Karoa 1
Baibel Duahia ena Namo be Dahaka?
Hekwakwanai momo idia vara noho, bona haoredia dalana be lasi. Taunimanima milion momo idia hitolo. Momo ese drag idia ania kava. Ruma bese momo idia parara. Tatau momo ese sibodia edia ruma taudia idia hadikadia. Taunimanima ese hodahoda bona ranu idia hadikaia noho. Bona raskol taudia ese ita momo idia hadikaia. Vadaeni, oi laloa inai hekwakwanai do idia haoredia diba, a?
1. (Hamatamaia herevana danu) Dahaka hekwakwanai idia vara dainai, taunimanima ese sisiba do idia abia be namo?
DANU, hari inai nega lalonai iseda raka dalana ita abia hidi be auka. Taunimanima momo ese natu be ena sinana ena bogana lalonai hamasea karana idia badulaia, to ma haida idia laloa hahine ese sibodia edia ura hegeregerena unai kara idia karaia be taravatu lasi. Momo idia laloa tatau ese tatau idia mahuta henidia karana bona heudahanai bona headava lasi taudia idia mahuta hebou karana be dika rohoroho. Ma haida idia laloa ta ta be ena ura ena ura hegeregerena unai kara idia karaia eiava idia dadaraia be maoro. Vadaeni, daidia edia lalohadai be maoro, bona daidia edia be kerere, be daika ese do ia gwauraia?
2, 3. Hari inai negai, momo ese Baibel edena bamona idia laloa?
2 Baibel ese kara maoromaoro ia sisibalaia, bona raskol karadia, hitolo, bona tanobada hadikaia karana hadokoa daladia ia gwauraia danu. To hari inai negai taunimanima momo ese Baibel ena hereva idia abia dae lasi. Guna, tano momo dekenai taunimanima ese idia abia dae mai edia hemataurai ida. Ena be Baibel be taunimanima ese idia torea bukana ta, to guna Kerisendom taudia momo idia laloa ia be Dirava ena Hereva; idia gwau Dirava ena lauma ese unai torea taudia ia hadibadia hegeregerena idia torea.
3 To hari inai negai momo ese edia bese edia kastom bona edia lalohadai bona edia taravatu, bona Dirava ia mauri noho herevana danu, be idia abia dae momokani lasi. Danu, idia laloa Baibel ena hereva be anina lasi. Diba momo taudia ta ta sibodia idia laloa ia be Dirava ena Hereva. Taunimanima momo ese diba momo tauna James Barr ena hereva idia hamomokania; ia gwau: “Baibel idia torea dalana ena sivarai lau torea, taunimanima ese idia havaraia gaukarana ena sivarai unai.”1
4, 5. Dahaka dainai gau badana be ita diba Dirava ese Baibel ia havaraia eiava lasi? Dahaka totona inai buka ai torea?
4 Oi be unai bamona oi laloa a? Dahaka oi laloa—Baibel be Dirava ena hereva eiava taunimanima edia, a? Mani inai oi laloa: Bema Baibel be taunimanima edia hereva mo, edia hekwakwanai kokidia dalana be lasi. Edia dala tamona be, edia diba hegeregerena do idia kwalimu toho mai edia daradara ida, tanobada hadikaia karana amo o niuklia tuarina amo idia be sibodia do idia hamasea ore garina. To, bema Baibel be Dirava ena Hereva, ita do ia durua momokani, hari inai nega dikana lalonai.
5 Inai buka amo do ai hahedinaraia Baibel be Dirava ena Hereva. Ai ura inai hamomokanilaia herevadia oi duahia murinai do oi diba Baibel ese taunimanima edia hekwakwanai kokidia dalana tamona ia gwauraia. To, ai ura gau haida do oi laloa guna, bena idia dainai do oi diba Baibel do oi duahia be namo.
Momo Herea Idia Halasidia
6, 7. Dahaka dainai Baibel ita laloa namonamo be namo?
