‘Do Ia Lao Negana Ia Ginidae!’
“Inai tanobada do ia rakatania, iena Tamana dekenai do ia lao negana ia ginidae vadaeni.”—IOANE 13:1.
1. Lagani 33 C.E. ena Pasova ia kahirakahira neganai, Ierusalema dekenai taunimanima ese dahaka idia herevalaia momo, bona dahaka dainai?
IENA bapatiso negana lagani 29 C.E. ai, Iesu ese dala ta ia badinaia bona unai dala ese do ia hakaua lao iena mase, toreisi lou, bona hairai abia “negana” dekenai. Lagani 33 C.E. ena siahu negana ia matamaia. Iuda taudia edia kota badana, Kaunsolo, ese pura haida gunanai palani idia karaia Iesu idia hamasea totona. Iesu be reana Nikodemo, Iesu ia tura henia Kaunsolo tauna ta, amo edia palani ia dibaia, bena Ierusalema ia rakatania bona Ioridane Sinavaina ia hanaia bona hanua maragidia gabuna dekenai ia noho. Pasova ena Aria ia kahirakahira, bona taunimanima momo be edia hanua maragidia amo idia lao Ierusalema dekenai, bona taunimanima momo ese Iesu idia herevalaia. Taunimanima idia henanadai heheni: “Umui be dahaka umui gwau? Iesu be inai aria totona do ia mai o lasi?” Hahelaga taudia badadia bona Farisea taudia ese unai kara idia habadaia badina taunimanima idia hagania vadaeni, bema ta ia diba Iesu be edeseniai ia noho idia do ia hadibaia.—Ioane 11:47-57.
2. Maria ese edena kara ta ia karaia bona idia hepapahuahulaia, bona Iesu ese ena kara ia hanamoa neganai, ia hahedinaraia ena “nega” dekenai dahaka ia diba?
2 Nisan 8 dekenai, dina 6 idia do noho ela bona Pasova do ia vara neganai, Iesu be Ierusalema ena gabu kahirakahira ia giroa lao. Betania—ia lalokau henia turadia Mareta, Maria, bona Lasaro edia gabu—dekenai ia lao, Ierusalema amo ena daudau be kilomita toi. Unai be Friday hanuaboi, bona Iesu be Sabati dinana ai unuseniai ia noho. Saturday hanuaboi, Maria ese Iesu dekenai dava bada bonana namona dehoro ia atoa neganai, ena hahediba taudia idia badu. Iesu ia gwau: “Inai hahine umui koua lasi, dehoro ia abia hegaegae noho vadaeni, lau do idia guria dinana totona. Ogogami taudia be nega ibounai umui dekenai idia noho, to lau be nega ibounai umui dekenai do lau noho lasi.” (Ioane 12:1-8; Mataio 26:6-13) Iesu ia diba “tanobada do ia rakatania, iena tamana dekenai do ia lao negana ia ginidae vadaeni.” (Ioane 13:1) Dina ima murinai ia ese “iena mauri do ia atoa diho, taunimanima momo edia dika davana karaia totona.” (Mareko 10:45) Unai murinai, Iesu ia karaia bona hadibaia gaudia ibounai dekenai karaharaga mamina ia hahedinaraia. Ita be inai tanobada ena oromana dikana ena dokona be mai iseda ura bada ida ita naria noho lalonai, namona be iena haheitalai namona ita laloa! Dina ta murinai, Iesu dekenai ia vara gauna mani oi laloa.
Iesu be mai Kwalimu ida Ia Vareai Dinana
3. (a) Sunday, Nisan 9 ai, Iesu be edena dala ai Ierusalema lalonai ia vareai, bona idia itaia taudia momo ese dahaka idia karaia? (b) Farisea taudia ese taunimanima hutuma idia maumauraia neganai, Iesu ena haere be dahaka?
3 Sunday, Nisan 9 ai, Iesu be mai kwalimu ida Ierusalema lalonai ia vareai. Siti ia vareai gwauraia neganai—doniki ena natuna latanai ia guia bona Sekaraia 9:9 ena hereva ia hagugurua—bona taunimanima momo ese edia dabua be dala dekenai idia atoa, ma haida be au rigidia idia utua bona dala dekenai idia atoa. Idia boiboi: “Lohiabada ena ladana dekenai ia mai King ita hanamoa inai!” Hutuma huanai idia noho Farisea taudia haida idia ura Iesu ese ena hahediba taudia ia gwau henia. To, Iesu ia haere, ia gwau: “Lau hamaoroa umui dekenai, bema idia be mai regerege lasi, inai nadi do idia boiboi.”—Luka 19:38-40; Mataio 21:6-9.
