Mai Moale ida Apokalupo Bukana Umui Duahia
“Inai buka ia duahia tauna be do ia moale. Ma danu, inai buka ena peroveta hereva idia kamonai henia, bona iena hadibaia hereva idia badinaia taudia be do idia moale.”—APOKALUPO 1:3.
1. Aposetolo Ioane ena noho be edena bamona Apokalupo ia torea neganai, bona badina be dahaka unai matahanai ia toredia diho?
“LAU be . . . Ioane. . . . Lau ese Dirava ena hereva, bona egu abidadama Iesu dekenai lau gwauraia hedinarai noho. Unai dainai, lau idia dogoatao, bona motumotu ta, ladana be Patamo, dekenai lau idia atoa, lau noho.” (Apokalupo 1:9) Unai bamona ia noho lalonai, aposetolo Ioane ese Apokalips, eiava Apokalupo bukana, ia torea. Haida idia laloa ia be Patamo dekenai idia hadiburaia, Roma Pavapavana Domitian (81-96 C.E.) ena lohia negana lalonai, unai pavapava ese pavapava tomadiho henia karana ia habadaia bona Keristani taudia ia dagedage henidia. Patamo dekenai ia noho neganai, Ioane ese matahanai haida ia itaia bona ia toredia diho. Ia ese Keristani ginigunadia ia hagaria totona ia torea lasi, to unai nega lalonai idia davaria hahetoho bona gabeai do idia vara hahetoho dainai idia ia hagoadaia, bona ia durua totona.—Kara 28:22; Apokalupo 1:4; 2:3, 9, 10, 13.
2. Dahaka dainai Ioane bona ena Keristani tadikaka ese idia noho negana be mai anina hari idia noho Keristani taudia dekenai?
2 Unai Baibel bukana idia torea negana be mai anina bada hari idia noho Keristani taudia dekenai. Ioane be hisihisi ia davaria badina ia be Iehova bona ena Natuna, Keriso Iesu, edia witness tauna ta. Ia bona ena Keristani tadikaka be dagedage negana ai idia noho badina ena be idia be taravatu idia badinaia taudia, to idia ese pavapava idia tomadiho henia diba lasi. (Luka 4:8) Tano haida ai, hari idia noho Keristani taudia be unai bamona hekwakwanai idia davaria, unuseniai Gavamani idia gwau idia be mai edia maoro dahaka be “tomadiho dalanai ia maoro” idia gwauraia totona. Unai dainai, Apokalupo bukana ena matamanai idia torea herevana ese ita ia hagoadaia, ia gwau: “Inai buka ia duahia tauna be do ia moale. Ma danu, inai buka ena peroveta hereva idia kamonai henia, bona iena hadibaia hereva idia badinaia taudia be do idia moale. Badina inai gaudia ibounai do idia vara ena nega be ia kahirakahira vadaeni.” (Apokalupo 1:3) Oibe, Apokalupo idia duahia bona ena hereva idia laloa bada bona idia badinaia taudia be moale korikorina bona hahenamo momo do idia davaria.
3 Daika be Apokalupo ena Badina korikorina, bona edena dala ia gaukaralaia ena hereva ia hahedinaraia totona? Ena siri ginigunana ese ita ia hamaoroa: “Inai buka ena hereva be Iesu Keriso ese ia hedinaraia gauna. Dirava ese Iesu dekenai ia hedinaraia, badina ia ura Iesu ese kahirakahira do idia vara gaudia be iena hesiai taudia dekenai do ia hedinaraia. Vadaeni Keriso ese iena aneru iena hesiai tauna Ioane dekenai ia siaia, inai gaudia do ia hamaoroa totona.” (Apokalupo 1:1) Dalana be inai, Apokalupo ena Badina korikorina be Iehova Dirava, ia ese Iesu dekenai ia henia, bona aneru amo, Iesu ese Ioane dekenai ia hamaoroa. Ita tahua namonamo neganai ia hedinarai Iesu ese lauma helaga ia gaukaralaia danu kongregesen idauidau dekenai hereva ia siaia bona Ioane dekenai matahanai ia henia totona.—Apokalupo 2:7, 11, 17, 29; 3:6, 13, 22; 4:2; 17:3; 21:10; mani Kara 2:33 itaia.
