Tama o Sina Ia Headava Lou Ruma Besedia Edia Hekwakwanai Badadia

TAMA O SINA IA HEADAVA LOU RUMA BESEDIA IDIA MOALE DIBA! EDENA DALA AI?

Tanobada ena kahana momo dekenai, tama o sina ia headava lou ruma besedia be momo. To, unai bamona ruma bese edia hekwakwanai be idau. Edia hekwakwanai badana be natudia naria dalana. To, hereva gabedia rua ese do idia hahedinaraia toho hegeregerena, tama o sina ia headava lou ruma besena lalonai, natudia idia naria namonamo diba.

VAIA, TAUNIMANIMA ESE TAMA O SINA ENA ADAVANA MATAMATANA IDIA GWAURAIA DIKA. ITA MARAGI neganai, ita haida ese Cinderella sivaraina idauidau ita kamonai, ena tamana ena adavana matamatana dikana ese ia hahisia bada. Danu, Europe dekenai idia noho natudia ese Snow White and the Seven Dwarfs sivaraina idia dibaia. Unai sivarai ese ia hahedinaraia Snow White ena tamana ena adavana matamatana be meamea hahinena dikana ta!

Unai bamona sivarai ese tama o sina ia headava lou ruma besedia edia mauri idia hahedinaraia maoromaoro, a? Tama sina matamatadia iboudiai idia dika, a? Lasi. Idia momo be headava amo idia abia natudia edia namo idia tahua. To idia be unai bamona ruma bese sibodia ese idia davaria hekwakwanai aukadia do idia davaria.

Natudia Naria Dalana Ena Hekwakwanai

Nega momo headava ginigunana idia hadokoa, badina tau bona hahine be lo taudia lasi. Headava iharuana lalonai, tau bona hahine edia turana karana ia hadikaia diba gauna be natudia kara henia daladia. Tahua karadia haida idia hahedinaraia tama o sina ia headava lou ruma besedia 10 10 amo 4 4 be lagani ginigunadia ima lalonai edia headava idia hadokoa.

Reana headava matamata taudia ese edia adavana matamatana ena natudia edia lalona idia hahisia gaudia idauidau, hegeregere daika idia badinaia be namo ena daradara, bona tama o sina ena adavana matamatana be ruma bese lalonai ia vareai dainai idia mamia mama o badu be idia lalo-pararalaia lasi. Reana idia laloa hari edia tama o sina korikorina ese idia ia ura henia lasi to adavana matamatana ia ura henia bada. Danu, reana ena adavana gunana ese ia rakatania tama o sina korikorina ia davaria, ena natudia ese ena adavana gunana idia lalokau henia noho ia abia dae be auka. Mero ta ese ena turana karana namona ena tamana korikorina ida ia hahedinaraia toho, ia gwau: “Sinagu, lau diba Tamagu ese oi ia kara dika henia, to ia be lau ia kara namo henia!” Ena be unai hereva be momokani, to ia dainai sinana ese natudia edia tamana ia badu henia diba.

Mai ena natudia hahinena ia adavaia tauna ta ia gwau: “Lau hegeregere lasi ena natudia hadibaia gaukarana lalonai lau davaria hekwakwanai ibounai lau hanaia totona. Lau laloa edia sinana lau adavaia dainai, hari lau be edia tamana. Lau laloa ia be auka lasi! Natudia ese edia tamana korikorina idia lalokau henia karana be lau lalo-pararalaia lasi, bona kerere momo lau karaia.”

Matahakani henia karadia ese hekwakwanai idia havaraia diba. Natudia ese mai edia lalokau ida idia henia matahakani idia abia be gau badana, to nega momo idia ura lasi idia abia dae, ena be edia tama o sina korikorina ese ia henia. Edia tama o sina ena adavana matamatana ese ia henia neganai, idia abia dae be auka momokani. Nega momo, unai bamona matahakani ia abia neganai, natuna be do ia gwau: “Oi be lauegu tamana korikorina lasi!” Ia ura namo sibona ia havaraia tamana o sinana matamatana be unai hereva dainai do ia lalohisihisi bada diba!

Tama o sina ia headava lou ruma besena lalonai, natudia idia hadibaia namonamo diba, a? Unai tama sina matamatadia ese gaukara namona idia karaia diba ruma bese goadana idia haginia totona, a? Unai henanadai ruaosi edia haere be oibe, bema ruma bese taudia ibounai ese Dirava ena lauma amo ia havaraia Herevana, Baibel, ena hakaua herevadia idia badinaia.

[Picture on page 3]

“Oi be lauegu tamana korikorina lasi!”