Hari be Hahemauri Dinana!
“Itaia! Harihari be nega namo hereana. Itaia! Harihari be hahemauri dinana.”—2 KORINTO 6:2, NW.
IEHOVA be taunimanima hahemaoro henia dinana ta ia abia hidi. (Kara 17:31) Bema ita ura unai dina ita dekenai be hahemauri dinana, namona be Ia bona ia abia hidi Hahemaoro Tauna, Iesu Keriso, edia lalo-namo ita abia. (Ioane 5:22) Unai bamona lalo-namo ita abia totona, namona be iseda kara be Dirava ena Hereva hegeregerena bona iseda abidadama ese ita ia hagoadaia ma haida ita durua Iesu ena hahediba taudia momokanidia ai idia lao totona.
2. Dahaka dainai inai tanobada taudia be Dirava dekena amo idia daudau?
2 Taunimanima be mai edia kara dika dainai, inai tanobada taudia be Dirava dekena amo idia daudau. (Roma 5:12; Efeso 4:17, 18) Unai dainai, ita haroro henidia taudia ese hahemauri idia abia dalana tamona be Dirava ida maino idia karaia. Aposetolo Paulo ese Korinto dekenai idia noho Keristani taudia ia tore henidia neganai, unai ia hahedinaraia goevagoeva. Mani 2 Korinto 5:10–6:10 ita itaia, Paulo ese hahemaoro, Dirava ida maino ita karaia, bona hahemauri ia herevalaia dalana ita laloa totona.
“Taunimanima Ai Sisiba Henia Goada”
3. Paulo be edena dala ai ‘taunimanima ia sisiba henia goada’ bona dahaka dainai hari unai bamona ita karaia danu be namo?
3 Paulo be inai hereva ia torea neganai, hahemaoro karana bona haroro gaukara ia hakapua, ia gwau: “Ita ibounai be Keriso ena Kota gabuna dekenai dohore ita gini. Vadaeni iseda tauanina dekenai ita karaia karadia edia davana do ita abia, namo o dika. Vadaeni, Lohiabada ai gari henia dainai, ai ese taunimanima ai sisiba henia goada.” (2 Korinto 5:10, 11) Aposetolo tauna be sivarai namona harorolaia karana amo ‘taunimanima ia sisiba henia goada.’ Ita be edena bamona? Ita be inai tanobada dikana ena dokona ai ita noho dainai, namona be ita gaukara goada bona ma haida edia lalona ita veria bena kara haida do idia karaia, Iesu ena hahemaoro karana ai idia do ia gwauraia namo bona hahemauri ena Badina, Iehova Dirava, ena lalo-namo do idia abia.
4 To, bema Iehova ese iseda hesiai gaukara ia hanamoa, ita heagi lasi be namo. Korinto dekenai haida be idia sibona eiava ma haida dainai idia heagi momo, unai dainai kongregesen idia hapararaia. (1 Korinto 1:10-13; 3:3, 4) Paulo be unai kara ia herevalaia, ia gwau: “Inai hereva dekenai ai ura aiemai ladana ai hanamoa lou gwauraia, a? Lasi, to badina korikori be, ai ura umui ese ai do umui heagilaia diba, taunimanima haida edia vairanai. Badina be taunimanima haida ese tau ta ena toana idia laloa momo, to iena lalona bona kara idia laloa lasi. Bona ai ura inai bamona laloa kerere taudia do umui haere henia diba. Bema ai be kava, unai be Dirava ena gaukara ai karaia dainai. Bema ai laloa maoromaoro, unai be umui durua totona.” (2 Korinto 5:12, 13) Idia heagi taudia be kongregesen ena lalo-tamona bona ena namo lauma dalanai idia laloa lasi. Idia ura toana sibona dainai idia heagi to edia abidadama tamona tadikaka idia durua lasi, Dirava vairanai edia kudouna do idia namo totona. Unai dainai, Paulo ese unai kongregesen ia sisiba henia bona gabeai ia gwau: “Tau ta bema ia ura do ia heagi, ia ese Lohiabada sibona do ia heagilaia.”—2 Korinto 10:17.
