Oiemu Hadibaia Karana Oi Naria Namonamo

“Oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu.”​—1 TIMOTEO 4:16.

1, 2. Dahaka dainai hadibaia taudia mai edia lalo-goada idia noho hari be gau badana?

“UMUI lao, bese ibounai be diba tahua taudia do umui halaoa . . . Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Iesu Keriso ese unai hahegani ia henia dainai, namona be Keristani taudia ibounai idia hekwarahi hadibaia taudia ai idia lao totona. Nega ia do noho lalonai, namona be hadibaia taudia mai edia lalo-goada ese kudou-maoro taudia idia durua Dirava idia diba totona. (Roma 13:11) Aposetolo Paulo ia gwau: “Sivarai Namona do oi harorolaia goadagoada, nega namodia neganai, bona nega dikadia neganai danu.” (2 Timoteo 4:​2) Unai dainai, ita ese kongregesen lalonai bona murimurinai ma haida ita hadibaia be namo. Momokani, haroro haheganina ena anina be Dirava ena hereva harorolaia karana sibona lasi. Kamonai taudia be hahediba taudia ai idia lao totona idia ita hadibaia namonamo be gau badana.

² Momokani, inai ‘nega ena dokona dekenai metau dikadia momo idia vara.’ (2 Timoteo 3:1) Taunimanima edia lalohadai bona hahediba hereva koikoidia ese momo edia lalona idia hakaua kerere. Momo “edia laloa be dibura” bona idia “hemarai lasi momokani.” (Efeso 4:18, 19) Haida edia hemami ia dika bona idia lalohisihisi. Oibe, taunimanima “idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) To, idia ita hadibaia namonamo neganai, kudou-maoro taudia ita durua bada edia mauri idia haidaua totona.

Hadibaia Taudia Kongregesen Lalonai

3. (a) Iesu ese ia henia hadibaia gaukarana ena kahana ta be dahaka? (b) Kongregesen lalonai ia vara hadibaia gaukarana be daidia edia maduna?

³ Baibel stadi karana amo, taunimanima milioni momo ese edia ruma ai diba idia abia. To, bapatiso idia abia murinai, ma heduru haida idia abia be namo, ‘do idia gini goada, ramu ese au badana ia dogoatao, ia gini goada bamona.’ (Efeso 3:17) Iesu ese Mataio 28:19, 20 lalonai ia henia hahegani ita badinaia bona taunimanima matamatadia be Iehova ena orea lalonai ita hakaua neganai, kongregesen lalonai ia vara hadibaia gaukarana amo namo do idia davaria. Efeso 4:​11-​13 ia gwau idia abia hidi taudia ‘haida be haroro taudia bona hadibaia taudia, Dirava ena taudia ibounai do idia durua, Dirava ena hesiai gaukara do idia karaia namonamo, bona Keriso ena tauanina do ia gini goada totona.’ Nega haida, kongregesen idia hadibaia namonamo lalonai, idia ‘sisiba henia, edia hereva amo edia kudouna idia pidia, ela bona edia lalona idia giroa. Taunimanima edia lalona idia hagoadaia.’ (2 Timoteo 4:2) Hadibaia taudia edia gaukara be mai ena anina bada dainai, Korinto taudia ia tore henia neganai, Paulo ese aposetolo bona peroveta taudia murinai hadibaia taudia ia herevalaia.​—1 Korinto 12:28.

4. Hadibaia namonamo karana ese edena bamona ita ia durua, Paulo ena hereva Heberu 10:24, 25 lalonai ita badinaia totona?

⁴ Momokani, Keristani taudia ibounai lasi be elda taudia, eiava gunalaia taudia. To, Baibel ese ita ibounai ia hagoadaia ita durua heheni, “lalokau dekena amo kara namodia” ita karaia totona. (Heberu 10:24, 25) Unai be hebou dekenai ita karaia ena anina ta be ita henia haeredia ita hegaegaelaia namonamo bona mai iseda kudouna ibounai ida ita henia, ma haida idia durua bona idia hagoadaia totona. Basileia harorolaia gaukarana idia manadalaia taudia ese ‘kara namodia idia karaia’ totona pablisa matamata taudia idia durua, bema idia ida idia haroro hebou neganai, idia dibaia vadaeni gaudia be idia dekenai idia hadibaia. Unai negadiai bona ma nega idauidau ai ma haida dekenai anina bada gaudia ita hadibaia diba. Hegeregere, Baibel ese lo hahinedia ia hagoadaia idia ese “kara namo do idia hadibaia.”​—Tito 2:3.

