Siahu Taudia ese Witness Taudia Idia Hanamoa

CÁDIZ be siti ta Spain ena kone kahana ai. Ia be Madrid ena sautwest kahana ai bona Madrid amo ena daudau be kilomita 500 bamona. Unai siti ena naria hahinena Doña Teófila Martínez ese Iehova ena Witness taudia dekenai herahera gauna ta mai ena toretore (ena laulau be ataiai) ia henia. Ia gwau: “Cádiz siti ena gavamani taudia ese Iehova ena Witness taudia idia tanikiu henia, badina siti ena namo totona idia gaukara bona idia hekwarahi.” Iehova ena Witness taudia be dahaka idia karaia bena unai bamona idia hanamodia?

Unai hanamoa hereva idia henia, badina Witness taudia ese unai siti ena gavamani ena steidiam ena kahana ta idia hanamoa. Saturday bona Sunday haida lalodiai, Witness taudia handred momo ese Carranza soka steidiam ena foloa ginigunana ena mei rumadia hanamoa totona volantia gaukara idia karaia. Hari, idia atoa paipa, plama gaudia, bona foloa dainai unai steidiam idia gaukaralaia taudia ibounai ese namo idia davaria.

Nega sisina daudau, Iehova ena Witness taudia be Cádiz siti ena gavamani taudia danu hetura karana namona idia moalelaia. Lagani ta ta, unai gavamani taudia ese mai hebogahisi ida Carranza Steidiam idia henia Witness taudia dekenai, lagani ta ta iboudiai idia karaia distrik hebouhebouna totona. Unai dainai, Witness taudia be mai moale ida idia karaia diba gaudia idia karaia unai steidiam ia namo noho totona.

Nega haida tauanina gaukara amo heduru idia henia, to unai sibona lasi, Iehova ena Witness taudia ese heduru idia henia dalana ma ta be unai siti ena taunimanima idia vadivadi henia hanaihanai. Idia ese Dirava ena Basileia ena “Sivarai Namona” idia harorolaia. Momokani, taunimanima ese idia hanamodia totona idia haroro lasi. Unai idia karaia, badina Iesu ena hahegani, “Basileia ena Sivarai Namona” do umui harorolaia bona “bese ibounai be diba tahua taudia do umui halaoa” haheganina, idia badinaia. (Mataio 24:14; 28:19) Unai dala amo, Iehova ena Witness taudia idia ura unai gabu ai idia noho taudia idia durua, bona “kara maoromaoro ena dala” be idia dekenai idia hadibaia.—Aonega Herevadia 12:28.