5 Paulo ia heagi, ani? Iena aposetolo dagina ia gwauraia dalana dainai, reana haida be unai bamona idia laloa. To ia be ‘Dirava dainai’ ia heagi. Iena aposetolo dagi ia heagilaia badina ia ura lasi Korinto taudia be Iehova do idia rakatania. Paulo ia ura Dirava dekenai idia ia hakaua lou dainai unai bamona ia karaia, badina aposetolo koikoidia ese idia hakaudia kerere. (2 Korinto 11:16-21; 12:11, 12, 19-21; 13:10) To, Paulo be taunimanima ibounai dekenai ia karaia vadaeni karadia edia sivarai ia gwauraia loulou lasi, edia lalona ia veria lasi.—Aonega Herevadia 21:4.
Keriso Ena Lalokau ese Oi Ia Biagua, A?
6. Namona be Keriso ena lalokau dainai edena bamona do ita laloa bona kara?
6 Paulo be aposetolo tauna momokanina dainai, ma haida dekenai Iesu ena mauri davalaia boubouna ia herevalaia. Unai gauna ese Paulo ena mauri dalana ia haidaua, badina ia gwau: “Keriso ena lalokau ese ai ia biagua noho, badina be hari ai diba momokani tau tamona ese taunimanima ibounai dainai ia mase. Inai anina be ita ibounai Keriso danu ita mase hebou vadaeni. Oibe, Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna, ena mauri bona iena ura gaudia do ita laloa bona karaia.” (2 Korinto 5:14, 15) Ita dainai Iesu ese ena mauri ia henia be lalokau bada herea karana! Momokani, namona be iseda mauri lalonai unai kara be ita ia biagua siahuna. Ita dainai Keriso ese ena mauri ia henia karana ita laloa bada dainai, iseda lalona ia hamarerea bena Iehova ese ena Natuna lalokauna amo ia karaia hahemauri karana ena sivarai namona ita harorolaia goadagoada. (Ioane 3:16; mani Salamo 96:2 itaia.) “Keriso ena lalokau” ese oi ia biagua noho dainai Basileia harorolaia gaukarana bona hahediba taudia halaoa gaukarana oi karaia goadagoada noho, a?—Mataio 28:19, 20.
7. “Tau ta, iena toana sibona dekena amo do ita laloa lasi” ena anina be dahaka?
7 Horoa taudia ese edia mauri idia gaukaralaia dalana amo idia hahedinaraia idia dainai Keriso ia karaia karana idia laloa bada, unai dainai idia be ‘sibona edia mauri bona edia ura idia laloa lasi, to iena ura gaudia idia laloa.’ Paulo ia gwau: “Unai dainai, hari ia lao, tau ta, iena toana sibona dekena amo do ita laloa lasi. Guna be Keriso ita laloa iena tauanina toana dekena amo, to harihari be unai dala dekena amo do ita laloa lasi.” (2 Korinto 5:16) Namona be Keristani taudia ese tauanina dalana ai taunimanima idia laloa lasi, reana Iuda taudia o taga taudia idia ura henia bada to Idau Bese taudia o ogogami taudia idia ura henia maragi. Horoa taudia be ‘tau ta, iena toana sibona dekena amo idia laloa lasi,’ badina be lauma dalanai edia hetura karana edia abidadama tamona tadikaka ida be mai anina bada gauna idia dekenai. ‘Keriso ena tauanina toana dekena amo ia idia laloa’ taudia be tanobada ai ia noho neganai ia idia itaia taudia sibona lasi. Ena be Mesia idia laloa taudia haida danu be tauanina dalana ai Keriso idia laloa, to unai bamona do idia laloa noho lasi be namo. Iena tauanina be mauri davana karaia totona ia henia bona mauri henia laumana ai ia toreisi lou. Guba maurina abia totona idia toreisi lou taudia haida be edia tanobada tauanina do idia rakatania, bona idia ese Iesu Keriso be tauanina ai idia itaia lasi.—1 Korinto 15:45, 50; 2 Korinto 5:1-5.
8 Paulo be horoa taudia ia hereva henidia noho lalonai, ma ia gwau: “Bema tau ta Keriso danu ia hakapua tamona neganai, unai tau be tau matamatana. Iena kara gunadia be idia ore, mauri matamata ia abia vadaeni inai.” (2 Korinto 5:17) Ta be “Keriso danu ia hakapua tamona” ena anina be ia ida idia lalo-tamona. (Ioane 17:21) Dirava ese ena Natuna dekenai unai tauna ia hakaua mai bona lauma helaga amo ena natuna ai ia halaoa neganai, unai hetura karana ia vara. Ia be lauma helaga amo Dirava ena natuna ta ai ia lao dainai, ia be “tau matamatana,” ena helaro be Keriso ida guba Basileia lalonai do idia noho. (Ioane 3:3-8; 6:44; Galatia 4:6, 7) Unai horoa taudia be hesiai gaukara hereadaena ta idia abia.