Edia Lalona Ia Veria Dainai Idia Abidadama Henia

5, 6. (a) Edena dala ai Keristani tomadiho momokanina bona tomadiho koikoi idia idau? (b) Edena dala ai elda taudia ese kamonai matamata taudia idia durua, abia hidi namodia idia karaia totona?

⁵ Keristani tomadiho momokanina bona tomadiho koikoi idia idau momokani. Tomadiho koikoi gunalaia taudia idia ura edia memba taudia edia lalohadai idia biagua. Iesu be tanobada dekenai ia noho neganai, tomadiho gunalaia taudia ese sene taravatu metaudia amo, taunimanima edia mauri ibounai idia biagua toho. (Luka 11:46) Nega momo Kerisendom ena gunalaia taudia be unai idia karaia danu.

⁶ To, tomadiho momokanina be “hesiai gaukara helagana” bona ita ese ‘mai iseda darana ida ita karaia.’ (Roma 12:1, NW) Baibel ena hereva ese Iehova ena hesiai taudia edia ‘lalona ia veria’ dainai idia abidadama henia. (2 Timoteo 3:​14, NW) Nega haida, naria taudia ese hakaua herevadia bona gaukara idauidau idia karaia, kongregesen ena heau dalana ia namo totona. To, elda taudia idia ura lasi Keristani tadikaka edia abia hidi idia karaia, idia ura tadikaka idia hadibaia, “maoro bona kerere edia toana idia diba namonamo” totona. (Heberu 5:14) Elda taudia ese lauma dalanai ‘Iesu ena hadibaia hereva’ amo kongregesen idia ubua neganai, unai idia karaia.​—1 Timoteo 4:6.

Oiemu Hadibaia Karana Oi Naria Namonamo

7, 8. (a) Edena dala ai diba bada lasi tatau bona hahine ese hadibaia karana idia karaia diba? (b) Dahaka ese ia hahedinaraia ita ta ta ita hekwarahi be gau badana hadibaia taudia namodia ai ita lao totona?

⁷ To, namona be ita abia hahegani, taunimanima hadibaia gaukarana, ita laloa lou. Unai gaukara ita karaia totona diba bada eiava edukeisen badana ita abia be namo, a? Lasi. Badina tanobada hegegemadai hadibaia gaukarana ena kahana badana be diba bada lasi tatau bona hahine ese idia karaia. (1 Korinto 1:​26-​29) Paulo ia gwau: “To ai, inai diari [hesiai gaukara] ai abia vadaeni taudia, be hodu, manoka gaudia [goevadae lasi taudia] sibona bamona do ai noho. Inai anina be taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.” (2 Korinto 4:7) Tanobada hegegemadai Basileia harorolaia gaukarana ese anina namona ia havaraia dainai, ita diba Iehova ena lauma ena siahu ese unai gaukara ia durua!

⁸ To, ‘gaukara namona momokani tauna ai do ita lao, bona hereva momokani do ita hadibaia maoromaoro’ totona ita ta ta ita hekwarahi be gau badana. (2 Timoteo 2:15) Paulo ese Timoteo ia hagoadaia, ia gwau: “Oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu.” (1 Timoteo 4:16) Ta ese kongregesen lalonai bona murimurinai ia karaia hadibaia karana be edena bamona ia naria namonamo? Unai ia karaia totona ena diba ia habadaia momokani eiava hadibaia daladia idauidau momo ia dibaia be gau badana, a?