4. Iesu be Ierusalema lalonai ia vareai neganai, dahaka dainai taunimanima idia herevahereva momo?
4 Pura haida sibona gunanai, Iesu be Lasaro ia hatorea isi lou neganai, unai hutuma lalonai idia noho taudia momo ese idia itaia. Hari idia be unai hoa karana idia herevalaia noho ma haida dekenai. Unai dainai Iesu be Ierusalema ia vareai neganai, unai hanua ai idia noho taudia ibounai idia herevahereva momo. Idia henanadai: “Inai be daika?” Bona hutuma idia gwau: “Inai be Iesu, peroveta tauna, Nasareta Galilea dekena amo ia mai.” Farisea taudia ese unai idia itaia neganai, mai edia lalohisihisi ida idia gwau: “Tanobada ibounai be iena murina dekenai idia raka vadaeni.”—Mataio 21:10, 11; Ioane 12:17-19.
5. Iesu be dubu dekenai ia lao neganai, dahaka ia vara?
5 Hadibaia Tauna Badana, Iesu, be Ierusalema ia vadivadi henia neganai, vaia ena kara dubu dekenai ia lao ia hadibaia totona. Unuseniai matakepulu taudia bona aena dika taudia idia lao ia dekenai bona idia ia hanamoa. Hahelaga taudia bona taravatu hadibaia taudia ese unai idia itaia, bona dubu dekenai memero idia boiboi, “Davida ena natuna ita hanamoa!” idia kamonai neganai idia badu. Iesu idia nanadaia, idia gwau: “Inai maragidia edia hereva oi kamonai, a?” Iesu ia gwau: “Oibe. Umui be nega ta Buka Helaga umui duahia lasi, a? ‘Natudia maragidia, rata idia inua memero, edia uduna dekenai Dirava idia hanamoa namonamo.’ ” Iesu ia hadibaia noho neganai, dubu lalonai idia vara gaudia ia itaia namonamo.—Mataio 21:15, 16; Mareko 11:11.
6. Edena dala ai Iesu ena kara hari be guna amo ia idau, bona dahaka dainai?
6 Hari Iesu ena kara ia haidaua, hua 6 gunanai amo ia idau momokani! Unai neganai Ierusalema dekenai Au Raurau Ruma Maragidia Ariana totona ‘hunia dekenai ia daekau.’ (Ioane 7:10) Bona ia idia hamasea toho neganai hanaihanai heau mauri dalana ia tahua. To hari taunimanima vairanai hanua lalonai ia vareai, ena be taunimanima idia hagania vadaeni bema ia idia itaia do idia dogoatao! Bona Iesu sibona ia gwauraia hedinaraia ia be Mesia tauna, be iena kara lasi. (Isaia 42:2; Mareko 1:40-44) Ia ura lasi taunimanima be mai rege bada ida ena kara be ariara dekenai idia boiboilaia eiava idia mogea vadaeni sivaraidia be ta ta dekenai idia gwauraia. To hari hutuma ese idia gwauraia hedinarai King bona Hamauria tauna—Mesia Tauna—bona tomadiho gunalaia taudia ese unai taudia do ia koua totona idia noia neganai, edia hereva ia dadaraia! Dahaka dainai ena kara be hari ia idau? Badina be Iesu ese murina dinana ai ia hamaorodia hegeregerena, “nega ia ginidae vadaeni, Taunimanima ena Natuna ese iena hairaina do ia abia.”—Ioane 12:23.
Gari Lasi Karana —Bena Hahemauri Herevadia
7, 8. Nisan 10, 33 C.E. ai, Iesu ia karaia karana ta be edena dala ai Pasova 30 C.E. ai, dubu lalonai ia karaia karana hegeregerena?
7 Monday, Nisan 10 ai, dubu dekenai ia ginidae neganai, adorahi gunanai ia itaia gaudia dainai kara ta ia karaia. Ia ese ‘hoihoi taudia ia lulua bona moni idia senisia taudia edia pata ia negea diho, bona pune manu idia hoia taudia edia helai gaudia ia bubua, bona Dubu Helaga lalonai idia hanaia lao kohu huaia taudia edia kara ia koua.’ Unai kara kerere taudia ia gwauraia dika, ia gwau: “Buka Helaga lalonai inai bamona ia torea vadaeni: ‘Lauegu Ruma be bese ibounai edia guriguri Rumana gwauraia?’ To umui be henaoa taudia edia noho ruma umui halaoa vadaeni.”—Mareko 11:15-17.
