Inai Oi Laloatao, A?

Vanegai idia halasia Gima Kohorona magasin edia hereva be mai moale ida oi duahia, a? Bema oibe, henunai idia noho hereva do oi moalelaia danu:

◻ Badina be dahaka ita laloa diba Iehova ese ia abia hidi taudia be hegeregere ena taunimanima do idia hakaua?

Iehova ese gaukara haida totona taunimanima ia abia hidi badina edia kara haida dainai idia hegeregere unai negai Iehova ia ura dalana ai ena taunimanima do idia hakaua.​—8/15, rau 14.

◻ Iona dekenai idia vara gaudia amo dahaka ita diba?

Iona ese sibona ia laloa bada bona ma haida ia laloa maragi. Iona amo diba ita abia bena ita sibona, bona eda hemami ita laloa bada lasi.​—8/15, rau 19.

◻ Edena dala ai ita gwau diba “Iehova ena ladana be kohoro aukana”? (Aonega Herevadia 18:10, NW)

Dirava ena ladana lalonai ita heau vareai ena anina be Iehova ita abidadama henia. (Salamo 20:1; 122:4, NW) Ena anina be iena lohia siahuna, iena taravatu bona hakaua herevadia ita abia isi, bona iena gwauhamata ita abidadama henidia momokani. (Isaia 50:10; Heberu 11:6)​—9/1, rau 10.

◻ Edena bamona Paulo be dagi bada taudia vairanai ia haroro dalana be haheitalai namona ita dekenai?

King Agripa dekenai ia hereva henia neganai, Paulo be mai ena aonega ida ia bona Agripa idia lalo-tamona gaudia ia herevalaia. Unai hegeregerena, namona be sivarai namona ena hereva namodia ita gwauraia hedinarai namonamo, bona ita iboudiai ita ura do idia vara gaudia ita herevalaia momo. (1 Korinto 9:​22)​—9/1, rau 31.

◻ Daidia be Iehova ena haheauka dainai hahenamo do idia abia?

Iehova ena haheauka karana dainai, ma taunimanima milioni momo dekenai dala ia kehoa “Dirava ena Dina” amo do idia roho mauri totona. (2 Petero 3:​9-​15) Iena haheauka karana dainai ita be mai eda dala ‘mai gari bona mai heudeheude danu eda hamauria do ita tahua noho.’ (Filipi 2:​12)​—9/15, rau 19, 20.

◻ Septuagint Baibel ena namo be dahaka?

Septuagint Baibel be mai anina bada gaukarana ia karaia, taunimanima ese Iehova Dirava bona ena Basileia, Iesu Keriso ia lohia Basileiana, ena sivarai idia dibaia totona. Keristani taudia ginigunadia edia negai, Septuagint Baibel ese gaukara badana ia karaia, Greek gado idia diba Iuda taudia bona Idau Bese taudia ese Basileia ena sivarai namona idia abia dae totona.​—9/15, rau 30.

◻ Raka boio merona ena parabole ese ita ia hadibaia Dirava be edena bamona?

Gau ginigunana be, Iehova be ‘hebogahisi bona hariharibada Diravana, badu dekenai ia haraga lasi to hebogahisi bona lalokau dekenai ia haraga.’ (Esodo 34:6) Gau iharuana be, ia hegaegae “kara dika ia gwauatao” totona, bema kara dika taudia be edia lalona idia haidaua, do idia hegeregere idia dekenai hebogahisi do ia hahedinaraia. (Salamo 86:5)​—10/1, rau 12, 13.

◻ Isaia 65:21-​25 ese ia gwauraia maino nohona ena gwauhamatana be edena negai do ia guguru?

Hari inai negai lauma paradaisona lalonai, mai lalo-tamona ida Iehova idia tomadiho henia horoa taudia bona “mamoe idaudia” taudia be Dirava ia henia maino idia mamia noho. (Ioane 10:16) Bona unai maino be Paradaiso korikorina dekenai do ia noho, ‘Dirava ena ura gauna tanobada dekenai do idia karaia, guba dekenai idia karaia bamona’ neganai. Unai neganai peroveta tauna Isaia ena hereva be do idia guguru momokani. (Mataio 6:​10)​—10/15, rau 24.

◻ Dahaka dainai Keristani taudia ese headava dinana idia moalelaia to vara dinana idia moalelaia lasi?

Baibel ese headava ia gwauraia dika lasi. Bema Keristani taudia idia ura lagani ta ta edia headava dinana ena moale idia laloa lou bona edia headava ia namo totona idia gaukara hebou lalohadaina idia hagoadaia lou, unai be ta ta sibona ena ura hegeregerena idia abia hidi diba. To, Baibel lalonai idia noho vara dinadia moalelaia karadia be Dirava diba lasi taudia ese idia karaia, bona mai edia dagedage karadia ida idia karaia.​—10/15, rau 30, 31.

◻ Paulo ena haheitalai 1 Korinto 3:​12, 13 dekenai, “lahi” ese dahaka ia laulaulaia, bona Keristani taudia ibounai be dahaka idia diba be namo?

Lahi ta be ita ibounai ese eda mauri lalonai ita davaria​—iseda abidadama idia tohoa hedibagani unai. (Ioane 15:20; Iamesi 1:​2, 3) Ita hadibaia taudia iboudiai be hedibagani do idia davaria. Bema iseda hadibaia gaukarana ita karaia namonamo lasi, dika do idia davaria diba, Paulo ese sisiba ia henia hegeregerena. (1 Korinto 3:​15)​—11/1, rau 11.

◻ Edena dala ai Noa be ‘Dirava danu ia raka’? (Genese 6:10)

Noa be Dirava danu ia raka ena anina be Dirava ese ia hamaoroa karadia ia karaia. Noa ese Iehova ena ura karaia totona ena mauri ia henia dainai, Dirava ida ia hetura namo herea.​—11/15, rau 10.

◻ Dirava ese kara dika taudia edia davana dikana do ia henia ena nega korikorina ita diba lasi dainai, ita be mai eda dala dahaka ita hahedinaraia totona?

Unai dainai ita be mai eda dala do ita hamomokania, Dirava ita lalokau henia momokani bona ita ura iena dala ai do ita raka ela bona hanaihanai. Ia hahedinaraia Dirava ita badinaia noho bona ita be mai eda abidadama iena gaukara karaia dalana dekenai. Danu, ita ia durua ita gima bona lauma dalanai ita noga noho totona. (Mataio 24:42-​44)​—11/15, rau 18.

◻ Dirava ena Natuna, ‘ena ladana’ abidadama henia ena anina be dahaka? (1 Ioane 5:​13)

Ena anina be Keriso ena hahegani ibounai idia badinaia, “umui ta ta do umui lalokau henia” taravatuna danu. (Ioane 15:14, 17) Lalokau ena anina be ma haida kara namo henia dalana ita tahua. Bese, tomadiho, eiava orea idauna ta inai henia kava karadia ibounai ia kokia.​—12/1, rau 6, 7.

◻ Taunimanima ese Iehova ena Witness taudia idia “badu henia” ena badina be dahaka? (Mataio 10:22)

Iehova ena Witness taudia idia kerere lasi to taunimanima ese idia badu henia ena badina be Keristani taudia ginigunadia idia dagedage henia ena badina hegeregerena. Gau ginigunana be, Iehova ena Witness taudia edia tomadiho karadia dainai, taunimanima haida ese idia ura henidia lasi. Gau iharuana be, idia samanidia koikoi​—koikoi hereva dikadia idia gwauraia bona idia abia dae herevadia idia mogea.​—12/1, rau 14.