Huguenot Taudia Idia Heau Mauri

“Lau King bona Lau Kwini amo, . . . Inai hereva Ai Gwauraia, France Protestan taudia ibounai idia Heau Boio, bona Aiemai Basileia dekenai idia mai, be Emai Lohia Siahuna henunai do Ai naridia sibona lasi . . . To do Ai Hekwarahi Dala idauidau ai do Ai Durudia, bona Ai Hagoadadia totona . . . unai amo inai Basileia lalonai edia noho do ia namo bona idia hekwarahi lasi.”

ENGLAND ena king bona kwini, William bona Mary, ese lagani 1689 lalonai unai hereva idia halasia. To dahaka dainai France Protestan taudia, o taunimanima ese idia gwauraidia Huguenot taudia, be France amo idia heau bona tano ma haida dekenai heduru idia tahua? Badina be dahaka lagani 300 idia ore vadaeni lalonai, Huguenot taudia be France amo idia heau mauri sivaraina ita ura ita diba?

Lagani 1500 murinai tomadiho tuaridia bona hepapahuahu momo ese Europe dekenai hisihisi bada idia havaraia. France tanona ena Tomadiho Tuaridia (1562-1598), Katolik bona Protestan taudia huanai, be unai nega lalonai ia vara danu. To, lagani 1598 ai, France ena King Henry Namba 4 ese ma haida edia tomadiho haheaukalaia taravatuna ladana Nantes ena Taravatu ia sainia, bona unai ese Protestan Huguenot taudia dekenai ura kwalimu sisina ia henia edia tomadiho idia badinaia totona. Europe dekenai gavamani ese tomadiho oreadia rua ia abia dae karana be kara idauna. Unai kara ese France dekenai lagani 30 lalonai idia vara tomadiho tuaridia ia hadokoa sisina.

Ena be unai taravatu idia karaia “do ia noho hanaihanai bona do idia haidaua diba lasi” totona, to lagani 1685 ai Fontainebleau ena Taravatu idia karaia bona Nantes ena Taravatu idia kokia. Gabeai France aonega tauna Voltaire ia gwau unai taravatu idia kokia be “France dekenai ia vara kara dika badana ta.” Unai idia karaia dainai, Huguenot taudia 200,000 bamona be tano ma haida dekenai idia heau lao. To, tano idaudia dekenai idia lao karana dainai gabeai dika bada idia vara. To dahaka dainai tomadiho haida haheaukalaia taravatuna ginigunana idia kokia?

Idia Karaia Negana amo Idia Inai Henia

Ena be Nantes ena Taravatu be lagani 90 bamona lalonai ia noho, to histori ia torea tauna ta ia gwau unai taravatu be ia “mase noho lalonai lagani 1685 ai idia kokia.” Momokani, unai taravatu be badina aukana dekenai idia haginia lasi. Idia karaia matamata negana amo, Katolik haroro taudia bona idia gwauraia Idia Hanamoa Tomadiho Oreana huanai heiriheiri ia havaraia. Lagani 1598 ai idia halasia negana amo ia lao lagani 1630, Nantes ena Taravatu inai henia karana dainai, Protestan bona Katolik taudia huanai hepapahuahu idia vara bona buka haida idia torea. To, tomadiho idaudia abia dae lasi karana ena toana be idauidau.

Lagani 1621 ia lao lagani 1629 lalonai Protestan taudia idia tuari henidia murinai, France gavamani ese dala idauidau amo ia doridia Katolik dubu dekenai idia vareai totona. Unai kara be Louis Namba 14, “Dina ena King” ena lohia negana lalonai ia bada ia lao. Iena dagedage karadia dainai Nantes ena Taravatu idia kokia.

