Natuna Naria Karana Ena Hekwarahi Hanaia

HARI inai negai natudia naria karana be auka tama sina dekenai, bona memero kekeni matamatadia naria karana be auka herea. Canada dekenai, Montreal ena niuspepa The Gazette ena ripoti ese ia hahedinaraia kekero muramura bona drag tohoa karana “be vaia matamata taudia edia kara.” Ia hahedinaraia goevagoeva tama sina be “mai edia maduna do idia noga noho edia matamata taudia edia kara ia idau idia itaia totona.”

Tama sina be dahaka idia tahua be namo bona unai ese ia hahedinaraia matamata taudia be mai edia hekwakwanai? American Academy of Child and Adolescent Psychiatry ese tauanina, hemami, bona hebamo dalanai idia hedinarai toa haida ia hahedinaraia, idia be, ta ia hesiku hanaihanai, ena kara bona hemami idia idau, nega bada daiutu lalonai ia noho kava, ia hepapahuahu, bona taravatu utua karadia ia karaia.

Tama sina be unai bamona gau dikadia tohoa karana bona ena davana dikana amo edena bamona edia natudia idia naria diba? Dr. Jeffrey L. Derevensky, McGill University amo ia gwau, natudia idia maragi neganai, herevahereva hebou karana bona hemataurai heheni karana ese natuna ia bada ia lao neganai ena hekwakwanai ia hamaragia diba. The Gazette be ma ia gwau, ena be idia tubu lalonai idia ura sibodia edia dala idia abia hidi karana idia habadaia, to memero bona kekeni be “tama sina edia hakaua, heduru, idia havaraia noho namo bona lalokau idia abia noho be gau badana.” Unai hereva be Baibel ena hereva ta hegeregerena, ia gwau: “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.” (Aonega Herevadia 22:6) Dirava ese tama sina ia sisiba henia, namona be haheitalai namona idia hahedinaraia, turadia ai idia lao, idia ida idia herevahereva hebou, bona idia hadibadia.​—Deuteronomi 6:​6, 7.