Hesiai Gaukara Helagadia Laloa Bada

HESIAI gaukara helagadia be do ita laloa bada. Idaunega Iuda ai hahelaga taudia be Iehova ena dubu helagana dekenai idia karaia gaukarana idia laloa maragi neganai, ia gwau henidia. (Malaki 1:​6-14) Bona Israela dekenai haida ese Nasiri taudia idia doria hesiai gaukara helaga lalonai idia huaia maduna do idia laloa maragi neganai, Iehova ese unai kara dika Israela taudia ia gwau henidia. (Amosa 2:​11-16) Keristani taudia momokanidia be hesiai gaukara helagadia idia karaia danu bona idia lalodia bada. (Roma 12:⁠1) Unai hesiai gaukara be idauidau, bona idia ibounai be mai anina bada.

Iesu be tanobada dekenai iena hahediba taudia ida ia do noho neganai, Dirava ena Basileia harorolaia gaukarana ia hadibadia. Gabeai, idia harorolaia sivaraina be tanobada ena gabu ibounai dekenai do idia gwauraia. (Mataio 28:​19, 20; Kara 1:⁠8) Hari inai nega dokona lalonai unai haroro gaukara be mai karaharaga lalohadaina ida idia harorolaia.

Iehova ena Witness taudia ibounai be unai gaukara idia karaia. Idia handred tausen momo be painia gaukara idia moalelaia. Mai anina bada tanobada ibounai gaukarana idia durua totona, tausen momo be spesel ful-taim hesiai gaukara, Betele, sekit bona distrik, o misinari gaukarana, idia karaia. Idia ura unai spesel ful-taim hesiai gaukara idia karaia noho taudia be reana dahaka hekwakwanai idia davaria?

Famili Lalonai Hekwakwanai Badadia Idia Vara Neganai

Spesel ful-taim hesiai gaukara lalonai ia do vareai lasi neganai, ta ese ena mauri lalonai gau haida ia haidaua guna. Taunimanima ibounai ese unai idia karaia diba lasi. Reana Baibel ia gwauraia maduna ese ta ena dala ia koua. To, spesel ful-taim hesiai gaukara idia karaia taudia ese famili hekwakwanai ta idia davaria, reana edia tama sina burukadia dekenai gau ta ia vara neganai, be edena bamona? Henunai idia noho Baibel ena hakaua herevadia bona sisiba ese ia durudia.

Iseda mauri ibounai lalonai eda hetura karana Iehova ida ita laloa bada be namo. (Hadibaia Tauna 12:13; Mareko 12:​28-30) Ita abia helaga gaudia do ita lalodia bada. (Luka 1:​74, 75; Heberu 12:16) Nega ta, ena mauri dalana ia haidaua be namo tauna dekenai Iesu ia gwau Dirava ena Basileia harorolaia gaukarana ia karaia goadagoada be namo. Toana be, unai tauna be ia ura unai gaukara do ia karaia lasi ela bona ena tamana ia mase murinai. (Luka 9:​59, 60) To danu, bema ta ia laloa gau ibounai be Dirava dekenai ia gwauhamatalaia bona “iena tamana bona sinana ia durua lasi” vadaeni Iesu ia gwauraia hedinarai tauna ena lalohadai be kerere. (Mareko 7:​9-13) Aposetolo Paulo ia hahedinaraia ‘ta ese iena varavara do ia naria’ anina be tamana, sinana, bona tubudia ia naria ena maduna be mai anina bada.​—⁠1 Timoteo 5:​3-8.

Unai ena anina be hekwakwanai badadia idia vara neganai, spesel ful-taim hesiai gaukara idia karaia taudia be edia gaukara do idia rakatania bona heduru do idia henia, a? Gau momo be mai anina unai henanadai ena haere dekenai. Ta ta be sibona ena lalona do ia hadaia be namo. (Galatia 6:⁠5) Momo herea idia laloa, ena be edia gaukara idia ura henia bada, to aonega dalana be edia tama sina ida do idia noho bona idia durudia. Dahaka dainai? Reana hekwakwanai be ia bada momokani, reana famili tauna ma ta ia noho lasi ia durudia totona, eiava edia kongregesen ia hegeregere lasi ia durudia totona. Haida be edia tamana sinana idia naria lalonai painia gaukara idia karaia diba danu. Ma haida be edia famili hekwakwanai ia ore murinai, spesel ful-taim hesiai gaukara idia karaia lou diba. To, nega momo, dala ma haida ai heduru idia henia diba.

