Iesu Ena Tanobada Maurina Ena Dina Ginigabena

Friday adorahi, Nisan 14, 33 C.E. ai, tatau bona hahine edia grup ta be idia lalokau henia bada turana ta idia guria gwauraia. Tau ta, Nikodemo, be bonana namona muramuradia ia mailaia mase tauanina ia hegaegaelaia idia guria totona. Tau ma ta, ladana Iosepa, ese idia goeva kumia dabuadia ia mailaia, idia botaia bona idia haberoa mase tauanina kumia totona.

UNAI taudia be daidia? Daika idia guria? Unai ibounai ena anina be dahaka oi dekenai? Unai henanadai haerelaia totona, namona be unai dina badana ena matamana ita laloa.

Thursday Adorahi, Nisan 14

Ierusalema ataiai, metairametaira ia daekau lao huana ia kuborukuboru bona ena diari be bada. Taunimanima momo idia noho unai hanua lalonai, bona hari edia gaukara ia ore dainai regerege be bada lasi. Mamoe nadua ena bonana ia goada. Oibe, taunimanima tausen momo ese aria badana totona idia hegaegae​—⁠unai aria be lagani ta ta ai idia karaia Pasova.

Vadivadi taudia totona ia noho daiutuna badana lalonai, Iesu Keriso bona ena aposetolo taudia 12 be aniani ia noho vadaeni teibolo badinai idia hekure. Kamonai! Iesu ia hereva. Ia gwau: “Lau ura bada hari inai Pasova do ita ania hebou guna, gabeai hisihisi do lau davaria.” (Luka 22:15) Iesu ia diba tomadiho gunalaia taudia ese ia idia inai henia bona idia ura ena mase dalana idia hegaegaelaia. To unai ia do vara lasi neganai, unai hanuaboi tamona ai, mai anina bada karana ta do ia vara.

Pasova idia karaia murinai, Iesu ese inai hadibaia herevana ia henia: “Umui ta ese lauegu mase dala do ia karaia.” (Mataio 26:21) Unai hereva dainai aposetolo taudia idia lalo-hisihisi. Daika ese unai do ia karaia? Idia herevahereva murinai, Iesu ese Iuda Iskariote ia hamaoroa: “Oi ura karaia gauna be do oi karaia haraga.” (Ioane 13:27) Ena be aposetolo taudia 11 ese inai idia diba lasi, to Iuda be Iesu do ia hadikaia tauna. Ia ese idia ia rakatania, Iesu hadikaia palanina lalonai ena kahana do ia karaia totona.

Hebou Idauna Ta

Unai neganai, Iesu ese hebou matamatana ia haginia​—⁠iena mase laloatao totona do idia karaia hebouna. Iesu ese paraoa ta ia abia, guriguri amo Dirava ia tanikiu henia bena ia haria. Idia ia hamaoroa: “Umui abia, umui ania, lauegu tauanina be inai.” Idia ta ta ese unai paraoa ena kahana ta idia ania murinai, Iesu ese kapusi ta mai ena uaina kakakaka ia abia bona ia hanamoa. Iesu ia gwau: “Umui ibounai umui inua.” Bena idia ia hadibaia, ia gwau: “Inai kapusi be maino karaia gwauhamata matamatana lauegu rarana dekenai, umui totona do ia bubua.” Idia abidadama noho aposetolo taudia 11 ia hamaoroa: “Inai bamona do umui karaia, lau do umui laloa totona.”​—⁠Mataio 26:​26-​28; Luka 22:​19, 20; 1 Korinto 11:​24, 25.

Unai hanuaboi ai, Iesu be mai hebogahisi ida iena kamonai aposetolo taudia ia hegaegaelaia do idia davaria gaudia idia haheaukalaia totona bona ia hamomokania idia ia lalokau henia bada. “Lalokau namo herea momokani be inai, tau ta ese ena mauri do ia atoa diho, iena turana totona. Lauegu taravatu do umui badinaia, unai dekena amo lauegu turana do umui lao.” (Ioane 15:​13-​15) Oibe, aposetolo taudia 11 idia hamomokania idia be Iesu ena tura korikoridia, badina ena hahetoho negadia ai ia idia badinaia noho.