9. Iseda diba be gau badana lasi to dahaka be gau badana?

⁹ Iesu ese Hereva Badana Ororo Dekenai ia henia neganai, ia hahedinaraia hadibaia daladia namodia ia diba namonamo. Ena hereva ia haorea murinai, “taunimanima ese iena hadibaia hereva dekenai idia hoa bada.” (Mataio 7:28) Momokani, ita ta lasi ese Iesu bamona ma haida ita hadibaia diba. To, ena be ita hereva namonamo diba lasi, hadibaia karana ita karaia namonamo diba. Iobu 12:7 ia gwau “uda boromadia bona ataiai manudia” ese hereva lasi dalanai hadibaia karana idia karaia! Bema diba ita abia unai be namo, to anina bada gauna be ‘ita be edena bamona’ taudia​—hegeregere iseda kara be edena bamona bona lauma dalanai edena kara ita manadalaia, stadi taudia idia tohotohoa totona.​—2 Petero 3:​11; Luka 6:​40.

Dirava Ena Hereva Stadilaia Taudia

10. Edena dala ai Iesu ia hahedinaraia namonamo ia be Dirava ena Hereva stadilaia tauna?

¹⁰ Ta ese Baibel ena hereva momokani ia hadibaia namonamo totona, Dirava ena Hereva ia stadilaia be namo. (Roma 2:​21) Iesu Keriso ese haheitalai namo hereana ia hahedinaraia. Iena haroro gaukarana lalonai, Iesu ese ia gwauraia hereva eiava lalohadai idauidau be Heberu Revarevadia momo amo ia abia.a Iena mauri lagani be 12 neganai, ia hedinarai Dirava ena Hereva ia diba namonamo, ia be “Dubu Helaga lalonai idia davaria, hadibaia taudia edia huanai ia helai, edia hereva ia kamonai, bona ia henanadaia danu, idia dekenai.” (Luka 2:46) Ia bada neganai, ia be dubu, Dirava ena Hereva idia duahia gabuna, dekenai ia lao hanaihanai.​—Luka 4:​16.

11. Hadibaia tauna ese edena stadi daladia namodia ia haginia be namo?

¹¹ Oi ura bada Dirava ena Hereva oi duahia, a? Baibel oi stadilaia namonamo karana amo, “Lohiabada gari henia kara do oi diba, bona Dirava do oi diba.” (Aonega Herevadia 2:4, 5) Unai dainai, stadi daladia namodia oi haginia. Dina ta ta ibounai Dirava ena Hereva ena kahana ta oi duahia toho. (Salamo 1:2) Gima Kohorona bona Awake! ta ta oi abia murinai, maoromaoro oi duahidia. Kongregesen hebou dekenai oi kamonai namonamo. Diba tahua namonamo karana oi dibaia. ‘Gau iboudiai oi tahua namonamo’ karana oi dibaia murinai, emu hadibaia karana lalonai, unai gaudia do oi herevalaia maoromaoro.​—Luka 1:3.

Oi Hadibaia Taudia Oi Lalokau Henia Bona Oi Matauraia

12. Iesu ena lalohadai ena hahediba taudia dekenai be edena bamona?

¹² Oi hadibaia taudia oi laloa dalana be mai anina bada gauna ma ta. Farisea taudia ese Iesu ena hereva idia kamonai taudia idia laloa maragi. Idia gwau: “Inai ariara taunimanima be Mose ena taravatu idia diba lasi. Idia be Dirava dekena amo dika davana do idia davaria.” (Ioane 7:49) To Iesu ese ena hahediba taudia ia lalokau henia bona ia matauraia bada. Ia gwau: “Harihari ia lao, umui be hesiai taudia do lau gwauraia lasi, badina hesiai tauna be iena biaguna ena kara ia diba lasi. To umui be lauegu turana do lau gwauraia, badina be lauegu Tamana dekena amo lau kamonai herevadia ibounai umui dekenai lau hamaoroa vadaeni.” (Ioane 15:15) Unai ese Iesu ena hahediba taudia ese edia hadibaia gaukarana do idia karaia dalana ia hahedinaraia.

