Kerere Gunadia amo Sisiba Ita Abia

ISEDA Havaraia Tauna ena mauri taravatudia be do idia idau lasi bona do idia noho ela bona hanaihanai. Unai dainai Galatia 6:7 ai ita davaria hakaua herevana be mai anina hari inai negai, ia gwau: “Bema tau ta aniani uhena ia hadoa, vadaeni unai bamona aniani sibona be do ia abia.” Momokani, reana tau ta ese Dirava vairanai ena kara ena badina gwauraia karana ia dadaraia, to Dirava ena taravatu be do ia idau lasi. Tau ta lasi ese ena kara dainai idia vara gaudia ia koua diba lasi.

Bema ta ese ena mauri lalonai kerere momo ia karaia to gabeai ena mauri ia haidaua bona Dirava ena hesiai tauna ta ai ia lao be edena bamona? Reana ena mauri dalana gunana dainai idia vara gaudia do ia haheaukalaia noho. To, ita gwau lasi unai ena anina be Dirava ese ena kara dika ia gwauatao lasi. Davida be Bataseba ida ia heudahanai karana ese ena mauri lalonai dika bada ia havaraia. Unai ia koua diba lasi. To ia helalo-kerehai, bona Dirava ese ena kara dika ia gwauatao.​—2 Samuela 12:13-​19; 13:​1-​31.

Nega ta oi lalohisihisi badina oi karaia kerere dainai idia vara gaudia oi koua diba lasi, a? Bema dala maorona ai ita laloa, iseda lalohisihisi ena hemami ese ita idia hadibaia lou bena ‘kara kerere daladia dekenai do ita giroa lou’ lasi. (Iobu 36:21) Oibe, lalohisihisi ena hemami ese ita ia durua diba, kerere ita karaia lou lasi totona. Dala namo hereana be inai: Davida ese ena kara dika amo ia abia sisiba ia gaukaralaia ena namo sibona totona lasi, to ma haida edia namo totona danu. Ia gwau: “Unai neganai lau ese, oiemu dala be kerere taudia dekenai do lau hadibaia. Bona kara dika taudia ese, oi dekenai do idia giroa lou.”​—Salamo 51:13.

[Pictures on page 7]

Davida ese Bataseba ida ia karaia kara dika amo sisiba ia abia