Hanuaboi momokani ai​—⁠reana 12 okaloka ia hanaia​—⁠Iesu ese do idia laloaboio diba lasi gurigurina ta ia henia, bena Iehova hanamoa anedia idia abia. Bena, hua kuboruna ena diari lalonai, hanua idia rakatania bona Kiderona Kourana idia raka hanaia.​—⁠Ioane 17:1–18:⁠1.

Getesemane Umana Lalonai

Nega daudau lasi murinai, Iesu bona ena aposetolo taudia idia ginidae Getesemane umana dekenai. Iesu be aposetolo taudia 8 ia rakatania uma ena vareai gabuna ai, bona Petero, Iamesi, bona Ioane ia hakaua lao olive audia gabuna dekenai. Unai tatau toiosi ia hamaoroa: “Lauegu lauma be ia hisihisi bada, mase bamona, umui noho iniseni, bona naria noho.”​—⁠Mareko 14:​33, 34.

Aposetolo taudia toi idia naria bona Iesu be uma gabu lalonai ia vareai momokani, do ia guriguri totona. Mai taitai bona mai matana ranu danu ia noinoi, ia gwau: “Egu Tamana e, oiemu lalona bema ia hegeregere, inai kapusi be lau dekena amo do oi kokia.” Iesu ena maduna be metau momokani. Iehova sibona ese ia havaraia Natuna tamona idia hasatauroa, raskol tauna bamona neganai, Iehova ena inai taudia edia hereva be Iesu ese ia laloa bona lalohisihisilaia! Iesu ia hahisia bada herea lalohadaina ta be, bema unai hahetoho aukana ia haheaukalaia diba lasi, ia lalokau henia Tamana do idia gwauraia dika. Iesu ia guriguri goadagoada bona hisihisi bada ese iena lalona ia abia dainai, ena varahu be rara bamona ia moru tano dekenai.​—⁠Luka 22:​42, 44.

Iesu ia guriguri negana ihatoina ia ore. Tatau mai edia lahi tosi bona lamepa be ia dekenai idia mai gwauraia. Vaira kahana ai ia raka tauna be Iuda Iskariote, bona maoromaoro Iesu dekenai ia mai. Ia gwau: “Hadibaia tauna e, oi namo?” Bena Iesu ia kisi henia. Iesu ia haere, ia gwau, “Iuda e, Taunimanima ena Natuna be kisi dekena amo iena mase dala do oi karaia, a?”​—⁠Mataio 26:49; Luka 22:​47, 48; Ioane 18:⁠3.

Vadaeni, aposetolo taudia idia lalo-parara dahaka ia vara. Edia Lohiabada bona turana namona idia dogoatao gwauraia! Unai dainai Petero ese tuari kaia ta ia dogoatao bona Hahelaga Tauna Badana ena hesiai tauna ena taiana ia utua oho. Iesu be karaharaga ia boiboi ia gwau: “Dohore.” Iesu ese ena imana ia atoa bona hesiai tauna ia hanamoa, bena Petero ia hagania: “Emu tuari kaia be ena gabu dekenai oi atoa lou, badina be tuari kaia idia iusilaia taudia ibounai, be tuari kaia dekenai do idia mase.” (Luka 22:​50, 51; Mataio 26:52) Tuari taudia bona edia biaguna taudia ese Iesu idia dogoatao bona idia kwatua. Aposetolo taudia idia gari bona idia daradara dainai, Iesu idia rakatania bona hanuaboi ena dibura ai idia boio.​—⁠Mataio 26:56; Ioane 18:⁠12.

Friday Daba, Nisan 14

Hari ia be Friday hanuaboi 12 okaloka ia hanaia momokani. Iesu idia hakaua lao Ana ena ruma dekenai, guna ia be Hahelaga Tauna Badana bona ena siahu ia do bada noho. Ana ese Iesu ia henanadai henia bena idia hakaua lao Hahelaga Tauna Kaiapa ena ruma dekenai, unuseniai Kaunsolo ia hebou.

