Namibia Dekenai Idia Mauri Noho Davana Bada Nadidia!

Namibia Dekenai Idia Mauri Noho Davana Bada Nadidia!

NAMIBIA ena bada be kahirakahira kilomita 1,500 bamona Africa ena southwest kone kahana dekenai. Unai tano ena kone ibounai dekenai be miri, nadi ororodia, bona tano aukadia idia noho. Namibia ena nadi konedia dekenai dava bada nadidia mai edia kala idauidau be unai kone edia nadi huanai idia noho. Bona nega haida, daimon be unai gabu dekenai idia davaria. To, ma gau ta ese unai tano ena dava bada nadidia ia hereaia momokani. Namibia be mai ena davana bada nadidia, idia mauri noho gaudia—idia be unai tano ena bese idauidau taudia.

Namibia dekenai idia noho taudia ginigunadia be, Khoisan gado idauidau ai idia hereva. Edia hereva be mai ena regena. Hari inai negai, Khoisan gado idia herevalaia taudia be kopi korema Damara taudia, kwadogi bona edia kopina be sisina kurokuro Nama taudia, bona labana idia diba momo Bushman taudia. Danu, lagani handred haida gunanai, kopina korema taudia edia iduhu momo be Namibia dekenai idia vareai. Idia ibounai be inai bese badadia toi henunai idia noho, Ovambo (ia be bese badana Namibia dekenai), Herero, bona Kavango taudia. Lagani 1800 murinai, Europe taudia idia vareai matamaia Namibia dekenai. Taunimanima idia noho lasi gabudia dekenai daimon idia davaria murinai, ma haida idia ginidae.

Namibia taudia be dava bada gaudia bamona badina Dirava ese tanobada taudia ibounai, idia danu, dainai ena natuna ia henia, unai amo dala ia kehoa mauri hanaihanai idia abia totona. (Ioane 3:16) Namibia ena iduhu taudia handred momo ese hahemauri sivaraina idia abia dae vadaeni. Idia be davana bada nadidia idia mauri noho gaudia bamona, badina idia be “bese iboudiai edia kohu namodia” huanai Iehova tomadiho henia rumana ai idia noho hebou.—Hagai 2:7.

Lauma Gaudia Tahua Gaukarana Ia Hamatamaia

Lagani 1928 ai, lauma dalanai Namibia ena dava bada nadidia tahua gaukarana ia hamatamaia. Unai lagani lalonai, Watch Tower Bible and Tract Society ena South Africa brens opesi ese Baibel herevalaia buka ibounai 50,000 idia siaia unai tano taudia iboudiai dekenai. Unai lagani murinai, horoa Keristani hahinena Lenie Theron, South Africa amo, ese kamonai taudia unuseniai ia lou henidia. Hua hani lalonai, unai tano dekenai ia sibona ia loaloa, Baibel stadilaia bukadia 6,000 mai kahana be Africa gado, English gado, bona German gado ai ia hariharilaidia. Unai gaukara ibounai be mai anina bada.

Hegeregere, German tauna Bernhard Baade, tano lalonai dava bada nadidia ia tahua tauna, mani oi laloa. Lagani 1929 ai, ia be biru tauna ta amo gatoi haida ia abia, unai gatoi ta ta be biru tauna ese Watch Tower bukana ta ena rau amo ia kumia. Bernhard be mai ena ura bada ida unai rau ta ta ia duahia, bona ia laloa daika ese unai buka ia torea. Rau ginigabena ia kehoa neganai, Watch Tower Society ena German brens opesi ena adres ia davaria. Bernhard ese German brens ia tore henia ma buka haida abia totona, bona gabeai Namibia ai hereva momokani goadalaia tauna ginigunana ai ia lao.

Ful-Taim Gaukara Taudia Idia Ginidae

Lagani 1950 ai, Watchtower Bible School of Gilead amo misinari taudia hani idia ginidae Namibia dekenai. Lagani 1953 ai, misinari taudia edia namba ia daekau 8. Idia haida be Dick bona ena adavana Coralie Waldron, Australia amo, hari mai abidadama ida hesiai gaukara idia do karaia noho Namibia dekenai. Ful-taim Basileia harorolaia taudia ma haida danu, South Africa bona gabu ma haida amo, be lauma dalanai Namibia ena davana bada nadidia tahua gaukarana idia karaia. Misinari taudia ma haida, bona Hesiai Gaukara Hadibaia Sikulina idia haorea taudia danu, be Namibia dekenai idia siaia lao.