6 Baibel ena momo ese ma buka idauidau iboudiai ta ta edia momo ia hanaia. Buka ta ladana Guinness Book of World Records, lagani 1988 gauna, ese ia hahedinaraia, lagani 1815 amo ema bona lagani 1975, Baibel 2,500,000,000 idia printaia. Unai be namba bada hereana. Idau nega amo ema bona hari, buka idauna ta ena momo be unai hegeregerena lasi.
7 Danu, Baibel ena hereva be gado 1,800 ai idia hahanaia vadaeni; buka idauna ta be unai bamona idia karaia lasi. The American Bible Society ia gwau, tanobada taudia 100 100 amo 98 98 ese idia abia diba, hari inai nega lalonai. Mani oi laloa, Baibel ena hereva be unai gado idauidau momo herea dekenai idia hahanaia be hekwarahi bada herea! Buka idauna ta be unai bamona idia hekwarahilaia lasi, ani?
Buka mai Siahuna
8, 9. Haida be dahaka idia gwau, unai amo idia hahedinaraia Baibel be mai ena siahu bada?
8 The New Encyclopædia Britannica ia gwau, “Matamana negana amo ema bona hari, Baibel ena siahu taunimanima dekenai ese buka oredia iboudiai edia siahu ia hanaia reana.”2 Germany ena ane torea tauna ta ladana Heinrich Heine ia gwau: “Lauegu lalona ia parara ena badina tamona be, buka ta lau duahia dainai . . . Baibel unai. Ia be Buka Helaga idia gwauraia be maoro. Iena Dirava ia haboia tauna ese inai buka lalonai do ia davaria lou diba.”3 Hesiai taudia ruhaia dalana ia tahua tauna ladana William H. Seward ia gwau: “Taunimanima ese edia noho do idia hanamoa dalana tamona be inai: Baibel ena siahu idia dekenai be do ia bada ia lao.”4
9 Abraham Lincoln, United States ena presiden gunana ta, ia gwau, Baibel be “Dirava ena harihari gauna hereadaena . . . Bema ia be lasi, maoro bona kerere edia idau ita diba lasi.”5 Britain ena taravatu diba momo tauna Sir William Blackstone ese ia hahedinaraia Baibel be mai ena siahu bada, ia gwau: “Taunimanima edia taravatu iboudiai edia badina ruaosi be inai: bese idauidau edia lalohadai tamonadia, bona Dirava ese ia hahedinaraia taravatudia [Baibel unai].”6
Haida ese Idia Ura Henia Lasi, Ma Haida ese Idia Ura Henia
10. Baibel idia ura lasi taudia ese edia badu edena bamona idia hahedinaraia?
10 To inai danu ita laloa be namo: Idau nega amo ema bona hari, taunimanima momo ese Baibel idia inai henia bada, buka ma ta be unai bamona idia inai henia lasi. Baibel be lahi dekenai idia gabudia, bona Baibel idia duahia o idia hariharilaia taudia be idia hafainidia o dibura dekenai idia koudia. Nega gunadia ai unai bamona taudia be taravatu utua taudia idia gwauraidia, bona idia momo idia hahisidia bena idia hamasedia.
11, 12. Tyndale be edena bamona ia hahedinaraia Baibel ia ura henia bada?
11 To unai nega daudau lalonai taunimanima momo ese Baibel idia ura henia bada danu. Ena be haida ese idia dagedage henidia hanaihanai, to idia duahia noho. Idia ta be England tauna ladana William Tyndale, lagani 400 bamona idia lao vadaeni ia mauri noho. Oxford ena Iunivesiti dekenai diba ia tahua, bena hadibaia tauna mai ena ladana bada ai ia lao, Cambridge ena Iunivesiti dekenai.
12 Tyndale ese Baibel ia ura henia bada. To unai neganai Baibel be Roma gado gunana sibona ai idia torea, tomadiho gunalaia taudia edia taravatu hegeregerena. Iena lalona ia hadaia, Baibel ena hereva be English gado ai do ia hahanaia, ena bese taudia ese do idia duahia diba totona. Unai be taravatu utua karana dainai, Tyndale ese ena dagi namona ia rakatania bena Germany dekenai ia lao. Gabu idauidau ai siahu taudia edia amo ia komu mai ena hekwarahi ida, ela bona Greek Revarevadia (“Taravatu Matamatana”) ibounai bona Heberu Revarevadia (“Taravatu Gunana”) ena kahana ta be English gado ai ia hahanaia. To unai murinai idia dogoatao, idia samania, ena aiona idia gigia ela bona ia mase, bena ena tauanina be lahi dekenai idia gabua.