Tomadiho gunalaia taudia ese uitnesi taudia idia tahua, Iesu dekenai koikoi samani herevadia henia totona. To, uitnesi koikoi taudia be mai lalo-tamona ida idia hereva diba lasi. Unai neganai, Iesu ia hereva lasi. Kaiapa ese ena karaia dalana ia haidaua, Iesu ia oda henia: “Mauri Dirava ena ladana dekenai lau hereva oi dekenai, oi hamaoroa ai dekenai, oi be Keriso, Dirava ena Natuna, o?” Iesu ese unai hereva momokanina ia gorea diba lasi, unai dainai mai gari lasi ida ia haere, ia gwau: “Lau inai, bona gabeai Taunimanima ena Natuna do umui itaia, Siahu Ibounai Dirava ena idiba kahanai ia helai, guba ena ori lalonai do ia diho mai.”​—⁠Mataio 26:63; Mareko 14:​60-​62.

Kaiapa ia boiboi, ia gwau: “Dirava dekenai hadikaia hereva ia gwauraia vadaeni, ma dahaka hereva ita tahua?” Hari haida ese Iesu ena vairana idia pataia bona ia dekenai idia kanudi. Ma haida be edia imana amo idia botaia bona idia kara dika henia badabada. (Mataio 26:​65-​68; Mareko 14:​63-​65) Friday dekenai, daba rere kahirakahira murinai, Kaunsolo ia hebou lou, unai hanuaboi ai idia karaia kota be maoro lasi dainai idia ura toana be taravatu idia badinaia. Ma nega ta Iesu be mai gari lasi ida ia gwau ia be Keriso, Dirava ena Natuna.​—⁠Luka 22:66-​71.

Unai murinai, dubu biagudia bona hanua tau badadia ese Iesu idia hakaua lao Pontio Pilato, Iudea ena Roma gavana dekenai, Iesu ia kota henia totona. Edia samania herevana be Iesu be bese taudia edia lalona ia ania, Kaisara ena takisi moni henia karana ia gwauraia dika, bona “sibona ia gwauraia ia be Keriso, king ta.” (Luka 23:2; mani Mareko 12:17 itaia.) Pilato ese Iesu ia henanadai henia murinai, inai hadibaia herevana ia henia: “Kerere ta lau davaria lasi inai tau dekenai.” (Luka 23:⁠4) Pilato ia kamonai Iesu be Galilea tauna, Heroda Anetipa, Galilea ena lohia tauna, dekenai ia siaia badina Pasova totona Ierusalema dekenai ia noho. Heroda be kota maoromaoro karana ia laloa bada lasi. Ia ura Iesu ena hoa karana ta ia itaia. Iesu ese hoa karana ta ia karaia lasi bona ia hereva lasi dainai, Heroda bona ena tuari taudia ese idia hevaseha henia bona Pilato dekenai idia siaia lou.

Pilato ia henanadai lou: “Inai tau ena dika be dahaka? Lau be mase ena badina ta ia dekenai lau davaria lasi. Lau ese do lau botaia, vadaeni do lau ruhaia.” (Luka 23:22) Iena oda dainai, Iesu idia kwadia, to hekwadi gauna be mai ena varo haida bona idia dekenai mai matana gaudia idia kwatua bona Iesu ena doruna ena kopina idia ivaia mai hisihisi bada herea ida. Bena tuari taudia ese kwara gauna au ginigini amo be Iesu ena kwarana dekenai idia atoa kau. Ia idia hevaseha henia bona siriho goadana ta amo idia botaia, bona unai kwara gauna au ginigini amo idia veria bona ena kwarana ia gwadaia. Unai hisihisi bona hahemaraia karadia lalonai, Iesu ena lalona ia goada noho.

Pilato​—⁠reana ena ura be Iesu ena tauanina ena bero dikadia do idia itaia bona do idia hebogahisi henia​—⁠be hutuma vairanai ia hakaua lao lou. Bena Pilato ia gwau: “Umui itaia, umui emui vairana dekenai lau hakaua murimuri dekenai. Do umui diba, iena kerere ta lau davaria lasi.” To dubu gunalaia taudia idia boiboi: “Oi hasatauroa! Oi hasatauroa!” (Ioane 19:​4-6) Hutuma edia boiboi noho karana dainai, Pilato ese Iesu ia henia idia dekenai idia hasatauroa totona.

