Hahemaoro Maoromaoro—Edena Negai Bona Edena Bamona?

KERERE lasi taudia be hahemaoro maoromaoro karana dekenai idia gari lasi. Momokani, gabu ibounai dekenai taunimanima idia moale bema edia tano dekenai taravatu gaukaralaia dalana ta amo hahemaoro maoromaoro idia karaia toho. Unai dala henunai taravatu idauidau idia noho, do idia badinaia totona pulisi taudia idia noho, bona hahemaoro karaia totona kota idia noho. Keristani taudia momokanidia ese edia tano dekenai hahemaoro karaia daladia idia matauraia, unai amo idia be Baibel ena sisiba hegeregerena ‘gavamani idia kamonai henia.’​—⁠Roma 13:​1-7.

To, tano idauidau ai hahemaoro karaia daladia dekenai hisihisi bona lalo-metau idia havaraia kereredia idia karaia.a Edia gaukara be kerere taudia idia panisia bona kerere lasi taudia idia gimaia, to nega haida kerere lasi taudia be idia karaia lasi kereredia dainai idia panisidia kava. Taunimanima ma haida be lagani momo herea dibura ruma dekenai idia noho, bena kerere ena davana idia hagugurua gwauraia neganai idia ruhaia, badina idia daradara bada herea bema idia be mai edia kerere bona idia guia be maoro eiava. Unai dainai, momo idia henanadai, Nega ta taunimanima ibounai dekenai hahemaoro maoromaoro do idia karaia, a? Bema oibe, edena negai bona edena bamona do ia vara? Daika ita abidadama henia diba, ia ese kerere lasi taudia do ia gimaia? Bona idia hahemaoro henia maoromaoro lasi taudia ese dahaka helaro idia abia diba?

Hahemaoro Karana Ia Kerere

Lagani 1980 murinai, Germany taudia ese “tuari murina negana lalonai ia vara hahemaoro karana idauna ta” idia itaia. Unai neganai, sina ta be ena natuna kekeni ruaosi ia hamasea dainai dibura ruma dekenai idia siaia lao, ena mauri ibounai unuseniai do ia noho. To, lagani momo murinai, ena kerere idia hamomokania herevadia ma idia tahua lou, bona idia ruhaia, do idia kota henia lou totona. Lagani 1995 ai, Die Zeit ia gwau unai hahemaoro ginigunana “be idia hamomokania diba ia be hahemaoro kererena.” Inai hereva ai torea neganai, unai hahine be lagani 9 dibura rumana ai ia noho vadaeni bona unai neganai idia diba lasi bema ia be mai ena kerere eiava lasi.

Adorahi ta, November 1974 ai, Birmingham, England dekenai, bomu rua be siti ena bisinesi gabuna badana ai idia pou bona taunimanima 21 idia mase. Palamen ena memba ta, Chris Mullen, ia gwau unai kara be “Birmingham taudia ta ese ia laloaboio diba lasi.” Gabeai, “kerere lasi tatau 6 idia guia, Britain ena sivarai lalonai unai ala-ala karana bada hereana dainai.” Gabeai, idia samanidia herevadia be idia hakoikoia​—⁠to unai tatau be lagani 16 dibura ruma dekenai idia noho vadaeni murinai, unai idia karaia!

Loea tauna Ken Crispin ese kota karana ta, “Australia ena kota karaia ena sivarai lalonai dala idauna ai taunimanima edia lalona ia veria” sivaraina, ia gwauraia. Ruma bese ta be Ayers Rock badinai kamepa dekenai idia mahuta totona idia lao bena unuseniai edia beibi ia boio, bona idia davaria lou lasi. Beibi ena sinana idia samania, idia gwau beibi ia alaia, bena dibura ruma dekenai idia siaia lao, unuseniai ena mauri ibounai do ia noho. Lagani 1987 ai, lagani toi mai kahana idia koua vadaeni murinai, tahua komiti ta ese idia davaria ia idia samania herevadia be hegeregere lasi ia idia guia totona. Ia idia ruhaia bona idia samania herevadia ibounai idia kokia.

Lagani 1986 ai, mauri lagani 18 hahinena ta United States ena saut kahanai ia noho, ta ese ia alaia. Ena mauri lagani be 50 bamona tauna ta idia samania, idia gwau unai hahine ia alaia, bena kerere davana be mase idia gwauraia. Dibura rumana ai lagani 6 ena mase totona ia naria, bena gabeai idia davaria ia ese unai kara dikana ia karaia lasi.

