“Mauri Korikori” Oi Moalelaia

IEHOVA DIRAVA ese taunimanima edia lalonai mauri hanaihanai urana ia atoa. (Hadibaia Tauna 3:​11) Unai dainai mase ia vara neganai taunimanima be idia hegeregere lasi mamina idia abia, to nega tamona ai, unai ura dainai idia ura dikadika idia mauri.

Buka Helaga, Dirava ena lauma amo ia havaraia Herevana, ese ita dekenai helaro ia henia. (2 Timoteo 3:​16) Iehova, lalokau ena badina, ese taunimanima ia karaia lasi mai edia mauri hanaihanai urana ida bena lagani haida sibona ia noho maurina ia henia. Ita ia havaraia bena eda mauri kwadogina ese ita ia hahisia be Dirava ena kara hegeregerena lasi. Ita ia havaraia lasi “uda boroma bamona, idia be mai edia lalona lasi.”​—⁠ 2 Petero 2:12.

Adamu bona Heva ia havaraia mai edia mauri hanaihanai urana ida neganai, Iehova Dirava ese ia karadia “namo herea”; ia karadia do idia noho hanaihanai totona. (Genese 1:​31) To madi, tau bona hahine ginigunadia ese edia ura kwalimu idia gaukaralaia kerere, Havaraia Tauna ese ia atoa taravatuna idia utua bona edia goevadae maurina idia haboioa. Unai dainai, idia mase, to kara dika bona mase be edia natudia dekenai idia henia hanai vadaeni.​—Genese 2:​17; 3:​1-​24; Roma 5:​12.

Baibel ese mauri ena badina bona mase ena anina ia hunia lasi. Ia gwau ta ia mase neganai ‘kara ta, laloa ta, diba bona aonega ta be lasi’ bona “mase taudia be gau ta idia diba lasi.” (Hadibaia Tauna 9:​5, 10) Eiava ita gwau diba, mase taudia be idia mase. Souli ia mase diba lasi hahediba herevana be Baibel amo lasi, unai dainai mase taudia edia noho dekenai hehuni gauna ta be lasi.​—⁠Genese 3:​19; Salamo 146:4; Hadibaia Tauna 3:​19, 20; Esekiela 18:⁠4.a

Dirava be mai ena ura; ia ese tanobada ia karaia lasi do ia “noho kava totona.” Ia karaia goevadae taudia ese paradaiso bamona lalonai, idia “noholaia diba” totona, bona Dirava ese ena ura ia haidaua lasi. (Isaia 45:18; Malaki 3:⁠6) Unai ia hamomokania totona, ena Natuna be tanobada dekenai ia siaia. Ia ese Dirava ia badinaia ela bona ia mase dainai, Iesu Keriso ese taunimanima be kara dika bona mase amo ia hoia diba dalana ia kehoa. Oibe, Iesu ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”​—⁠Ioane 3:⁠16.

Idaunegai, Dirava ia gwauhamata ia ese “tanobada matamata bona guba matamata” do ia karaia. (Isaia 65:17; 2 Petero 3:​13) Unai dainai abidadama Keristani taudia haida ia abia hidi, guba dekenai do idia mauri totona. Iesu Keriso ida gavamani do idia haginia. Baibel ese unai ia gwauraia “Guba Basileia,” eiava “Dirava ena Basileia,” bona ia ese ‘tanobada gaudia’ do ia naria. (Mataio 4:​17; 12:28; Efeso 1:​10; Apokalupo 5:​9, 10; 14:​1, 3) Iseda tanobada ibounai amo Dirava idia badinaia lasi taudia ia haorea bona tanobada ia hagoevaia murinai, Dirava ese kara maoromaoro taudia edia orea matamatana, o “tanobada matamata” do ia havaraia. Unai taudia haida be kahirakahira inai tanobada dikana do ia hadikaia neganai Dirava ese do ia naria taudia. (Mataio 24:​3, 7-​14, 21; Apokalupo 7:​9, 13, 14) Idia be Dirava ena gwauhamata hegeregerena do idia toreisi lou taudia danu do idia noho hebou.​—⁠Ioane 5:​28, 29; Kara 24:⁠15.

“Mauri Korikori” Unai Nega Ai

Vaira neganai Paradaiso ai mauri ena toana ia hahedinaraia ena hereva ia hamomokania totona, Dirava ia gwau: “Harihari be gau ibounai lau karaia matamata inai.” (Apokalupo 21:⁠5) Taunimanima edia harana ese taunimanima totona Dirava ese do ia karaia gaudia ibounai idia lalo-pararalaia diba lasi. Dirava ese tanobada ibounai lalonai paradaiso do ia havaraia, Eden bamona. (Luka 23:43) Eden hegeregerena, kala idauidau mai edia hairai bona rege namodia bona aniani edia mamina namona be do idia bada herea. Ogogami bona aniani lasi negadia be do idia ore, badina unai nega be Baibel ese inai bamona ia gwauraia: “Gau gunadia be idia ore vadaeni.” (Apokalupo 21:⁠4; Salamo 72:16) Ta do ia gwau lasi, “lau be gorere,” badina gorere be do ia haorea ela bona hanaihanai. (Isaia 33:24) Oibe, hisihisi idia havaraia gaudia ibounai be do idia boio, nega daudau lalonai taunimanima ia hahisia gauna, mase, be do ia ore danu. (1 Korinto 15:26) Aposetolo Ioane ese “tanobada matamatana,” Keriso ena lohia henunai do idia noho taudia edia orea matamatana, ena matahanai ia abia lalonai, ia kamonai gado ta ia gwau: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” Unai Dirava ena gwauhamata, do ia guguru negana ese hahenamo bona moale bada herea do ia mailaia, ani?