Hisihisi Bada Herea Mase Dalana

Hari ia be daba kahana, reana dina tubua negana bamona. Iesu idia abia lao Ierusalema murimuriai ia noho gabuna dekenai, ladana be Gologota. Ikoko badadia amo Iesu ena imana bona ena aena be satauro dekenai idia kokoa kau. Satauro idia abia isi bona ena tauanina ena metau ese idia kokoa gabudia dekenai ena hidio ia hedare neganai ena hisihisi be hereva amo ita gwauraia hedinarai diba lasi. Taunimanima hutuma be Iesu bona henao taudia ruaosi idia hasatauroa gabuna dekenai idia lao unai kara idia itaia totona. Momo be Iesu idia gwau henia. Dubu gunalaia taudia bona ma haida ese idia hevaseha henia, idia gwau: “Ia be idau taudia ia hamauria, to edena bamona ia sibona ia hamauria diba lasi?” Tuari taudia, bona idia hasatauroa henao taudia rua danu ese Iesu idia hereva dika henia.​—⁠Mataio 27:​41-​44.

Vadaeni, dina tubua ai, Iesu be nega sisina satauro dekenai ia noho murinai, Dirava ese ia havaraia dibura idauna ese tanobada ia koua ela bona hora toi idia ore.a Reana ia dainai Iesu ida idia hasatauroa taudia ta ese ena bamona ia gwau henia. Bena, Iesu dekenai ia hereva, ia noinoi: “Oiemu Basileia do oi abia neganai, do oi laloa lau!” Ia mase gwauraia neganai, unai bamona abidadama ia hahedinaraia be hoa gauna! Iesu ese ia haere, ia gwau: “Momokani, hari dina oi lau hamaoroa, oi be lau danu Paradaiso dekenai do ita noho.” (NW)​—⁠Luka 23:​39-​43.

Adorahi ai, 3 okaloka bamona, Iesu ia diba ena mauri be kahirakahira do ia ore. Ia gwau: “Lau ranu mase.” Bena ia boiboi mai goada danu, ia gwau: “Egu Dirava e, egu Dirava e, dahaka dainai lau oi rakatania?” Iesu ia mamia ena Tamana ena naria siahuna be ia amo ia kokia, iena kara maoromaoro do idia tohoa vaitani totona, bona Davida ena hereva ia gwauraia lou. Ta be sipanisi ta uaina iditana lalonai ia atoa diho, bona Iesu ena uduna bibina dekenai ia abia isi. Iesu be unai uaina haida ia inua, bena ia gwau: “Ia ore vadaeni!” Bena ia boiboi, ia gwau, “Egu Tamana e, egu lauma be oiemu imana dekenai lau atoa inai,” bena ena kwarana ia atoa diho, bona ia mase.​—⁠Ioane 19:​28-​30; Mataio 27:46; Luka 23:46; Salamo 22:1.

Hari ia be adorahi momokani, bona haraga herea gau haida idia hegaegaelaia Iesu do idia guria dina ia do diho lasi neganai, badina unai neganai Sabati (Nisan 15) do ia matamaia. Iosepa, Arimatea tauna, momo idia diba Kaunsolo tauna, bona hunia dalana dekenai ia be Iesu ena hahediba tauna danu, be gwaumaoro ia abia Iesu ia guria totona. Nikodemo, Kaunsolo tauna danu, guna hunia dalanai ia gwau Iesu ia abidadama henia, be muro bona aloe edia muramura, edia metau be kilogram 33 bamona, ia henia. Unai gabu kahirakahira ai, Iesu ena tauanina be guria gabuna matamatana ta ai idia atoa namonamo.

Ia Mauri Lou!