4. Hari Iehova ese dahaka ia do gaukaralaia noho tanobada dekenai ena taunimanima ia gunalaia totona?
4 Iehova ese ena Natuna, “ekalesia ena kwarana,” ia do gaukaralaia noho, ena hesiai taudia tanobada dekenai ia hadibaia totona. (Efeso 5:23; Isaia 54:13; Ioane 6:45) Iehova ese ena lauma ia gaukaralaia danu ena taunimanima ia hadibaia totona. (Ioane 15:26; 1 Korinto 2:10) Bona Iesu ese ena “hesiai tauna Ioane” amo unai negai idia noho kongregesen dekenai hagoadaia lauma aniani ia henia hegeregerena, hari inai negai ia ese “hesiai tauna mai ena kamonai, bona mai ena kara maoromaoro,” ena horoa ‘tadikaka’ tanobada ai, ia gaukaralaia ena tadikaka bona edia turadia “edia aniani neganai” lauma aniani ia henia totona. (Mataio 24:45-47; 25:40) Lauma aniani, “gau namodia” unai, edia Badina bona Ia gaukaralaia dalana idia diba taudia do idia moale.—Iamesi 1:17.
Keriso ese Ia Gunalaidia Kongregesen
5 Apokalupo ena matamaia karoa lalodiai, Keristani kongregesen be lamepa bamona ia herevalaidia. Edia elda taudia be aneru (hereva gwauraia taudia) bona hisiu bamona ia herevalaidia. (Apokalupo 1:20)a Keriso be sibona ia herevalaia bona Ioane ia hamaoroa inai do ia torea: “Hisiu 7 iena imana idibana dekenai ia dogoatao noho, bona golo lamepa 7 edia huanai ia raka noho tauna ese hadibaia hereva ia gwauraia.” (Apokalupo 2:1) Unai Asia kongregesen 7 dekenai ia siaia hereva 7 ese idia hahedinaraia aposetolo edia negai idia noho kongregesen taudia bona edia elda taudia be mai edia goada bona manoka gaudia. Hari inai nega danu be unai bamona. Unai dainai, do ita moale bema ita laloatao Keriso, iseda Kwarana, be kongregesen lalodiai ia noho. Idia vara gaudia ibounai ia diba goevagoeva. Laulau dalanai elda taudia be ena “imana idibana dekenai ia dogoatao noho,” unai anina be, idia be ena siahu bona hakaua henunai bona edia kongregesen naria karana dainai ia vairanai do idia gini.—Kara 20:28; Heberu 13:17.
6 To, ita sibona do ita koia bema ita laloa elda taudia sibodia be edia kara dainai Keriso vairanai do idia gini. Ia siaia herevana ta lalonai, Keriso ia gwau: “Ekalesia orea taudia ibounai do idia diba, lau be taunimanima ibounai edia laloa bona edia ura lau diba. Bona umui danu ta ta emui davana do lau henia, emui kara, emui kara hegeregerena.” (Apokalupo 2:23) Unai hereva tamona be sisiba herevana bona hagoadaia herevana—ia be sisiba herevana badina ia hahedinaraia Keriso be iseda lalona ena ura korikorina ia diba, bona ia be hagoadaia herevana badina ita ia hadibaia Keriso be iseda hekwarahi ia diba bona ita do ia hanamoa bema ita karaia diba gauna ita karaia.—Mareko 14:6-9; Luka 21:3, 4.
