Abidadama ese Emu Mauri Ia Haidaua Diba

“MOMOKANI dala ia noho oi ese kara namodia oi karaia diba ena be Dirava be lasi.” Unai be Dirava ia noho ia daradaralaia hahinena ta ena hereva. Ia gwau ia ese ena natudia dekenai kara maoromaoro taravatudia ia hadibaia, bona idia danu ese edia natudia dekenai unai taravatudia idia hadibaia​—⁠bona Dirava idia abidadama henia lasi.

Unai ena anina be Dirava ita abidadama henia be gau badana lasi, a? Ia hedinarai goevagoeva, unai hahine be unai bamona ia laloa. Bona momokani Dirava idia abidadama henia lasi taudia ibounai be taunimanima dikadia lasi. Aposetolo Paulo ese “Iuda lasi taudia” ia herevalaia, idia be Dirava idia diba lasi to “edia laloa diari dekena amo taravatu idia badinaia.” (Roma 2:14) Taunimanima iboudiai​—⁠Dirava ia noho idia daradaralaia taudia danu​—⁠be mai lalona ena mamina ida idia vara. Momo ese edia lalona ena mamina idia badinaia toho ena be unai dika bona namo dibaia mamina idia dekenai ia henia Diravana idia abia dae lasi.

To, Dirava dekenai abidadama goadana​—⁠Baibel amo ia mai gauna​—⁠ena siahu namo havaraia totona ese heduru ia abia lasi lalona ena mamina ia hereaia. Dirava ena Hereva, Baibel, amo ia mai abidadama ese lalona ena mamina ia hadibaia, maoro bona kerere ia diba namonamo totona. (Heberu 5:14) Danu, abidadama ese taunimanima ia hagoadaia metau badadia idia davaria lalonai Dirava ena taravatu idia badinaia noho totona. Hegeregere, lagani 1900 murina laganidia lalonai, tano momo be politikol taudia dikadia henunai idia noho, bona idia ese taunimanima namodia idia doria kara dikadia idia karaia totona. To, Dirava idia abidadama henia momokani taudia ese edia kara maoromaoro idia rakatania lasi, ena be edia mauri idia haboioa diba. Danu, Baibel amo ia mai abidadama ese taunimanima edia mauri ia haidaua diba. Taunimanima ia hamauria diba bona ia durudia kerere badadia idia karaia lasi totona. Mani haheitalai haida oi laloa.

Abidadama ese Ruma Bese Maurina Ia Haidaua Diba

“Emui abidadama dainai umui be tau ta ese ia karaia diba lasi gauna umui karaia.” Daika ese John bona Tania edia natudia do ia naria karana dekenai ena lalohadai ia gwauraia neganai, England diadi tauna ta be unai bamona ia hereva. Nega ginigunana John bona Tania be siahu taudia ese idia hereva henidia neganai, idia do headava lasi bona edia ruma bese maurina be ia dika. John, drag ia ania kava bona laki gadara ia manadalaia tauna, be henaohenao karadia ia karaia ena kara kereredia ia karaia noho diba totona. Ia ese ena natudia bona edia sinana ia naria namonamo lasi. Unai dainai, dahaka “hoa gauna” ia vara?

Dina ta, John be ena vavana merona ese Paradaiso ia herevalaia neganai ia kamonai. Ena lalona ia veria dainai, ia ese unai mero ena tama sina ia nanadaia. Unai tama sina be Iehova ena Witnes taudia, bona idia ese John idia durua Baibel amo unai ia dibaia totona. Sisina sisina, John bona Tania be Baibel amo ia mai abidadama idia abia, bona unai ese edia mauri ia haidaua. Edia headava idia rejista bona edia kara kerere idia rakatanidia. Edia ruma bese idia tahua siahu taudia ese nega sisina gunanai idia laloa ia vara diba lasi gauna idia davaria​—⁠moale ruma besena ruma namona dekenai, natudia naria gabuna namona. Unai diadi ia hereva maoro badina ia gwau John bona Tania ese idia davaria abidadama matamatana dainai unai “hoa gauna” ia vara.