13. Dahaka dainai Baibel be idau vaitani?
13 Tyndale bona ma taunimanima momo ese edia gau iboudiai idia haboioa, Baibel do idia duahia totona, eiava ma haida do idia henidia totona. Baibel sibona mo ese tatau bona hahine momo edia lalona ia hagoadaia bena idia be unai bamona idia boga-auka momokani. Buka ma ta be unai bamona lasi.
Idia Gwau Ia be Dirava ena Hereva
14, 15. Baibel torea taudia be dahaka idia gwau loulou?
14 Baibel be idau vaitani ena badina ma ta be inai: Baibel torea taudia be 40 bamona; idia haida be pavapava, mamoe naria taudia, haoda taudia, gavamani taudia bona hahelaga taudia; ta be tuari biaguna bona ma ta be doketa. Unai torea taudia momo idia gwau loulou, sibodia edia lalohadai idia torea lasi, to Dirava ena.
15 Unai hegeregerena, inai bamona hereva be Baibel lalonai idia torea momo: “Iehova ena lauma be egu uduna amo ia hereva, iena hereva be egu malana ai” eiava, “Gaubada, guba oreadia edia Iehova, be inai bamona ia hereva.” (2 Samuel 23:2; Isaia 22:15) Aposetolo Paulo ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia.”—2 Timoteo 3:16.
16. Baibel ese dahaka henanadai ia haerelaidia?
16 Unai hegeregerena, Dirava sibona mo ia haerelaia diba henanadaidia be Baibel ese ia haerelaia. Unai henanadai haida be inai: Dahaka dainai taunimanima edia gavamani ese noho hanaihanai mainona idia havaraia diba lasi? Taunimanima ese moale momokani edena bamona do idia davaria, bona nega vairai dahaka be tanobada bona noholaia taudia dekenai do ia vara? Unai henanadai be oi ese oi henanadailaidia nega momo, ani? Vadaeni, mani inai oi laloa: Bema Baibel be Dirava ena Hereva, unai henanadai edia haere maorodia ia gwauraia hedinarai diba.
17, 18. (a) Haida ese Baibel edena bamona idia gwauraia dika? (b) Inai buka ese dahaka danu ia gwauraia?
17 Mani oi ese inai buka ena hereva oi tahua namonamo. Baibel idia gwauraia dika taudia edia samani herevadia be ia haerelaia. Baibel be saiens herevadia hegeregeredia lasi, a? Ena hereva haida ese ena hereva ma haida idia hakoikoia, a? Ena sivarai be sivarai momokanidia eiava gori sibona, a? Hoa karadia, edia sivarai Baibel lalonai idia torea, be momokani idia vara, a? Unai henanadai be inai buka ese hereva maorodia amo ia haerelaia. Unai murinai, Baibel ena peroveta herevadia, bona ena aonega dobuna, bona ena siahu bada taunimanima dekenai, be ia ese ia gwauraia; unai gau ese idia hahedinaraia goevagoeva Dirava ese Baibel ia havaraia. Dokonai, Baibel ese oiemu mauri ia haidaua diba dalana ia gwauraia.
18 To, Baibel ita abia dalana ena sivarai do ita tahua guna. Unai sivarai danu ese ia hahedinaraia, Baibel be taunimanima ese idia havaraia gauna lasi.
[Full-page picture on page 4]
[Picture on page 6]
Baibel momo herea be gado idauidau momo ai idia halasia gabu momo dekenai; buka idaudia iboudiai ia hanaidia
[Picture on page 9]
Inai idaunegai laulauna ese ia hahedinaraia bamona, momo be lahi dekenai idia gabudia, Baibel idia duahia dainai
[Picture on page 11]
Baibel torea taudia idia gwau Dirava ese ia hasiahudia