Edia Taravatu Idia Ha-aukaia

Edia taravatu idia ha-aukaia dalana ta be metairametaira gau haida dekenai Protestan taudia edia maoro idia kokia. Lagani 1657 bona 1685 huanai, Huguenot taudia dekenai taravatu ibounai 300 idia karaia, nega momo unai taravatu be dubu gunalaia taudia edia hereva dainai idia karaia. Unai taravatu ese edia mauri lalonai idia karaia gaudia ibounai ia taravatua. Gaukara idauidau hegeregere, doketa, loea, bona mara hahinedia durua gaukarana danu do idia karaia diba lasi. Histori ia torea hahinena ta ese mara hahinedia durua gaukarana ia herevalaia, ia gwau: “Ta ena mauri be edena bamona hahediba herevadia maorodia ia gorea hahinena, ia ura gavamani ese ia abia dae tomadiho dalana ia hadikaia hahinena, ena imana lalonai do ia atoa diba?”

Unai dagedage karana be lagani 1677 ai idia ha-aukaia momokani. Bema idia davaria Huguenot tauna ta be Katolik tauna ta ia veria ena tomadiho lalonai ia vareai totona, ia ese 1,000 pauni do ia faini. Gavamani ese takisi amo moni bada herea ia abia, bona unai moni ia gaukaralaia Huguenot taudia edia lalona idia veria Katolik taudia ai idia lao totona. Lagani 1675 ai, Katolik dubu gunalaia taudia ese 4.5 milioni pauni idia henia King Louis Namba 14 dekenai, bona idia hamaoroa: “Hari oi ese emu moale karana do oi hahedinaraia ela bona dokona, bona emu siahu do oi gaukaralaia hahediba herevadia idia gorea karana do oi haorea vaitani.” Taunimanima idia “hoidia” edia tomadiho idia haidaua karana dainai, lagani toi lalonai taunimanima 10,000 be Katolik taudia ai idia lao.

Lagani 1663 ai ta be Protestan tauna ai ia lao karana idia taravatua. Danu gabu haida dekenai taravatu idia atoa Huguenot taudia do idia noho lasi. Edia taravatu aukadia ena haheitalai ta be ena be tama sina idia ura lasi, to natudia edia mauri lagani be 7 neganai Katolik taudia ai idia lao diba. Protestan tama sina be edia natudia ese Jesuit o Katolik tisa amo idia abia edukeisini ena davana do idia karaia.

Huguenot taudia idia haorea karana lalonai idia gaukaralaia gauna ta be hehuni dalanai ia gaukara oreana, Compagnie du Saint-Sacrement (Helaga Gaudia Ena Orea). Ia be Katolik oreana ta, bona histori torea hahinena Janine Garrisson ia gwau ia be “orea bada herea” France ibounai lalonai. Iena memba taudia be aonega bona taga taudia dainai, moni dainai ia hekwarahi lasi bona mai anina bada sivarai ia abia haraga. Garrisson ia gwau dala momo ia gaukaralaia: “Unai orea ese dala idauidau ibounai ia gaukaralaia Protestan oreana ia hamanokaia totona. Idia kara dika henidia, edia gaukara idia koua, edia lalona idia ania, taunimanima vairanai idia gwauraidia dika, bona idia hagaridia.” To herevana dahaka ia vara, Huguenot taudia momo be unai dagedage negana lalonai France dekenai idia noho sibona. Histori torea hahinena Garrisson ia gwau: “Ena be dagedage ia bada ia lao, to dahaka dainai Protestan taudia momo be unai Basileia idia rakatania lasi ita lalo-pararalaia diba lasi.” To, gabeai idia mase ore garina, namona be do idia heau mauri.

Edia Noho be Matamana Negana Bamona

Nymegen ena Maino (1678) bona Ratisbon ena Tuari Ia Doko Gwauhamatana (1684) dainai, King Louis Namba 14 be tano ma haida ida ia tuari lasi. Channel ena kahana ai England dekenai, February 1685 ai, Katolik tauna be king ai ia lao. Louis Namba 14 ese unai kara matamatana ia gaukaralaia diba ena ura ia hagugurua totona. Lagani haida gunanai, France dekenai Katolik gunalaia taudia ese Four Gallican Articles idia halasia, idia ese pope ena siahu idia hamaragia. Unai neganai Pope Innocent Namba 11 “ia laloa France Dubu be kahirakahira Katolik dubu amo ia parara.” Unai dainai, Louis Namba 14 ese Nantes ena Taravatu ia kokia neganai, ena ladana dikana ia hanamoa diba bona pope ida ena hetura karana ia hanamoa diba.

