Edia Gaukara Dainai “Idia Matauraidia”

APOSETOLO Petero ese ena Keristani tadikaka ia sisiba henidia, ia gwau: “Dirava idia diba lasi taudia edia vairanai, kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa.” (1 Petero 2:12) Lagani momo lalonai Iehova ena Witness taudia Italy dekenai be taunimanima vairanai kara namodia idia hahedinaraia. Iesu ena hereva ‘ruma ena ataiai dekena amo do umui haroro’ hegeregerena, edia Keristani gaukara ibounai idia hunia lasi, to taunimanima ese idia itaia diba gabudia dekenai idia karaia. (Mataio 10:27; Ioane 18:20) Unai dainai, Italy dekenai loea tauna ta bona pris tauna ta idia gwau Iehova ena Witness taudia be ‘sibodia edia lalohadai idia badinaia goadagoada tomadiho orea koikoina’ bona idia be “taunimanima idia tarapua hunia oreadia” ida idia gwauraia hebou neganai, Witness taudia ese unai hereva koikoidia dainai kota dekenai idia abidia lao.

Kota ginigunana idia karaia neganai, kota ia gwau unai loea tauna bona pris tauna be taravatu ta idia makohia lasi. To July 17, 1997 ai, Venice Court of Appeals ese unai kota ginigunana ena hereva ia haidaua, bona ia gwau unai tatau rua be mai edia kerere. Unai Court of Appeals ia gwau: “Idia halasia herevadia rua lalonai hereva haida idia noho bona unai hereva be ‘Iehova ena Witness taudia’ edia tomadiho oreana idia badinaia taudia edia ladana ia hadikaia diba. Toana be unai hereva rua idia halasia badina idia ura taunimanima ese unai orea idia badinaia taudia do idia dadaraia.” Unai kota ia gwau idia halasia hereva ruaosi “be sivarai torea dalana bona ma haida edia namo o dika herevalaia karana ena taravatu ia utua.” Kota ese unai ladana idia hadikaia taudia rua ia fainia bona ia oda henidia kota ena davana ibounai do idia karaia, unai be Witness taudia edia kota rua edia davana danu.

Venice Court of Appeals ena hahemaoro pepana ai inai hereva idia torea: “[Italy ena] konstitusen ese ia gwauraia maoro gaudia ibounai be maka tamona dekenai ita badinaia bona ita naria neganai, haida edia kara haheaukalaia lasi bona tomadiho goadalaia mai lalo-dika ida karana do ita koua diba.” Unai hahemaoro hereva ia hahedinaraia Iehova ena Witness taudia edia gaukara be hehuni gauna lasi eiava ia be tomadiho orea koikoina ta lasi. Unai kota ia gwau, “Witness taudia be hehuni oreadia ida idia gwauraia hebou ese histori ese ia hamomokania gauna ia matauraia lasi, badina inai tomadiho oreana be siti momo dekenai ia noho bona gabu ibounai dekenai Sunday bona ma holide negadia haida lalonai ena memba taudia ese taunimanima be edia orea ena memba taudia ai idia halaoa gaukarana be taunimanima momo idia diba bona edia hekwarahi dainai idia matauraidia, ena be reana ta be edia hahediba herevadia ia ura lasi.” Italy dekenai Iehova ena Witness taudia edia haroro goadagoada karana bona edia haheitalai namona ese idia inai henia karana ia koua.​—⁠Mataio 5:​14-16; 1 Petero 2:⁠15.