Haida ese Edia Tomadiho Idia Haidaua Ena Badina

Momo dekenai, tomadiho be maka ta sibona. Reana ia hahedinaraia tau ta be Sunday haida ai edeseniai ia lao, edeseniai do ia headava, bona ia mase neganai edeseniai do idia guria. To ia hahedinaraia lasi ia be edena bamona tauna o dahaka ia diba bona ia abidadama henia. Hegeregere, tahua gaukara ta ia hahedinaraia sibodia idia gwauraia Keristani taudia 50 pesen be idia diba lasi daika ese Ororo Dekenai Haroro Herevana ia henia. To, India gunalaia tauna badana Mohandas Gandhi, Hindu tauna, be unai ia diba!

TAUNIMANIMA momo be edia tomadiho edia hahediba herevadia idia diba lasi dainai edia dubu amo idia raka siri be ita hoalaia gauna, a? Lasi, unai ita hoalaia lasi. To, danu unai kara idia koua diba. Baibel idia dibaia totona heduru idia abia dae taudia idia hoa, badina idia davaria idia ia durua bada. Baibel ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.”​—⁠Isaia 48:⁠17.

Lauma dalanai idia do hitolo noho taudia ese dahaka idia karaia be namo? Namona be Dirava tomadiho henia karana idia rakatania lasi! To, namona be Baibel idia stadilaia bona Dirava sibona ese dahaka ia henidia do idia itaia.

Henanadai Aukadia Edia Haere

Ena mauri lagani be 7 neganai, Bernd ese iena sinana ia mase ia itaia.a Ia maragi laganidia ibounai lalonai, ia laloa, ‘Egu sinana be edeseni? Badina dahaka lau sibona lau bada, bona ia noho lasi?’ Mero badana ai ia lao neganai, Bernd be dubu dekenai ia lao hanaihanai. Taunimanima ese hisihisi idia ania ia laloa bada dainai, ia ura ogogami tanona ta dekenai heduru gaukara do ia karaia. To, ia be do gau haida ia lalo-hekwarahilaia bona iena dubu ese haere namodia ia henia lasi.

Bena Bernd ese iena sikuli turana ta ia hereva henia, ia be Iehova ena Witness merona ta. Unai mero matamata ese Baibel amo Bernd ia hadibaia iena sinana be gau ta ia diba lasi, mase lalonai ia mahuta sibona. Bernd ese unai idia gwauraia hedinarai Baibel siri momo ia dibaia, hegeregere Hadibaia Tauna 9:5: “Mase taudia be gau ta idia diba lasi.” Unai dainai Bernd ena sinana be gabu ta hegeregere pegatori​—⁠o gabu dikana ma ta​—⁠dekenai hisihisi ia abia noho ia lalo-hekwarahilaia be badina lasi. Ena be tomadiho oreadia momo ese mase diba lasi soulina ena hahediba herevana idia hadibaia, Bernd ia itaia Baibel ia gwau souli be taunimanima ta sibona. Unai tauna ia mase neganai, souli ia mase. “Ia kara dika soulina​—⁠ia sibona do ia mase.”​—⁠Esekiela 18:⁠4, NW.

Bernd ese mase taudia edia helaro namona ia dibaia danu. Ia sibona ese Baibel bukana Kara dekenai inai ia duahia: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Ia moale bada herea badina ia davaria unai toreisi lou be inai tanobada, Dirava ese paradaiso ai do ia halaoa tanobadana, dekenai do ia vara!​—⁠Salamo 37:29; Apokalupo 21:​3, 4.

Daudau lasi murinai Bernd ena hitolo lauma dalanai be Baibel ena diba korikorina ese ia hanamoa. Bernd ese tomadiho ia dadaraia lasi. To, ena hitolo lauma dalanai ia hanamoa diba lasi dubuna ia rakatania bona Baibel ena hereva ia badinaia auka tomadiho dalana ia abia dae. Ia gwau: “Lagani 14 idia ore vadaeni unai lau karaia, bona egu kara lau lalo-hisihisilaia lasi. Hari lau diba Havaraia Tauna ese hisihisi ia havaraia lasi. Satani be inai tanobada ena dirava, bona ita dekenai idia vara dika gaudia be ia ese ia havaraia. To Dirava ese kahirakahira Satani ena tanobada ese ia havaraia dika ibounai do ia hamaoromaoroa. Egu sinana danu be toreisi lou negana ai do ia giroa mai. Unai be do moale bada negana!”