King ese Protestan taudia dekenai do ia karaia gaudia be ia hedinarai goevagoeva. Auka lasi daladia (edia lalona idia ania bona taravatu idia karaia) be idia hegeregere lasi. To, dragoona tuari taudia edia dagedage karadia be ia kwalimu. Unai dainai lagani 1685 ai, Louis Namba 14 ese Fontainebleau ena Taravatu ia sainia bona Nantes ena Taravatu ia kokia. Unai taravatu idia kokia neganai dagedage bada ia vara bona Huguenot taudia edia noho be ia dika momokani, Nantes ena Taravatu idia do karaia lasi negana ena dika ia hanaia. Dahaka do idia karaia hari?

Do Idia Komu, Tuari, o Heau Boio?

Huguenot taudia haida be edia lalona idia hadaia hunia dekenai do idia tomadiho. Edia hebou gabudia idia hadikaia bona edia hebou karana idia taravatua dainai, idia be ‘Tano Gagaena ena Dubu’ dekenai o hunia dalanai idia tomadiho. Unai bamona hebou idia karaia, ena be July 1686 ai idia karaia taravatu ia gwau hunia dalanai idia hebou taudia do idia hamasedia. Huguenot taudia haida ese edia tomadiho idia rakatania, badina idia laloa gabeai do idia giroa lou diba. Idia ese koikoi dalanai Katolik tomadiho idia badinaia, bona gabeai uru matamata taudia ese unai kara idia tohotohoa.

Gavamani ia ura Katolik dubu lalonai idia vareai taudia be unai tomadiho dalana do idia badinaia goadagoada. Moni gaukara idia abia totona, idia vareai matamata taudia be setifiket ta do idia hahedinaraia. Unai setifiket be pris tauna ese ia sainia bona ia hahedinaraia idia be Katolik taudia bona dubu dekenai idia lao. Bema natudia be Katolik dubu dekenai idia bapatiso lasi bona Katolik dalanai idia hadibadia lasi, edia tama sina amo idia abidia oho diba. Sikuli ese Katolik tomadiho ia hadibaia. Idia hekwarahi bada Katolik tomadiho idia abia isi bukadia idia halasia, “Buka [Baibel] ena taunimanima” totona. Protestan taudia be unai bamona idia gwauraidia. Gavamani ese buka ibounai milioni ta mai kahana ia printaia bona Katolik taudia ai idia lao taudia momo idia noho gabudia dekenai idia siaidia lao. Taravatu aukadia momokani idia karaia, hegeregere bema tau ta be ia gorere dikadika bona kahirakahira ia mase, to ia ura lasi Katolik tomadiho ena dalana ai guriguri ginigabena idia karaia, bena gabeai ia namo lou neganai, dibura rumana dekenai idia siaia lao o lagatoi badana dekenai dibura tauna bamona do ia gaukara ela bona ia mase. Bona ia mase neganai, iena tauanina be momoru bamona idia negea, bona iena kohu idia abia.

Huguenot taudia haida be gavamani idia tuari henia. Cévennes, tomadiho idia goadalaia gabuna dekenai, Huguenot tuari oreana ta ladana Camisard taudia be lagani 1702 ai gavamani idia tuari henia. Camisard taudia idia hunia bona hanuaboi ai gavamani ami taudia idia tuari henidia dainai, gavamani ami taudia ese edia hanua idia gabua. Ena be nega ta ta lalonai idia tuari, to lagani 1710 ai King Louis ena ami ese Camisard taudia ia haoredia.

Huguenot taudia ese idia karaia karana ta be France idia heautania. Tano idauidau dekenai idia heau lao. Huguenot taudia momo idia heau boio neganai idia dabu bada herea, badina gavamani ese edia kohu idia dadia, bona Katolik Dubu be kahana ia abia. Unai dainai idia heau mauri be auka herea. France gavamani ese edia heau mauri sivaraina ia kamonai neganai, karaharaga kara haida ia karaia, bona heau daladia idia naria namonamo bona lagatoi lalonai Huguenot taudia idia tahua. Davara dekenai raskol taudia ese France idia rakatania lagatoi edia kohu idia henaoa, badina Huguenot taudia idia davaria neganai, gavamani ese moni bada ia henidia. Idia heau mauri Huguenot taudia idia davaridia neganai, dika bada herea idia abia. Edia dala ia auka momokani, badina spai taudia be idia huanai idia noho bona idia heau boio totona palani idia karaia taudia edia ladana bona idia gaukaralaia dalana idia tahua bona idia abia. Nega ibounai idia vara karadia haida be edia revareva idia henaodia, koikoi revareva idia tore henidia, bona palani idauidau idia karaia idia koidia totona.