Edia Maduna Idia Huaia

Hekwakwanai badadia idia vara neganai, spesel ful-taim hesiai gaukara idia karaia taudia haida be heduru idia henia diba ena be edia gaukara idia rakatania lasi. Mani unai haheitalai haida ita itaia.

Tadikaka ta mai ena adavana be sekit bona distrik gaukara idia karaia murinai, lagani 1978 ai, Iehova ena Witness taudia edia hedikwota dekenai idia vareai Betele gaukara idia karaia totona. Tadikaka be tiokratik orea lalonai maduna badana ia huaia. To iena tama sina be heduru idia abia danu be namo. Inai Betele tadikaka bona ena adavana be lagani ta ta lalonai nega toi o hani idia lao ena tama sina idia durua totona. Unai be kilomita 3,500 bamona idia lao bona idia lou mai. Idia ese ruma ta idia haginia ena tama sina edia dabu gaudia durua totona. Idia gorere bada herea neganai idia lao idia durudia totona. Lagani 20 bamona lalodiai edia holide negadia kahirakahira ibounai idia gaukaralaia unai maduna idia huaia totona. Ena tama sina idia lalokau henia bona idia matauraidia, to edia hesiai gaukara helagana idia laloa bada danu.

Tadikaka ma ta be lagani 36 lalodiai loaloa naria gaukara ia karaia murinai, ia gwau ena mauri lalonai hekwakwanai aukana ta ia davaria. Iena ravana hahine, Iehova ia abidadama henia hahinena ena mauri lagani be 85, be haida ida ia noho be namo idia durua totona. Unai neganai, ena natudia momo idia laloa idia danu ia noho be hegeregere lasi. Varavara ta ese unai loaloa naria tauna ia hamaoroa ia bona ena adavana ese edia gaukara do idia rakatania bona, famili totona, ena ravana do idia naria be namo. To unai tadikaka bona ena adavana be edia mai anina bada gaukarana idia rakatania lasi, bona idia ese ena ravana ena dabu gaudia idia dadaraia lasi. Unai nega amo lagani 9 lalodiai ia be idia danu ia noho. Guna, edia motuka murinai idia veria loaloa diba rumana dekenai idia noho, bena gabeai sekit idauidau ese idia henia ruma idauidau dekenai idia noho. Unai neganai unai tadikaka be distrik naria tauna, bona nega daudau lalodiai ia loaloa ena gaukara ia karaia totona, bona ena adavana ia noho bona mai ena lalokau ida ena sinana ia naria. Wiki ta ta ai Sunday hebou murinai, tadikaka be gabu daudau amo ia giroa lao ia durudia totona. Edia hekwakwanai idia diba taudia momo ese unai tadikaka bona ena adavana idia karaia karana dainai hanamoa herevadia idia gwauraia. Edia kara dainai, gabeai famili taudia haida ese heduru idia henia danu. Unai tadikaka bona ena adavana be sibona edia ura gaudia idia dadaraia taudia bona edia hesiai gaukara helagana idia dogoatao dainai, Iehova ena taunimanima tausen momo be namo bada idia davaria noho.

Famili Edia Heduru Ida

Famili taudia ese spesel ful-taim hesiai gaukara ena namo idia laloa bada neganai, idia heduru heheni bena unai amo haida be unai gaukara idia karaia diba.

Unai bamona famili taudia idia heduru heheni karana ese West Africa dekenai misinari gaukara idia karaia Canada tauna bona ena adavana ia durua. Idia naria lasi ela bona hekwakwanai badana ta do ia vara, bona idia laloa lasi gau ta do ia vara lasi. Lasi. Idia hegaegae totona Watchtower Bible School of Gilead idia do lao lasi neganai, tadikaka be iena tadina ida bema edia sinana ia gorere eiava ia raka diba lasi ena naria dalana idia kikilaia. Ena tadina be ena sinana ia lalokau henia bona misinari gaukara ia laloa bada dainai, ia gwau: “Lau be mai egu famili bona mai egu natudia hari. Gabu daudau dekenai lau lao diba lasi oi karaia gaudia lau karaia totona. Unai dainai bema Mama dekenai gau ta ia vara, lau ese do lau naria.”

