Dahaka Dainai Tomadiho Idia Rakatania Noho?

LAGANI 1800 bona 1899 huanai, do oi kamonai diba lasi, Prussia (hari Germany ena not kahana) tauna do ia gwau ia be tomadiho oreana ta ia bamoa lasi. Oibe, bema tomadiho orea badana ta ia rakatania bona orea maragina ta ia bamoa neganai, pulisi ese hunia dalanai ia do idia raraia loaloa. Hari inai nega be idau momokani!

Hari, Germany taudia momo herea be edia dubu idia rakatania noho. Ripoti ta ia hahedinaraia, taunimanima hani hani amo tamona tamona idia gwau idia be tomadiho oreana ta idia bamoa lasi. Unai bamona kara be Austria bona Switzerland dekenai ia vara danu. Bema tomadiho oreana ta ia noho ena memba taudia dainai, vadaeni, Germany toretore tauna Reimer Gronemeyer ia hereva bamona, “Europe ena tomadiho oreadia be kahirakahira idia ore.”

Tomadiho Idia Dadaraia Ena Badina

Dahaka dainai momo be tomadiho oreadia idia dadaraia? Nega momo, ena badina be moni, hegeregere memba taudia ese dubu ena takisi moni idia henia tanodia dekenai unai ia vara. Momo idia henanadai, ‘Badina be dahaka egu gaukara aukana amo lau abia monina be dubu dekenai do ia lao?’ Haida be dubu ena taga bona siahu bada karana idia ura henia lasi. Idia be Germany dekenai, Cologne ena Kadinal Joachim Meisner ena hereva idia abia dae, ia gwau dubu be mai ena taga bada dainai, kohu gaudia ia laloa bada bona “Keriso dekenai abidadama karana ia laloa bada lasi.”

Taunimanima haida be edia tomadiho oreana idia rakatania badina idia hesiku, idia ura henia lasi, bona edia hitolo lauma dalanai ia hanamoa lasi. Idia be peroveta tauna Amosa ese ia gwauraia doe idia mamia, “do idia hitolo, to paraoa totona lasi. Idia be do idia ranu mase, to ranu totona lasi. Do idia hitolo bona ranu mase gauna be Lohiabada ena hereva totona.” (Amosa 8:11) Edia dubu amo heduru ta idia abia lasi dainai, idia rakatania.

Ena be idia davaria hekwakwanai be momokani, to tomadiho ibounai idia dadaraia be ia maoro, a? Mani ia hitolo tauna ta oi laloa, ia ese gau ta ia itaia bona ena toana be paraoa bamona. To, ia ura ania gwauraia neganai, ia davaria ia be timba ena momoru sibona amo idia karaia. Ena hitolo bona ena ura aniani totona do ia dadaraia, a? Lasi, ia ese aniani korikorina do ia tahua. Unai hegeregerena, bema tomadiho oreana be ena memba taudia edia hitolo lauma dalanai ia hanamoa lasi, memba taudia ese tomadiho ibounai idia dadaraia be namo, a? Eiava aonega dalana be idia ese edia hitolo lauma dalanai hanamoa dalana ta do idia tahua be namo? Momo be unai idia karaia, hereva gabena ese ia hahedinaraia bamona.