Athos Ororona—“Ororo Helagana,” A?

OTODOKS Dubu taudia milioni 220 mai kahana dekenai, Athos Ororona, Greece ena not kahana dekenai ia noho iduka ororona, be “ororo helagana momokani Otodoks Keristani oreana lalonai.” Idia momo idia ura momokani Athos “ororo helagana” dekenai do idia lao. Unai “ororo helagana” be dahaka? Edena dala ai ia be mai anina bada ororona ai ia lao? Bona Dirava idia gari henia taudia ese unai “ororo” dekenai, lauma ena hahekau bona tomadiho momokani idia tahua be maoro, a?

Inai hereva “ororo helagana” be Baibel ai ia hedinarai. Unai amo Dirava momokanina, Iehova, tomadiho henia karana helagana, goevana, bona hereadaena ia herevalaia. Idaunegai Ierusalema dekenai, King Davida ese taravatu mauana be Siona Ororona dekenai ia abia lao neganai, unai ororo be “ororo helagana” ai ia lao. (Salamo 15:1; 43:3; 2 Samuela 6:​12, 17) Moraia Ororona dekenai, Solomona ena dubu idia haginia murinai, dubu ia noho gabuna be “Siona” ena kahana ai ia lao; unai dainai, “Siona” idia gwauraia Dirava ena “ororo helagana.” (Salamo 2:6; Ioela 3:​17) Danu, toana be Ierusalema dekenai Dirava ena dubu ia noho dainai, nega haida unai hanua ena ladana idia gwauraia, Dirava ena “ororo helagana.”​—Isaia 66:20; Daniela 9:​16, 20.

Hari inai nega be edena bamona? Athos Ororona​—⁠eiava atai herea gabuna ma ta​—be “ororo helagana,” taunimanima idia daekau bona dala maorona ai Dirava idia tomadiho henia gabuna, a?

Monasteri “Ororo Helagana”

Athos Ororona be Chalcidice Peninsula ena ist kahana dekenai. Unai tano be hari negai idia gwauraia Thessaloníki ena ist kahana ai Aegean Davarana latanai ia noho. Unai nadi ororona, davara amo ia daekau maoromaoro ela bona atai, ena lata be mita 2,032.

Nega daudau lalonai, Athos idia gwauraia gabu helagana. Greek taudia edia sivarai lalonai, dirava ibounai be Olympus Ororona ai idia do noho lasi neganai, idia be unai ororo ai idia noho guna. Constantine Badana ena nega murinai (lagani 300 C.E. murinai), Athos be Keristani dubu taudia edia gabu helagana ai ia lao. Gori ta ese ia hahedinaraia, “rami-hebou” hahinena Maria be evanelia tauna Ioane ese ia bamona Kupro dekenai, Lasaro idia vadivadi henia totona idia lao neganai, lai bona medu bada herea dainai Athos dekenai idia noho. Unai ororo hairaina ia ura henia dainai, Iesu ia noia do ia abia totona. Unai dainai, Athos ena ladana idia gwauraia, “Rami-Hebou Hahine Helagana Ena Uma” danu. Byzantine negana huanai, unai nadi ororona ibounai idia gwauraia Ororo Helagana. Unai ladana be lagani 1050 C.E. bamona ai, Lohia Tauna Constantine Ihahanina Monomachus ena oda dainai idia abia dae bona hamomokania.

Badina be Athos ororona ena nadi momo bona sibona ia noho dainai, unai gabu be sibona edia ura dadaraia maurina idia badinaia gabuna ai idia halaoa. Lagani handred momo lalodiai, gabu idauidau amo Otodoks orea lalonai idia noho tomadiho tataudia​—Greek, Serbia, Roma, Bulgaria, Russia, bona gabu ma haida tataudia​—be unuseniai idia lao, bena monasteri rumadia momo idia haginia, mai edia dubu bona noho gabudia danu. Unai bamona gabu 20 bamona be idia do noho.

Hari Inai Negai Ia Noho Athos Ororona

Hari inai negai, Athos be sibona idia naria gabuna ta, bona unai naria siahuna be lagani 1926 ai idia hamomokania. Lagani momo idia hanaia lalonai, unuseniai idia noho monk taudia edia namba ia maragi ia lao to hari ia bada daekau 2,000 ia hanaia.