South America dekenai misinari gaukara idia karaia tadikaka bona ena adavana be taihu ena sinana buruka naria totona famili taudia amo heduru bada idia abia. Taihu ena kakana bona ena adavana ese edia sinana idia naria ela bona ena kakana be gorere dikana ta ia davaria. Vadaeni dahaka ia vara? Edia lalo-hekwarahi hamaragia totona, ena nakimi be inai bamona ia torea: “Lau bona egu natudia ai do mauri noho lalonai, umui ese emui misinari gaukara do umui rakatania lasi.” Famili amo heduru ma ta idia abia danu badina taihu ena tadina ta bona ena adavana ese edia gabu idia rakatania bona edia sinana ia noho gabuna dekenai idia lao idia naria totona, bona unuseniai idia noho ela bona sinana ia mase. Unai be heduru heheni karana hereadaena! Idia ibounai ese misinari gaukara idia durua.

Mai Edia Ura ida Iehova Dekenai Idia Henia Tama Sina

Nega momo tama sina idia hahedinaraia idia be hesiai gaukara helagadia idia laloa bada. Edia natudia be edia dava bada kohu bona idia amo Iehova idia hanamoa diba. (Aonega Herevadia 3:⁠9) Keristani tama sina momo ese edia natudia idia hagoadaia ful-taim hesiai gaukara lalonai idia vareai totona. Bona haida be Hana bamona, ia ese ena natuna mero Samuela ia henia Iehova ena hesiai gaukara ia karaia “hanaihanai” totona, anina be “iena mauri dinadia ibounai lalonai.”​—⁠1 Samuela 1:​22, 28.

Unai bamona sina ta ese ena natuna kekeni Africa dekenai be inai bamona ia tore henia: “Oi abia hahenamo namo hereana dainai, Iehova ai tanikiu henia. Ai ura henia bada gauna oi abia vadaeni.” Bona ma nega ta ai ia gwau: “Momokani ita noho hebou lasi, to Iehova ese oi ia naria dalana ai itaia neganai ai moale bada!”

Ecuador dekenai ia noho misinari ta be ena tama sina burukadia durua daladia idauidau ia herevalaia murinai, ia gwau: “Lau laloa lau bona egu adavana ese ai abia hahegoada badana be egu tamana ena guriguri. Ena mase murinai, egu sinana ese ai ia hamaoroa: ‘Dina ta ta iboudiai emu tamana be Iehova ia guriguri henia dala do ia kehoa umui be emui gaukara do umui karaia noho totona.’ ”

California, U.S.A. dekenai idia noho buruka tadikaka mai ena adavana idia moale badina edia natuna merona ta be ful-taim hesiai gaukara ia karaia. Iena sinana ia mase neganai unai natuna mero bona ena adavana be Spain dekenai idia noho. Famili taudia haida idia laloa edia tamana naria totona gau haida do idia hegaegaelaia. Idia bisi bada herea edia moni gaukara dekenai bona edia natudia idia naria dainai, idia laloa unai maduna do idia huaia diba lasi. To, idia ese spesel ful-taim hesiai gaukara ia karaia merona bona ena adavana idia hereva henidia goadagoada idia giroa mai edia tamana idia naria totona. To, edia tamana, ena be iena mauri lagani be 79, to ena tauanina be goada, bona lauma gaudia ia laloa maoromaoro danu. Famili hebou ta dekenai, haida be edia lalohadai idia gwauraia hedinarai murinai, edia tamana ia toreisi bona mai goada ida, ia gwau: “Lau ura Spain dekenai do idia giroa lao bona idia gaukara noho.” Idia giroa lao, to dala idauidau ai idia durua bada danu. Hari idia ese sekit gaukara idia karaia noho Spain dekenai. Unai famili hebouna murinai, famili taudia ma haida ese unai tadikaka bona ena adavana edia hesiai gaukara idau tanona dekenai idia laloa bada. Lagani haida murinai, mero ma ta ese ena ruma dekenai tamana ia abia lao bona ia naria ela bona ia mase.

Pennsylvania, U.S.A. dekenai, lagani 40 ia painia horoa tadikaka ta ena mauri lagani be 90 ia hanaia neganai, iena adavana be gorere badana ia davaria bona ia mase. Ena natudia be mero tamona bona kekeni toi, bona lauma dalanai idia abia natudia be momo danu. Iena natuna kekeni ta be lagani 40 lalodiai ful-taim hesiai gaukara ia karaia, iena adavana danu misinari gaukara ia karaia, loaloa naria gaukara bona Betele gaukara ia karaia. Ia ese dala ia karaia ena tamana ese heduru namona ia abia totona. Kongregesen tadikaka ese idia durua danu ena tamana be Kingdom Hall ai hebou dekenai ia lao diba totona. Gabeai, ena adavana ia mase neganai, tamana ia nanadaia bema ia ura Betele do ia rakatania bona ia do ia naria. Tamana be helaga gaudia ia laloa bada, bona ia laloa ma dala haida amo iena dabu gaudia ia abia diba. Unai dainai ia gwau: “Unai do oi karaia be ia dika, bona bema gwaumaoro lau henia unai oi karaia totona unai be ia dika momokani.”

