“Lai Badana Lalonai Davara Dekenai Heau Lao”

OI ABIA DAE unai kara be nega laloa namonamo lasi, kavakava, bona dika bada ia havaraia diba karana, ani? To, dala ta ai haida be unai bamona idia karaia. Edena dala ai? England toretore tauna ladana Thomas Fuller ia gwau: “Oi badu neganai kara ta oi karaia lasi. Unai be lai badana lalonai davara dekenai heau lao karana.”

Badu oi biagua namonamo lasi negana ai kara ta oi karaia ese dika idauidau ia havaraia diba. Unai be Baibel lalonai idia torea sivaraina ta ese ia hahedinaraia. Idaunegai iduhu kwarana tauna Iakobo ena natuna memero, Simeona bona Levi, be Sekema ese edia taihuna Daina ia hadikaia dainai, idia kara mai badu dikadika ida. Unai kara ese ala-ala bona henaohenao bada herea ia havaraia. Unai dainai ita daradara lasi Iakobo ese edia kara ia gwauraia dika, ia gwau: “Lau dekenai kerere umui havaraia vadaeni, bona lauegu ladana umui hadikaia vadaeni inai tano noho taudia edia huanai.”​—Genese 34:25-​30.

Aonega dalanai, Dirava ena Hereva, Baibel, ese kara idauna ia gwauraia. Ia gwau: “Do oi badu lasi, do oi dagedage lasi. Do oi laloa hekwarahi o laloa badu lasi, badina unai bamona laloa ese kara dika ia havaraia noho.” (Salamo 37:8) Unai sisiba badinaia karana ese dika badadia ia koua.​—Hadibaia Tauna 10:4; mani Aonega Herevadia 22:24, 25 itaia.