Unai monasteri ta ta be mai edia uma, tomadiho rumadia, bona noho rumadia. Unai monk taudia edia gabu badana be Karoúlia dekenai do oi davaria, Athos Ororona ena atai kahana ena dokonai. Unuseniai ruma maragidia momo idia noho bona oi davaria dalana tamona be raka daladia idauidau oi hanaia, nadi amo idia karaia vadavada, bona seini amo oi raka daekau. Athos ai, monk taudia be edia noho dalana gunana idia do badinaia, Byzantine dina gauna (dina ena diho negana amo dina ia matamaia) bona Julian kalenda (dina 13 Gregorian kalenda murinai idia duahia gauna) idia gaukaralaidia.

Ena be unai tomadiho gabuna be hahine ta dainai idia gwauraia “helaga,” to lagani tausen lalodiai, monk bona idia bamoa taudia ese hahine​—taunimanima bona animal​—bona eunuko eiava ena auki huina ia utua tauna be unai gabu dekenai ia lao be taravatu. Vanegai, auki huina idia utua tataudia bona animal hahine haida totona taravatu idia hamanokaia, to namona be hahine be mita 500 Athos ena kone bona davara kahana dekenai do idia vareai lasi ena taravatu ia do noho.

“Ororo Helagana” be Ita Ibounai Totona

Dirava idia gari henia taudia be “ororo helagana,” Athos, dekenai do idia lao idia tomadiho totona, a? Iesu ese Samaria hahinena ta, Gerisima Ororona dekenai Dirava idia tomadiho henia karana ia abia dae hahinena, ia hamaoroa goevagoeva Dirava be ororo korikorina ta sibona amo do idia tomadiho henia lasi. Iesu ia gwau: “Gabeai nega ta do ia mai, inai [Gerisima] ororo dekenai, bona Ierusalema dekenai danu, taunimanima be do idia tomadiho henia lasi.” Dahaka dainai? “Dirava be Lauma, bona do idia tomadiho henia taudia ese, lauma bona momokani dekena amo do idia tomadiho henia.”​—Ioane 4:​21, 24.

Peroveta tauna Isaia ese iseda nega be laulau dalanai ia perovetalaia, ia gwau, “Lohiabada ena Dubu Helaga ia gini ororona, be ataiai momokani ororona do ia lao,” bona “ororo ibounai do ia herea,” bona tanobada besedia ibounai be laulau dalanai unai gabu dekenai do idia haboua.​—Isaia 2:​2, 3.

Idia ura Dirava idia tura henia tatau bona hahine idia boiria, “lauma bona momokani” dekena amo Iehova do idia tomadiho henia totona. Tanobada hegegemadai, taunimanima milioni momo be “Iehova ena ororo” dekenai idia daekau lao vadaeni. Idia bona ma haida danu, ese Greek loea hahinena ta ena hereva Athos dekenai idia gwauraia: “Lauma gaudia be idia koua momokani gabudia haida eiava monasteri sibona dekenai idia goadalaia be lau abia dae lasi.”​—Kara 17:24 itaia.

[Box on page 31]

Nega Daudau Lalonai Idia Hunia Dava Bada Gaudia Idia Davaria

Lagani momo idia hanaia lalonai, Athos monk taudia ese idia haboua dava bada gaudia huanai, idaunegai revarevadia 15,000 idia haboua danu, bona haida be lagani 300 C.E. murinai idia noho gaudia, unai dainai tanobada ibounai lalonai idia be dava bada gaudia bamona. Unai gaudia be lokua bukadia, Evanelia Bukadia edia volium ibounai bona rau haida, salamo bona ane, unai sibona lasi, to idia penia laulau gunadia, idia koroa gaudia bona laulaudia, raro amo idia koroa laulaudia bona auri amo idia koroa laulaudia. Haida idia laloa, tanobada ibounai lalonai Greek toretore gunadia ibounai kahana hani amo, kahana ta be Athos Ororona dekenai, to momo be edia orea ai idia do atoa lasi. Lagani 1997 ai, nega ginigunana, monk taudia ese edia dava bada gaudia haida be Thessaloníki dekenai idia hahedinaraia.

[Picture Credit Line on page 31]

Telis/Greek National Tourist Organization