Idia Laloaboio Diba Lasi Gauna Ia Vara France Dekenai

“IEHOVA SITI AI URA LASI!” Taoni lalonai gabu idauidau ai idia atoa pepadia be unai bamona idia hereva. Dagedage oreana ta ia gwau, “Mai Lalo-Tamona ida Iehova Ena Gaukara Ita Koua.” Niuspepa sivaraidia handred momo ese taunimanima dekenai unai hekwakwanai idia hadibaia. Unai gaukara koua pepana idia sainia, bona unai gaukara idia herevalaia pepapepa milioni ta mai kahana be taunimanima iboudiai edia pos opesi mauana idia hahonua. France ena notwest kahana taoni Louviers dekenai regerege bada ia havaraia gaukarana be dahaka? Iehova ena Witness taudia edia noho gabuna bona brens opesi matamatana do idia haginia gaukarana.

Iehova ese Ia Habadaia

Iehova ena Witness taudia edia gaukara France dekenai be lagani 1880 murinai ia hamatamaia. Baibel bukadia bona magasin haboua gabuna be lagani 1905 ai idia kehoa Beauvène, France ena saut kahana dekenai, bona lagani 1919 ai, Paris dekenai opesi maragina ta dekenai idia gaukara. Lagani 1930 ai, brens opesi be Paris dekenai idia kehoa, bona murina lagani ai opesi dekenai idia gaukara taudia be Betele rumana, Paris ena not kahana, Enghien-les-Bains dekenai idia noho matamaia. Tanobada Ibounai Tuarina Iharuana murinai, Betele famili be Paris dekenai idia lou lao, bona lagani 1959 ai, brens idia abia lao foloa ima rumana ta dekenai, Boulogne-​Billancourt ai, Paris ena west kahana dekenai.

Basileia harorolaia gaukarana ia bada ia lao dainai, lagani 1973 ai, printa gaukara bona buka bona magasin siaia gaukarana gabudia be Louviers, Paris ena west kahana dekenai, kilomita 100 bamona ai idia abia lao, to opesi be Boulogne-​Billancourt dekenai idia noho. Ena be lagani 1978 bona 1985 ai Louviers dekenai idia noho gabudia idia habadaia, to idia hegeregere lasi, badina France dekenai pablisa taudia edia namba ia bada ia lao. Unai dainai idia laloa brens do idia habadaia bona Betele famili do idia mailaia gabu tamona dekenai. Inai hereva matamanai ai hahedinaraia hegeregerena, ibounai ese unai gaukara idia ura henia lasi. Ena be dagedage ia vara, to printa gabuna amo kilomita ta mai kahana ai gabu ta idia davaria. Lagani 6 lalonai idia gaukara goadagoada, bona dokonai, lagani 23 lalonai idia parara murinai, August 1996 ai Betele famili ibounai be Louviers dekenai idia noho hebou.

Saturday, November 15, 1997 ai, mai moale bada ida taunimanima ibounai 1,187 idia hebou, idia huanai be French Betele famili taudia 300, bona brens 42 amo idia mai taudia 329 idia noho. Idia be Tadikaka Lloyd Barry, Hakaua Oreana ena memba ta, ese do ia henia hahelagaia herevana idia kamonai totona idia hebou. To, unai brens kehoa gaukarana be dagedage negana ai bona nega daudau lalonai, France tanona ibounai nius idia halasia taudia ese Iehova ena Witness taudia hadikaia herevadia idia halasia negana lalonai ia vara dainai, idia laloa French Witness taudia ibounai ese unai moale lalonai idia vareai be namo. Unai dainai, Sunday, November 16 ai, hebouhebou idauna ta, ena sinado be “Keriso Ena Lalokau Lalonai Umui Noho,” idia karaia Villepinte Exhibition Center ai, Paris ena not kahana dekenai. Iehova ena Witness taudia ibounai France ai bona Belgium bona Switzerland ai idia noho French gado idia veria diba Witness taudia idia boiridia, bona Britain, Germany, Luxembourg, bona Netherlands edia kongregesen danu idia boiridia.