13. Paulo ese ia hadibaia taudia be edena bamona ia laloa?

¹³ Hegeregere, Paulo bona ia hadibaia taudia edia turana karana be namo herea, bisinesi karana bamona lasi. Korinto taudia ia hamaoroa, ia gwau: “Bema Keriso ena mauri dalana umui dekenai idia hadibaia taudia ibounai be 10,000, inai be gau ta lasi. Umui emui tamana be tamona sibona. Oibe, Keriso Iesu ena mauri dalana diba totona umui emui tamana be lau sibona. Lau ese Sivarai Namona umui dekenai lau haroro henia dainai umui be lauegu natuna.” (1 Korinto 4:15) Nega haida, Paulo ia hadibaia taudia ia sisiba henia mai ena tai ida! (Kara 20:31) Danu, ia ese haheauka bona hebogahisi bada herea ia hahedinaraia. Unai dainai Tesalonika taudia ia hamaoroa diba: “Umui emui huanai ai be manau, iena natuna ia ubua hahine bamona.”​—1 Tesalonika 2:7.

14. Dahaka dainai iseda Baibel stadi taudia edia namo ita tahua be gau badana? Mani haheitalai oi gwauraia.

¹⁴ Oi ese Iesu bona Paulo oi tohotohoa, a? Ena be iseda diba be bada lasi, to bema iseda stadi taudia ita lalokau henia momokani do ita hegeregere. Iseda Baibel stadi taudia idia itaia edia namo ita tahua momokani, a? Nega ita atoa idia ita diba namonamo totona, a? Keristani hahine ta ia hekwarahi bada ena stadi hahinena be lauma dalanai ia goada ia lao totona, to anina ia vara lasi, bena mai hebogahisi ida ia henanadai: “Gau ta dainai oi lalo-hekwarahi, a?” Unai hahine ese ena kudouna dekenai idia noho gaudia ibounai ia gwauraia hedinarai, bona ia lalo-hekwarahilaia gaudia be momo. Unai herevahereva namona ese unai hahine ia durua bona unai murinai lauma dalanai ia goada ia lao. Unai bamona taudia be Baibel ena hereva amo ita hagoadadia be namo. (Roma 15:4) To, sisiba herevana ta: Reana Baibel stadi tauna ta be lauma dalanai ia goada ia lao haraga noho, to reana iena kara haida be Keristani taudia edia kara hegeregerena lasi. Unai dainai ia ita bamoa momo be aonega karana lasi. Baibel ese Keristani taudia dekenai ia atoa taravatu ita badinaia be namo.​—1 Korinto 15:33.

15. Edena dala ai ita ese iseda Baibel stadi taudia dekenai hemataurai karana ita hahedinaraia diba?

¹⁵ Iseda stadi taudia ita matauraia karana ena anina ta be edia mauri ita biagua toho lasi. (1 Tesalonika 4:​11) Hegeregere, reana ita stadi henia hahinena ta be tau ta ida ia noho hebou to idia headava momokani lasi bona reana idia be mai edia natudia danu. Hahine ese Dirava ia diba namonamo neganai, ia ura ena mauri dalana ia haidaua, Iehova vairanai ia goeva totona. (Heberu 13:4) Unai tau do ia adavaia eiava ia rakatania be namo, a? Reana ita laloa lauma gaudia ia laloa sisina sibona eiava ia laloa lasi tauna ia adavaia dainai, hahine be lauma dalanai do ia manoka diba. Eiava, reana ita ese ena natudia edia namo ita tahua bona ita laloa unai tauna do ia adavaia be namo. Herevana dahaka ita laloa, to stadi tauna ena mauri ita biagua toho bona iseda lalohadai badinaia totona ia ita doria be hemataurai lasi bona lalokau lasi karana. Oibe, iena abia hidi dainai do idia vara gaudia be ia dekenai do idia vara. Unai dainai, unai stadi tauna ita hadibaia bena ia sibona ena “lalona” ai ena dala do ia abia hidi be namo, ani?​—Heberu 5:14.