Sunday ai, daba ia do rere lasi neganai, Maria Magadala bona hahine ma haida ese Iesu ena gara gabuna dekenai idia lao. To itaia! Ta ese gara koua nadi ia kokia vadaeni! Gara lalonai tauanina be lasi! Maria Magadala ia heau lao Petero bona Ioane hadibaia totona. (Ioane 20:​1, 2) Ia lao neganai, aneru be unai hahine ma haida dekenai ia hedinarai. Ia gwau: “Umui gari lasi.” Idia ia hagania: “Umui lao haragaharaga, iena diba tahua taudia dekenai do umui hamaoroa ia be mase dekena amo ia toreisi vadaeni.”​—⁠Mataio 28:​2-7.

Idia heau lao neganai, Iesu idia davaria! Idia ia hamaoroa: “Lauegu varavara taudia do umui hamaoroa.” (Mataio 28:​8-​10) Gabeai, Maria Magadala be gara gabuna dekenai ia noho bona ia taitai neganai, Iesu be ia dekenai ia hedinarai. Iena moale be bada momokani bona hahediba taudia ma haida dekenai unai sivarai namona ia hamaoroa totona ia heau lao. (Ioane 20:​11-​18) Momokani, unai do idia laloaboio lasi Sunday ai, ia toreisi lou Iesu be nega ima ia hedinarai ena hahediba taudia idauidau dekenai, ia hamomokania ia mauri lou momokani!

Edena Dala ai Oiemu Mauri Ia Haidaua

Edena dala ai lagani 1,966 gunanai idia vara gaudia be hari lagani 2000 ia kahirakahira negana ai umui noho taudia emui mauri idia haidaua diba? Unai gaudia ia itaia tauna ta ia gwau: “Dirava ese iena lalokau ita dekenai, be inai bamona ia hedinaraia: Ia ese iena Natuna tamona tanobada dekenai ia siaia, ia dekena amo mauri do ita abia totona. Lalokau ena anina be inai: Ita ese Dirava ita lalokau henia lasi, to Dirava ese ita ia lalokau henia. Bona ia ese iena Natuna ia siaia, ia sibona be iseda dika gwauatao dalana totona.”​—⁠1 Ioane 4:​9, 10.

Edena dala ai Keriso ena mase be “iseda dika gwauatao dalana”? Iseda dika ia gwauatao dainai, Dirava ita tura henia namonamo diba. Tau ginigunana, Adamu, ese Dirava ia gwau-edeede henia bena unai dainai ena natudia dekenai kara dika bona mase ia henia, edia ahuna bamona. To, Iesu ese ena mauri ia henia, taunimanima edia kara dika bona mase davana henia totona, bona unai kara amo Dirava ese ita ia hebogahisi henia bona lalo-namo henia diba. (1 Timoteo 2:​5, 6) Iesu ena boubou, kara dika ia koua diba boubouna, oi abidadama henia neganai, Adamu amo oi abia kara dika bona mase amo oi do ia ruhaia diba. (Roma 5:​12; 6:​23) Bena, unai ese dala ia kehoa oiemu lalokau Tamana, Iehova Dirava, oi tura henia namonamo diba totona. Vadaeni, Iesu ena boubou hereadaena ena anina oi dekenai be do ia doko lasi maurina.​—⁠Ioane 3:​16; 17:⁠3.

Thursday adorahi, April 1 ai, tanobada hegegemadai, gabu tausen momo dekenai, taunimanima milioni momo be Iesu ena mase laloatao heboudia dekenai idia lao neganai, unai bona unai bamona gaudia do idia kikilaia. Oi ai boiria do oi noho danu. Oiemu gabu dekenai idia noho Iehova ena Witness taudia be mai moale ida oi do idia hamaoroa edeseniai bona edena negai oi lao be namo. Bema oi noho, iseda lalokau Diravana bona ena Natuna Iesu ese ena tanobada maurina ena dina ginigabena ai idia karaia gauna dekenai, emu laloa bada karana do ia habadaia.

[Footnotes]

[Chart/Pictures on page 7]

IESU ENA MASE BONA TOREISI LOU

NISAN 33 C.E. IDIA VARA GAUDIA TAU HEREADAENAb

[Footnote]