Matamata Taudia Momo ese Idia Laloa Bada Lasi Bukana

“EDENA bamona do lau diba Baibel be momokani Dirava ena Hereva? Inai buka ese egu lalona ia veria lasi.” Unai be hahine matamata ladana Beate ena hereva.

Beate ia noho gabuna Germany dekenai, matamata taudia momo be unai bamona idia laloa; unai dainai, idia dekenai Baibel duahia karana be gau badana lasi. Unuseniai idia karaia tahua gaukarana ta ese ia hahedinaraia, matamata taudia 1 pesen bamona be Baibel idia duahia momo, 2 pesen be nega ta ta, 19 pesen be nega tamona, bona kahirakahira 80 pesen be Baibel idia duahia lasi. Reana tano haida bona emu noho gabunai, unai namba be idau lasi. Ia hedinarai goevagoeva, Baibel be matamata taudia momo ese idia laloa bada lasi bukana.

Unai dainai, ita hoa lasi matamata taudia momo herea be Baibel ena hereva idia diba lasi! Lagani 2000 ena matamana ai, niuspepa ta Lausitzer Rundschau ese tahua gaukarana ta ena sivarai ia herevalaia, ia hahedinaraia taunimanima hida be Taravatu Ten idia diba bona edia mauri lalonai unai ese ia hakaudia. Mauri lagani 60 idia hanaia taudia ibounai 67 pesen be taravatu idia diba bona idia ia hakaua; to mauri lagani 30 idia do abia lasi taudia 28 pesen sibona be unai bamona. Oibe, matamata taudia momo be Dirava ena Hereva idia diba lasi.

Haida Edia Lalohadai be Idau

To, tanobada hegegemadai, ma matamata taudia milioni momo dekenai Dirava ena Hereva ena namo be bada herea. Hegeregere, Alexander ena mauri lagani be 19, bona daba iboudiai gaukara dekenai ia do lao lasi neganai, Baibel ia duahia guna. Ia gwau: “Dina ena gaukara hamatamaia dala namona ma ta lau laloa diba lasi.” Sandra ese hanuaboi iboudiai Baibel ena kahana ta duahia karana ia herevalaia. Ia gwau: “Inai be dina ta ta iboudiai lau karaia karana ta.” Bona mauri lagani 13 kekenina, Julia, be hanuaboi ai ia do mahuta lasi neganai Baibel ena karoa ta ia duahia ore karana ia manadalaia. “Lau moalelaia bada, bona lau ura vaira negana ai lau karaia noho.”

Edena lalohadai be maoro bona aonega lalohadaina? Momokani, Baibel duahia karana be mai ena namo, a? Matamata taudia dekenai ia be mai anina bada bona gau badana, a? Oiemu lalohadai be dahaka?