Vaira negana ena toana ia herevalaia neganai, Baibel ese ia hahedinaraia goevagoeva unai noho dalana ese taunimanima edia dabu gaudia kara maoromaoro bona lauma dalana ai do ia henia. Idaunega amo ema bona hari taunimanima ese mai hekwarahi ida idia tahua gaudia maorodia be do idia hagugurua. (Mataio 6:​10) Unai gaudia ta be hahemaoro maoromaoro, guna ia guguru lasi badina nega momo lohia taudia dikadia ese manoka taudia idia hahisia. (Hadibaia Tauna 8:⁠9) Salamo torea tauna be peroveta dalanai, Keriso ena lohia henunai do ia vara maurina be inai bamona ia gwauraia: “Iena nega ai kara maoromaoro do ia tubu, bona maino danu be bada.”​—⁠Salamo 72:​7, The New Jerusalem Bible.

Idia tahua gauna ma ta be, taunimanima ibounai be do idia hegeregere, bona momo ese gau momo idia negea unai idia havaraia totona. “Gau ibounai karaia matamata ena neganai,” Dirava ese taunimanima ma haida inai henia karana be do ia haorea momokani. (Mataio 19:28) Taunimanima ibounai ese do idia abia hemataurai be hegeregere. Unai be gavamani ta ese ena dala dikana amo do ia havaraia lasi. To, Dirava ese taunimanima ma haida inai henia karana ia havaraia gaudia be do ia haorea vaitani, mataganigani bona hekokoroku, taunimanima idia doria haida lohiaia eiava kohu momo haboua karadia, be do idia ore. Isaia ia peroveta, ia gwau: “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi. Bona idia ese vain umadia do idia hadoa, vadaeni vain ena anina, uaina do idia inua. Idau taudia ese edia uaina do idia inua lasi.”​—Isaia 65:​21, 22.

Taunimanima edia mauri lalonai bona ami taudia huanai idia vara tuari ese rara bada idia bubua dainai taunimanima idia hisihisi! Unai be Abela alaia negana amo ema bona hari inai nega ai idia karaia tuaridia lalonai ia vara noho. Taunimanima be nega daudau lalonai idia naria bona idia ura dikadika maino do ia vara, to ia vara lasi! Do ia vara Paradaisona lalonai, taunimanima ibounai be maino ai do idia noho bona do idia manau; idia be ‘moale bona maino’ do idia davaria.​—Salamo 37:⁠11.

Isaia 11:9 ia gwau: “Tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.” Idia abia hanai kara dikana, bona ma gau haida dainai, hari inai negai unai hereva edia anina korikori ita lalo-pararalaia momokani diba lasi. Dirava dibaia maoromaoro karana dainai ita bona ia do ita lalo-tamona dalana bona unai ese do ia havaraia moale bada be gabeai do ita diba. To, Baibel ese ita ia hadibaia Iehova be siahu, aonega, hahemaoro maoromaoro, bona lalokau bada Diravana dainai, ita diba momokani “tanobada matamata” ai do idia noho taudia edia guriguri ibounai do ia kamonai.

“Mauri Korikori” Do Ia Vara Momokani​—⁠Oi Dogoatao Auka!

Taunimanima momo dekenai, mauri hanaihanai tanobada namona lalonai be nihi ta bamona eiava taunimanima ese idia laloa kava gauna ta sibona. To, Baibel ena gwauhamata idia abidadama henia momokani taudia dekenai, unai helaro be do ia guguru momokani. Unai be edia mauri ena dogo bamona. (Heberu 6:​19) Dogo ese vanagi be ena gabu dekenai ia dogoatao bona do ia marere lasi hegeregerena, mauri hanaihanai helarona ese taunimanima ia durudia idia noho namonamo bona vaira negana idia laloa mai daradara lasi ida bona mauri lalonai idia vara hekwakwanai idia haheaukalaidia bona idia hanaia diba.