Anina Bada Ia Havaraia Hebouhebouna

Unai hebou be hua 6 gunanai idia hegaegaelaia matamaia vadaeni. Bena, pura rua hahelagaia dinana vairana ai, French taraka taria taudia idia straiki, dala badadia idia koua bona bensini abia gabudia idia koua danu. Sea bona ma kohu haida be nega korikori ai do idia abidia diba, a? Dala idia koudia dainai tadikaka do idia mai diba lasi, a? To ibounai idia moale badina, pura tamona murinai straiki idia hadokoa, bona dala idia kehoa lou. Hahelagaia dinana vairanai, Friday adorahi ai, taraka 38 ese sea ibounai 84,000 idia abia lao idia rentaia rumadia rua dekenai. Sea, platfom, saun gaudia bona vidio itaia gaudia badadia idia atoa totona, tadikaka bona taihu 800 mai kahana idia gaukara goadagoada hanuaboi ai ela bona Saturday daba 9:30 a.m. ai.

Sunday daba, 6:00 a.m. ai, iduara idia kehoa, bona hutuma idia vareai matamaia. Idia rentaia trein ibounai 17 ese Witness taudia 13,000 idia abidia mai Paris dekenai. Paris dekenai idia noho tadikaka bona taihu 200 mai kahana be trein naria gabuna dekenai idia ginidae tadikaka idia hedavari henidia bona hebouhebou gabuna dekenai idia hakaudia lao. Taihu ta ia gwau unai bamona hegaegae dalana ese idia dekenai “noho namo bona goada mamina” ia henidia.

Haida be peleini bona motuka amo idia mai Paris dekenai. To, momo be basi ibounai 953 amo idia mai, bona Paris dekenai idia noho Witness taudia be siti dekenai idia gaukara basi bona trein amo idia lao Exhibition Center dekenai. Momo be hanuaboi ibounai lalonai idia laolao o daba maragi ai edia ruma idia rakatania, to ia hedinarai unai hebouhebou dekenai idia lao dainai idia moale bada. Lagani momo lalonai ta ta idia itaia lasi turadia be mai moale bada ida idia hedavari bona idia herosi heheni. Tano idauidau edia sene dabua mai edia kala momo idia hahedokilaia bona unai ese mamina ia havaraia momokani idia be tanobada besedia idauidau amo. Momokani, gau idauna ta do ia vara.

Program be 10:00 a.m. ai ia hamatamaia negana ai, sea ibounai be idia honu vadaeni, to miniti ta ta ai taunimanima handred momo idia do mai noho. Edeseniai oi itaia neganai, taunimanima edia kiri vairadia sibona oi itaia. Taunimanima tausen momo be idia gini o semenisi foloa latanai idia helai. Unai hebouhebou ena sinado hegeregerena, matamata taudia momo idia gini, buruka taudia idia helai diba totona. Headava tauna ta mai adavana edia revareva lalonai, inai bamona idia gwau: “Ai moale bada badina emai sea ai henia ai diba lasi to ai lalokau henia bada tadikaka bona taihu dekenai.” Momo ese sibodia edia ura idia dadaraia karana idia hahedinaraia: “Program ibounai lalonai Friday hanuaboi lalonai ai atodia sea badinai ai gini. To hebouhebou dekenai ai noho diba dainai Iehova ai tanikiu henia bada.”

Ena be idia hesiku o idia gini sibona, hebou lao taudia be tano haida edia ripoti bona Lloyd Barry bona Daniel Sydlik, ia be Hakaua Oreana ena memba tauna ta danu, edia hereva idia hakala henia namonamo. Tadikaka Barry ena hereva ena sinado be “Iehova ese Goada Ia Habadaia Noho,” bona ia ese Iehova be iena taunimanima ia hanamodia ena be hahetoho momo idia davaria ia kikilaia. Tadikaka Sydlik ena hereva ena ladana be “Idia Moale Badina Edia Dirava be Iehova!” Unai hereva rua be nega korikori ai idia henia badina hari inai negai Iehova ena Witness taudia France dekenai be dagedage idia davaria noho. Tadikaka Sydlik ia hahedinaraia moale korikorina be murimuri gaudia ese idia havaraia lasi, to iseda hetura karana Iehova ida bona iseda lalohadai mauri dekenai ese ia havaraia. Ena henanadai helai taudia dekenai, “Umui moale, a?” be imana patapataia regena bada herea karana amo idia haerelaia.

“Ena moale ia ore” taihu ta be gabeai inai bamona ia torea: “Haraga momokani lau lalo-parara moale lau davaria diba. Egu goada be dala kererena dekenai lau haorea noho, bona unai hereva amo, Iehova ese ia hahedinaraia egu dala lau haidaua be namo.” Tadikaka ma ta ia gwau: “Hari lau ura lau goada karaia Iehova ena kudouna lau hamoalea totona. Lau ura lasi gau ta ese egu kudouna lalonai lau mamia noho moalena do ia kokia.”

