Dirava Ena Ladana Idia Atoa Lou

LAGANI momo, reana lagani handred momo lalodiai, inai ladana Iehova, be Baibel idauidau amo idia kokia murinai, Keristani tomadihona tamona, iena witness taudia hari inai negai be unai ladana idia laloa bada bona tetragramaton be Baibel lalonai idia atoa lou.”a

Unai hereva be Brazil ena toretore tauna Assis Brasil ena buka ladana Jeová dentro do Judaísmo e do Cristianismo (Iehova Iuda Tomadihona Bona Keristani Tomadihona Ai) lalonai idia hedinarai. To ita henanadai diba, Ena be idia hahanaia Baibel haida ese Dirava ena ladana idia gaukaralaia, to dahaka dainai tomadiho haida be edia Baibel amo unai ladana idia kokia? Brasil ia gwau: “Dirava ena ladana idia kokia, badina idia gari kava . . . , badina hehunidia dainai, eiava badina idia ura Iesu bona ena sinana, Maria, edia ladana idia abia isi.”

To, Mr. Brasil ese ia hahedinaraia maoro: “To New World Translation of the Holy Scriptures ese Portugal gado dekenai [Dirava] ena ladana kokia karana ia hamaoromaoroa.” Edena dala ai? Unai Baibel lalonai inai ladana Iehova be ena gabu korikoridia dekenai idia atoa lou. Unai ladana Iehova be nega 7,200 bamona New World Translation dekenai ia hedinarai.

Nega ginigunana idia halasia murinai, hari inai nega Portugal gado dekenai idia hahanaia Baibel ena kopi milioni 6 mai kahana idia hariharilaia vadaeni. Unai dainai, Brazil ena niuspepa ta (Diário o Nordeste) dekenai, torea tauna ta ia henanadai, “Oi diba Dirava be mai ena ladana, a?” Unai Baibel matamatana dainai, hari taunimanima milioni momo idia haere diba: “Oibe. Dirava ena ladana be Iehova.”

[Footnote]