7 Keriso ena hereva Lidia tanona ai ia noho Piladelepia kongregesen dekenai be sisiba herevana lasi, to ita laloa bada be namo gwauhamatana ta ia gwauraia. “Oi ese lauegu haheauka karana ena hereva oi badinaia dainai, lau ese hahetoho ena hora amo oi do lau gimaia, unai be taunimanima idia noho tanobadana ibounai latanai do ia vara, tanobada latanai idia noho taudia tohoa totona.” (Apokalupo 3:10, NW ) Greek gado dekenai “lauegu haheauka karana ena hereva” ena anina ma ta be “oi haheauka totona lau gwauraia herevana oi badinaia.” Siri 8 ia hahedinaraia Piladelepia dekenai idia noho Keristani taudia be Keriso ena oda herevadia idia badinaia sibona lasi, to ena sisiba mai abidadama ida do idia haheauka totona idia badinaia danu.—Mataio 10:22; Luka 21:19.
8. (a) Piladelepia Keristani taudia dekenai Iesu ese dahaka gwauhamata ia karaia? (b) Hari inai negai daidia ese “hahetoho ena hora” idia abia?
8 Iesu ia gwau ia ese “hahetoho ena hora amo” idia do ia gimaia. Unai hereva ena anina unai negai idia noho Keristani taudia dekenai be ita diba lasi. Ena be lagani 96 C.E. ai Domitian ia mase murinai dagedage ia doko sisina, to Trajan (98-117 C.E.) ia lohia neganai, dagedage ia matamaia lou bona hahetoho idia davaria lou. To “hahetoho ena hora” negana badana be “Lohiabada ena Dina,” “dokona negana,” ai do ia vara, hari ita noho negana unai. (Apokalupo 1:10; Daniela 12:4) Tanobada Ibounai Tuarina Ginigunana lalonai bona ia murinai lauma helaga ese ia horoa Keristani taudia be hahetoho idia davaria. To, “hahetoho ena hora” be ia do noho. Ia be “taunimanima idia noho tanobadana ibounai” dekenai do ia vara, edia helaro be hisihisi badana amo do idia roho mauri taudia, hutuma bada herea taudia dekenai danu. (Apokalupo 3:10; 7:9, 14, NW ) Do ita moale bema ‘Iesu ena hereva haheauka totona ita badinaia,’ ia gwau: “Iena lalona do ia goada noho ela bona dokona, unai tauna be do ia mauri.”—Mataio 24:13.
Mai Moale ida Iehova Ena Lohia Henunai Ita Noho
9, 10. (a) Iehova ena terona ia hahedinaraia matahanaina be edena bamona ita laloa be namo? (b) Apokalupo bukana ita duahia neganai, edena dala ai ita ia hamoalea diba?
9 Apokalupo ena karoa 4 bona 5 lalonai ia noho matahanai ese Iehova ena terona bona ena lohia gabuna guba dekenai ia hahedinaraia, unai ita hoalaia be namo. Mai edia siahu bada guba taudia be mai moale ida Iehova ena kara maoromaoro lohia siahuna henunai idia noho bona idia gwauraia hanamoa herevadia ita hoalaia be namo. (Apokalupo 4:8-11) Namona be ita be inai bamona idia hereva taudia ida ita gwau: “Helai gabuna badana dekenai ia helai Diravana, bona Mamoe ena Natuna be, hanamoa, bona hairai, bona mataurai, bona siahu do idia abia, ela bona hanaihanai.”—Apokalupo 5:13.
10 Unai ita laloa namonamo neganai, anina be gau ibounai lalonai mai moale ida Iehova henunai do ita noho. Aposetolo Paulo ia gwau: “Emui kara ibounai bona emui hereva ibounai, gau ibounai, be Lohiabada Iesu ena ladana dekenai do umui karaia. Bona Tamana Dirava do umui tanikiu henia Keriso ena ladana dainai.” (Kolose 3:17) Apokalupo bukana ita duahia neganai, moale korikorina do ita davaria bema mai iseda lalona bona kudouna ibounai ida Iehova ena lohia siahuna ita abia dae bona iseda mauri lalonai idia vara gaudia ibounai lalonai ena ura ita laloaboio lasi.
