Iehova Ena Orea Oi Laloa Bada, A?
“[Iehova] ia gwau, ‘Guba be lauegu terona, bona tanobada be lauegu aena atoa gauna.’ ”—ISAIA 66:1.
1, 2. (a) Edena gaudia, oi itaia diba gaudia unai, ese idia hamomokania Iehova be mai ena orea? (b) Iehova be edeseniai ia noho?
OI ABIA dae Iehova be mai ena orea ta, a? Bema oibe, dahaka dainai unai oi abia dae? Reana oi haere: ‘Aiemai Kingdom Hall ia noho. Aiemai kongregesen ia heau namonamo bona ia be mai ena elda oreana. Idia abia hidi sekit naria tauna ese hanaihanai ai ia vadivadi henia. Idia hegaegaelaia sekit bona distrik hebouhebou dekenai ai lao. Iseda tano ai, Watch Tower Society ena brens opesi ia noho. Momokani, unai ibounai bona ma gau momo ese idia hamomokania Iehova be mai ena orea bona ia gaukara namonamo.’
2 Unai gaudia ese idia hamomokania orea ta ia noho. To bema ita itaia bona laloa bada gaudia ibounai be tanobada dekenai idia noho, Iehova ena orea ibounai ita do lalo-pararalaia lasi. Iehova be Isaia ia hamaoroa tanobada be Iena aena atoa gauna sibona, to guba be Iena terona. (Isaia 66:1) Iehova ese edena “guba” ia herevalaia? Hodahoda noho gabuna, a? Dina, hisiu, bona planeti idia noho gabuna, a? Eiava mauri gaudia idaudia edia noho gabuna? Isaia ese Iehova ena “helaga bona hairai” gabuna ia herevalaia, bona salamo torea tauna ia gwau unai guba be ena “helai gabuna.” Unai dainai, Isaia 66:1 ena hereva “guba” ese ita itaia diba lasi lauma gabuna ia gwauraia, bona unuseniai Iehova be atai herea.—Isaia 63:15; Salamo 33:13, 14.
3. Edena dala ai ita ese daradara ita koua diba?
3 Unai dainai, bema momokani Iehova ena orea ita ura ita lalo-pararalaia bona ita laloa bada, namona be guba ita laloa. Bona taunimanima haida dekenai unai be hekwakwanai ta. Iehova ena guba oreana ita itaia diba lasi dainai, edena bamona ita diba ia be momokani ia noho? Reana haida idia daradara bona idia gwau, ‘Edena bamona unai ita hamomokania diba?’ Edena dala ai abidadama ese daradara ia koua? Dala badadia rua be Dirava ena Hereva ita stadilaia goadagoada bona hanaihanai Keristani hebou dekenai ita lao bona hebou dekenai idia karaia karadia ibounai ita karaia. Bena hereva momokani ena diari ese iseda daradara ia kokia. Dirava ena hesiai taudia ma haida idia daradara danu. Suria ena king ese Israela ia tuari henia neganai, Elisaia ena hesiai tauna ena kara mani ita laloa.—Ioane 20:24-29; Iamesi 1:5-8 itaia.
Guba Anerudia Ia Itaia Tauna
4, 5. (a) Elisaia ena hesiai tauna ena hekwakwanai be dahaka? (b) Edena dala ai Iehova ese Elisaia ena guriguri ia haere henia?
4 Suria ena king ese hanuaboi lalonai ami badana be Dotana dekenai ia siaia lao, Elisaia idia dogoatao totona. Dabai momokani Elisaia ena hesiai tauna ia toreisi bona reana edia Middle East rumana ena guhi palakana ai hodahoda namona ia abia totona ia lao, bona ia hoa bada herea! Suria taudia edia tuari oreana mai ena hosi bona tuari kariota momo ese taoni ia hagegea, Dirava ena peroveta tauna idia dogoatao totona idia naria noho. Hesiai tauna be Elisaia dekenai ia boiboi: “Lohia e, madi ita be dika! Edena bamona do ita karaia?” Toana be Elisaia be mai lalo-hekwarahi lasi bona mai ena goada ida ia haere, ia gwau: “Oi gari lasi, badina be ita idia durua taudia be momo, to unai orea idia durua taudia be momo lasi.” Reana hesiai tauna ia daradara, ‘Edeseniai idia noho? Idia lau itaia diba lasi!’ Reana nega haida unai be iseda hekwakwanai danu—guba anerudia be iseda lalona ena matana amo ita itaia lasi, eiava ita lalo-pararalaia lasi.—2 King Taudia 6:8-16; Efeso 1:18.