‘Dirava Danu Do Umui Turana Karaia’
9. Dirava be dahaka ia karaia ia ida maino ita karaia diba dalana ia kehoa totona?
9 Iehova ese “tau matamatana” ia lalo-namo henia momokani! Paulo ia gwau: “Inai kara ibounai be Dirava ese ia karaia. Guna ita be Dirava danu ita turana lasi, to Keriso ena kara dekena amo, Dirava ese iena turana ita ia halaoa vadaeni. Bona ia ese gaukara ta ai dekenai ia henia, gauna inai: Taunimanima do ai veria, do ai haroro henia, ela bona idia danu Dirava ena turana idia lao. Aiemai haroro hereva be inai: Dirava be . . . Keriso dekena amo, tanobada taudia danu ia turana karaia noho. Keriso lalonai, Dirava ese edia kara dika ia laloatao lasi. Inai bamona haroro gaukara Dirava ese ai dekenai ia henia vadaeni, taunimanima be ia danu do idia turana karaia totona.” (2 Korinto 5:18, 19) Adamu ia kara dika negana amo taunimanima be Dirava dekena amo idia daudau. To Iehova be mai ena lalokau ida dala ia kehoa Iesu ena boubou karana amo ia ida maino idia karaia totona.—Roma 5:6-12.
10 Iehova ese unai maino harorolaia gaukarana be horoa taudia dekenai ia henia, unai dainai Paulo ia gwau diba: “Unai dainai ai be Keriso ena hereva gwauraia hedinarai taudia, Dirava ese aiemai uduna dekena amo umui dekenai ia noia noho. Vadaeni Keriso ena ladana dainai umui ai noia, Dirava do umui dagedage henia lou lasi, to ia danu do umui turana karaia.” (2 Korinto 5:20) Nega gunadia ai, gwaukau taudia be hepapahuahu negadia ai idia siaia, bena dala idia tahua tuari do ia vara lasi totona. (Luka 14:31, 32) Inai kara dika tanobadana ena taunimanima be Dirava amo ia daudau dainai, ia ese ena horoa gwaukau taudia ia siaia taunimanima dekenai iena maino karaia taravatudia idia gwauraia totona. Horoa taudia be Keriso ena gabu ai idia gaukara dainai, idia noinoi idia gwau: “Dirava . . . danu do umui turana karaia.” Unai be mai hebogahisi ida idia gwauraia noinoi, taunimanima idia noia Dirava ida maino do idia karaia bona Keriso amo ia karaia hahemauri karana idia abia dae.
11 Unai mauri davana henia karana idia abidadama henia taudia ibounai be Dirava ida maino idia karaia diba. (Ioane 3:36) Paulo ia gwau: “Keriso be kara dika lasi momokani, to Dirava ese dika ia karaia Tauna dekenai ia halaoa vadaeni ita dainai. Vadaeni bema Keriso lalonai ita noho neganai, Dirava ena kara maoromaoro do ita abia.” (2 Korinto 5:21) Goevadae tauna Iesu be Adamu ena natudia iboudiai edia kara dika boubouna, idia abia hanai kara dika amo idia ia ruhaia. Iesu amo “Dirava ena kara maoromaoro” idia abia. Unai kara maoromaoro, eiava Dirava vairanai idia maoromaoro karana, be Keriso ida do idia lohia taudia 144,000 dekenai ia vara guna. Hanaihanai Noho Tamana, Iesu Keriso, ena Lagani 1,000 Lohia Negana ai, ena natudia tanobada dekenai be maoromaoro bona goevadae taudia ai do idia lao. Ia ese do ia durudia kara maoromaoro bona goevadae taudia ai do idia lao totona, unai amo Dirava do idia badinaia momokani diba bona mauri hanaihanai ena harihari bada do idia abia.—Isaia 9:6; Apokalupo 14:1; 20:4-6, 11-15.