8 Iesu ena kara be lagani toi gunanai, Pasova 30 C.E. ai, dubu ia lao neganai ia karaia karana bamona. To hari ia gwauraia dika mai ena siahu ida. Dubu lalonai idia noho hoihoi taudia ia gwauraia “henaoa taudia.” (Luka 19:45, 46; Ioane 2:13-16) Idia be unai bamona taudia badina boubou totona animal idia hoia gwauraia taudia amo davana bada herea idia abia. Hahelaga taudia, taravatua hadibaia taudia, bona hanua ena tau badadia ese Iesu ena kara ena sivarai idia kamonai bona hamasea dalana idia tahua lou. To, idia diba lasi edena dala ai Iesu do idia hamasea diba, badina taunimanima ibounai be iena hadibaia herevadia dainai idia hoa bona idia ura Iesu idia bamoa ena hereva idia kamonaia totona.—Mareko 11:18; Luka 19:47, 48.
9. Iesu ese dahaka ia hadibaia, bona dubu dekenai iena hereva idia kamonai henia taudia ia boiria dahaka idia karaia totona?
9 Iesu ia hadibaia noho dubu dekenai, bona ia gwau: “Nega ia ginidae vadaeni, Taunimanima ena Natuna ese iena hairaina do ia abia.” Oibe, ia diba ena tanobada maurina ena dina haida sibona idia do noho. Uiti nadinadi do ia mase, bena unai amo anina ia havaraia diba—iena mase amo ma haida dekenai mauri hanaihanai do ia henia diba ia laulaulaia dalana—ia herevalaia murinai, kamonai taudia ia boiria, ia gwau: “Tau ta bema ia ura lauegu hesiai gaukara do ia karaia, ia ese lauegu murina dekenai do ia raka. Vadaeni do lau noho gabuna dekenai, egu hesiai tauna danu do ia noho. Bema tau ta ese lauegu hesiai gaukara do ia karaia, egu Tamana ese do ia hanamoa.”—Ioane 12:23-26.
10. Iesu ese do ia abia mase mai hisihisina ia laloa neganai, iena hemami be edena bamona?
10 Iesu ese ena mase mai hisihisina, dina hani murinai do ia vara gauna, ia laloa noho, ma ia gwau: “Harihari lauegu kudouna ia hisihisi. Dahaka do lau gwauraia? Egu Tamana e, inai harihari nega dekena amo lau oi hamauria?” To Iesu be unai dika amo do ia siri lasi. Ia gwau: “Lasi, badina be hari inai nega totona lau mai ginidae vadaeni.” Momokani, Iesu ese Dirava ena palani ibounai ia abia dae. Iena lalona ia hadaia Dirava ena ura hegeregere do ia kara ela bona ena mauri ia bouboulaia. (Ioane 12:27) Haheitalai namo hereana ia henia ita dekenai—kara ibounai ia karaia Dirava ena ura hegeregerena!
11. Iesu ese guba amo ia mai gadona idia kamonai taudia dekenai dahaka ia hadibaia?
11 Iesu ia laloa momo gauna be ena mase ese ena Tamana ena ladana do ia hadikaia, unai dainai ia guriguri, ia gwau: “Egu Tamana e, oiemu ladana oi hanamoa!” Dubu dekenai idia gini taudia hutuma idia hoa, badina guba amo gadona ta ia gwau: “Lau hanamoa vadaeni, ma do lau hanamoa lou.” Hadibaia Tauna Badana ese unai nega ia gaukaralaia hutuma taudia ia hamaoroa unai gadona idia kamonai ena badina be dahaka, bona iena mase amo do idia vara gaudia be dahaka, bona dahaka dainai abidadama idia hahedinaraia be gau badana. (Ioane 12:28-36) Idia ore vadaeni dina rua lalonai gau momo idia vara Iesu dekenai. To mai anina bada dinana ia do noho.