England amo kilomita tausen haida, ia headava vadaeni hahine matamata ta Near East dekenai be lalohisihisi gauna tamona idia davaria taudia ta ai ia lao gwauraia. Palani ia karaia edia headava idia hadokoa taudia milioni haida hegeregerena do ia noho. Ia be mai ena natuna ta, to ena adavana ena mauri lagani ese iena ia hanaia. Unai dainai, ena varavara ese ia idia doria edia headava do ia hadokoa totona, bona ia be dala ia karaia matamaia vadaeni unai bamona do ia karaia totona. To, ia be Iehova ena Witnes tauna ta ida Baibel ia stadilaia. Witnes taihu ese unai sivarai ia kamonai neganai, ia ese Baibel ena lalohadai headava dekenai ia herevalaia​—⁠hegeregere, headava be Dirava ena harihari gauna ta bona do ita hadokoa kava lasi be namo. (Mataio 19:​4-6, 9) Unai hahine be sibona ena lalona dekenai ia gwau, ‘Ia idau badina inai hahine, lau diba namonamo lasi hahinena, be ia ura emai ruma bese ia durua to lau kahirakahira noho taudia be idia ura idia hadikaia.’ Ia abia abidadama matamatana ese ia durua ena headava ia hadokoa lasi totona.

Ruma bese maurina ia hadikaia lalohisihisi gauna ta be bogana lalonai natuna hamasea karana. United Nations ena ripoti ia gwau lagani iboudiai beibi milioni 45 be mai edia ura ida bogana lalonai idia hamasea. Unai kara ta ta be dika bada. Baibel amo ia abia dibana ese Philippines ai ia noho hahinena ta ia durua unai kara ia karaia lasi totona.

Unai hahine be Iehova ena Witnes taudia ese idia davaria, Baibel stadi buklet ta ladana Dirava Ia Ura Dahaka Ita Karaia?a ia abia dae, bona Baibel ia stadilaia matamaia. Hua haida murinai, badina ia gwauraia. Witnes taudia ese idia vadivadi henia neganai unai hahine be ia rogorogo, to ia bona ena tau ese edia lalona idia hadaia vadaeni unai beibi be bogana lalonai do idia hamasea. To, unai buklet ena rau 24 dekenai, ia do vara lasi beibi ena laulau ese iena kudouna ia hamarerea. Ia kahirakahira ia noho herevana ia hahedinaraia Baibel ena hereva hegeregerena mauri be helaga badina Dirava “be mauri ibounai ena badina,” bona unai ese ia durua ena natuna ia dogoatao totona. (Salamo 36:⁠9) Hari ia be mai hairai bona gorere lasi beibi ta ena sinana.

Abidadama ese Idia Laloa Maragi Taudia ia Durua

Ethiopia dekenai, edia dabua be namo lasi tatau rua be Iehova ena Witnes taudia ese idia karaia tomadiho hebouna ta dekenai idia lao. Unai hebou murinai, Witnes ta ese dala namona ai ia hedavari henidia. Unai tatau ese heduru totona idia noinoi. Unai Witnes tauna ese moni lasi to gau namona ta ia henia. Idia ia hagoadaia Dirava idia abidadama henia totona, unai ese “golo ia hereaia.” (1 Petero 1:⁠7) Idia ta ia kamonai bona Baibel ia stadilaia matamaia. Unai ese ena mauri ia haidaua. Ena abidadama ia goada ia lao neganai, kuku ania karana, inuinu kekero karana, matabodaga karana, bona khat (lalona biagua drag dikana ta) abia karana ia hadokoa. Ia be sibona durua dalana ia dibaia bona noinoi karana ia rakatania, bona hari iena mauri ia goeva, bona anina ia havaraia.

Italy dekenai, ena mauri lagani be 47 tauna ta be hahemaoro herevana idia henia lagani 10 dibura ai do ia noho bona judicial psychiatric hospital dekenai idia dogoatao. Dibura rumadia ai, lauma dalanai heduru ia henia totona gwaumaoro idia henia Iehova ena Witnes tauna ta be ia ida Baibel ia stadilaia. Unai tau be lauma dalanai ia goada haraga. Abidadama ese ena mauri ia haidaua bada dainai hari ma dibura taudia haida be edia hekwakwanai hamaoromaoroa totona sisiba be ia amo idia tahua. Baibel amo ia abia abidadama dainai dibura naria taudia ese idia matauraia, hanamoa, bona abidadama henia.

Vanegai lagani edia niuspepa ese idia hahedinaraia Africa ena tano idauidau lalonai tano tamona taudia idia tuari heheni. Tuari taudia ai idia lao totona idia tereini memero matamatadia edia sivarai be dika herea. Unai natudia dekenai drag idia henia, idia hahisidia, bona idia doria edia varavara idia kara dika henidia totona bona unai amo idia hamomokania edia ura badana be edia tuari oreana sibona do idia badinaia. Baibel amo ia mai abidadama ena goada ia hegeregere unai bamona matamata taudia edia mauri haidaua totona, a? Ita diba matamata taudia rua dekenai ia be hegeregere.