“Nega Namo Hereana”
12 Hahemauri abia totona, Paulo ena hereva hegeregerena ita karaia be namo, ia gwau: “Ia [Iehova] ida ai gaukara hebou dainai, ai danu be umui ai noia Dirava ena hariharibada umui abia dae bena ena anina umui reaia lasi. Badina be ia gwau: ‘Nega namona ta ai oi lau kamonai henia, bona hahemauri dinana ta ai oi lau durua.’ Itaia! Harihari be nega namo hereana. Itaia! Harihari be hahemauri dinana.” (2 Korinto 6:1, 2, NW) Iehova ena horoa gwaukau taudia bona ia siaia taudia, “mamoe idaudia,” be edia guba Tamana ena hariharibada idia abia dae bena ena anina idia reaia lasi. (Ioane 10:16) Inai “nega namo hereana” ai, edia kara maoromaoro bona haroro goadagoada karana amo, idia ura Dirava ena lalo-namo idia abia bona tanobada taudia idia hadibaia hari be “hahemauri dinana.”
13 Paulo be Isaia 49:8 ena hereva ia torea hanai, unai siri ia gwau: “Lohiabada ese iena bese taudia ia hamaoroa, ia gwau, ‘Umui do lau hamauria dinana ia ginidae neganai, lau ese umui do lau durua, bona umui be durua totona umui boiboi neganai, umui dekenai do lau haere. Lau ese umui do lau naria, bona umui dekena amo lau ese, bese idauidau ibounai danu gwauhamata do lau karaia. Lau ese emui tano, idia hadikaia vadaeni tano do lau hanamoa lou, vadaeni do umui noholaia lou.’ ” Israela besena be Babulonia ena igui hesiai amo idia ruhaia bona gabeai edia tano, ia noho kava tanona, dekenai idia giroa lou neganai, unai be unai hereva ena anina ia guguru negana ginigunana.—Isaia 49:3, 9.
14 Isaia ena peroveta herevana ma ia guguru totona, Iehova ese ena “Hesiai Tauna,” Iesu, ia henia “idau bese, Iuda lasi bese taudia, edia diari do [ia] lao, vadaeni [ia] dekena amo, tanobada ibounai ese [Dirava ena hahemauri] do idia davaria.” (Isaia 49:6, 8; mani Isaia 42:1-4, 6, 7; Mataio 12:18-21 itaia.) Ia hedinarai, unai “durua” negana eiava “nega namo hereana” be tanobada ai Iesu ia noho negana ia gwauraia. Ia guriguri, bena Iehova be ia dekenai ia “haere.” Iesu dekenai unai be “hahemauri dinana ta,” badina kara maoromaoro ia badinaia goevagoeva bona unai amo “ia be hegeregere vadaeni, ia dekenai idia kamonai henia taudia ibounai dekenai, be mauri hanaihanai do ia henidia.”—Heberu 5:7, 9; Ioane 12:27, 28.
15 Paulo ia hahedinaraia Isaia 49:8 ena hereva be mai anina horoa Keristani taudia dekenai, bona idia ia noia ‘Dirava ena hariharibada ena anina do idia reaia lasi,’ unai “nega namo hereana” ai bona ia henia “hahemauri dinana” ai iena lalo-namo idia tahua lasi karana amo. Paulo be ma ia gwau: “Itaia! Harihari be nega namo hereana. Itaia! Harihari be hahemauri dinana.” (2 Korinto 6:2, NW) Pentekoste 33 C.E. amo, namona be lauma Israela taudia idia hamomokania idia be hegeregere Dirava ena hariharibada idia abia, unai amo idia dekenai unai “nega namo hereana” be “hahemauri dinana ta.”
‘Ita Hahedinaraia Ita be Dirava Ena Hesiai Taudia’
16 Korinto kongregesen ena tatau haida idia hamomokania lasi idia be hegeregere Dirava ena hariharibada idia abia totona. Ena be Paulo ese ‘taunimanima hadikaia kara ta ia karaia lasi,’ to idia ese iena ladana idia hadikaia, badina idia ura ena aposetolo siahuna idia hadikaia. Paulo ia hahedinaraia ia be Dirava ena hesiai tauna, badina ‘metau ibounai neganai ia haheauka, hisihisi neganai ia gini goada, hekwarahi bada neganai ia gaukara noho. Ia idia botaia vadaeni, dibura ruma lalonai ia idia atoa, taunimanima momo ese ia idia dagedage henia, gaukara bada ese kahirakahira ia hamasea, nega momo ia be mahuta dala lasi, nega momo ia hitolo.’ (2 Korinto 6:3-5) Gabeai, Paulo ia gwau bema ia idia tuari henia taudia be hesiai taudia, vadaeni ia ese ‘idia ia hereaia,’ badina nega momo dibura ruma dekenai idia koua, idia botaia, dika ia davaria, bona ia dabu.—2 Korinto 11:23-27.