16. Edena dala ai elda taudia ese Dirava ena mamoe oreana dekenai lalokau bona hemataurai idia hahedinaraia?

¹⁶ Kongregesen elda taudia ese mamoe oreana idia kara henia mai lalokau bona hemataurai ida be gau badana. Filemona ia tore henia neganai, Paulo ia gwau: “Oi be lauegu tadina, Keriso lalonai ita noho dainai. Unai dainai oi lau oda henia diba, kara ta do oi karaia. To oi lau lalokau henia dainai, oi do lau oda henia lasi, to oi do lau noia sibona.” (Filemona 8, 9) Nega haida, kongregesen lalonai idia vara gaudia idia hesikulaia. Reana elda taudia be mai goada ida idia kara be namo. Paulo ese Tito ia hagoadaia ‘idia [kara dika taudia] do ia gwau henia goadagoada, Sivarai Namona do idia abidadama henia maoromaoro totona.’ (Tito 1:13) Ena be unai bamona idia karaia be namo, to namona be elda taudia idia naria namonamo, hebogahisi lasi dalanai kongregesen idia hereva henia garina. Paulo ia gwau: “Lohiabada ena hesiai tauna be do ia heai lasi, to taunimanima ibounai dekenai do ia bogahisihisi henia. Ia ese Dirava ena dala do ia hadibaia namonamo, mai ena goada bona haheauka danu.”​—2 Timoteo 2:24; Salamo 141:3.

17. Mose ena kerere be dahaka, bona elda taudia ese ia amo dahaka idia dibaia diba?

¹⁷ Namona be elda taudia ese nega ibounai idia laloatao idia ese ‘Dirava ia henia mamoe orea idia naria.’ (1 Petero 5:2) Ena be Mose be manau tauna, to nega sisina unai lalohadai ia laloaboio. Israela taudia ese “Mose ena lauma idia habadua, bona unai dainai ia ese hereva maoromaoro ia gwauraia lasi.” (Salamo 106:33) Ena be Israela taudia edia kara be mai kerere, to Mose ese Iena mamoe oreana ia hereva dika henia dainai Dirava ia moale lasi. (Numera 20:​2-12) Hari inai negai unai bamona gaudia idia vara neganai, namona be elda taudia idia hekwarahi mai edia lalo-parara bona kara namo ida kerere taudia idia hadibaia totona. Bema tadikaka ita kara henia neganai, edia kara idia haidaua diba lasi taudia bamona lasi, to heduru idia abia be namo taudia bamona ita kara henia mai hebogahisi ida, sisiba do idia badinaia haraga. Namona be elda taudia ese Paulo ena lalohadai namona idia abia, ia gwau: “Ai be Lohiabada ai abidadama henia dainai, ai ese umui danu ai abidadama henia. Ai diba momokani, umui dekenai ai hadibaia hereva be umui karaia noho, bona do umui karaia noho.”​—2 Tesalonika 3:4.

Edia Dabu Gaudia Oi Laloa

18, 19. (a) Edena dala ai ita ese Baibel stadi taudia edia diba hegeregerena iseda hadibaia karana ita haidaua be namo? (b) Bema Baibel stadi taudia be gau haida dekenai lalohadai maorona idia abia dae be auka, edena bamona ita durudia diba?

¹⁸ Hadibaia tauna namona ese ena hadibaia dalana ia haidaua ena stadi tauna ena diba hegeregerena. (Ioane 16:12 itaia.) Iesu ese ia gwauraia kina parabolena lalonai, gaukara biaguna ese hesiai taudia dekenai hahenamo ia henia “idia ta ta edia diba hegeregerena.” (Mataio 25:15) Ita ese Baibel stadi ita karaia neganai, unai kara ita tohotohoa diba. Momokani, ita ura Baibel ia herevalaia bukana o buklet ta ita stadilaia ore sisina haraga. To, namona be ita lalo-parara, taunimanima ibounai idia duahiduahi namonamo lasi bona lalohadai matamatadia idia abia dae haraga lasi. Unai dainai, bema kamonai tauna namona ese diba ia abia haraga lasi, namona be mai eda lalo-parara ida ita laloa namonamo edena negai ita stadilaia kahana ta ita rakatania bona kahana ma ta dekenai ita lao. Stadi negana lalonai karoa ta ita stadilaia ore be gau badana lasi, to stadi taudia ita durua, idia dibaia gaudia idia lalo-pararalaia totona be gau badana.​—Mataio 13:51.