Unai hahemaoro kerere karadia be nega momo idia vara lasi, a? David Rudovsky, University of Pennsylvania Law School tauna, ia gwau: “Lau be inai hahemaoro karaia dalana dekenai lagani 25 bamona lau gaukara vadaeni bona kota karadia momo lau itaia vadaeni. Lau gwau idia guia to idia be kerere lasi taudia . . . lau laloa edia momo be 5 bona 10 pesen huanai bamona.” Crispin ese inai henanadai ia gwauraia: “Kerere lasi taudia ma haida be idia dadaraia taudia bamona dibura rumadia lalonai idia helai noho, a?” Unai bamona kerere badadia be edena bamona idia vara diba?

Taunimanima Edia Hahemaoro Daladia​—⁠Taunimanima Edia Manoka Idia Noho

Lagani 1991 ai, Britain ena Court of Appeal ia gwau: “Taunimanima edia gaukara dalana ta ia goevadae diba lasi.” Hahemaoro daladia be idia havaraia bona idia gaukaralaia taudia edia laloa maoro bona diba hegeregerena do ia heau. Taunimanima idia kerere, idia koikoi, bona idia hahemaoro koikoi diba. Unai dainai, ita hoa lasi bema taunimanima edia hahemaoro daladia lalonai unai kerere idauidau idia hedinarai. Mani inai hereva haida oi laloa.

Germany ena Judge Rolf Bender ia gwau taravatu utua karadia dainai idia karaia kota iboudiai amo, 95 pesen be uitnesi taudia edia hereva idia abia dae bona idia gaukaralaia. To kota dekenai unai uitnesi taudia be hanaihanai ita abidadama henia diba, a? Judge Bender be unai bamona ia laloa lasi. Ia gwau kota vairanai idia gini uitnesi taudia iboudiai amo, kahana ta bamona be koikoi herevadia idia gwauraia. Bernd Schünemann, taravatu ia stadilaia profesa badana, University of Munich, Germany dekenai, be unai bamona ia laloa danu. Die Zeit niuspepa taudia ese idia henanadai henia neganai, Schünemann ia gwau uitnesi taudia edia hereva​—⁠herevana ia maoro lasi​—⁠be hamomokania gauna badana. “Lau laloa hahemaoro karaia kerere ena badina ta be hahemaoro tauna be uitnesi taudia edia hereva kereredia dekenai ia tabekau.”

Uitnesi taudia be kerere idia karaia diba; bona pulisi taudia danu. Taravatu utua karana ta dainai taunimanima idia badu neganai, pulisi be kerere tauna idia guia totona idia lalo-hekwarahi. Unai nega lalonai, pulisi taudia haida be hamomokania gaudia koikoidia idia havaraia eiava idia samania tauna idia doria, edia samani herevana ia hamomokania totona. Birmingham dekenai bomu idia pou dainai idia guia tatau 6 idia ruhaia neganai, Britain ena niuspepa, The Independent, be inai hereva kwarana ia hahedinaraia: “Pulisi Edia Kara Gageva Dainai Unai Tatau 6 Idia Guia.” The Times ia gwau: “Pulisi idia koikoi, palani dikana idia karaia, bona ma haida idia koia.”

Nega haida, ma haida inai henia kava karana dainai, pulisi bona taunimanima ese bese ta, tomadiho ta, eiava tano ta taudia idia samania. U.S.News & World Report ia hereva bamona, unai neganai taravatu idia utua taudia davaria karana be do ia dika ia lao bena “bese idaudia inai henia karana ia vara, to laloa namonamo karana ia vara lasi.”

Kara ta be kota dekenai idia gwauraia neganai, uitnesi taudia edia hereva sibona lasi to saiens dalanai idia hamomokania gaudia danu be mai anina, dala ta idia abia hidi totona. Saiens taudia edia tahua karadia bona daladia idauidau be momo, bona hahemaoro tauna eiava hahemaoro karaia oreana be reana ipidi bona buleti edia pou dalana eiava ima kwakikwaki ta ena laini toana, imana amo idia torea revareva, rara oreadia, huina ena kala, dabua ena varovaro, eiava DNA toana amo ta ia kerere eiava lasi do idia abia hidi. Loea tauna ta ia gwau kota taudia edia vairanai “saiens taudia momo herea idia noho bona daradara idia havaraia daladia aukadia idia gwauraia hedinarai.”

