Maoro Bona Dika Edia Idau Oi Diba, A?

“Lau sibona ese taunimanima 25 bamona lau hamasea. . . . Hanuaboi bona dina ibounai egu lalona dekenai unai lau itaia noho. Egu nihi ese lau idia hagaria. . . . Reana gabu ta ai lau lao bona ta ena vairana lau itaia neganai, lau hamasea taudia lau laloa lou. Unai lau itaia namonamo diba, ia be hari dina, harihari sibona ia vara hegeregerena. . . . Sibona egu kara lau gwauatao diba lasi.”​—V.S.

“Lau idia hamaoroa unuseniai lau lao bona inai henia taudia lau hamasea. . . . Lau laloa lasi idia be tatau, hahine, bona natudia. . . . Unai negana ai bona hari danu lau laloa lau idia oda henia hegeregerena lau kara, bona lau abia haheganina lau badinaia bona unai dainai lau lalohisihisi lasi.”​—W.C.

MARCH 16, 1968 ai, ataiai idia noho herevadia idia gwauraia tatau ruaosi be kara ta lalonai idia vareai, gabeai taunimanima ese unai kara idia gwauraia, tuari lalonai idia karaia taravatu utua karana badana ta. Idia be ma tuari taudia haida ida Vietnam hanuana maragina ta lalonai idia vareai bona taunimanima handred momo idia hamasea​—hahine, natudia, bona tatau burukadia danu. To unai tuari taudia ruaosi edia hemami idaudia mani oi laloa. Ia hedinarai goevagoeva, tuari tauna ginigunana ese ia karaia karana ia lalohisihisilaia bada. Iharuana ia laloa iena kara ena badina be maoro. Dahaka dainai taunimanima rua edia lalohadai gau tamona dekenai be idia idau vaitani?

Haere be edia lalona ena mamina​—Dirava ese ia henia gauna bona ia amo heduru ita abia, ita sibona, iseda kara, bona iseda ura ita laloa namonamo totona. Lalona ena mamina ena anina be iseda lalona ai ita diba dahaka kara be maoro bona dahaka kara be dika.

Dala ta idia abia hidi neganai, taunimanima haida idia gwau: “Namona be emu lalona ena mamina ese oi ia hakaua.” To, madi, lalona ena mamina be nega ibounai ita abidadama henia diba lasi. Oibe, taunimanima momo ese kara dika rohorohodia idia abia dae eiava idia karaia, bona edia lalona ena mamina idia hadikaia lasi. (Ioane 16:2; Kara 8:1) England toretore tauna Samuel Butler be nega ta ia gwau, lalona ena mamina be “idia ura lasi kamonai taudia ia hadibaia noho lasi.”

Oi ese oiemu lalona ena mamina oi abidadama henia diba, a? Hereva gabena ese do ia hahedinaraia, haere be oiemu lalona ena mamina oi hadibaia hegeregerena.

[Picture Credit Line on page 3]

Upper war scene: U.S. Signal Corps photo