Bernd ese iena tahua gauna tano ta ai heduru gaukara do ia karaia ia davaria. Ia be tano idauna dekenai haida ia durua Dirava ena Basileia, edia hisihisi ia haorea gauna korikorina idia diba totona. Bernd hegeregerena, taunimanima milioni momo idia dibaia vadaeni Dirava ese taunimanima edia hisihisi do ia hadokoa. Idia moale bada badina edia hitolo lauma dalanai ia hanamoa tomadiho oreana ta ia noho.​—⁠Mataio 5:⁠3, NW.

Mauri Ena Badina be Dahaka?

West tanodia dekenai tomadiho idia dadaraia karana ia bada ia lao lalonai, momo idia henanadai, ‘Mauri ena badina be dahaka?’ Ena haere be Baibel lalonai do ita davaria, Michael ese ia davaria hegeregerena. Lagani 1975 bamona ai, Michael ia ura dagedage oreana ta ia bamoa. Iena mauri lalonai gau tamona sibona ia laloa bada​—⁠ia laloa kohu bada tanodia ai kara gageva idia karaia taudia edia mauri do ia hadikaia. Ia gwau: “Nega ibounai egu ruma lau rakatania neganai egu ipidi lau abia. Egu palani be gavamani taudia badadia bona bisinesi taudia badadia momo do lau hamasea. Egu mauri do lau henia unai gaukara karaia totona.”

Michael be dubu dekenai ia lao tauna, to iena dubu tauna ta ese mauri ena badina ia gwauraia hedinarai diba lasi. Unai dainai, Iehova ena Witness taudia ese iena ruma dekenai idia lao bona Baibel amo iena henanadai edia haere idia hahedinaraia neganai, Michael ia kamonai namonamo. Kingdom Hall dekenai Iehova ena Witness taudia edia hebou dekenai ia lao matamaia.

Michael ena turadia idia ura dikadika idia diba dahaka dainai Baibel ia ura henia matamaia. Michael ese ia hamaorodia: “Inai Sunday ai hebou dekenai umui mai. Nega sisina umui noho. Bema umui kamonai gaudia umui ura lasi, vadaeni ruma dekenai umui giroa.” Unai idia karaia, 45 miniti Baibel ena hereva ta idia kamonai murinai, iena turadia momo ese Kingdom Hall idia rakatania. To idia tamona​—⁠Susan​—⁠ia noho. Unai hahine matamatana be ia kamonai gaudia ia hoalaia. Michael bona Susan be gabeai idia headava bona idia bapatiso bona Iehova ena Witness taudia ai idia lao. Michael ia gwau: “Hari lau diba dahaka dainai tanobada dekenai ita noho. Iehova ese ita ia havaraia. Iseda mauri ena badina korikorina be ia do ita dibaia bona iena ura do ita karaia. Unai ese moale momokanina ia mailaia!”

Taunimanima milioni momo be Michael ena lalohadai idia abia dae. Idia ese inai Baibel herevana idia abia dae: “Egu hereva ibounai oi kamonai vadaeni, to egu hadibaia hereva dokona, sisiba badana be inai: Dirava do oi gari henia, bona iena oda do oi badinaia, badina be taunimanima edia gaukara korikori be unai sibona.”​—⁠Hadibaia Tauna 12:⁠13.

Mauri Ena Hekwakwanai Idia Haheaukalaia

Ita ibounai ese 2 Timoteo 3:1 (NW) ia guguru ita mamia, ia gwau: “To namona be inai oi diba, dina gabedia ai, nega aukadia mai edia hekwarahi do idia vara.” Tau ta ese inai “nega aukadia” ai idia vara hekwakwanai idia reaia lasi. To Baibel ese ita ia durua ita haheaukalaidia totona.