5 Elisaia ia guriguri, Dirava ese ena hesiai tauna ena matana ia kehoa totona. Dahaka ia vara? Maoromaoro “[Iehova] ese unai hesiai tauna ena matana ia kehoa, ia itaia, ororo be lahi kariota dekenai idia honu, idia ese Elisaia ia noho gabuna idia hagegea noho.” (2 King Taudia 6:17) Oibe, ia ese guba anerudia ia itaia, Dirava ena hesiai tauna idia durua totona idia naria noho aneru edia tuari oreadia ia itaia. Hari ia ese Elisaia ena abidadama ena badina ia lalo-pararalaia diba.
6. Edena dala ai ita ese Iehova ena guba oreana do ita lalo-pararalaia diba?
6 Nega haida, Elisaia ena hesiai tauna hegeregerena, ita danu be gau haida ita lalo-pararalaia namonamo lasi, a? Tano haida ai, ita eiava iseda Keristani gaukara idia hadikaia diba gaudia be tauanina dalanai sibona ita laloa, a? Bema oibe, matahanai idauna ta ese iseda lalona do ia hadiaria, a? Lasi, badina Elisaia ena hesiai tauna ia abia lasi gauna ta be ita abia—matahanai momo edia sivarai idia noho bukana ta, Baibel, ita abia bona ena hereva amo guba oreana ita lalo-pararalaia diba. Unai buka, Dirava ena lauma amo ia havaraia Herevana, ese hakaua herevadia ia henia danu, iseda laloa dalana bona mauri dalana ita hamaoromaoroa totona. To, namona be ita hekwarahi, lalo-parara ita tahua bona Iehova ena gaukara daladia ita laloa bada totona. Bona unai be sibona eda stadi, guriguri, bona laloa dobu karadia amo ita karaia diba.—Roma 12:12; Filipi 4:6; 2 Timoteo 3:15-17.
Lalo-Parara Ita Abia Totona Ita Stadi
7. (a) Dahaka dainai haida ese sibona edia stadi karana idia moalelaia lasi? (b) Dahaka dainai sibona eda stadi karana ita karaia totona ita hekwarahi be mai badina?
7 Reana taunimanima momo, hegeregere sikuli lalonai stadi karana idia moalelaia lasi taudia eiava guna stadi idia karaia dalana be lasi taudia, ese sibona edia stadi karana idia moalelaia lasi. To, bema ita ura iseda lalona ena matana amo Iehova ena orea ita lalo-pararalaia bona ita laloa bada, namona be stadi karaia urana ita habadaia. Bema oi ese aniani oi hegaegaelaia lasi, aniani namona do oi moalelaia diba, a? Nanadu taudia ibounai ese oi do idia hadibaia, aniani namona hegaegaelaia gaukarana be mai ena hekwarahi. To, reana miniti 30 bamona eiava unai nega ia do abia lasi neganai ita ania haorea. To, sibona eda stadi karana amo ita abia namo be eda mauri dinadia ibounai lalonai do ita moalelaia diba. Lauma dalanai ita goada ita lao ita itaia neganai, sibona eda stadi karana ita moalelaia matamaia diba. Aposetolo Paulo be mai ena maoro ida ia gwau namona be sibona eda kara bona eda hadibaia gaukarana do ita naria namonamo bona taunimanima vairanai duahia karana ita goadalaia. Unai ita karaia totona ita hekwarahi noho, to namo do ita abia ela bona hanaihanai.—1 Timoteo 4:13-16.
8. Aonega Herevadia ese ia hahedinaraia hegeregerena, edena bamona lalohadai ita abia be namo?
8 Idaunegai aonega tauna ta ia gwau: “Egu natuna e, lau, aonega, egu hadibaia hereva do oi tahua, bona egu oda do oi laloaboio lasi. Aonega herevadia do oi kamonai, bona oiemu kudouna ese laloa kehoa do ia ura henia. Bema oi ese aonega totona oi noinoi, bona bema laloa kehoa totona oi boiboi goada, bema oi tahua, siliva do oi tahua bamona, bema oi tahua goada, kohu momo, idia hunia gaudia, do oi tahua bamona, unai neganai Lohiabada gari henia kara do oi diba, bona Dirava do oi diba.”—Aonega Herevadia 2:1-5.
9. (a) Bema ‘Dirava ita diba’ karana bona golo ita hahegeregerea, golo ena davana be edena bamona? (b) Dahaka gaudia ita gaukaralaia diba, diba maoromaoro ita abia totona?