17 Paulo bona ena bamodia hegeregerena, ita hahedinaraia diba ita be Dirava ena hesiai taudia. Edena dala ai? “Laloa goevagoeva karadia dekena amo,” bona Baibel ena diba maoromaoro hegeregerena ita karaia karadia amo. “Haheauka dekena amo,” anina be taunimanima edia kara kerere eiava badu havaraia karadia ita haheaukalaia amo unai ita hahedinaraia diba, bona “bogahisihisi karadia dekena amo,” anina be ma haida durua karadia ita karaia. Danu, Dirava ena lauma ena hakaua dalana ita abia dae, “lalokau momokani” ita hahedinaraia, ita hereva momokani, bona iena hesiai gaukara karaia lalonai goada abia totona ia dekenai ita tabekau karana amo ita hahedinaraia ita be Dirava ena hesiai taudia. To, Paulo ese “kara maoromaoro be tuari gauna [iena] imana ruaosi dekenai” ia abia karana amo ena hesiai gaukara dagina ia hamomokania danu. Guna negadia ai taunimanima idia tuari neganai, edia imana idibana ai tuari kaia idia dogoatao bona edia imana laurina ai kesi idia dogoatao. Lauma dalana ai hahediba koikoi taudia tuari henia totona, Paulo be kara dika tauanina ena tuari kohudia—kara gageva, bona koikoi—ia gaukaralaia lasi. (2 Korinto 6:6, 7; 11:12-14; Aonega Herevadia 3:32) Ia ese kara maoromaoro ‘tuari gaudia,’ eiava dala maorodia, ia gaukaralaia tomadiho momokani ia habadaia totona. Namona be unai bamona ita karaia danu.
18 Bema ita be Dirava ena hesiai taudia, Paulo bona ia ida idia gaukara hebou taudia bamona do ita karaia. Herevana ita idia hanamoa eiava ita idia matauraia lasi, to eda kara be Keristani taudia hegeregerena. Iseda ladana idia hadikaia sivaraidia ese iseda haroro gaukarana do ia koua lasi, eiava do ita heagi lasi bema ita idia hanamoa. Hereva momokani do ita gwauraia bona reana iseda gaukara namodia do idia laloa. Iseda inai taudia amo mase ita davaria diba neganai, Iehova do ita abidadama henia. Bona matahakani do ita abia dae mai eda lalo-moale ida.—2 Korinto 6:8, 9.
19 Paulo be maino harorolaia gaukarana ena hereva ia hadokoa neganai, ia bona ena bamodia ia gwauraia, ia gwau: “Ai be ogogami taudia, to ai laloa lasi, taunimanima momo dekenai Dirava ena kohu momo ai henia. Ai be gau ta lasi taudia bamona, to ai laloa lasi, badina gau ibounai be aiemai.” (2 Korinto 6:10) Ena be unai hesiai taudia be edia hisihisi dainai idia lalohisihisi diba, to idia edia lalona ai idia moale. Tauanina dalana ai idia ogogami, to lauma dalanai ‘taunimanima momo dekenai kohu momo idia henia.’ Momokani, ‘gau ibounai be idia edia’ badina edia abidadama dainai lauma dalanai kohu momo idia abia—danu edia helaro be guba dekenai Dirava ena natudia ai do idia lao. Bona Keristani hesiai gaukara idia karaia lalonai edia mauri be mai anina bona idia moalelaia. (Kara 20:35) Idia hegeregerena, harihari—inai hahemauri dinana ai—maino harorolaia gaukarana ita karaia amo ‘taunimanima momo dekenai kohu momo’ ita henia diba!
Iehova Ena Hahemauri Karana Oi Abidadama Henia
20. (a) Paulo ena ura badana be dahaka, bona dahaka dainai nega bada ia noho lasi? (b) Hari inai hahemauri dinana ena toana ia hahedinaraia gauna be dahaka?
