Vaira Negana ai Dahaka Do Ia Vara Iseda Tanobada Dekenai?
World Military and Social Expenditures 1996 ia gwau: “Lagani gunadia handred ma ta edia dika ese lagani 1900 murina laganidia edia dika ia hereaia lasi, gavamani dagedage henia kara dikadia dekenai, idia havaraia hepapahuahu edia namba, taunimanima hutuma idia heau mauri karana, tuari dekenai taunimanima milioni momo idia hamasea karana, bona ‘sibodia naria’ tuari kohudia dekenai moni bada herea idia negea karana dekenai.” Unai kara do ia idau, a?
Aposetolo Petero be Keristani taudia dekenai Dirava ese lagani handred momo gunanai ia karaia gwauhamatana ma ia gwauraia lou, ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13) Unai hereva be guna Isaia ese ia gwauraia peroveta herevana ena kahana ta. (Isaia 65:17; 66:22) Idaunegai Israela besena be lagani 70 Babulonia ena igui lalonai idia noho murinai, gwauhamata tanona dekenai idia giroa lou neganai, unai hereva ia guguru negana ginigunana idia itaia. Petero ese unai “guba matamata bona tanobada matamata” gwauhamatana ia gwauraia lou karana amo ia hahedinaraia unai peroveta herevana be dala bada hereana ai do ia guguru—tanobada hegegemadai!
Dirava ena ura be tanobada hegegemadai gau ibounai do idia maoromaoro, bona iena guba Basileiana mai ena King, Keriso, ese unai ibounai do ia havaraia. “Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.” (Isaia 2:4) Tanobada dekenai unai bamona maino bona noho namona be Iesu ese ena murinai idia raka taudia ia hadibadia do idia naria bona gurigurilaia totona, momo ese idia gwauraia Iseda Tamana, eiava Lohiabada ena Guriguri dekenai ia hedinarai hegeregerena, ia gwau: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—Mataio 6:9, 10.
Guba ia maoromaoro hegeregerena, kara maoromaoro tanobadana dekenai oi ura oi noho mai moale ida, a? Unai helaro be Baibel ese mai edia kudouna ibounai ida Dirava idia tahua bona iena kara maoromaoro hegeregerena idia ura idia noho taudia ibounai dekenai ia henia.