9 Maduna be daika ena oi itaia, a? Inai hereva “oi” ia hedinarai loulou. Bona mani oi itaia ia gwau ‘oi tahua, kohu momo idia hunia gaudia, do oi tahua bamona.’ Lagani handred momo lalodiai, Bolivia, Mexico, South Africa, bona ma tano haida ai, siliva bona golo totona tano idia geia taudia mani oi laloa. Idia ese piki bona savolo idia gaukaralaia bona idia hekwarahi bada, siliva bona golo idia noho nadi idia davaria totona. Golo idia laloa bada dainai, maina badana ta ai, California, U.S.A. dekenai, tano henunai idia geia daladia edia daudau be kilomita 591, bona idia geia ela bona tano lalonai kilomita 1.5 idia diho—golo sibona idia abia totona. To, golo oi ania diba, a? Golo oi inua diba, a? Tano kaukau dekenai oi hitolo mase bona ranu mase neganai, oi do ia durua diba, a? Lasi, ena davana be koikoi bona idia atoa kava, bona intenesenel bisinesi dekenai idia vara gaudia idia hahedinaraia dina ta ta ibounai ena davana be idau. To, taunimanima be ia dainai idia mase. Vadaeni, edena bamona oi hekwarahi be namo, lauma golo oi abia, anina be ‘Dirava oi diba’ totona? Mani oi laloa, guba bona tanobada edia Siahu Ibounai Lohiabadana, ena orea, bona ena ura do oi dibaia diba! Unai diba ita abia totona, lauma dalanai piki bona savolo ita gaukaralaia diba. Unai be Baibel idia gwauraia bukadia, ita idia durua Iehova ena Hereva ita geia bona ena anina ita lalo-pararalaia totona.—Iobu 28:12-19.
Lalo-Parara Totona Ita Geia
10. Daniela ese matahanai lalonai dahaka ia itaia?
10 Lauma dalanai mani ita geia, Iehova ena guba oreana ita dibaia matamaia totona. Ita lalo-parara namonamo totona, Daniela ena matahanai mani ita laloa, ia lalonai Mauri Noho Hanaihanai Tauna be ena terona ai ia helai. Daniela ia gwau: “Lau itaia noho neganai, gabu ta ta dekenai terona idia atoa. Mauri Noho Hanaihanai Tauna ia mai, terona ta dekenai ia helai. Iena dabua be kurokuro momokani sinou bamona, bona iena huina be kurokuro momokani, mamoe huina goevana bamona. Iena terona be mai uili, bona lahi be terona ena kahana ibounai ia hururu noho. Unai Tau ena terona dekena amo be lahi ia mai, sinavai ena ranu bamona ia heau lao. [Idia tausen tausen] ese unai Tau ena hesiai gaukara idia karaia, bona milioni momo ese iena vairana dekenai idia gini. Kota badana ena nega ia ginidae, bona buka danu idia kehoa.” (Daniela 7:9, 10) Iehova ena hesiai gaukara idia karaia tausen momo be daidia? Bema New World Translation ena rau edia ihuanai idia torea siridia be “piki” bona “savolo” bamona ita gaukaralaia, Salamo 68:17 (NW) bona Heberu 1:14 dekenai ita do idia hakaua lao. Oibe, guba anerudia ese unai hesiai gaukara idia karaia!
11. Edena dala ai Daniela ena matahanai ese ita ia durua Elisaia ena hereva ita lalo-pararalaia totona?
11 Daniela ia torea sivaraina ia gwau lasi ia ese Dirava ena hahegani idia badinaia aneru iboudiai ia itaia. Reana ma milioni momo idia noho. To hari ita lalo-parara namonamo dahaka dainai Elisaia ia gwau diba: “Ita idia durua taudia be momo, to unai orea idia durua taudia be momo lasi.” Ena be Dirava idia dadaraia anerudia, demoni unai, ese Suria ena king ena tuari oreana idia durua, to Iehova ena guba anerudia edia namba ese demoni edia namba ia hanaia!—Salamo 34:7; 91:11.
