Lagani Hida Do Ita Mauri Diba?
Taunimanima momo be nega daudau lalonai idia mauri noho, unai dainai momo idia henanadai, ‘Lagani hida do ita mauri diba?’
BUKA ta, The New Encyclopædia Britannica (1995) ia gwau, guna taunimanima idia abia dae Pierre Joubert be nega daudau lalonai ia mauri tauna. Lagani 1814 ai, iena mauri lagani be 113 neganai ia mase. Momokani, idia gwau ma haida edia mauri lagani be unai idia hanaia, to idia hamomokania diba lasi. To, hereva maorodia idia torea dainai, idia hahedinaraia taunimanima ma haida ese Pierre Joubert ena mauri lagani idia hanaia.
February 21, 1875 ai, Jeanne Louise Calment be Arles, France ena sautist kahana dekenai ia vara. Iena mase August 4, 1997 ai—unai be lagani 122 mai kahana murinai—be momo ese idia diba. Lagani 1986 ai, Japan tauna, Shigechiyo Izumi, ena mauri lagani be 120 neganai ia mase. Guinness Book of Records 1999 ia gwau unai idia torea neganai, Sarah Knauss, ena mauri lagani be 118, be nega daudau lalonai ia mauri noho hahine burukana. Ia be September 24, 1880 ai, Pennsylvania, U.S.A. dekenai ia vara. Marie-Louise Febronie Meilleur, Quebec, Canada amo, be lagani 1998 ai ia mase neganai, ena mauri lagani be 118 bona ia be dina 26 amo Sarah ena mauri lagani ia hanaia.
Momokani, buruka taudia edia namba ia bada ia lao momokani. Idia laloa lagani 2000 ia lao 2050 lalonai, edia mauri lagani be 100 ia hanaia taudia edia namba be 2.2 milioni amo do ia bada daekau! Unai hegeregerena, edia mauri lagani be 80 eiava 80 idia hanaia taudia be lagani 1970 lalonai 26.7 milioni amo ia daekau lao 66 milioni dekenai lagani 1998 ai. Unai mauri lagani taudia edia namba be 147 pesen amo ia bada daekau. To tanobada hegegemadai taunimanima ibounai edia namba be 60 pesen amo ia bada daekau sibona.
Bona taunimanima be idia mauri daudau sibona lasi. Momo be mauri lagani 20 taudia ese idia karaia diba lasi gaudia idia karaia noho. Lagani 1990 ai, John Kelley, ena mauri lagani be 82 tauna be heau helulu ta—ena daudau be kilomita 42.195—lalonai ia heau bona hora ima bona miniti ima lalonai ia haorea. Lagani 1991 ai, Mavis Lindgren, ena mauri lagani be 84 hahine buruka ta mai ena tubuna momo, be hora 7 bona miniti 9 lalonai unai heau helulu ia haorea. Bona vanegai sibona, ena mauri lagani be 91 tauna ta ese New York City Heau Heluluna ia haorea!
Guna idia noho buruka taudia be hoa dalana ai gau haida idia karaia danu. Baibel ese ia sivarailaia bese kwarana Aberahamo ena mauri lagani be 99 neganai, iena vadivadi taudia dekenai “ia heau lao.” Kaleba ena mauri lagani be 85 neganai, ia gwau: “Hari dina dekenai egu goada be do noho, Mose ese lau ia siaia dinana hegeregerena [lagani 45 gunanai]. Tuari totona bona kara ibounai totona lauegu goada [ia] do noho.” Bona Baibel ia gwau Mose ena mauri lagani be 120 neganai, “iena matana be dika sisina lasi, bona iena tauanina be manoka lasi.”—Genese 18:2; Iosua 14:10, 11; Deuteronomi 34:7.
Iesu Keriso ese tau ginigunana, Adamu, bona lagatoi ia karaia tauna Noa be taunimanima momokanidia hegeregerena ia gwauraidia. (Mataio 19:4-6; 24:37-39) Genese bukana ia gwau Adamu ia mauri ela bona ena mauri lagani be 930, bona Noa ena mauri lagani be 950. (Genese 5:5; 9:29) Momokani taunimanima idia mauri ela bona edia mauri lagani ena daudau be unai bamona, a? Ita be nega daudau lalonai ita mauri diba, a? Reana ita mauri hanaihanai diba, a? Mani emu kara, hereva gabedia lalonai idia noho hamomokania herevadia oi tahua namonamo.