Gwauraidia Dika Dinana
12. Tuesday, Nisan 11 ai, tomadiho gunalaia taudia be edena dala ai Iesu idia tarapua toho, bona dahaka ia vara?
12 Tuesday, Nisan 11 ai, Iesu be ma nega ta dubu dekenai ia lao ia hadibaia totona. Badu dikadika taudia idia noho. Hahelaga taudia bona tau badadia ese dina gunanai ia karaia karana idia gwauraia, bona ia idia nanadaia: “Edena siahu dekenai inai kara oi karaia, bona inai siahu be daika ia henia oi dekenai, a?” Hadibaia Tauna Badana ena haere dainai idia daradara, bona parabole toi ia gwauraia—rua be vain uma gabu idia kikilaia bona ta be headava aria ia kikilaia—bona ena inai taudia edia kara dika ena bada idia hahedinaraia goevagoeva. Tomadiho gunalaia taudia be idia kamonaia gaudia dainai idia badu, bona idia ura Iesu idia dogoatao. To taunimanima hutuma idia gari henia, badina idia laloa Iesu be peroveta tauna ta. Unai dainai Iesu idia koia toho, idia ura hereva kererena ta ia gwauraia bena do idia dogoatao diba. To Iesu ia henia haere ese edia uduna ia koua.—Mataio 21:23–22:46.
13. Iesu ese taravatu hadibaia taudia bona Farisea taudia ia herevalaia neganai, kamonai taudia dekenai dahaka sisiba ia henia?
13 Taravatu hadibaia taudia bona Farisea taudia idia gwau Dirava ena Taravatu idia hadibaia, unai dainai Iesu ese ena hereva idia kamonaia taudia ia hagoadaia: “Idia hereva henia gaudia be do umui badinaia, bona do umui karaia. To idia karaia bamona do umui karaia lasi. Badina be idia hereva, to idia karaia lasi.” (Mataio 23:1-3) Taunimanima vairanai idia ia gwauraia dika momokani! To Iesu ese unai gwauraia dika karana ia do haorea lasi. Hari be ena dina ginigabena dubu dekenai, bona unai taudia edia kara dika ia gwauraia hedinarai—guba ia boiboi loulou bamona ta ta ia halasia.
14, 15. Dahaka hereva haida amo Iesu ese Taravatu hadibaia taudia bona Farisea taudia ia gwauraia dika?
14 Iesu be nega 6 ia gwau: “Taravatu hadibaia taudia bona Farisea taudia, kara koikoi taudia, dika do umui davaria momokani!” Idia ia hamaoroa idia be unai bamona taudia badina guba Basileia ena iduara be idia raka vareai gwauraia taudia edia vairana dekenai idia koua. Unai koikoi taudia be davara bona tanobada idia hanaia, helalo-kerehai tauna tamona sibona abia totona, to idia abia neganai ia be mase hanaihanai do ia abia tauna ai idia halaoa. “To taravatu ena hereva badadia, kota henia, bona bogahisihisi, bona abidadama” idia negea bona kahana 10 henia karana idia laloa momo. Ia be hegeregere, ‘kapusi bona mereki edia murina kahana sibona idia huria goevagoeva, to edia lalona kahana be dadia kara bona lebulebu kara dekenai idia honu momokani.’ Edia lalona ena bodaga bona ena miro be edia helaga karadia koikoidia amo idia hunia toho. Danu, edia kara ta be peroveta taudia edia gara idia karaia bona idia hahairaia sibona edia henia karana hahedinaraia totona, to idia be “peroveta taudia idia alaia taudia edia natuna.”—Mataio 23:13-15, 23-31.
15 Iesu ena inai taudia be lauma gaudia idia laloa bada lasi dainai idia ia gwauraia dika, ia gwau: “Hakaua taudia emui matana idia kepulu, dika do umui davaria momokani!” Lauma dalanai idia matakepulu badina dubu ena golo idia laloa momo to lauma dalanai unai tomadiho gabuna ena davana badana idia laloa bada lasi. Bena Iesu ese hereva aukadia amo idia ia gwauraia dika, ia gwau: “Gaigai e! Koria gaigai edia natuna! Dirava ena Kota Badana dekena amo [Gehena] ena panisi edena bamona do umui heau mauri diba?” Oibe, Iesu ese idia ia hamaoroa edia kara dika dalana idia badinaia dainai, mase ela bona hanaihanai ena hisihisi do idia mamia. (Mataio 23:16-22, 33) Namona be ita danu ese Basileia ena sivarai ita harorolaia mai gari lasi ida, tomadiho koikoi edia kara ita gwauraia hedinarai neganai danu.
16. Olive Ororona dekenai idia helai neganai, Iesu ese edena mai anina bada peroveta herevana ia henia iena hahediba taudia dekenai?