12. Edena dala ai aneru dekenai oiemu diba oi habadaia diba?
12 Reana oi ura unai aneru dekenai oiemu diba oi habadaia, hegeregere oi ura oi diba Iehova idia hesiai henia neganai, edena gaukara idia karaia. Greek gado ai aneru ia gwauraia herevana amo ita itaia idia be hereva gwauraia taudia, badina unai hereva ena anina ma ta be “gwaukau tauna.” To, edia gaukara be unai sibona lasi. Edia gaukara oi diba namonamo totona oi geia be namo. Bema Insight on the Scriptures bukana oi abia, hereva ladana “Angels” oi stadilaia diba, eiava aneru idia herevalaia Gima Kohorona herevadia gunadia oi itaia diba. Dirava ena guba hesiai taudia oi dibaia namonamo diba dainai, do oi hoa, bona edia heduru be do oi laloa bada. (Apokalupo 14:6, 7) To, Dirava ena guba oreana lalonai, aneru haida ese hesiai gaukara idauna idia karaia.
Isaia Ia Itaia Gaudia
13, 14. Isaia ese matahanai lalonai dahaka ia itaia, bona unai dainai dahaka ia karaia?
13 Vadaeni, Isaia ena matahanai ena anina mani ita tahua. Karoa 6, siri 1 ia lao 7 oi duahia neganai, do oi hoa bada. Isaia ia gwau ia ese ‘Iehova ia itaia, ia be iena terona dekenai ia helai noho,’ bona ia ataiai “serapi idia gini noho.” Idia ese Iehova ena hairai idia boiboilaia, ena helaga karana idia abia isi. Unai sivarai oi duahia sibona ese oiemu kudouna do ia hamarerea. To Isaia ena hemami be dahaka? “Lau be lau boiboi, lau gwau, ‘Madi, lau be dika momokani! Badina egu uduna ia gwauraia hereva ibounai be miro bona dika, bona lau be hereva dika taudia edia huanai lau noho. To momokani lau ese King, Siahu Ibounai Lohiabada, egu matana dekenai lau itaia vadaeni.’ ” Ia itaia matahanai ia laloa bada momokani! Oi laloa bada danu, a?
14 Isaia ese unai matahanai mai ena hairaina ia itaia neganai, edena bamona ia gini diba? Ia gwau serapi ta ese ia durua bona ia gwau: “Oiemu kerere be ia ore, bona oiemu kara dika be Dirava ese ia gwauatao vadaeni.” (Isaia 6:7) Isaia ese Dirava ena hebogahisi karana ia abidadama henia diba bona Iehova ena hereva ia kamonai. Vadaeni, oi ura emu diba unai dagi bada anerudia dekenai oi habadaia, a? Unai dainai dahaka oi karaia be namo? Diba abia totona oi geia be namo. Oi gaukaralaia diba heduru gauna ta be Watch Tower Publications Index, ia gwauraia bukadia amo diba maoromaoro do oi abia.
Esekiela ese Dahaka Ia Itaia?
15. Dahaka ese ia hahedinaraia Esekiela ena matahanai be momokani?
15 Ita ese aneru ma idaudia mani ita laloa. Esekiela be Babulonia dekenai idia do guia neganai, ia ese hagoadaia matahanai ia itaia. Mani, Esekiela karoa 1 ena siri ginigunadia toi dekenai oiemu Baibel oi kehoa. Unai sivarai be edena bamona ia matamaia? ‘Nega ta, tano daudauna dekenai . . .’ be ena matamana herevana, a? Lasi, unai be ena nega idia hamomokania diba lasi gori sibona lasi. Siri 1 ia gwau: “Lagani namba 30 lalonai, hua namba 4, bona dina namba 5 dekenai lau Esekiela be Iuda hesiai mai guia danu taudia edia huanai lau noho, sinavai ena ladana Kebara ena badinai. Unai neganai guba be sibona ia kehoa, bona mata hanai dekena amo Dirava lau itaia.” Unai siri dekenai dahaka oi itaia? Ia ese dina bona gabu maorona ia hahedinaraia. Unai gaudia dainai ita diba unai siri ese lagani 613 B.C.E., King Iehoiakini idia guia laganina namba 5, ia herevalaia.
16. Esekiela be dahaka ia itaia?
16 Iehova ena imana be Esekiela latanai ia noho, bona Esekiela ese matahanai mai garina ia itaia, ia lalonai Iehova be guba kariota badana ena terona dekenai ia helai bona unai kariota ena uili badadia edia kahana ibounai dekenai matana momo idia noho. Mauri gaudia hani, idia ta ta be uili ta ta dekenai idia gini, edia anina ita ura ita diba. “Edia toana be taunimanima bamona. To idia ibounai ta ta be mai edia vairana 4, bona mai edia hanina 4 danu. . . . Inai mauri gaudia edia vairadia edia toana be idauidau, vaira kahanai edia vairana be taunimanima edia vairana bamona, idiba kahana dekenai edia vairana be laiona ena vairana bamona, lauri kahanai edia vairana be boromakau tau ena vairana, bona edia murina kahana edia vairana be ugava manu ena vairana ena toana bamona.”—Esekiela 1:5, 6, 10.
