Edena Bamona Oiemu Natudia Oi Gimaia Diba?

LAGANI momo ai, Wernera be iena noho gabuna ena sikuli ta dekenai ia lao murinai, ma matamata taudia 3,000 ida Sao Paulo, Brazil dekenai, edukeisen badana ia abia matamaia. Unai be nega ginigunana ia itaia iena sikuli turadia be drag idia hoihoilaia bona idia ania. Ia maragi dainai, karaharaga edia mauri lagani be bada stiuden taudia ese ia idia hahemaraia bona dika idia havaraia diba orea vareai karadia idia karaia ia dekenai.

Werner ena taihuna Eva ese hekwakwanai ia davaria danu. Ia ura gaukara namo hereana ia karaia dainai, ia stadi goadagoada ela bona ena tauanina bona ena lalona edia goada idia ore vaitani. Ma matamata taudia hegeregerena, Werner bona Eva ese heduru idia abia be namo, ta ese edia tauanina ena goada bona edia lalona ena goada ia gimaia totona. Oiemu natudia ese edena heduru idia abia be namo? Edena bamona idia oi durua diba tau bona hahine edia maduna idia huaia totona? Momokani, edena bamona vaira negana oi ura oiemu natudia totona?

Oi Ubudia Sibona Lasi

Hari inai negai tama sina ese edia natudia idia gimaia gaukarana badana mani nega sisina oi laloa. Ruma bese edia mauri dalana be ia dika ia lao dainai, bona hari momo idia ogogami dainai, tano momo ai, dala dekenai idia mahuta natudia edia namba be ia bada ia lao. Bisinesi taudia haida ese edia bisinesi lalonai memero kekeni momo idia gaukaralaia kerere badina tama sina ese unai kara amo edia natudia idia gimaia lasi. Drag ania karana ese matamata taudia momo ia hadikaia. Hegeregere, Brazil dekenai, matamata merona ta ese drag ia ania matamaia neganai, maino be iena ruma amo ia boio. Ena tama sina ese idia lalo hekwarahi sibona lasi, to moni dalana ai idia hekwarahi ia namo ia lao totona, bona hebogahisi lasi drag idia hoihoilaia taudia be edia ruma ai idia lao drag ena davana idia tahua totona.

Ena be mauri ena metau gaudia idia davaria, to tama sina momo idia hekwarahi noho edia natudia dekenai aniani, dabua, bona ruma idia henia totona sibona lasi, to dagedage, drag ania karana, bona ma hekwakwanai haida amo idia gimaia totona. Unai be hekwarahi namona, to ia sibona ia hegeregere, a? Lalona hadikaia karadia, bona lauma dalana hadikaia karadia amo idia gimaia be edena bamona? Tama sina momo idia diba, anina namona idia havaraia totona, edia natudia be edia turadia bona moale karadia idia abia hidi karana lalonai idia durua be namo. To, edena bamona tama sina ese gari kava karana bona matahakani henia lasi karana do idia hahegeregerea namonamo? Hereva gabena dekenai idia noho haeredia mani oi laloa.

[Footnote]