11, 12. (a) Satani ena tanobada oreana be edena bamona do ia hamarerea bona ia hadikaia? (b) Apokalupo karoa 7 hegeregerena unai nega ai daidia be ‘do idia mauri noho diba’?
11 Ita ta ta iseda mauri lalonai bona tanobada bona guba ibounai lalonai moale do ia noho bema Iehova ena lohia siahuna henunai ita noho mai eda moale ida. Kahirakahira tano mareremarere ese ia laulaulaia gauna do ia vara bona Satani ena tanobada ena badina do ia hamorua bona ia hadikaia ore. Dirava ena lohia siahuna ia laulaulaia gauna, Keriso ena guba Basileia gavamanina unai, ena henunai idia ura lasi idia noho taudia be heau mauri gabuna ta do idia davaria lasi. Peroveta herevana ia gwau: “Tanobada ena king taudia bona lohia taudia, bona tuari biagudia, bona kohu momo taudia, bona goada taudia, bona hesiai mai guia danu taudia, bona ura kwalimu taudia, ibounai be nadi ena kohua dekenai, bona nadi badadia henunai idia hunia, ororo dekenai. Idia ese ororo bona nadi badadia dekenai idia boiboi, idia gwau, ‘Umui ese aiemai latanai do umui moru diho, ai do umui hunia, helai gabuna badana dekenai ia helai Diravana ena vairana do ai itaia garina. Ai do umui hunia, Mamoe ena Natuna ena badu ese ai do ia abia garina! Badina be idia ruaosi edia badu dinana badana ia ginidae vadaeni, bona daika do ia mauri noho diba?’ ”—Apokalupo 6:12, 15-17.
12 Unai henanadai ena haere ia kikilaia neganai, aposetolo Ioane ese karoa 7 lalonai hisihisi badana lalona amo idia mai hutuma bada herea taudia be “terona vairanai bona Mamoe ena Natuna vairanai idia gini” (NW ) ia herevalaia. (Apokalupo 7:9, 14, 15) Dirava ena terona vairanai idia gini ena anina be iena lohia dalana idia abia dae bona Iehova ena lohia siahuna henunai idia noho. Unai dainai ia ese ia lalo-namo henidia.
13. (a) Tanobada taudia momo be daika idia tomadiho henia, bona edia baguna o imana dekenai idia abia maka ese dahaka ia laulaulaia? (b) Vadaeni, dahaka dainai haheauka be mai anina bada?
13 To, karoa 13 ese ia hahedinaraia tanobada taudia oredia be Satani ena politikol oreana, dagedage gauna ese ia laulaulaia oreana unai, idia tomadiho henia. Idia ese edia “baguna” o edia “imana” dekenai maka idia abia, unai ese ia hahedinaraia edia lalohadai dekenai bona edia kara amo idia be Satani ena orea idia durua. (Apokalupo 13:1-8, 16, 17) Bena, karoa 14 be ma ia gwau: “Tau ta ese, bema dagedage gauna mai ena laulauna danu ia tomadiho henia, bona unai gauna ena maka be iena baguna dekenai, o iena imana dekenai do ia abia, unai tau ese uaina auka herea do ia inua. Inai uaina be Dirava ena badu, bona Dirava ese ranu dekena amo iena uaina ia hamanokaia lasi. Lasi momokani. Dirava ese iena badu be kapusi dekenai ia bubua, vadaeni unai tau ese do ia inua. . . . To inai bamona ia vara neganai, Dirava ena bese taudia do idia gini goada be namo. Dirava ena bese taudia be inai: Dirava ena taravatu idia badinaia, bona Iesu idia abidadama henia mai momokani danu.” (Apokalupo 14:9, 10, 12) Nega ia hanaia lalonai, do ia hedinarai momo henanadai badana be: Oi be daika ena kahana dekenai oi gini? Iehova bona ena lohia siahuna ena kahana eiava dagedage gauna ese ia laulaulaia Dirava idia dadaraia politikol oreana ena kahana dekenai? Dagedage gauna ena maka idia abia lasi bona mai abidadama ida Iehova ena lohia siahuna henunai idia noho taudia be do idia moale.