Hebouhebou ia ore gwauraia neganai, seamani be mai moale ida hebouhebou dekenai idia lao taudia edia namba ia gwauraia: 95,888​—⁠unai be Iehova ena Witness taudia edia hebouhebou bada herea momokani France dekenai!

Hebouhebou koua ane idia abia neganai momo be moale dainai mai taitai danu ane idia abia, unai murinai guriguri dokona idia karaia, bena tadikaka be mai edia moale bona lalohisihisi ida edia gabu dekenai idia giroa. Edia lalokau bona hetura karana be taunimanima ese idia itaia. Basi taria taudia momo ese hebou lao taudia edia kara idia hanamoa. Idia hoa badina gau ibounai idia hegaegaelaia namonamo dainai hora rua sibona lalonai basi ibounai 953 be Exhibition Center idia rakatania bona motuka ma haida ese edia dala idia koua lasi! Hebou lao taudia edia kara be trein haheaua taudia bona taoni lalonai basi taria taudia danu ese idia laloa bada. Herevahereva namodia momo idia hamatamaia, bona haroro namona idia henia.

“Tano Gagaena ai Ia Noho Ranu Gabuna”

Aposetolo Paulo ese iena Keristani tadikaka ia hagoadaia, ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. . . . Umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Heberu 10:​24, 25) Momokani, inai hebouhebou idauna be hahegoada bada ia henia ibounai dekenai, taihu ta ia gwauraia bamona, ia gwau ia be “tano gagaena ai ia noho ranu gabuna.” Togo ena brens amo idia mai tadikaka be inai bamona idia torea: “Unai hebouhebou murinai, mai emai goada, helaro bona lalo-goada ida ai giroa, bona ai ura dikadika Iehova ena hesiai gaukara dekenai do ai moale noho.” Sekit naria tauna ta ia gwau: “Idia lalohisihisi taudia be mai moale ida idia giroa.” Ma ta ia gwau: “Tadikaka edia ura idia habadaia bona idia hagoadadia.” Headava tauna ta mai ena adavana be edia revareva lalonai idia gwau: “Ai mamia ai be Iehova ena orea kahirakahira momokani dekenai ai lao, guna unai bamona ai mamia lasi.”

Salamo torea tauna ia gwau: “Lau gini goada noho, bona lau hadikaia totona gauna ta ia noho lasi. Lohiabada e, oiemu bese taudia, edia hebou badana lalonai, lau ese oi do lau hanamoa bada.” (Salamo 26:12) Unai bamona Keristani hebouhebou ese ibounai ia hagoadaia lauma dalanai do idia gini goada ena be hekwakwanai momo idia vara. Taihu ta ese unai ia hamomokania, ia gwau: “Herevana dahaka hisihisi idia vara, unai bamona nega idaudia be iseda kudouna lalonai momokani idia noho bona ita do idia hagoadaia hanaihanai.” Unai hegeregerena, loaloa naria tadikaka ia gwau: “Nega dikadia idia mai neganai, unai hebouhebou, gabeai Paradaiso lalonai do ia vara gauna ena mamina ia havaraia hebouhebouna, ai lalotao bona unai ese ai do ia durua ai haheauka totona.”

Salamo 96:7 ia gwau: “Tanobada ena bese taudia ibounai e, Lohiabada do umui hanamoa. Iena hairaina bona iena goada badana do umui hanamoa.” Daradara be lasi, France dekenai brens opesi matamatana idia hahelagaia be Iehova ese ia karaia kwalimu momokani karana. Ena be taunimanima momo idia ura lasi bona idia dagedage, ia sibona ese unai gaukara ia hagugurua diba. Iehova ena Witness taudia France dekenai be idia ura momokani ‘Keriso ena lalokau lalonai do idia noho’ bona ‘edia diari do idia hahedinaraia.’ (Ioane 15:9; Mataio 5:16) Hahelagaia program dekenai idia lao taudia ibounai be Salamo torea tauna ena hemami idia abia, ia gwau: “Inai be Lohiabada ena kara, ita itaia noho, bona ita hoa noho.”​—⁠Salamo 118:⁠23.

[Picture on page 26]

Lloyd Barry

[Picture on page 26]

Daniel Sydlik

[Picture on page 26]

Villepinte Exhibition Center dekenai taunimanima 95,888 ese program idauna dekenai idia lao

[Pictures on page 28]

Idia lao taudia tausen momo be idia gini o foloa dekenai idia helai idia kamonai totona