo ia hagoadaia vaira negana ai tanobada be maino amo do ia honu. (Salamo 37:​10, 11; Daniela 2:44; Mataio 6:​9, 10) Ia abia dae vaira pura ai do ia rini henia lou bona dahaka dainai Dirava ena gwauhamata do ita abia dae diba do idia kikilaia. Hua tamona lalonai telefon amo Baibel idia stadilaia, Witness taihu ese Baibel stadi bukana ta amo paragraf ia duahia bona henanadai ia henia murinai, unai hahine ese Basileia harorolaia taihu ia hanamoa badina pura ta ta ai kiki herevana idauidau momo ia gaukaralaia. Unai be nega namona ia dekenai stadi bukana do ia herevalaia bona sibona ena kopi ia hariharilaia. Idia ruaosi idia hedavari totona nega idia hegaegaelaia. Momokani, Iehova ena Witness taudia be edia lalokau taunimanima totona idia hahedinaraia, bona taunimanima be idia kamonai noho, badina idia itaia Iehova be unai Keristani haroro taudia ida.​—⁠1 Korinto 14:⁠25 itaia.

Buka Bona Magasin Amo: Quebec, French gado idia veria momo provinsi dekenai, Basileia harorolaia taudia be taunimanima idia noho gabudia dekenai idia lao danu. Loaloa hesiai tauna ta ia gwau: “Lagani momo lalonai tadikaka idia laloa edia gaukara do ia bada ia lao lasi badina dubu ese idia dagedage henidia bada. To tadikaka edia hesiku lasi gaukara dainai bona hanaihanai idia giroa lou giroa lou dainai, Baibel, guna taunimanima haida sibona idia duahia bukana, be hari ruma momo dekenai oi davaria diba.”

Quebec dekenai idia noho taudia idauidau, medikol gaukara taudia danu, be haroro taudia matamatadia ai idia lao ese moale bada ia havaraia. Doketa ta ena sivarai hegeregerena. Iena adavana, ia be Basileia harorolaia hahinena danu, ese nega momo ia dekenai Baibel ena helaro ia kikilaia. Kongregesen elda ta ese unai doketa ia boiria kongregesen ena hebou ta dekenai, unai negai How Can Blood Save Your Life? buklet idia stadilaia. Ia mai bona ia haere danu. Hebou be ia namo herea bona lauma dalanai dobu gaudia idia stadilaia dainai ia hoa bada, bona ia ese sibona ena stadi ia abia dae. Hari ia danu be Basileia harorolaia tauna ta.

Magasin hariharilaia namonamo karana be mai anina bada taunimanima edia lalona veria Baibel idia diba totona. Ita diba lasi edena hereva ese tau ta do ia veria mai hereva momokani dekenai. Basileia harorolaia tauna ta ese iena dekena hahinena dekenai Awake! magasin ta ia hariharilaia. Unai hahine ia ura lasi sivarai namona ia kamonai to ia be manumanu stadilaia karana ia ura dikadika. November 22, 1992 ena Awake! dekenai ia noho herevana “Chagas’ Disease​—⁠A Kiss of Death” ena laulau ese ena lalona ia veria. Ia duahia herevana ia moalelaia dainai, magasin ma haida totona ia noinoi. Baibel stadi idia hamatamaia, bona hua 6 lalonai ia be ma haida dekenai ia haroro.

Taunimanima Idia Loaloa Gabudia Ai: Canada ena taravatu ese taunimanima idia loaloa gabudia dekenai haroro totona gwaumaoro ia henia, hegeregere peleini idia diho gabudia dekenai. Halifax International Airport dekenai, Basileia harorolaia taudia be aonega dalanai loaloa taudia idia hereva henidia. Henanadai namodia idia gaukaralaia Baibel idia herevalaia totona. Idia be mai edia Baibel maragina, magasin bona buka dainai, idia hereva henia taudia be lauma dalanai idia durua diba. Doketa taudia, saiens taudia, loea taudia, peleini taria tauna, haroro taudia, pulisi taudia, taksi taria taudia, ensinia taudia, tisa taudia, ami taudia, tano ma ta amo idia mai politikol taudia be unai dala amo Basileia ena sivarai idia kamonai taudia haida, bona gabu daudau dekenai hereva momokani ena uhe idia abia lao bona idia tubu.​—⁠Kolose 1:⁠6.

Daba maragi ta peleini diho gabuna ai, tau ta ese Gima Kohorona bona Awake! ia abia. Bena metairametaira ia gwau: “O, lasi, Iehova ena Witness taudia lasi!” Dahaka dainai unai bamona ia hereva? Unai tauna be Muslim tauna goadana bona hari sibona peleini diho gabuna ena dubu maragina dekenai ia guriguri. Ia ese Dirava ia noia aonega, lalo-parara bona hereva momokani ia henia totona. Ia laloa Iehova ena Witness taudia be iena guriguri ena haere dainai ia hoa bada.

Oibe, Canada dekenai gau ta ese Basileia harorolaia goadagoada taudia edia dala ia koua lasi mai dava bada Basileia ena sivarai idia harorolaia totona. Gado idaudia, dala dikadia, gabu daudaudia, siti lalonai sekuriti aukadia ruma latadia ese idia koudia lasi. Idia ura dikadika Dirava ena mauri sivaraina be hereva momokani idia tahua kudou-maoro taudia dekenai idia abia lao. Edia tadikaka tanobada hegegemadai ida, idia ese sibodia edia ura idia tahua lasi to Iesu ena oda, ‘hahediba taudia do idia karaia’ gaukarana, idia badinaia.​—⁠Mataio 28:⁠19.

[Footnote]

[Box on page 27]

Kwalimu Basileia Harorolaia Taudia ese Telefon Idia Gaukaralaia

Haida idia gwau: “Namo, egu ladana be [emu ladana oi gwauraia]. Lau be emu gabu dekenai idia noho taudia dekenai maino be edena bamona ita abia diba lau kikilaia. Oi laloa tanobada hegegemadai maino do ia vara diba, a? [Ena haere oi naria.] Oi gari lasi, lau be tahua gaukara ta lau karaia lasi o gau ta lau hoihoilaia lasi. To, lau be Baibel amo Dirava ese maino do ia havaraia momokani ena sivarai lau kikilaia noho.” Bena Baibel ena hereva ta oi kikilaia diba.

Ma haida be idia gwau: “Adorahi namona. Lauegu ladana be [emu ladana oi gwauraia]. Lau be volantia gaukara tauna emu gabu dekenai. Lau be emu gabu dekenai idia noho taudia ta ta edia lalohadai lau tahua. Iseda gabu dekenai dagedage bona raskol karadia idia bada idia lao dainai momo be sibodia edia noho namo idia lalo-hekwarahilaia. Oi be unai oi lalo-hekwarahilaia danu, a? [Ena haere oi naria.] Oi laloa nega ta do ia mai bona tanobada hegegemadai taunimanima ibounai be do idia gari lasi, a?” Ena haere oi naria, bena Baibel ena hereva oi kikilaia.