14, 15. Apokalupo ese Aramagedono ia herevalaia lalonai, dahaka hereva ia hedinarai, bona ena anina be dahaka ita dekenai?
14 ‘Tanobada ena king ibounai’ be tuari idia lao henia noho, idia be Iehova danu lohia siahuna dainai do idia tuari. Aramagedono, “Siahu Ibounai Diravana ena Dina Badana,” ena tuari ai do ia hedinarai daika be mai ena maoro ia lohia totona. (Apokalupo 16:14, 16) Tanobada edia king be Iehova danu do idia tuari totona idia haboua ia herevalaia lalonai, iseda lalona ia veria herevana ta ia hedinarai. Iesu ia hedinarai bona ia gwau: “Kamonai! Lau be henaoa tauna bamona umui dekenai do lau mai. Ia noga noho, bona iena dabua ia atoa hegaegae noho tauna be namo. Ia namo lasi, mai kopina kavakava do ia loaloa, badina be unai bamona iena hemarai do ia hedinaraia garina.” (Apokalupo 16:15) Reana unai ese dubu helaga dekenai idia gaukara Levi gima taudia ia herevalaia, bema edia gaukara neganai idia mahuta bona idia davaria, taunimanima vairanai idia hahemaraia totona, edia dabua idia kokia.
15 Inai ia hedinarai goevagoeva: Bema ita ura Aramagedono amo ita roho mauri, namona be lauma dalanai ita noga noho bona laulau dalanai Iehova Dirava ena kamonai Witness taudia ia hahedinaraia dabuana do ita hahedokilaia noho. Bema lauma dalanai ita manoka lasi, bona Dirava ena Basileia ena “noho hanaihanai Sivarai Namona” ita harorolaia goadagoada noho, do ita moale.—Apokalupo 14:6.
‘Inai Buka Ena Hereva Ia Kamonai Henia Tauna Do Ia Moale’
16. Dahaka dainai Apokalupo ena karoa dokona be moale idia havaraia?
16 Mai moale ida Apokalupo bukana idia duahia taudia be ena karoa dokona lalodiai iseda helaro hereadaena idia duahia neganai do idia moale bada. Unai helaro be guba matamata bona tanobada matamata, anina be, kara maoromaoro guba Basileia gavamanina ese idia goeva taunimanima edia orea matamatana do ia lohiaia, unai kara ibounai ese “Siahu Ibounai Diravana [Iehova]” do ia hanamoa. (Apokalupo 21:22) Unai matahanai namodia dokonai, aneru ese Ioane ia hamaoroa: “ ‘Inai hereva be maoromaoro bona momokani, bona inai hereva do oi abidadama henia diba. [Iehova] Dirava ese iena Lauma Helaga iena peroveta taudia dekenai ia henia noho. Ia ese iena aneru ia siaia vadaeni, kahirakahira do idia vara gaudia, iena hesiai taudia dekenai do ia hadibaia totona.’ Iesu ia hereva, ia gwau, ‘Kamonai! Lau be do lau mai haraga! Inai buka ena peroveta herevadia idia kamonai henia taudia be do idia moale!’ ”—Apokalupo 22:6, 7.