Lauma dalanai Namibia taudia ia durua gauna ma ta be Baibel herevalaia bukadia idia hahanaia bona idia halasia edia gado badadia ai, hegeregere Herero, Kwangali, Kwanyama, Nama/Damara, bona Ndonga gadodia ai. Lagani 1990 amo ema bona hari, Namibia ena taoni badana Windhoek dekenai, gado hahanaia opesi bona ful-taim volantia taudia edia noho rumadia idia gaukaralaia noho. Karen Deppisch, ena adavana ida ful-taim hesiai gaukara idia karaia hahinena, ia gwau: “Momo idia hoa edia gado dekenai idia hahanaia bukadia ai hariharilaia neganai, badina be unai gado dekenai buka idauidau momo idia noho lasi.”

Dava Bada Nadidia Hagoevaia

Nega daudau herea lalonai, Namibia ena dava bada nadidia korikoridia haida be davara ena hurehure bona miri ese ia hagoevaia. To, momokani, unai bamona hagoevaia karana ese davana bada nadidia idia mauri noho gaudia ia havaraia diba lasi. Goevadae lasi taudia edia ‘mauri gunana be dabua gunana bamona do idia kokia’ bona Keriso ena kara ia hahedinaraia mauri matamata atoa karana, be mai ena hekwarahi. (Efeso 4:20-24) Hegeregere, Namibia ena iduhu momo dekenai idia mase vadaeni sene taudia matauraia karana be mai anina bada. Bema ta be ena tubuna tomadiho henia karana ia karaia lasi, nega momo ena ruma bese eiava ena dekena taudia ese do idia dagedage henia. Unai dainai, bema ta be Baibel amo ia diba “mase taudia be gau ta idia diba lasi,” hahetoho do ia davaria. (Hadibaia Tauna 9:5) Edena dala amo?

Harero dekenai, Witness tauna ta ia gwau: “Hereva momokani badinaia karana be mai ena hekwarahi bada. Iehova ena Witness taudia ida Baibel stadilaia karana lau abia dae, to lau hekwarahi bada lau dibaia gaudia badinaia totona. Gau ginigunana be lau ura hamomokania sene karadia lau badinaia lasi neganai dika do lau davaria eiava. Hegeregere, Namibia ena gabu haida dekenai lau heau hanai neganai, lau stopu lasi gara ta dekenai nadi ta lau atoa totona eiava egu kwara gauna lau abia isi lasi mase tauna lau hanamoa totona. Unai amo, lau abia dae bema sene taudia lau tomadiho henia lasi, gau ta do ia vara lasi lau dekenai. Lau moale bada herea badina egu ruma bese bona kamonai taudia dekenai hereva momokani lau hadibaia totona Iehova ese egu gaukara ia hanamoa!”

Lauma Dalanai Dava Bada Nadidia Tahua Taudia Idia Ura

Lagani 1950 ai, misinari taudia idia do mai lasi neganai, sivarai namona harorolaia tauna tamona sibona ia noho Namibia dekenai. Unai namba ia bada daekau 995. To, gaukara bada herea ia do noho. Momokani, gabu haida idia do karaia lasi. Oi be hegeregere Basileia harorolaia taudia idia noho lasi gabudia dekenai oi lao totona, a? Vadaeni, mani emu kara, Namibia dekenai oi mai bona ai ida lauma dalanai dava bada nadidia ma haida ita tahua bona hagoevadia totona.—Kara 16:9 itaia.

[Map/Pictures on page 26]

(For fully formatted text, see publication)

AFRICA

NAMIBIA

[Pictures]

Namibia be dava bada nadidia mai edia hairai idia noho gabuna

[Credit Lines]

[Picture on page 28]

Oi be hegeregere Basileia harorolaia taudia be lasi gabudia dekenai oi lao totona, a?

[Picture on page 26]

Sivarai namona be Namibia ena bese idauidau taudia dekenai idia harorolaia noho