16 Hari Iesu be dubu ia rakatania. Dina ia diho gwauraia, bona ia bona ena aposetolo taudia be Olive Ororona ai idia daekau. Unuseniai idia helai neganai, Iesu ese dubu hadikaia negana bona ena noho ena toana bona inai tanobada ena oromana dikana ena dokona ia perovetalaia. Unai peroveta herevadia edia anina be bada hari inai negai danu. Unai hanuaboi ai, Iesu ese ena hahediba taudia ia hamaoroa: “Umui diba, dina rua do idia ore, Pasova ena aria do idia karaia. Unai neganai Taunimanima ena Natuna ena mase dala do idia karaia, do idia hasatauroa.”—Mataio 24:1-14; 26:1, 2.
Iesu ese ‘Ia Lalokau Henidia ela Bona Dokona’
17. (a) Nisan 14 ai, Iesu be Pasova lalonai aposetolo taudia 12 dekenai dahaka ia hadibaia? (b) Iesu ese Iuda Iskariote ia siaia lao murinai, dahaka ia hamatamaia?
17 Dina rua lalonai—Nisan 12 bona 13 ai—Iesu be taunimanima vairanai dubu dekenai ia hedinaraia lasi. Tomadiho gunalaia taudia ese do idia hamasea dalana idia tahua, bona ia ura lasi kerere ta do ia vara bena ia be dala lasi Pasova be ena aposetolo taudia ida idia karaia. Thursday ai, dina ia diho neganai, Nisan 14 ia hamatamaia—Iesu ena tanobada maurina ena dina ginigabena. Unai hanuaboi ai, Iesu bona ena aposetolo taudia be ruma ta Ierusalema dekenai idia hebou, bona Pasova idia karaia totona gau ibounai idia hegaegaelaia. Pasova idia moalelaia hebou, bena aposetolo 12 dekenai manau ia hadibaia, edia aena ia huria karana amo. Iuda Iskariote be gwauhamata ia karaia vadaeni siliva monidia 30—Mose ena Taravatu hegeregerena hesiai tauna ta ena davana—amo iena Biaguna ena mase dalana do ia karaia. Iesu ese Iuda Iskariote ia siaia lao murinai, ia ese ena mase laloatao hebouna, Memorial, ia hamatamaia.—Esodo 21:32; Mataio 26:14, 15, 26-29; Ioane 13:2-30.
18. Iena abidadama aposetolo taudia dekenai, Iesu be mai lalokau ida dahaka hadibaia herevadia ma haida ia henia, bona kahirakahira idia do ia rakatania dainai, edena dala ai idia ia hegaegaelaia?
18 Iesu ese Memorial ia hamatamaia murinai, aposetolo taudia be mai badu ida daika ia bada idia hepapahuahulaia. Iesu ese ia gwau henidia lasi, to mai haheauka ida idia ia hadibaia ma haida hesiai henia karana be mai ena namo. Hahetoho ia davaria neganai, ia idia rakatania lasi, bona unai ia laloa bada, unai dainai idia danu basileia ta totona gwauhamata ia karaia. (Luka 22:24-30) Iesu ese idia ia hagania do idia lalokau heheni, Iesu ese idia ia lalokau henia hegeregerena. (Ioane 13:34) Unai daiutu dekenai Iesu ia naria noho lalonai, idia ia hegaegaelaia mai lalokau ida badina kahirakahira do ia rakatanidia. Idia ia hamaoroa ia be edia turana bona idia ia hagoadaia abidadama idia hahedinaraia, bona iena gwauhamata be lauma helaga ese idia do ia durua. (Ioane 14:1-17; 15:15) Ruma ia do rakatania lasi neganai, Iesu ese ena Tamana ia noinoi henia, ia gwau: “Egu Tamana e, negana inai, emu Natuna do oi hanamoa, vadaeni emu Natuna ese oi do ia hanamoa.” Momokani, Iesu ese ena aposetolo taudia ia hegaegaelaia badina idia do ia rakatania, bona ia hedinaraia ‘sibona ena lalokau taudia ia lalokau henidia ela bona dokona.’—Ioane 13:1; 17:1.
