Basileia Haroro Ripoti

Edia Abidadama Dainai Hahenamo Idia Abia

APOSETOLO Paulo be abidadama bada tauna ta, bona ena tadikaka ia hagoadaia edia abidadama idia habadaia totona. Ia gwau: “Bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. . . . Dirava idia tahua taudia ibounai, be davana namona Dirava ese do ia henidia.” (Heberu 11:⁠6) Inai ekspiriens Mozambique amo ese idia hahedinaraia Iehova ese abidadama goadana idia hahedinaraia taudia edia davana ia henia bona guriguri goadagoada taudia edia guriguri ia haerelaia.

• Vabu taihuna ta not kahana ena provinsi Niassa amo be ia laloa momo ia bona ena natudia 6 be edena bamona “Dirava ia Gwauraia Mauri Dalana” Distrik Hebouhebou dekenai do idia lao. Iena moni abia dalana tamona be ena gabu ai ia noho maketi dekenai kohu ia hoihoilaia, to hebouhebou ena nega ia kahirakahira neganai, iena moni be ia hegeregere ia bona ena natuna be trein amo idia lao ena davana sibona do idia henia. To, Iehova ese do ia durua karana dekenai ia abidadama bona hebouhebou dekenai do ia lao ena palani ia karaia.

Ena natudia 6 ida trein dekenai idia guia. Idia heau lao lalonai unai trein taria tauna be taihu dekenai ia lao ena tiketi ia abia totona. Ena lapel kadi ia itaia neganai, ia henanadai ia karaia kadi ena anina be dahaka. Unai taihu ese ia hamaoroa unai kadi ia karaia dainai taunimanima do idia diba ia be Iehova ena Witnes taudia edia distrik hebouhebou dekenai ia lao tauna ta. Unai trein taria tauna ia henanadai: “Unai hebouhebou be edeseni do idia karaia?” Hebouhebou be kahirakahira ia noho provinsi ladana Nampula ai do idia abia, ena daudau be kilomita 300 bamona, ia dibaia neganai, unai taihu ia hoa badina ia ese ena tiketi ena davana ena kahana sibona ia abia! Bena ia ese unai tiketi ena davana kahana amo unai hahine bona ena ruma bese edia giroa lou ena tiketi ia henia. Ia moale dikadika badina Iehova ia abidadama henia!​​—⁠Salamo 121:​1, 2.

• Lagani 25 lalonai, tomadiho ia laloa bada hahinena ta ese Dirava ia noia tomadiho dalana maorona ia hadibaia totona. Ena dubu ese tomadiho bona sene karadia idia karaia hebou, bona ia laloa reana unai bamona tomadiho ese Dirava ia hamoalea lasi.

Ia gwau: “Hanaihanai Iesu ena hereva Mataio 7:7 dekenai lau laloatao, ‘Umui noinoi, do ia henia. Umui tahua, vadaeni do umui davaria. Umui pidipidi, vadaeni iduara do ia kehoa umui dekenai.’ Unai siri lau laloa dainai, hanaihanai Dirava lau noia hereva momokani dekenai lau do ia hakaua lao. Dina ta aiemai dubu ena pasto tauna ese maketi ai idia gaukara taudia ibounai ia hamaoroa moni haida bona kohu haida do idia abia mai unai amo ia ese do ia hanamodia. Lau laloa unai noinoi karana be Baibel ena hereva hegeregerena lasi, unai dainai gau ta lau abia lao lasi. Pasto ia itaia lau ese ‘harihari’ gauna ta lau abia mai lasi neganai, dubu taudia ibounai vairanai lau ia gwau henia. Unai dina ai lau lalo-parara Dirava ia ura lasi unai bamona tomadiho dalana amo ia ita tomadiho henia, bena unai dubu lau rakatania. To, guriguri karana lau goadalaia noho, hereva momokani lau davaria totona.

“Dokonai, lau ese egu lalona lau hagoadaia bona lauegu varavara ta, Iehova ena Witnes tauna ta, lau hereva henia. Ia ese pepapepa ta lau dekenai ia henia, bona lau duahia neganai karaharaga lau lalo-parara Dirava ese egu guriguri ia haerelaia. Gabeai, lau danu ia noho tauna ese Baibel ena hereva momokani ia laloa bada matamaia, bona emai headava ai hamaoromaoroa. To gabeai, egu adavana ia gorere bada herea. To ela bona ia mase, ia ese lau ia hagoadaia hereva momokani ena dala ai do lau goada noho Paradaiso ai do ai hedavari lou totona.

“Hanaihanai Iehova lau tanikiu henia badina egu guriguri ia haerelaia bona ia tomadiho henia dalana maorona ia hahedinaraia. Egu guriguri ma haida ia haerelaia danu, bona hari egu natudia ibounai 8 be Iehova ena gwauhamata hesiai taudia.”