Dirava Ena Kara Idia “Gagevagageva,” A?
“DEUS ESCREVE CERTO POR LINHAS TORTAS” (“DIRAVA IA TOREA namonamo to laini idia gagevagageva”) be Brazil taudia edia hereva ta. Ena anina be Dirava ena kara be hanaihanai idia maoromaoro, to nega haida taunimanima dekenai toana be idia maoro lasi. Hegeregere, matamata tauna goadana ia mase neganai, momo idia gwau, ‘Dirava ese guba dekenai ia boiria lao.’ Bema ta ena tauanina kahana ta ia dika eiava gau dikana ta ia vara ia dekenai, haida idia gwau, ‘Unai be Dirava ena ura.’ Mase, gorere, bona lalo-hisihisi gaudia ma haida be Dirava ena kerere idia gwauraia dainai, toana be unai hereva edia anina be ‘Dirava ia torea gagevagageva,’ eiava taunimanima ese ena kara idia lalo-pararalaia diba lasi.
Dahaka dainai dubu dekenai idia lao taudia momo idia laloa Dirava ese mase bona hisihisi ia havaraia? Nega momo unai bamona idia laloa ena badina be Baibel siri haida idia lalohadailaia kerere. Nega sisina lalonai idia haida do ita tahua.
● ”Daika ese tau ta ena uduna ia hakapua, o iena taiana ia koua? Daika ese matana ia kehoa? Daika ese ena matana ia hakepulua? Lau inai Lohiabada, ani?”—Esodo 4:11.
Unai hereva ena anina be taunimanima edia tauanina ena kahana idauidau idia dika neganai unai be Dirava ena kerere, a? Lasi. Unai be Dirava ena kara amo ia idau. Baibel ia gwau: “Dirava ese ia karaia gaudia ibounai be namo.” (1 Timoteo 4:4) Bema ta ia vara neganai ia matakepulu, ia mu, eiava ia taia kudima, unai be Dirava ena kerere lasi. Ia ura ia karaia gaudia ese namo sibona do idia davaria, badina ia be “gau namodia ibounai, bona harihari gaudia namodia momokani ibounai,” edia Badina.—Iamesi 1:17.
Iseda tama sina ginigunadia, Adamu bona Heva, ese sibona edia ura dainai Dirava dekenai idia gwau-edeede bona goevadae maurina idia haboioa bona unai amo goevadae natudia idia havaraia diba lasi. (Genese 3:1-6, 16, 19; Iobu 14:4) Edia natudia bona tubudia be idia headava bona natudia idia havaraia neganai, goevadae lasi karadia momo, tauanina ena kahana haida idia dika danu, idia hedinarai matamaia. Ena be Iehova Dirava ese unai ia havaraia lasi, to ia koua lasi. Unai dainai ia gwau ia ese uduna ia hakapua, taiana ia koua, bona matana ia hakepulua.
● ”Gau ta ia gagevagageva neganai, oi hamaoromaoroa diba lasi.”—Hadibaia Tauna 1:15.
Dirava ese gagevagageva gaudia ia havaraia, a? Lasi. Hadibaia Tauna 7:29 ia gwau: “Dirava ese taunimanima ia karadia mai edia maoromaoro, to idia ese sibodia edia ura daladia idia tahua bona karaia dainai, edia mauri dala be ia auka.” Contemporary English Version Baibel ia gwau: “Dirava ese ita ia havaraia neganai, ita be kara momokani sibona ita karaia, to hari iseda lalona idia gagevagageva.” Tatau bona hahine momo be Dirava ena taravatu maoromaorodia idia badinaia lasi, to mai edia diba ida sibodia edia ura, palani, bona dala idia badinaia—bona dika idia davaria.—1 Timoteo 2:14.
Danu, aposetolo Paulo ia hereva bamona, taunimanima edia kara dika dainai “Dirava ese unai ia karadia gaudia be mauri anina lasi idia davaria.” (Roma 8:20) Bona taunimanima ese unai ‘idia hamaoromaoroa diba lasi.’ Dirava sibona ese gagevagageva gaudia bona anina lasi maurina do ia kokia diba.
