“Unuseniai Ia Noho Mainona Lau Mamia”

GERMANY gado ia diba tauna ta be Iehova ena Witness taudia idia karaia hebouhebouna ta dekenai ia lao, Witness taudia ia “spai” henia totona. Dahaka dainai? Ia ura “unai hehuni oreana ena dika ia hahedinaraia bona ena turadia be dika amo ia hamauria.” Hebouhebou dekenai ia lao murinai, inai revareva be ena turadia dekenai ia torea:

“Hebouhebou gabuna dekenai lau lao neganai, lau daradara gabu maorona dekenai lau mai eiava lasi. Taunimanima ta lau itaia lasi, bona tano dekenai momoru ta eiava bia tini ta be lasi. Kahirakahira lau lao neganai, steidiam vareai gabuna dekenai tatau rua lau itaia. Lau idia hedavari henia bona lau vareai.

“Lau laloa unuseniai idia noho taudia tausen momo edia regerege do lau kamonai, to regerege lau kamonai lasi. Lau laloa ‘Reana taunimanima haida sibona be unai gabu ena kahana ta ta dekenai idia noho.’

“Lau vareai neganai, platfom dekenai idia karaia drama ese maoromaoro egu lalona ia veria. Gabeai lau itaia, idia kamonai namonamo taudia tausen momo ese unai steidiam idia hahonua momokani. Unuseniai ia noho mainona lau mamia. Hebouhebou ena program ena kahana orena lalonai lau kamonai, itaia, bona mamia gaudia ese egu lalona idia hamarerea bada.

“Witness taudia bogaraginai lau loaloa neganai, edia vairana dekenai ia hedinarai moale bona lalokau lau itaia diba. Vadaeni, inai lalohadai lau koua diba lasi, ‘Momokani inai taudia be Dirava ena taunimanima!’ ”

“Ena turadia be dika amo ia hamauria” lasi, to unai tau matamata ese idia ia noia ia ida Baibel stadi idia karaia. Bena dahaka ia vara? Hari, ia be Keristani elda tauna ta. Ia bona ena ruma bese taudia idia gaukara goadagoada kongregesen ta, Zug, Switzerland dekenai.