Ita abia dae diba Dirava ese ena gwauhamata do ia hagugurua. Unai ia hamomokania totona ia ese hereva helagana ta ia henia, bona unai be do ia haidaua diba lasi. Aposetolo Paulo ia torea: “Dirava ia ura iena natuna taudia be do idia diba momokani iena gwauhamata be do ia haidaua lasi. Unai dainai, hereva helagana ma ta, metau bada gauna, ia gwauraia, helaga bada gauna. Vadaeni, inai Dirava ena hereva gaudia rua idia noho, gwauhamata bona hereva helagana, bona idia senisi diba lasi. Ita diba unai hereva ruaosi idia noho, bona ita diba Dirava ia koikoi diba lasi. . . . Bona unai dainai, iseda abidadama do ita dogoatao noho, badina be ita diba ita naria noho davana namona, mauri hanaihanai, be do ita abia momokani.” (Heberu 6:​17, 18) “Idia senisi diba lasi” gaudia rua, Dirava ese do ia laloaboio diba lasi gaudia be iena gwauhamata bona ia gwauraia hereva helagana, bona ita ese unai gaudia dekenai iseda helaro ita haginia.

Dirava ena gwauhamata abidadama henia karana ese ita ia durua bona lauma dalanai ita ia hagoadaia. Iosua, Israela besena ia gunalaia tauna ta, ena abidadama be unai bamona. Iosua ese ena hereva dokona Israela taudia ia henia neganai, ia be buruka bona ia diba kahirakahira do ia mase. To, ia ese goada bona do ia dika diba lasi badinaia karana ia hahedinaraia, unai be Dirava ena gwauhamata ia abidadama henia momokani karana amo ia vara. Inai hereva “lau be taunimanima ibounai edia dalana hegeregerena do lau mase” ia gwauraia murinai, Iosua ia gwau: “Umui ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.” Oibe, nega toi Iosua ia gwau Dirava be ena gwauhamata ibounai do ia hamomokania.​—⁠Iosua 23:⁠14.

Oi danu ese unai bamona abidadama Dirava ese ia gwauhamatalaia tanobada matamatana, kahirakahira do ia havaraia gauna, dekenai oi abia diba. Baibel oi stadilaia goadagoada karana amo, Iehova be daika bona dahaka dainai ia oi abidadama henia momokani be maoro do oi dibaia. (Apokalupo 4:​11) Aberahamo, Sara, Isako, Iakobo, bona idaunegai abidadama taudia ma haida ese abidadama goadana idia abia, unai be edia diba Dirava momokanina, Iehova, dekenai dainai ia vara. Edia helaro dekenai idia goada, ena be idia do mauri noho lalonai “gwauhamata ena anina idia do davaria lasi.” To “daudau herea dekena amo, unai gwauhamata gaudia idia itaia, bona idia moale bada.”​—⁠Heberu 11:⁠13.

Baibel ena peroveta herevadia ita lalo-pararalaia dainai, hari ita itaia “Siahu Ibounai Diravana ena Dina Badana” ia mai noho, bona unai nega ai Dirava ese kara dika ibounai do ia haorea amo tanobada do ia hagoevaia. (Apokalupo 16:​14, 16) Abidadama taudia gunadia bamona, ita ese vaira neganai do idia vara gaudia ita naria noho mai eda laloa maoromaoro danu, badina Dirava bona “mauri korikori” lalokau henia karana bona abidadama ese ita ia doria dainai. Tanobada matamatana ia mai kahirakahira be doria gauna goadana Iehova idia abidadama henia bona lalokau henia taudia dekenai. Unai bamona abidadama bona lalokau ita habadaia be namo Dirava ena lalo-namo ita abia bona iena dina badana, kahirakahira do ia vara dinana lalonai, ita do ia naria totona.​—⁠Sepanaia 2:3; 2 Tesalonika 1:3; Heberu 10:​37-​39.

Unai dainai, mauri oi ura henia bada, a? Bona oi ese “mauri korikori”​—⁠Dirava ese ia abia dae hesiai tauna ena mauri dalana, vaira negana mai moalena, oibe, mauri hanaihanai dalana unai​—⁠oi ura henia dikadika, a? Bema unai be oi ese oi tahua gauna, aposetolo Paulo ena hahegoada herevana oi badinaia be namo, ia gwau ‘inai tanobada ena kohu do ita abidadama henia lasi, to Dirava sibona do ita abidadama henia.’ Paulo be ma ia gwau, Dirava ia hamoalea ‘kara namodia do ita karaia’ be namo, unai amo ‘mauri korikori do ita abia momokani’ (NW ).​—⁠1 Timoteo 6:​17-​19.

Iehova ena Witness taudia ese idia henia Baibel stadi oi abia dae neganai, oi ese “mauri hanaihanai” abia dibana oi abia diba. (Ioane 17:⁠3) Lalokau dalanai, Baibel ese inai hereva, tamana ta ena hereva bamona taunimanima ibounai dekenai ia gwauraia: “Egu natuna e, egu hadibaia hereva, be do oi laloaboio lasi. Egu oda hereva, be oiemu kudouna lalonai do oi dogoatao noho. Egu hadibaia hereva ese, oiemu mauri dinadia do idia halataia, bona noho namona momokani, oi dekenai do idia henia.”​—⁠ Aonega Herevadia 3:​1, 2.

[Footnote]