● ”Dirava ena kara do oi laloa noho. Dirava ese ia hagagevaia gauna, be daika ese do ia hamaoromaoroa diba?”—Hadibaia Tauna 7:13.
Solomona ena henanadai ena anina be: ‘Taunimanima iboudiai huanai daika ese dika bona goevadae lasi karadia, Dirava ia koua lasi gaudia, ia hamaoromaoroa diba?’ Ta lasi, to Iehova Dirava ese unai gaudia ia koua lasi be mai ena badina.
Unai dainai Solomona ia gwau: “Oiemu noho be namo neganai, do oi moale. Bona oi dekenai dika ia vara neganai do oi laloa, Dirava ese moale bona hekwarahi ia siaia noho, bona taunimanima idia diba lasi dahaka bona dahaka do idia vara.” (Hadibaia Tauna 7:14) Namona be tau ta ese dina namona ia moalelaia bona kara namodia amo ia hahedinaraia unai dina ia laloa bada. Namona be ia laloa dina namona be Dirava ena harihari gauna. To bema dina lalonai dika ia vara be edena bamona? Namona be tau ta ese ia “laloa,” anina be ia lalo-parara, Dirava ese unai dika ia koua lasi. Dahaka dainai Dirava be unai bamona ia karaia? Solomona ia gwau: “Taunimanima idia diba lasi dahaka bona dahaka do idia vara” dainai. Unai ena anina be dahaka?
Dirava ese moale bona dika ia koua lasi ese ita ia hadibaia lou vaira negana ai dahaka do ia vara ita diba lasi. Dika be kara maoromaoro taudia bona kara dika taudia dekenai ia vara diba. Ta be ia idau lasi. Unai ese ita ia durua bona do ita lalo-parara, ita sibona dekenai ita tabekau lasi, to Dirava ita tabekau henia be gau badana, bona ita laloatao “Dirava be lalokau.” (1 Ioane 4:8) Ena be hari gau haida ita lalo-pararalaia lasi, to ita diba gau ibounai idia ore neganai, Dirava ia koua lasi gaudia ese namo do idia havaraia.
Herevana ia koua lasi gauna be dahaka, to idia ese kara maoromaoro taudia idia hadikaia momokani diba lasi. Aposetolo Petero ese iena nega lalonai dika idia davaria Keristani taudia ia herevalaia neganai, unai ia hahedinaraia goevagoeva, ia gwau: “Umui be nega sisina do umui hisihisi, vadaeni gabeai, hariharibada ibounai Diravana ese umui do ia hanamoa lou momokani, umui do ia haginia goada, bona emui abidadama do ia hagoadaia. Oibe, inai Dirava ese umui ia boiria vadaeni, iena noho hanaihanai hairaina Keriso Iesu danu do umui abia hebou totona.”—1 Petero 5:10.
Hamaoromaoroa Negana
Iehova ese ita dekenai goada ia henia ita davaria hahetoho ita haheaukalaia totona. Danu ia gwauhamata, ‘gau ibounai do lau karaia matamata.’ (Apokalupo 21:5) Oibe, iena ura be ena guba Basileiana ese edia tauanina ena kahana idia dika taudia edia hisihisi do ia hanamoa bona mase taudia hatoreaisi lou gaukarana do ia naria. Unai gavamani ese kara gagevagageva tauna dikana—Satani Diabolo—do ia haorea. (Ioane 5:28, 29; Roma 16:20; 1 Korinto 15:26; 2 Petero 3:13) Dirava ese gau ibounai ia hamaoromaoroa negana ia ginidae neganai, Dirava idia gari henia taudia iboudiai tanobada hegegemadai be hahenamo bada do idia abia!
[Picture Credit Line on page 28]
Job Hearing of His Ruin/The Doré Bible Illustrations/Dover Publications