Baibel ese Ita Ia Durua Diba Hari, A?

“BAIBEL ibounai oi laloa neganai, kahana 1 pesen sibona be mai anina bada ita duahia totona, to orena be anina lasi hari inai nega totona.” Tauhau ta be unai bamona ia hereva. Taunimanima momo ese iena hereva do idia abia dae. Ena be tanobada hegegemadai taunimanima momo herea ese Baibel idia hoia noho, to taunimanima milioni momo be iena hereva idia laloa lasi bona ena hahediba herevadia idia diba lasi.

Germany ena niuspepa ta ladana Süddeutsche Zeitung ena lagani 1996 Kerisimasi gauna ia gwau, Baibel be “taunimanima haida sibona ese idia duahia noho. Hari inai negai, taunimanima be saiens bona tanobada gaudia idia laloa momo dainai, momo idia laloa Baibel ena sivarai be idau momokani bona idia lalo-pararalaia be auka.” Tahua gaukara haida ese unai ripoti idia hamomokania. Stadi haida ese idia hahedinaraia natudia maragidia momo be idia diba maoromaoro lasi Iesu be daika. Tahua gaukara ta lalonai, idia henanadai henidia taudia ibounai amo kahana maragina sibona ese Baibel lalonai idia noho raka boio merona bona Samaria tauna namona edia sivarai idia gwauraia diba.

Swiss Evangelical Church ena niuspepa ladana Reformiertes Forum, ia gwau Switzerland ai guna Baibel idia hoia momo to hari unai namba be ia diho momokani. Ena be taunimanima haida be mai edia Baibel, to idia duahia lasi. Britain dekenai unai ia vara danu. Tahua gaukara ta amo idia davaria, ena be taunimanima momo be mai edia Baibel, to idia momo ese idia duahia lasi vaitani.

To, tanobada hegegemadai taunimanima milioni momo herea edia lalohadai Baibel dekenai be idau. Idia abia dae ia be Dirava ena Hereva bona idia laloa ia be mai anina bada bona namo ia havaraia. Unai dainai, idia duahia loulou. Hahine matamata ta ia gwau: “Dina ta ta ai Baibel ena karoa tamona eiava rua lau duahia toho. Unai lau moalelaia bada.” Unai bamona taudia ese Baibel ena hahediba herevadia idia laloa bada, bona idia hekwarahi edia mauri lalonai ena sisiba idia badinaia totona. Idia abia dae hari inai hekwakwanai tanobadana lalonai Baibel ese idia ia durua diba.

Oiemu lalohadai be dahaka? Hari inai negai Baibel be anina lasi, a? Eiava, ia be mai anina bada bona namo ia havaraia? Baibel ese ita ia durua diba hari, a?