19. Dahaka dainai Getesemane umana lalonai Iesu be hisihisi bada herea ia mamia?
19 Reana hanuaboi 12 okaloka ia hanaia vadaeni, Iesu bona ena abidadama aposetolo taudia 11 be Getesemane umana dekenai idia ginidae. Nega momo ia bona ena aposetolo taudia be unai gabu dekenai idia lao. (Ioane 18:1, 2) Hora haida murinai, Iesu be kara dika rohoroho tauna hegeregerena do ia mase. Ia diba unai do ia vara ia dekenai bona unai ese ena Tamana ena ladana do ia hadikaia dainai, ena lalona ia hisihisi bada, bona Iesu ia guriguri neganai, iena varahu be rara bamona ia moru tano dekenai. (Luka 22:41-44) Iesu ese ena aposetolo taudia ia hamaoroa: “Vadaeni! Negana ia ginidae.” Ia gwau: “Lau ia samania tauna be kahirakahira.” Ia hereva noho lalonai, Iuda Iskariote ia mai, bona hutuma bada mai edia lahi tosi, lamepa, bona dagedage kohu ese ia idia bamoa. Idia lao Iesu idia dogoatao totona. Ia be ia heau oho lasi. Idia dekena ena kara ena badina ia hamaoroa, ia gwau: “Buka Helaga be edena bamona do ia momokani? Badina ia torea vadaeni, inai kara be do ia vara lau dekenai.”—Mareko 14:41-43; Mataio 26:48-54.
Taunimanima Ena Natuna be Hairai Ia Abia!
20. (a) Iesu idia dogoatao murinai, edena gau dikadia idia vara ia dekenai? (b) Iesu ia mase gwauraia neganai, dahaka dainai ia boiboi, ia gwau: “Ia ore vadaeni”?
20 Iesu idia dogoatao murinai, uitnesi taudia koikoidia ese idia samania, Iesu idia ura henia lasi diadi taudia ese idia kota henia, Pontio Pilato ese davana ia gwauraia, hahelaga taudia bona taunimanima hutuma ese idia hevaseha henia, bona tuari taudia ese idia kirikirilaia bona idia hahisia. (Mareko 14:53-65; 15:1, 15; Ioane 19:1-3) Friday, dina tubua ai, Iesu be ikoko amo satauro dekenai idia kokoa kau bona iena tauanina ena metau ese idia kokoa gabudia ena imana bona aena dekenai ena hidio ia hedare neganai, hisihisi bada herea ia davaria. (Ioane 19:17, 18) Adorahi ai, 3 okaloka bamona ai, Iesu ia boiboi ia gwau: “Ia ore vadaeni!” Oibe, tanobada dekenai ia mai bona ia abia gaukarana ibounai ia haorea. Dirava ena imana dekenai ena lauma ia atoa, iena kwarana ia atoa diho bona ia mase. (Ioane 19:28, 30; Mataio 27:45, 46; Luka 23:46) Unai murinai, dina ihatoina ai, Iehova ese ena Natuna ia hatorea isi lou. (Mareko 16:1-6) Iesu ia toreisi lou bona dina 40 murinai, ia daekau lao guba dekenai bona hairai ia abia.—Ioane 17:5; Kara 1:3, 9-12; Filipi 2:8-11.
21. Edena dala ai ita be Iesu ita tohotohoa diba?
21 Edena dala ai ita be Iesu ‘ena aena gabudia dekenai do ita raka’ namonamo diba? (1 Petero 2:21) Ia bamona, namona be Basileia harorolaia gaukara bona hahediba taudia halaoa gaukara ita karaia goadagoada bona Dirava ena hereva be mai gari lasi ida ita herevalaia. (Mataio 24:14; 28:19, 20; Kara 4:29-31; Filipi 1:14) Namona be ita noho negana ena anina ita laloaboio lasi bona ita hagoadaia heheni, lalokau dekena amo kara namodia do ita karaia totona. (Mareko 13:28-33; Heberu 10:24, 25) Namona be iseda mauri dalana ibounai be Iehova Dirava ena ura ese ia biagua bona ia hahedinaraia ita diba “dokona negana” lalonai ita noho.—Daniela 12:4.
Edena Bamona Do Oi Haere?
• Iesu ia diba ena mase be kahirakahira dainai, Ierusalema ena dubu dekenai ia haroro negana ginigabena ai dahaka ia karaia?
• Dahaka ese ia hahedinaraia Iesu ese ‘sibona ena lalokau taudia ia lalokau henidia ela bona dokona’?
• Iesu ena tanobada maurina ena hora ginigabedia lalonai idia vara gaudia dainai Iesu be edena bamona ita laloa?
• Iseda hesiai gaukara lalonai, edena dala ai Keriso Iesu ita tohotohoa diba?
[Picture on page 18]
Iesu ese “ia lalokau henidia, ia lao bona dokona”