Oi Laloatao, A?

Vanegai idia halasia Gima Kohorona magasin oi lalodia namonamo, a? Bema unai oi karaia, do oi ura inai hereva haida oi laloa lou:

◻ Badina be dahaka, Dirava ese tau ta dekenai dahaka do ia vara ia gwauraia hidi vadaeni hahediba herevana be ia maoro lasi?

Bema Adamu do ia kara dika be Dirava ese guna ia diba vadaeni, bona ia gwauraia hidi anina be Iehova ese tau ia havaraia neganai, ia be kara dika havaraia tauna ai ia lao danu, bona taunimanima edia dika bona hisihisi ibounai be ia ena maduna. Unai lalohadai be Dirava ena kara ida ita hatamonaia diba lasi. Ia be lalokau Diravana bona ia ese kara dika ia inai henia. (Salamo 33:5; Aonega Herevadia 15:​9; 1 Ioane 4:⁠8)​—⁠4/15, rau 7, 8.

◻ Isaia 2:​2-4 ena hereva hegeregerena, taunimanima bese momo amo be dahaka idia karaia noho?

Iehova ena orea dekenai idia lao idia tomadiho henia totona neganai, idia be ‘tuari dibaia’ karana idia rakatania danu, badina idia edia abidadama be Dirava ena guba tuari oreadia dekenai idia atoa, idia do idia gimaia totona. Unai tuari oreadia be idia gini hegaegae vadaeni maino idia inai henia taudia ibounai idia kokia totona.​—⁠4/15, rau 30.

◻ Ioela 3:​10, 11 ena hereva hegeregerena, Dirava ena tuari taudia be daidia?

Nega 280 bamona, Baibel ese Dirava momokanina ia gwauraia “tuari oreadia edia Iehova.” (2 King Taudia 3:​14, NW) Unai tuari oreadia be guba anerudia edia orea, idia hegaegae vadaeni Iehova ena ura idia karaia totona.​—⁠5/1, rau 23.

◻ Iehova ia ura Iobu ese ia idia kara dika henia taudia totona do ia guriguri karana amo dahaka ita dibaia diba? (Iobu 42:⁠8)

Iobu be ena gorere amo ia do namo lasi neganai, Iehova ia ura ia idia kara dika henia taudia totona do ia guriguri. Unai ese ia hahedinaraia Iehova ia ura ita idia kara dika henia taudia do ita gwauatao guna, bena ia ese iseda kara dika do ia gwauatao. (Mataio 6:12; Efeso 4:32)​—⁠5/1, rau 31.

◻ Iamesi ena hereva: “Nega ibounai metau bona hisihisi lalonai do umui haheauka noho,” ena anina be dahaka? (Iamesi 1:⁠4)

Haheauka ese gaukara ta ia karaia. Ena gaukara be iseda kara ibounai do ia hanamoa. Unai dainai, hahetoho be Baibel ena taravatu utua dalana ta amo ita koua lasi neganai, iseda abidadama ia tohoa bona ia hanamoa.​—⁠5/15, rau 16.

◻ Badina be dahaka Dirava ese taunimanima edia hekwakwanai do ia kokia totona ia naria daudau?

Iehova ese nega ia laloa dalana be idau bona ita ese nega ita laloa dalana be idau. Hanaihanai ia noho Diravana dekenai, nega ena lata Adamu ia havaraia amo ema bona hari be pura tamona sibona bamona. (2 Petero 3:⁠8) To herevana edena dala ai nega ita laloa, idia hanaia dina ta ta ese Iehova ena lohia siahuna ia hamomokania dinana kahirakahira dekenai ita ia abia lao.​—⁠6/1, rau 5, 6.

◻ Dahaka ese Iehova ena Witness taudia edia lalona ia doria?

Iehova ese ena taunimanima ia hadibaia dainai, idia be idau, idia lalokau heheni bona edia dekena taudia idia lalokau henia, sibodia idia lalokau henia hegeregerena. (Isaia 54:13) Lalokau ese Iehova ena Witness taudia ia doria dainai, ena be taunimanima ese idia kamonai henidia lasi eiava idia dagedage henidia, to idia haroro noho. (Mataio 22:​36-40; 1 Korinto 13:​1-8)​—⁠6/15, rau 20.

◻ Iesu ena hereva: “Do umui raka goada, iduara maragimaragi dekena amo do umui raka vareai,” ena anina be dahaka? (Luka 13:24)

Iesu ena hereva ena anina be do ita hekwarahi, iseda gaukara do ita habadaia. Iena hereva ese ia hahedinaraia danu reana haida idia ura sibodia idia abia hidi negana ai, eiava idia ura henia hekwarahi lasi dalana ai, ‘iduara dekenai idia raka vareai.’ Unai dainai ita ta ta ese sibona do ita nanadaia, ‘Lau be lau gaukara namonamo bona gaukara goadagoada noho, a?’​—⁠6/15, rau 31.

◻ Do idia toreisi lou taudia be edena bamona “Dirava ese ia kota henia, edia kara buka lalonai ia torea hegeregerena”? (Apokalupo 20:12)

Unai buka be guna idia karaia gaudia edia sivarai bukadia lasi; idia mase neganai, edia mauri lalonai idia karaia kara dika ese idia guidia lou lasi. (Roma 6:​7, 23) To, toreisi lou taudia be Adamu amo idia abia kara dika henunai idia do noho. Unai dainai, unai buka dekenai Dirava ena hahediba herevadia do idia noho, taunimanima ibounai ese unai do idia badinaia be namo, Iesu Keriso ena boubou amo namo bada idia abia totona.​—⁠7/1, rau 22.

◻ Iesu ena Samaria tauna namona ena parabole amo dahaka gaudia ita dibaia? (Luka 10:​30-37)

Iesu ena parabole ese ia hahedinaraia kara maoromaoro momokani tauna be Dirava ena taravatu ia badinaia sibona lasi, to ena kara ia tohotohoa danu. (Efeso 5:⁠1) Ia hahedinaraia danu iseda dekena tauna lalokau henia karana ese bese, sene, bona tomadiho daladia idauidau ia laloa lasi. (Galatia 6:​10)​—⁠7/1, rau 31.

◻ Edena dala toi amo emu natudia oi diba namonamo, bona sisiba oi henidia diba?

(1) Emu natudia ese moni gaukara namona do idia abia hidi totona oi durudia; (2) sikuli bona gaukara gabuna dekenai do idia davaria lalo-hekwarahi idia haheaukalaia totona oi hegaegaelaidia; (3) lauma gaudia idia tahua karana oi hahedinaraia.​—⁠7/15, rau 4.

◻ Badina be dahaka Dirava be “dina namba 7” ai ia laga-ani? (Genese 2:​1-3)

Dirava be ia hesiku dainai ia laga-ani lasi. To, tanobada dekenai ena havaraia gaukarana ia haorea, ia hamatamaia gaudia be do idia guguru bona hairai momokanina do idia abia, ia idia hanamoa bona abia isi totona.​—⁠7/15, rau 18.

◻ Edena dala toi amo kota maoromaoro karana ita badinaia diba?

Ginigunana be, namona be Dirava ena mauri taravatudia ita badinaia. (Isaia 1:17) Iharuana be, ita ura dala namona ai Iehova ese ita ia kara henia hegeregerena ma haida ita kara henidia neganai, kota maoromaoro ita hahedinaraia unai. (Salamo 130:​3, 4) Ihatoina be, mai eda ura bada ida haroro gaukara ita karaia neganai, unai ese Dirava ena kota maoromaoro ia hahedinaraia. (Aonega Herevadia 3:27)​—⁠8/1, rau 14, 15.