17. Kerubi edia vairana hani ese dahaka idia laulaulaia?
17 Unai mauri gaudia hani be dahaka? Esekiela ia gwau idia be kerubi. (Esekiela 10:1-3, 14) Dahaka dainai idia ta ta edia vairana be hani? Siahu Ibounai Lohiabadana Iehova ena kara badadia hani idia hahedinaraia totona. Ugava ena vairana ese aonega badana ia laulaulaia. (Iobu 39:27-29) Boromakau tau ena vairana ese dahaka ia laulaulaia? Ena aiona bona pagana be mai edia goada bada herea dainai, nega haida ia badu boromakau tau ese hosi bona ia guia tauna ia abia oho. Momokani, boromakau tau be Iehova ena siahu badana ia laulaulaia. Laiona idia gaukaralaia hahemaoro mai ena gari lasi ia laulaulaia totona. Ginigabena be, tau ta ena vairana ese Dirava ena lalokau ia laulaulaia, badina tanobada ai taunimanima sibona ese mai edia aonega ida unai kara idia hahedinaraia diba.—Mataio 22:37, 39; 1 Ioane 4:8.
18. Edena dala ai aposetolo Ioane ese guba oreana dekenai iseda lalo-parara ia habadaia?
18 Ma matahanai haida ese ita idia durua diba, unai laulau ita lalo-pararalaia totona. Idia haida be Ioane ena matahanai Baibel bukana Apokalupo dekenai. Esekiela bamona, ia ese Iehova ia itaia ena terona mai hairaina dekenai bona ia ida kerubi idia noho. Unai kerubi be dahaka idia karaia? Idia be Isaia karoa 6 ia hahedinaraia serapi edia hereva idia gwauraia lou: “Helaga, Helaga, Helaga. Lohiabada Dirava be mai Siahu Ibounai. Gunaguna ia noho, harihari ia noho, bona gabeai danu do ia mai.” (Apokalupo 4:6-8) Danu, Ioane ese terona badinai mamoe ena natuna ta ia itaia. Ia be daika ia laulaulaia? Dirava ena Mamoe Natuna, Iesu Keriso unai.—Apokalupo 5:13, 14.
19. Inai stadi amo dahaka oi dibaia Iehova ena orea dekenai?
19 Unai matahanai idauidau amo, dahaka ita diba? Ita diba guba oreana ena ataiai taudia be Iehova Dirava ena terona ai bona Dirava ia bamoa Mamoe Natuna, Iesu Keriso, ia be Hereva, eiava Logos. Danu, ita ese guba anerudia edia orea, serapi bona kerubi danu, ita itaia. Idia be mai lalo-tamona ida Iehova ia hesiai henia bona ena ura ia hagugurua oreana badana lalonai idia noho. Bona Iehova ia ura hagugurua gaukarana ta be inai dokona negana lalonai, tanobada hegegemadai, sivarai namona harorolaia gaukarana.—Mareko 13:10; Ioane 1:1-3; Apokalupo 14:6, 7.
20. Hereva gabena ese edena henanadai do ia haerelaia?
20 Tanobada dekenai, Iehova ena Witness taudia be edia Kingdom Hall dekenai idia hebou, Siahu Ibounai Lohiabadana ena ura karaia dalana idia dibaia totona. Momokani, hari ita abia dae diba ita idia durua taudia be momo, to Satani bona hereva momokani idia inai henia taudia ida idia noho taudia be momo lasi. To henanadai ta ia noho, Basileia ena sivarai namona harorolaia gaukarana lalonai, guba oreana ena anina be dahaka? Hereva gabena ese unai bona gau ma haida do ia hahedinaraia.
Riviu Henanadai
◻ Iehova ena orea ita laloa bada totona, dahaka ita lalo-pararalaia be namo?
◻ Dahaka ia vara Elisaia ena hesiai tauna dekenai, bona edena dala ai peroveta tauna ese ia hagoadaia?
◻ Sibona eda stadi karana be edena bamona ita laloa be namo?
◻ Daniela, Isaia, bona Esekiela ese guba oreana ena gau idauidau be edena bamona idia hahedinaraia?
[Picture on page 13]
Sibona eda stadi karana amo ita abia namo ese aniani namona ena namo ia hereaia
[Picture on page 15]
Iehova ena haere Elisaia ena guriguri dekenai be guba anerudia idia itaia