¹⁹ Unai be momokani danu, bema Baibel stadi taudia ese gau haida, hegeregere Toi Tamona herevana eiava tomadiho dina helagadia, dekenai lalohadai maorona idia abia dae be auka. Ena be nega momo Baibel idia herevalaia bukadia ma haida amo ita tahua gaudia be iseda stadi lalonai ita herevalaia lasi, to nega haida ita karaia diba bema ia hedinarai goevagoeva unai ese stadi tauna do ia durua. To namona be ita laloa maoromaoro, lauma dalanai stadi tauna ia tubu haraga karana ita koua garina.

Mai Ura Bada ida Oi Karaia!

20. Edena dala ai Paulo ese ia hahedinaraia ena hadibaia karana be mai ena lalo-goada bona abidadama ida ia karaia?

²⁰ Paulo ia gwau: “Gaukara goada.” (Roma 12:11) Oibe, herevana ita ese ta ena ruma dekenai Baibel stadi ita karaia eiava kongregesen hebou dekenai hereva ta ita henia, to namona be mai eda lalo-goada bona ura bada ida ita karaia. Paulo be Tesalonika taudia ia hamaoroa, ia gwau: “Sivarai Namona ai mailaia umui dekenai, hereva sibona dekenai lasi, to Lauma Helaga ena siahu dekenai danu. . . . [Bona] ai gwauraia mai siahu danu.” (1 Tesalonika 1:5) Unai dainai Paulo bona ena bamodia ese ‘sivarai namona idia henia sibona lasi, to edia mauri idia atoa diho danu.’​—1 Tesalonika 2:8.

21. Edena dala ai ita ese mai eda ura bada ida iseda hadibaia gaukarana ita karaia noho diba?

²¹ Mai ura bada korikorina ida ita karaia diba, bema ita abia dae momokani iseda Baibel stadi taudia ese ita gwauraia herevana idia kamonai be gau badana. Namo lasi ita laloa hadibaia gaukarana ta ita karaia kava diba. Toretore tauna Esera ese ena hadibaia karana ia naria namonamo. Ia ese “mai ena lalona ibounai, Lohiabada ena Taravatu ia tahua, bona ena kara ia karaia danu. Ia ese danu, unai taravatu bona oda herevadia ibounai be Israela taudia dekenai ia hadibaia.” (Esera 7:​10) Unai ita karaia totona, namona be do ita stadilaia gaudia ita hegaegaelaia namonamo bona edia anina ita laloa dobu. Namona be Iehova ita guriguri henia, iseda abidadama ia habadaia totona. (Luka 17:5) Mai iseda ura bada ida ita karaia neganai, Baibel stadi taudia do ita durua, hereva momokani idia ura henia goadagoada totona. Momokani, iseda hadibaia karana ita naria namonamo lalonai, reana hadibaia daladia haida ita badinaia danu be namo. Hereva gabena ese unai gaudia do ia herevalaia.

[Footnotes]

Oi Laloatao, A?

◻ Dahaka dainai Keristani hadibaia taudia namodia idia noho hari be gau badana?

◻ Ita ese edena stadi daladia namodia ita haginia be namo?

◻ Dahaka dainai ita hadibaia taudia ita lalokau henia bona ita matauraia be gau badana?

◻ Edena dala ai ita ese iseda Baibel stadi taudia edia diba hegeregerena iseda hadibaia karana ita haidaua diba?

◻ Dahaka dainai ura bada bona abidadama be gau badadia ma haida ita hadibaia neganai?

[Picture on page 10]

Hadibaia taudia namodia be Dirava ena Hereva stadilaia taudia

[Picture on page 13]

Baibel stadi taudia edia namo oi tahua