Liberia dekenai, Alex be Katolik Dubu lalonai pris durua gaukarana ia karaia. To ena mauri lagani be 13 neganai, tuari oreana ta lalonai ia vareai bona ladana bada tuari merona ta ai ia lao. Mai gari lasi ida ia tuari totona, meamea taudia dekenai heduru ia tahua. Alex ese ena turadia momo idia hamasea be ia itaia, to ia roho mauri. Lagani 1997 ai, Iehova ena Witnes taudia ida ia hedavari bona ia davaria idia be ia idia laloa maragi lasi. To, ia idia durua Baibel ese dagedage be edena bamona ia herevalaia ia dibaia totona. Alex ese tuari oreana ia rakatania. Ena abidadama ia goada ia lao lalonai, ia ese Baibel ena hahegani ia badinaia: “Dika do ia rakatania, bona kara namo do ia karaia. Maino do ia tahua, bona maino ena dala do ia badinaia noho.”​—⁠1 Petero 3:⁠11.

Unai nega lalonai, guna ia tuari merona ladana Samson be Alex ia noho taoni dekenai ia lao. Guna ia be dubu dekenai ane abia oreana ta lalonai ia noho to lagani 1993 lalonai tuari tauna ai ia lao bona drag ania kava, meamea, bona matabodaga karadia ia karaia matamaia. Lagani 1997 ai idia hadokoa. Samson be sekuriti oreana idauna ta lalonai ia vareai totona Monrovia dekenai ia lao neganai, ena turana ta ese ia hagoadaia Iehova ena Witnes taudia ida Baibel ia stadilaia totona, bona unai dainai, ia be Baibel amo ia mai abidadama ia abia. Unai ese goada ia henia ena tuari daladia ia rakatania totona. Hari Alex bona Samson be maino ai idia noho bona edia mauri ia goeva. Baibel amo ia mai abidadama ese edia mauri idia hadikaia vadaeni taudia edia mauri ia haidaua diba, ani?

Abidadama Maorona

Unai be idia torea diba haheitalai momo amo haheitalai haida sibona Baibel amo ia mai abidadama korikorina ena siahu hahedinaraia totona. Momokani, sibona idia gwauraia Dirava abidadama henia taudia ibounai lasi ese Baibel ena taravatu idia badinaia. Oibe, Dirava idia abia dae lasi taudia haida edia mauri dalana ese sibona idia gwauraia Keristani taudia edia noho ia hereaia. Unai ena badina be Baibel amo ia mai abidadama ena anina be Dirava idia abia dae herevana idia gwauraia sibona lasi.

Aposetolo Paulo ese abidadama ia gwauraia inai bamona: “Ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” (Heberu 11:⁠1) Unai dainai, abidadama ena anina ta be matana amo ita itaia lasi gaudia be​—⁠ta ese ia hakoikoia diba lasi dainai​—⁠ita abia dae goada. Mai anina bada gauna be ita daradara lasi Dirava ia noho, ia ese ita ia laloa, bona ena ura idia karaia taudia do ia hanamoa. Aposetolo tauna be ma ia gwau: “Tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.”​—⁠Heberu 11:⁠6.

Unai bamona abidadama ese John, Tania, bona inai hereva lalonai ai gwauraia taudia ma haida edia mauri ia haidaua. Idia ia hakaua abia hidi karana lalonai Dirava ena Hereva, Baibel, do idia tahua mai goada ida. Ia durudia gau haida do idia dadaraia dala kererena dekenai idia raka lasi totona. Unai sivarai ta ta idia idau, to ibounai be dala tamona ai idia hamatamaia. Iehova ena Witnes taudia be unai taudia ida Baibel idia stadilaia, bona idia itaia Baibel ena hereva be momokani, ia gwau: “Dirava ena hereva be ia mauri noho, bona ia be mai ena siahu.” (Heberu 4:12) Dirava ena Hereva ena siahu ese idia ta ta ia durua edia mauri ia hanamoa abidadama goadana idia abia totona.

Iehova ena Witnes taudia be tano bona motumotu 230 mai kahana lalonai idia gaukara noho. Oi idia boiria Baibel stadi oi abia totona. Dahaka dainai? Badina idia diba Baibel amo ia mai abidadama ese oiemu mauri lalonai danu gau momo ia hanamoa diba.

[Footnote]

[Pictures on page 3]

Baibel amo ia mai abidadama ese taunimanima edia mauri ia hanamoa

[Picture Credit Line on page 2]

Title card of Biblia nieświeska by Szymon Budny, 1572