“Daika ese Hanuaboi Ena Paripari Ia Havaraia?”
LAGANI 1800 C.E. murinai ia noho niusi ia ripotilaia tauna ta ese hanuaboi ena paripari ia gwauraia “hodahoda ese ia havaraia, tanobada ena ranu herahera gauna.” Iseda Havaraia Tauna ese idaunegai iduhu kwarana tauna Iobu ia nanadaia: “Daika ese hanuaboi ena paripari ia havaraia?” (Iobu 38:28, NW) Dirava be Iobu ia hadibaia lou mai anina bada hanuaboi pariparina be Ia ese ia havaraia.
Ia be herahera bamona ia diaridiari gauna sibona lasi, to Baibel ese hanuaboi paripari be hahenamo, natuna havaraia siahuna, aniani o kohu momo, bona hamauria noho karana ida ia herevalaia. (Genese 27:28; Deuteronomi 33:13, 28; Sekaraia 8:12) Israela tanona ena siahu bona medu lasi negana ai, “Heremona Ororo ena hanuaboi ranu” ese tano ena aniani ia hamauria noho, bona unai amo taunimanima idia mauri noho diba. Heremona Ororona be au badadia bona ava ese idia koua bona ena dorina dekenai sinou ia noho bona hanuaboi ena hodahoda amo hanuaboi ena paripari ia do havaraia noho. Salamo torea tauna Davida ese unai hanuaboi pariparina ese ia havaraia mamina namona be Iehova idia tomadiho henia tadikaka danu noho hebou karana ena moale ida ia hahegeregerea.—Salamo 133:3.
Peroveta tauna Mose ena hadibaia herevadia Israela besena dekenai be idia metau lasi bona mamina namona ia henidia, hanuaboi pariparina bamona. Ia gwau: “Lauegu hadibaia hereva, be hanuaboi ena paripari bamona do ia hedinarai, medu maragina rei matamata ena latanai bamona, medu bada aniani avadia edia latanai bamona.” (Deuteronomi 32:2) Hari inai negai, Iehova ena Witness taudia be mauri ia henia sivaraina, Dirava ena Basileia ena sivarai namona unai, idia harorolaia noho tanobada ibounai dekenai. (Mataio 24:14) Dirava be taunimanima ia boiria: “Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) Tanobada ena bese iboudiai amo taunimanima milioni momo be Dirava amo lauma dalanai inai mamina hanamoa ranuna idia abia noho, unai ese mauri hanaihanai do ia henidia.