Heduru Idia Henia Kongregesen

Kongregesen haida be heduru bada idia henia spesel ful-taim hesiai gaukara idia karaia taudia edia tama sina burukadia idia naria totona. Idia ese lagani momo lalonai unai gaukara idia karaia taudia idia laloa bada. Ena be Baibel ese ia gwauraia maduna natudia amo idia kokia diba lasi, to unai kongregesen ese edia maduna ia hamaragia sisina bona unai amo edia natudia ese edia spesel ful-taim hesiai gaukara idia rakatania lasi.

Germany tadikaka bona ena adavana be lagani 17 lalodiai idau tanona dekenai idia gaukara, bona nega bada be loaloa naria gaukarana idia karaia. Unai nega lalonai tadikaka ena sinana buruka ena dabu gaudia idia bada idia lao. Lagani ta ta edia holide negana idia gaukaralaia ia idia durua totona. Ia kahirakahira dekenai idia noho Witness taudia ese mai lalokau ida heduru idia henia danu. Bena ena sinana ia gorere dikadika negana ta ai, ful-taim hesiai gaukara karaia tadikaka bona ena adavana be ia ida idia noho neganai, unai gabu ena kongregesen ena elda taudia ese dala idia karaia idia ida do idia herevahereva totona. Idia be unai tadikaka bona ena adavana ese hanaihanai iena sinana totona idia karaia gaudia idia diba. Danu, unai tadikaka bona ena adavana ese idia karaia spesel hesiai gaukara idia laloa bada. Unai dainai elda taudia ese tadikaka ena sinana naria totona idia karaia program idia hahedinaraia bena idia gwau: “Oiemu sinana umui durua bada herea vadaeni, to umui hegeregere lasi heduru ma haida umui henia totona; umui do ai durua unai amo Spain dekenai emui gaukara umui karaia noho diba.” Idia hanaia lagani 7 lalodiai, unai elda taudia ese heduru idia do henia noho.

Unai hegeregerena, lagani 1967 amo Senegal dekenai hesiai gaukara ia karaia tadikaka be ena tamana ia noho kongregesen ese mai lalokau ida idia durua bada. Hekwakwanai badana ta ia vara neganai, ena lalokau adavana ena heduru ida, unai tadikaka be United States dekenai sibona ia giroa lou ena tama sina ia durudia totona. Ia davaria hua haida unuseniai do ia noho be namo. Unai hekwakwanai be ia auka momokani, to ia karaia diba gauna ia karaia murinai, kongregesen ese heduru ia henia bona unai amo iena misinari gaukara ia karaia noho diba. Lagani 18 lalodiai, unai kongregesen be mai lalokau ida dala idauidau momo ai heduru idia henia, ena tamana (ena be idia momo ia laloaboio) idia naria guna, bena gabeai ena sinana idia naria. Unai ena anina be edia natuna mero be maduna ta ia huaia lasi, a? Lasi; nega momo ia ese Senegal amo ia mai bona ena holide negana ia gaukaralaia ia durua totona. To kongregesen lalonai momo idia moale badina idia diba idia ese Senegal dekenai idia gaukara goadagoada tadikaka bona ena adavana idia durua noho spesel ful-taim hesiai gaukara idia karaia totona.

Iesu ia gwau sivarai namona totona gau ibounai idia rakatania taudia be tadikaka, taihu, sina, bona natudia handred mai kahana do idia davaria. (Mareko 10:​29, 30) Iehova ena hesiai taudia bogaraginai unai be ia vara momokani. Benin, West Africa dekenai hesiai gaukara ia karaia tadikaka bona ena adavana ese unai idia mamia. Edia tama sina edia kongregesen dekenai Witness rua ese idia hamaorodia edia tama sina totona do idia lalo-hekwarahi lasi, idia gwau: “Umui emui tama sina be aiemai tama sina danu.”

Oibe, dala momo ai ita hahedinaraia diba ita be hesiai gaukara helagadia ita laloa bada. Unai oi hahedinaraia badabada daladia haida idia noho, a?

[Pictures on page 26]

Idia be sibona idia henia spesel ful-taim hesiai gaukarana idia karaia totona