Noho Gabuna Namona

Huguenot taudia be France amo idia heau boio bona idia vareai tanodia ese idia abidia dae karana idia gwauraia Noho Gabuna Namona. Huguenot taudia be Holland, Switerzland, Germany, bona England dekenai idia heau lao. Gabeai haida be Scandinavia, America, Ireland, West Indies, South Africa, bona Russia dekenai idia lao.

Europe tanodia haida ese Huguenot taudia idia hagoadaia edia tano dekenai idia lao totona taravatu gwauhamatadia haida idia karaia. Do idia abia gau namodia haida be, unai tano taudia ai do idia lao davana lasi, takisi do idia henia lasi, bona gaukara tamona idia karaia taudia edia orea ta lalonai memba taudia ai idia lao diba davana lasi. Histori ia torea hahinena Elisabeth Labrousse ia gwau, Huguenot taudia momo be “tau matamatadia . . . mai edia goada bona gaukara idauidau idia ura karaia, bona edia kara be goeva.” Unai dainai, France ia goada bada negana lalonai, ena gaukara idauidau karaia namonamo taudia momo ia haboioa. Oibe, “edia kohu, taga bona aonega” be tano ma ta dekenai idia abia lao. Tomadiho bona politikol oreadia danu ese Huguenot taudia dekenai heduru idia henia idia noho namonamo totona. To tano idaudia dekenai idia heau lao karana dainai, gabeai dahaka ia vara?

Nantes ena Taravatu idia kokia bona idia vara dagedage karadia dainai, tano haida idia moale lasi. Tano momo ese France idia badu henia bona William of Orange ese unai ia gaukaralaia Netherlands ena king ai ia lao totona. Huguenot opesa taudia edia heduru ida, ia ese Great Britain ena king, Katolik tauna James Iharuana ena gabu ia abia danu. Histori ia torea tauna Philippe Joutard ia gwau, “Louis Namba 14 ese Protestan taudia ia dagedage henia karana be James Iharuana ia hamorua gauna badana [bona] Augsburg oreana ia haginia. . . . [Unai] gaudia ese mai anina bada gaudia idia havaraia Europe ena histori lalonai, bona France ese tano haida ia biagua karana ia ore bona England ese unai siahu ia abia.”

Huguenot taudia ese Europe taudia edia mauri dalana dekenai mai anina bada gaudia idia havaraia. Idia ese edia ura kwalimu matamatana idia gaukaralaia Lalo-Diari lalohadaina bona ma haida edia kara haheaukalaia karana idia abia isi bukadia idia halasia totona. Hegeregere, France Protestan tauna ta ese England tauna, John Locke, ena buka ia hahanaia, unai buka ese taunimanima edia maoro ia herevalaia. Protestan toretore taudia haida edia buka ese lalona ena hemami badinaia mai ura kwalimu ida idia herevalaia momo. Ia vara lalohadaina be gavamani taudia kamonai henia karana be mai ena hetoana, bema lohia taudia ese idia bona taunimanima huanai idia karaia gwauhamata idia makohia neganai, taunimanima ese do idia kamonai henidia lasi. Unai dainai histori torea tauna Charles Read ia gwau, Nantes ena Taravatu idia kokia karana be “France taudia ese edia gavamani idia hamorua tuarina badana ena badina ta.”

Dahaka Gaudia Idia Dibaia?

