Gaukara Bona Laga-Ani Oi Laloa Maoromaoro

“LAGA-ANI be dabua namona ta, to nega ibounai do ita karaia lasi.” Unai hereva be ena ladana ita diba lasi toretore tauna ta ese ia gwauraia, laga-ani ena namo ia haheitalaia totona. To, ia hahedinaraia namona be gaukara ita karaia danu be namo.

Dirava ena lauma amo Baibel torea tauna Solomona ese unai bamona hereva ia gwauraia danu. Unai aonega bada king ese ita dadaraia kara idaudia rua ia hahedinaraia. Ginigunana ia herevalaia neganai, ia gwau: “Kavakava tauna ese ia gaukara lasi, bona iena aniani be hegeregere lasi dainai, ia manoka lao, bona ia mase.” (Hadibaia Tauna 4:5) Oibe, lahedo ese tau ta dekenai hitolo do ia havaraia. Unai kara dainai, lahedo tauna ese ena tauanina bona ena mauri do ia hadikaia. To, ma haida be gau ibounai idia dadaraia, moni gaukara idia karaia diba totona. Solomona ia gwau, edia gaukara be “anina lasi, lai bema idia lulua kava hegeregerena.”​—Hadibaia Tauna 4:4.

Badina namona dainai, Solomona ese laloa maoromaoro karana ena namo ia herevalaia, ia gwau: “To sedira aniani sisina sibona mai laga–ani danu ena namo ese hekwarahi bada, bona lai lulua kava kara ena namo ia hereaia noho.” (Hadibaia Tauna 4:6) Namona be tau ta ese “iena hekwarahi dekena amo ia abia gaudia do ia moalelaia.” (Hadibaia Tauna 2:24) Bona namona be mauri lalonai moni gaukara sibona oi karaia lasi, to ma gau haida oi karaia danu be namo. Iseda ruma bese ese iseda nega idia abia be namo. Solomona ese ia hahedinaraia iseda maduna badana be moni gaukara lasi, to Dirava ena hesiai gaukara. (Hadibaia Tauna 12:13) Oi be edia gaukara idia laloa maoromaoro dainai idia moale taudia huanai oi noho, a?