17 Mai moale ida Apokalupo idia duahia taudia be do idia laloatao “inai buka” ena matamanai unai bamona hereva idia noho danu. (Apokalupo 1:1, 3) Unai hereva ese ita idia hadibaia Baibel ena buka ginigabena ese ia perovetalaia “gaudia ibounai do idia vara ena nega be ia kahirakahira vadaeni.” Ita be dokona negana momokani ai ita noho bona Apokalupo ese ia perovetalaia gaudia be kahirakahira karaharaga do idia vara. Unai dainai, Satani ena tanobada ai do ia vara noho namo toana, ese ita do ia koia lasi be namo. Apokalupo bukana ia duahia namonamo tauna ese Asia ena kongregesen 7 idia abia sisiba herevadia do ia laloatao bona kohu ura henia karana, kaivakuku tomadiho henia karana, kara bodaga, siahu sisina sibona karana, bona hereva momokani negea karana edia tarapu do ia dadaraia.
18 Apokalupo bukana lalonai, Iesu be nega momo ia gwau: “Lau be do lau mai haraga!” (Apokalupo 2:16; 3:11; 22:7, 20a) Do ia mai Babulonia Badana, Satani ena politikol oreana, bona Iehova ena lohia siahuna, hari Mesia Basileiana amo ia hahedinaraia siahuna, idia dadaraia taudia ibounai ia haorea totona. Aposetolo Ioane ida do ita boiboi ita gwau: “Amen. Lohiabada Iesu e, oi mai.”—Apokalupo 22:20b.
18, 19. (a) Dahaka dainai Iesu be do ia mai be namo, bona edena helaro Ioane ese ia gwauraia be iseda helaro danu? (b) Iehova be dahaka do ia karaia totona do ia “mai”?
19 Iehova sibona ia gwau: “Kamonai! Lau be karaharaga umui dekenai do lau mai! Taunimanima edia gaukara davana be lauegu imana dekenai idia noho. Taunimanima ibounai edia kara hegeregerena edia davana do lau henia.” (Apokalupo 22:12) Ia gwauhamatalaia “guba matamatana” o “tanobada matamatana” lalonai mauri hanaihanai ena davana namona ita naria noho lalonai, namona be mai eda goada ibounai ida kudou-maoro taudia iboudiai dekenai inai boiboi herevana do ita gwauraia: “ ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) Namona be idia danu be mai moale ida lauma helaga amo ia vara bona ita ia hagoadaia Apokalupo bukana duahia taudia ai idia lao!
[Footnote]
a Apokalupo—Ena Hagugurua Negana Ia Kahirakahira!, rau 28-9, 136 (futnout) itaia.
Hereva Badadia Riviulaia
◻ Iehova be edena dala ia gaukaralaia Apokalupo bukana ia hahedinaraia totona, bona unai amo dahaka ita dibaia diba?
◻ Dahaka dainai mai moale ida Asia dekenai idia noho kongregesen 7 idia abia hereva ita duahia be namo?
◻ Edena dala ai ita be “hahetoho ena hora” ai dika do ita davaria lasi?
◻ Bema Apokalupo ia herevalaia bukana ena hereva ita badinaia, edena bamona moale do ita davaria?
3. Ioane ese ia abia Apokalupo ena Badina be daika?
5. (a) Keristani kongregesen bona edia elda taudia be dahaka gaudia bamona idia herevalaidia? (b) Ena be ita be goevadae taudia lasi, dahaka ese ita do ia hamoalea?
6. Dahaka ese ia hahedinaraia elda taudia sibodia be edia kara dainai Keriso vairanai do idia gini lasi?
7. Piladelepia Keristani taudia ese edena dala ai ‘Iesu ena hereva haheauka totona idia badinaia’?
17. (a) Apokalupo 22:6 ese dahaka hagoadaia hereva ia henia? (b) Ita naria namonamo dahaka gaudia ita dadaraia totona?
[Picture on page 15]
Sivarai namona ia mai ena Badina idia diba taudia idia moale
[Picture on page 18]
Ia noga noho tauna be do ia moale