Bese Idaudia Inai Henia Karana Bona Tomadiho

“LAGANI 1978 lalonai, U.S. dekenai lau mai neganai, lau laloa idaunegai America ese bese idaudia inai henia hekwakwanaidia ia hanaia vadaeni, lau laloa korema taudia bona kurokuro taudia be idia hegeregere.” Unai be South Africa dekenai ia vara toretore tauna, Mark Mathabane, ese ia gwauraia, Time magasin taudia ese ia idia henanadai henia neganai. “Dala momo ai, lau davaria unai be momokani. U.S. be lagani handred amo South Africa ia hanaia bamona. Bena, lau ura henia lasi momokani gauna lau davaria, taunimanima edia kudouna dekenai edia lalohadai ia idau lasi.” Dahaka ese ia dekenai unai hoa gauna ia hahedinaraia?

Mathabane ia gwau, “America dekenai Sunday daba 11 okaloka be hapararaia negana badana ta.” Ia itaia dubu lalonai danu, taunimanima idia ura lasi ma bese idauna taudia danu idia hebou tomadiho totona. Ia henanadai: “Pura ena dina ma haida lalonai edia hemami be edena bamona?” Mathabane ia laloa edukeisen be unai do ia haidaua diba gauna badana, ia gwau: “Edukeisen dainai do oi abia dae diba taunimanima be idauidau.”

Iehova ena Witness taudia idia abia dae edukeisen be unai hekwakwanai hamaoromaoroa dalana, to idia ese Dirava ena Hereva amo ia mai edukeisen, idia gwauraia badabada. Oibe, Baibel ese ia durudia bese idaudia inai henia kava gaudia idia kokia totona​—bese idaudia inai henia karana ia bada herea tanodia dekenai danu. Pura ta ta edia Kingdom Hall dekenai, bese idauidau bona hanua idauidau taudia be idia hebou Dirava ena Hereva, Baibel, ena taravatu bona hakaua herevadia amo edukeisen idia abia totona. Unai hebou lalonai moni idia gogoa lasi. Oi ai boiria unai hebou dekenai oi mai totona!