20 Lagani 55 C.E. ai, Korinto taudia dekenai Paulo ese ena revareva iharuana ia torea neganai, lagani 15 sibona idia do noho bena Iuda taudia edia nega oromana do ia ore. Aposetolo tauna ia ura Iuda bona Idau Bese taudia be Keriso ena amo Dirava ida maino do idia karaia. Unai be hahemauri dinana, bona nega bada ia noho lasi. Momokani, unai hegeregerena, lagani 1914 amo ita danu be nega ta ena oromana ena dokona ai ita noho. Basileia harorolaia gaukarana be hari tanobada hegegemadai idia karaia noho dainai, ia hahedinaraia hari be hahemauri dinana.
21. (a) Lagani 1999 ena siri badana be dahaka? (b) Hari inai hahemauri dinana ai, namona be dahaka ita karaia noho?
21 Bese iboudiai taudia be Dirava ese Iesu Keriso amo ia havaraia hahemauri dalana ena sivarai idia kamonai be namo. Nega be lasi. Paulo ia gwau: “Itaia! Harihari be hahemauri dinana!” Unai hereva 2 Korinto 6:2 (NW) dekenai be lagani 1999 ai, Iehova ena Witness taudia edia lagani ena siri badana. Unai be maoro, badina ita vairanai ia noho karana ese Ierusalema bona ena dubu hadikaia ore karana ena dika ia hereaia! Kahirakahira inai nega ena oromana ibounai do ia ore, tanobada taudia ibounai ese do idia mamia. Harihari—kerukeru lasi—be kara ta ita karaia negana. Bema ita abia dae momokani hahemauri be Iehova ena, bema ia ita lalokau henia, bona bema mauri hanaihanai ita laloa bada, Dirava ena hariharibada ena anina do ita reaia lasi. Mai eda lalona ibounai ida ita ura Iehova ita hanamoa dainai, iseda kara bona hereva amo do ita hamomokania inai boiboi be mai eda momokani ida ita gwauraia: “Itaia! Harihari be hahemauri dinana.”
Edena Bamona Do Oi Haere?
◻ Dahaka dainai Dirava ida maino ita karaia be mai anina bada momokani?
◻ Unai gwaukau taudia bona Dirava ia siaia taudia, maino harorolaia gaukarana idia karaia taudia unai, be daidia?
◻ Edena dala ai ita hahedinaraia diba ita be Dirava ena hesiai taudia?
◻ Lagani 1999 ai, Iehova ena Witness taudia edia lagani ena siri ena anina oi dekenai be dahaka?
1. Dirava bona Keriso edia lalo-namo ita abia totona, dahaka be mai anina bada?
4, 5. (a) Dahaka dainai Iehova ena hesiai gaukarana lalonai ita karaia vadaeni gaudia dainai do ita heagi lasi? (b) Edena dala ai Paulo be ‘Dirava dainai’ ia heagi?
8. Taunimanima haida be edena dala ai ‘Keriso danu idia hakapua tamona’?
10. Iehova ese unai maino harorolaia gaukarana be daika ia henia, bona idia be dahaka idia karaia vadaeni?
11. Daidia be unai boubou gauna dekenai idia abidadama dainai, gabeai Dirava vairanai maoromaoro taudia ai do idia lao?
12. Edena gaukara mai anina bada be Iehova ena gwaukau taudia bona ia siaia taudia ese idia karaia?
13. Isaia 49:8 ena hereva badana be dahaka, bona edena dala ai nega ginigunana ia guguru?
14. Iesu dekenai Isaia 49:8 be edena dala ai ia guguru?
15. Edena nega amo lauma Israela taudia idia ura bada idia hamomokania idia be hegeregere Dirava ena harihari bada idia abia totona, bona edia tahua gauna be dahaka?
16. Edena bamona hahetoho lalodiai Paulo ia hahedinaraia ia be Dirava ena hesiai tauna?
17. (a) Edena kara idauidau amo ita hahedinaraia diba ita be Dirava ena hesiai taudia? (b) Kara maoromaoro ‘tuari gaudia’ be dahaka?
18. Bema ita be Dirava ena hesiai taudia, edena bamona do ita kara?
19. Edena dala ai lauma dalanai ‘taunimanima momo dekenai kohu momo ita henia’ diba?
[Picture on page 17]
Paulo hegeregerena, oi haroro goadagoada noho bona ma haida oi durudia noho Dirava ida maino idia karaia totona, a?
United States
France
Côte d’Ivoire
[Picture on page 18]
Hari inai hahemauri dinana ai, oi be Iehova Dirava ida maino idia karaia noho taudia huanai oi noho, a?