Danu, magasin ladana Nature ia gwau saiens taudia ibounai idia lalo-tamona lasi saiens dalana ai idia hamomokania toho gaudia dekenai. Ia gwau: “Nega haida saiens taudia edia lalohadai unai gaudia dekenai be idauidau.” To madi, “saiens dalanai idia hamomokania kerere gaudia dainai, haida idia guia kava vadaeni.”

Herevana edeseniai ita noho, to hari inai nega lalonai idia gaukaralaia hahemaoro daladia ibounai lalonai taunimanima edia manoka do idia hedinarai. Vadaeni, daika ita abidadama henia diba, ia ese kerere lasi taudia do ia gimaia? Hahemaoro maoromaoro do ita abia be helaro korikorina, a? Bona idia hahemaoro henia kerere taudia ese dahaka helaro idia abia diba?

“Lau [Iehova] ese Kota Maoromaorona Lau Ura Henia”

Oi eiava oiemu ruma bese tauna ta idia hahemaoro henia kerere neganai, Iehova Dirava bona iena Natuna, Iesu, idia diba oiemu hemami be edena bamona. Taunimanima edia sivarai lalonai hahemaoro karana dika hereana be satauro dekenai Keriso idia hamasea neganai idia karaia. Aposetolo Petero ese ita ia hamaoroa, Iesu be “kara dika ta ia karaia lasi.” To, uitnesi taudia koikoidia ese idia samania, idia gwau ia kerere, bena idia hamasea.​—⁠1 Petero 2:22; Mataio 26:​3, 4, 59-​62.

Iehova ese iena Natuna idia hadikaia kava dainai ia abia hemamina mani oi laloa! Hahemaoro maoromaoro be Iehova ena kara badana ta. Baibel ese ita ia hamaoroa, ia gwau: “Iena dala ibounai be maoro[maoro].”​—⁠Deuteronomi 32:4; Salamo 33:⁠5.

Iehova ese Israela taudia dekenai hahemaoro dalana namo hereana ia henia. Bema mase ta ena badina idia davaria diba lasi, unai mase dainai boubou karana ta idia karaia. Taravatu utua karana ena badina idia davaria totona idia lalo-metau lasi, bena kerere lasi tauna ta idia guia kava lasi. Mase ta dainai ta idia guia kava diba lasi, nega tamona ai idia vara karadia dainai eiava saiens dalanai idia hamomokania gaudia dainai; matana amo idia itaia taudia rua ese idia hamomokania be namo. (Deuteronomi 17:6; 21:​1-9) Unai haheitalai ese idia hahedinaraia Iehova ena dala be ataiai bona ia ura hahemaoro idia karaia namonamo. Momokani, ia gwau: “Lau [Iehova] ese kota maoromaorona lau ura henia.”​—⁠Isaia 61:⁠8.

To momokani, Israela ena hahemaoro karaia dalana be taunimanima ese idia haheaua bona idia danu be mai edia manoka gaudia, iseda hegeregerena. Nega haida taravatu idia gaukaralaia kerere. King Solomona ia gwau: “Bema gavamani ese ogogami taudia ia hisihisi henidia, bona kota maoromaoro, bona ahuna korikori ia henidia lasi neganai, do oi hoa bada lasi.”​—⁠Hadibaia Tauna 5:⁠8.

Iehova ese iena natuna dekenai idia karaia hahemaoro kererena ia hamaoromaoroa diba. Iesu be unai ia diba momokani dainai ia lalo-goada, “ia diba guba ena moale be iena vairanai ia noho dainai, ia ese satauro . . . ia laloa lasi.” Unai hegeregerena, paradaiso tanobadana ai Mesia ena lohia henunai do ita noho, bona kara maoromaoro sibona do ia noho negana, ena helaro mai moalena ese ita ia hagoadaia diba, bena inai tanobada gunana ena hahemaoro kerere dainai ita hisihisi eiava edia sivarai ita kamonai neganai, ita haheauka diba. Dika bona hisihisi iboudiai be Iehova ese ena nega korikori ai do ia hanamoa. Hahemaoro kerere dainai edia mauri idia haboioa taudia danu be reana do idia toreisi lou.​—⁠Heberu 12:⁠2; Kara 24:⁠15.