Mani Steven bona Olive, headava tau bona ena hahine, ita laloa. Idia be Iehova ena Witness taudia ida Baibel idia stadilaia matamaia neganai, taunimanima momo hegeregeredia, idia be mai edia hekwakwanai edia headava lalonai. Steven ia gwau: “Ai be metairametaira ai parara noho. Emai tahua gaudia bona ura gaudia be idauidau.” Dahaka ese ia durudia idia noho hebou totona? Steven ia gwau: “Iehova ena Witness taudia ese ai idia hadibaia edena bamona Baibel ena hakaua herevadia be emai mauri lalonai ai badinaia diba. Unai be nega ginigunana, sibona ena ura dadaraia bona ma ta laloa bada karana edia anina ai dibaia. Baibel ena hakaua herevadia ai badinaia ese ai ruaosi ia hakapua hebou. Hari emai headava maurina be mai ena moale bona ia goada.”

Dirava Tura Henia Momokani

Vanegai stadi ta amo idia davaria America taudia 96 pesen ese Dirava idia abia dae, bona idia momo be ia dekenai idia guriguri. To, stadi idauna ta ia hahedinaraia lagani 50 lalonai dubu bona Iuda taudia edia dubu helaga dekenai idia lao taudia edia namba be hari ia diho momokani. America taudia 58 pesen idia gwau hua ta ta lalonai nega tamona sibona dubu dekenai idia lao eiava hua haida ai idia lao lasi. Ia hedinarai, tomadiho ese Dirava kahirakahira dekenai idia ia veria lao lasi. Bona unai hekwakwanai be United States sibona dekenai lasi.

Linda be Bavaria dekenai ia bada. Ia be Katolik tomadiho ia badinaia bona hanaihanai ia guriguri. To nega tamona ai, ia be vaira negana ai dahaka do ia vara ia garilaia. Dirava ena ura taunimanima totona ia diba lasi. Iena mauri lagani be 14 sibona neganai, Linda ese Iehova ena Witness taudia ia davaridia, bona ia gwau: “Idia herevalaia gaudia lau ura henia, unai dainai Baibel stadi bukadia rua lau abia bona maoromaoro lau duahidia.” Lagani rua murinai, Linda ese Iehova ena Witness taudia ida Baibel ia stadilaia matamaia. Ia gwau: “Dirava ena kara ibounai lau dibaia Baibel amo be maoro.” Linda be iena dubu amo ia doko bona ena mauri lagani be 18 neganai, ia bapatiso bona Iehova ena Witness kekenina ai ia lao.

Dahaka ese Linda ia doria ena tomadiho ia haidaua totona? Ia gwau: “Egu dubu ese lau dekenai ia hadibaia Dirava ia noho, bona ia lau abia dae. To ia lau tura henia diba lasi bona ia be daudau herea. Baibel lau stadilaia neganai egu abidadama Dirava dekenai ia hagoadaia sibona lasi to lau ia durua ia lau diba bona lau lalokau henia totona. Hari lau be mai egu hetura karana namona Dirava ida, gau ibounai ia hanaia dava bada gauna.”

Tomadiho Momokanina be Mai Anina Bada!

Oiemu tomadiho ese lauma dalanai oi ia durua bona oi ia hadibaia edena bamona Baibel amo emu mauri ena hekwakwanai oi haheaukalaia diba, a? Baibel ena helaro vaira negana totona ia hadibaia, a? Baibel ena diba maorona amo oi ia durua Havaraia Tauna ida oi hetura namonamo totona, a? Bema lasi, oi hesiku lasi. Tomadiho oi dadaraia lasi, to Baibel ia badinaia momokani tomadihona oi tahua. Bena oi be Baibel buka Isaia ese ia perovetalaia taudia ta bamona: “Unai dainai lau Lohiabada Dirava ese inai hereva lau gwauraia: ‘Lau dekenai idia tomadiho bona kamonai henia taudia, be do idia aniani bona inuinu bada . . . Egu hesiai taudia be do idia moale . . . Egu hesiai taudia ese ane do idia abia, edia moale be bada dainai.’ ”​—⁠Isaia 65:​13, 14.

[Footnote]

[Pictures on page 4, 5]

Baibel ese ita ia durua Dirava ita diba bona ita lalokau henia totona