France ese Huguenot taudia ia dagedage henidia to ia kwalimu lasi bona aonega taudia momo ia haboioa dainai, Marquis de Vauban, King Louis Namba 14 ena tuari daladia ia sisibalaia tauna, ese king ia hamaoroa Nantes ena Taravatu do ia atoa lou, ia gwau: “Taunimanima edia kudouna haidaua karana be Dirava sibona ese ia karaia.” Vadaeni dahaka dainai France gavamani ese unai ia lalo-pararalaia lasi bona Nantes ena Taravatu ia atoa lou lasi? Momokani king ia gari badina ta be gavamani ena goada ia manoka garina. Bona danu, king ese Katolik dubu ia hamoalea, bona France tanona ese tomadiho idauna ia haheaukalaia lasi karana be idia sibona edia namo ia habadaia.

Nantes ena Taravatu idia kokia karana dainai momo ese inai henanadai idia gwauraia: ‘Tano ta ese tomadiho oreadia edia tomadiho karadia ibounai ia abia dae eiava?’ Momokani, histori torea taudia idia hereva bamona, Huguenot taudia edia sivarai ita laloa neganai, “gavamani ese edia siahu idia gaukaralaia kerere karadia” ita laloa danu. Hari inai negai, tano momo lalonai kopi idauidau bona tomadiho idauidau taudia idia noho hebou, bona unai ita itaia neganai, Huguenot taudia edia heau mauri sivaraina ita laloa. Unai sivarai ese ia hahedinaraia dahaka ia vara bema gavamani be dubu ena hereva ia badinaia to taunimanima edia namo ia laloa lasi.

[Footnote]

[Box on page 28]

Dragoon Tuari Taudia Edia Dagedage Karadia

Gari Dainai Edia Tomadiho Idia Haidaua

Haida idia laloa dragoon taudia be “misinari taudia namodia.” To Huguenot taudia dekenai, idia ese gari idia havaraia, bona nega haida hanua taudia idia kamonai dragoon taudia idia ginidae neganai, hanua ibounai be Katolik taudia ai idia lao. To unai dragoon taudia be daidia?

Dragoon taudia be mai edia tuari kohu momo tuari taudia bona Huguenot taudia edia ruma dekenai idia noho, ruma taudia idia hagaridia totona. Famili taudia latanai maduna metauna idia atoa totona, ruma ta ta dekenai tuari taudia edia momo be famili edia kohu bona aniani hegeregerena ai idia atoa lasi. Dragoon taudia be mai edia siahu famili taudia do idia botaia, edia mahuta idia hadikaia, bona edia kohu idia hadikaia. Bema famili taudia ese edia Protestan tomadiho idia rakatania, dragoon taudia ese do idia rakatanidia.

Lagani 1681 ai Huguenot taudia momo herea idia noho gabuna Poitou, West France dekenai, dragoon taudia idia gaukaralaidia unai taudia be Katolik taudia ai idia halaodia totona. Hua haida sibona lalonai Huguenot taudia 30,000 ia lao 35,000 be Katolik taudia ai idia lao. Lagani 1685 ai, Huguenot taudia edia noho gabudia ma haida dekenai unai bamona idia karaia. Hua haida sibona lalonai Huguenot taudia 300,000 ia lao 400,000 be Katolik taudia ai idia lao. Histori ia torea tauna Jean Quéniart ia gwau dragoon tuari taudia edia dagedage karadia dekenai idia kwalimu dainai, “[Nantes ena Taravatu] kokia karana idia koua diba lasi, badina hari Huguenot taudia be Katolik taudia ai idia halaodia.”

[Credit Line]

© Cliché Bibliothèque Nationale de France, Paris

[Caption on page 25]

Inai oda, lagani 1689 ai idia karaia gauna, ese edia tomadiho dainai dagedage idia davaria France Protestan taudia dekenai heduru ia henia

[Credit Line]

By permission of The Huguenot Library, Huguenot Society of Great Britain and Ireland, London

[Picture on page 26]

Lagani 1685, Nantes ena Taravatu idia kokia (Idia kokia oda ena rau ginigunana ia hedinarai)

[Credit Line]

Documents conservés au Centre Historique des Archives nationales à Paris

[Picture on page 26]

Protestan tomadiho ena dubu momo idia hadikadia

[Credit Line]

© Cliché Bibliothèque Nationale de France, Paris