Bema hahemaoro maoromaoro lasi karana dainai ita hisihisi, ita moale diba badina hahemaoro daladia momo be mai edia taravatu gaukaralaia daladia bona idia amo kerere ta ita hamaoromaoroa diba. Keristani taudia ese unai dala idia gaukaralaidia diba. To, inai hereva momokanina idia laloatao: Goevadae lasi hahemaoro daladia ese idia hahedinaraia taunimanima besena edia noho dalana do ia idau be namo. Kahirakahira unai do ia vara​—⁠Dirava ena amo.

Kahirakahira Iehova ese inai kara maoromaoro lasi tanobadana ena oromana do ia haorea bona ena gabu ai tanobada oromana matamatana do ia havaraia, unuseniai “kara maoromaoro sibona do ia noho.” Iseda Havaraia Tauna ita abidadama henia momokani diba, ia ese Mesia Pavapavana, Iesu Keriso, amo kara maoromaoro do ia havaraia. Taunimanima ibounai kara henia maoromaoro negana be ia kahirakahira! Unai helaro dainai ita moale bada.​—⁠2 Petero 3:⁠13.

[Footnote]

[Blurb on page 27]

Goevadae lasi hahemaoro daladia​—⁠bona kara gageva gavamanidia, ladana dika tomadiho idauidau, bona kara maoromaoro lasi bisinesi danu​—⁠ese idia hahedinaraia taunimanima besena edia noho dalana do ia idau be namo

[Box on page 28]

Revareva Helagadia amo Lalo-Goada Ita Abia

November 1952 ai, Derek Bentley bona Christopher Craig be Croydon dekenai kohu haboua rumana ta idia hamakohia bona idia vareai; unai be London badinai, England dekenai. Unai neganai Bentley ena mauri lagani be 19 bona Craig ena mauri lagani be 16. Pulisi taudia idia boiria, bona Craig ese pulisi tauna ta ia pidia mase. Craig be lagani 9 dibura rumana dekenai ia noho, to Bentley be ala-ala dainai, January 1953 ai ena aiona dekenai varo idia atoa bona idia tauadae.

Bentley ena taihuna, Iris, be lagani 40 lalonai ia hekwarahi Bentley ese unai ala-ala ia karaia lasi ena maoro ia hahedinaraia totona. Lagani 1993 ai, siahu lohia taudia ese samani herevadia ibounai idia kokia pepana idia henia, idia gwau Bentley idia tauadae be maoro lasi. Iris Bentley be buka ladana Let Him Have Justice lalonai unai kara ena sivarai ia torea, ia gwau:

“Lagani ta gunanai unai pidia karana ia do vara lasi neganai, Derek be Iehova ena Witness ta ia davaria dala dekenai . . . Taihu Lane be Fairview Road dekenai ia noho, aiemai gabu amo ia daudau lasi, bona ia ese Derek ia boiria iena ruma dekenai Baibel sivaraidia ia kamonai totona. . . . Heduru gauna ta be Taihu Lane dekenai Baibel sivaraidia edia rekodi idia noho, ia dekenai unai ia henia [badina Derek be ia duahiduahi namonamo lasi]. . . . Do ia giroa mai bona lau dekenai hahine ese ia hamaoroa gaudia do ia gwauraia, hegeregere ita ibounai be do ita mauri lou ita mase murinai.”

Iris Bentley be ena taihuna idia do hamasea lasi neganai, dibura rumana dekenai ia vadivadi henia. Ena hemami be edena bamona? “Taihu Lane ese ia hamaoroa gaudia ese unai dina ginigabedia ai ia idia durua.”

Bema hahemaoro kerere dainai hisihisi oi ania, heduru gauna namona ta be Baibel ena hereva momokanidia oi duahia bona laloa loulou. Unai ese oiemu lalona do ia hagoadaia momokani diba, badina Iehova Dirava be ‘bogahisihisi bona durua ibounai ia henia Diravana. Iseda hisihisi ibounai lalonai ia ese ita ia durua noho.’​—⁠2 Korinto 1:​3, 4.

[Picture on page 29]

Keriso idia hamasea neganai hahemaoro karana dika hereana idia karaia