Tanobada Ena Maino—Daika Ena Amo?
TANOBADA ibounai lalonai taunimanima idia abia edukeisen bona edia tomadiho idia tamona karana amo tanobada ena maino do ia vara, a? Unai be Dr. Robert Muller ena ura gauna, ia be guna United Nations oreana ena seketere-general ia durua bona lagani 1989 ai UNESCO ese ia henia Maino Edukeisen ena Kwalimu Ahuna ia abia tauna. The Vancouver Sun niuspepa ena hereva bamona, Dr. Muller ia “abia dae tanobada ena stiuden taudia ibounai be tanobada, taunimanima edia mauri, bona dagedage lasi karana dekenai gau korikoridia bona mai anina bada gaudia be dala tamona ai idia hadibaia be namo.” Dina ta ia laloa, unai dina ai tanobada hegegemadai hadibaia oreadia ibounai ese natudia do idia hadibaia UN be maino do ia havaraia gauna hereadaena. Sun niuspepa ia gwau, Dr. Muller ese ia abia dae danu, “tanobada ena tomadiho iboudiai be UN-bamona oreana matamatana ladana United Religions ena memba taudia ai idia lao be namo.” Bena “tomadiho hahediba herevadia ibounai be dagedage lasi karana do idia abia isi.”
Tanobada ena maino do ia vara momokani, a? Momokani do ia vara! To taunimanima edia orea ta amo lasi. Lagani 2,700 bona ma haida idia lao vadaeni, Dirava ena lauma amo ia honu tauna ta ese maino totona edukeisen hereadaena ia hahedinaraia, ia gwau kudou- maoro taudia be “Iehova ese do ia hadibaia,” bona edia maino be do ia “bada.”—Isaia 54:13, NW.
Baibel ia gwau, Dirava ese “maino ia havaraia.” (Roma 16:20) Tanobada ibounai lalonai edukeisen program namo hereana ia heau noho hari. Iehova ese ena taunimanima ia hadibaia ‘maino idia tahua bona maino ena dala idia badinaia noho,’ bona ‘edia tuari kaia amo tano geia auri do idia karaia,’ bona ‘tuari do idia dibaia lou lasi.’—1 Petero 3:11; Isaia 2:2-4.
Dirava ese hereva momokani dekenai idia haginia bona ia lalonai kara koikoi be lasi tomadihona ia lalo-namo henia bona ia hanamoa. (Mataio 15:7-9; Ioane 4:23, 24) Dirava ena hereva ida ia hegeregere tomadihona sibona ese maino ai idia noho taudia, lalo-tamona ai idia noho bona idia lalokau heheni momokani taudia, ia havaraia diba.—Ioane 13:35.
Dirava ena hereva ese ia gwauraia tanobada ena maino ena hereva ma haida oi diba totona, ai ese oi ai noia inai magasin idia halasia taudia do oi tore henia.