Mauri Oi Ura Henia Bada, A?

“MANI diari lau itaia.” Unai hereva be Italy ena ane torea tauna Giacomo Leopardi be kahirakahira ia mase neganai, ia idia naria taudia dekenai ia gwauraia. Unai hereva ese idia hahedinaraia taunimanima ese mauri, diari ese ia laulaulaia gauna, idia ura henia bada.

Mauri ura henia bada urana be taunimanima ia doria mai anina bada gauna ta, ia ese momo ia doria dika idia reaia totona bona ia dainai idia gaukara goada do idia mauri noho totona. Unai gauna dekenai, taunimanima be animal edia amo idia idau momokani lasi, idia danu be mauri noho urana goadana idia abia.

To edena bamona mauri be namo, ita noholaia bona ura henia momokani totona? Ia be iseda tauanina ena mauri dalana sibona lasi​—ita hahodi bona marere dalana unai. Danu, mauri lalonai gau momo herea ita ura abia karana amo moale korikori ita abia lasi. Epikuro taudia edia lalohadai, “ita aniani bona ita inuinu, badina be kerukeru do ita mase,” ese nega momo taunimanima dekenai moale ia havaraia lasi. (1 Korinto 15:32) Taunimanima ese tauanina durua gaudia idia abia be namo, to kastom dalanai bona taunimanima hebamo henia dalanai gau haida idia ura abia danu bona lauma dalanai idia dabu, unai lalonai Atai Herea Tauna abidadama henia be mai anina bada. To madi, taunimanima milioni momo, reana bilioni momo, ese mauri durua gaudia sisina sibona idia abia badina tanobada ena gabu momo ai noho gabudia bona daladia idia namo lasi. Edia tauanina ena ura gaudia idia tahua sibona​—aniani, inuinu, kohu haboua, o mahuta hebou urana hagugurua​—taudia edia mauri be animal edia hegeregerena, unai amo moale momokanina idia abia lasi. Momokani, mauri lalonai idia abia diba mai anina bada gaudia, taunimanima edia aonega bona edia hemami hagugurua gaudia, idia gaukaralaia lasi. Danu, sibodia edia ura idia hagugurua taudia ese mauri namona abia dalana idia reaia sibona lasi, to idia kahirakahira idia noho taudia edia noho idia hadikaia danu, bona ma haida edia namo idia habadaia lasi.

Matamata taudia edia kota karadia ia hakaua diadi tauna ta ese unai ia hamomokania, ia gwau “namo bona dika daradaralaia karana, haheitalai dikadia abia isi karana, bona moni abia haraga karana amo namo davaria toho karadia” ese “kara helulu mamina idia havaraia badabada.” Unai ese taunimanima edia noho dalana ia hadikaia bona matamata taudia edia mauri ia hadikaia, drag idia ania kava matamaia neganai ia hadikadia bada.

Oi diba mauri ese lalona veria gaudia momo ia hahedinaraia​—laga-ani negadia gabu mai hairaidia dekenai, duahiduahi bona tahua gaudia momo, turana namodia, miusiki namona. Bona ma gaukara haida ese oi dekenai moale bada eiava moale sisina idia havaraia. Dirava idia abidadama henia bada taudia be mai edia badina dainai mauri idia lalokau henia to Baibel ese ia gwauraia Diravana, Iehova, idia abidadama henia taudia dekenai badina badana ia noho mauri idia lalokau henia totona. Abidadama momokanina ese taunimanima dekenai goada bona siahu ia henia diba nega dikana ai idia haheauka totona. Dirava momokanina idia abidadama henia taudia be mai goada ida idia gwau diba: “Lohiabada be lauegu durua Tauna, lau be lau gari diba lasi.” (Heberu 13:⁠6) Dirava ena lalokau idia dibaia taudia idia mamia ia ese ia lalokau henidia. Idia ese iena lalokau idia abia dae, bona unai amo moale bada idia abia. (1 Ioane 4:​7, 8, 16) Idia ese mauri namona bona sibona ena ura dadaraia maurina, moale ia havaraia dalana, idia noholaia diba. Iesu Keriso ia hereva bamona: “Henia kara ena moale be bada, abia kara ena moale be maragi.”​—⁠Kara 20:⁠35.

Madi, hari inai nega maurina dekenai ma gau haida idia vara danu. Gabu momo dekenai hisihisi, kara gageva, ogogami, gorere, bona mase idia vara​—unai be nega momo iseda mauri idia hadikaia bona hisihisi idia havaraia gaudia haida sibona. Idaunegai besena Israela ena aonega King Solomona mai ena taga bona siahu be mauri lalonai taunimanima idia hamoalea gaudia ta amo ia dabu lasi. To, gau ta dainai ia laloa momo​—ia lalo-parara, mase neganai ia ese ma ta dekenai ‘iena hekwarahi,’ “mai aonega, bona lalona kehoa, bona mai ena diba bada” ida ia karaia gaudia ibounai do ia rakatania.​—Hadibaia Tauna 2:​17-21.

Solomona bamona, momo idia lalo-parara mauri be kwadogi, ia ore haraga. Baibel ia gwau Dirava ese ‘mauri hanaihanai iseda lalona dekenai ia atoa.’ (Hadibaia Tauna 3:​11, Byington) Mauri hanaihanai lalo-pararalaia karana dainai, taunimanima ese mauri kwadogina idia lalohadailaia. Gabeai, mauri bona mase dekenai haere maorodia idia davaria lasi dainai, mauri lalonai dika ese moale ia hanaia bona mauri be anina lasi ena hemami ese ta ia hametaua diba. Unai ese mauri ia hadikaia diba.

Taunimanima idia lalohisihisilaia henanadai edia haere idia noho, a? Mauri hahairaia bona hadaudaua gaudia do idia vara eiava?