Dirava Ena Peroveta Herevana Oi Kamonai Namonamo
“Ai daradara lasi momokani, to ai diba peroveta taudia edia hereva be momokani. Umui danu peroveta taudia edia hereva do umui badinaia be namo.”—2 PETERO 1:19.
1, 2. Edena mesia koikoidia edia haheitalai oi gwauraia diba?
LAGANI handred momo lalodiai, mesia koikoidia ese vaira negana ai do idia vara gaudia idia gwauraia toho. Lagani 400 C.E. murinai, Crete motumotuna dekenai, tau ta be sibona ia gwauraia Mose bona Iuda taudia ia hamaoroa ia be idia naria mesia tauna bona edia igui hesiai amo do ia hamauridia. Edia ruhaia dinana ia ginidae neganai, idia bamoa bona idia lao Mediterranean Davara ena kone ena ataiai momokani gabuna dekenai. Idia ia hamaoroa namona be davara dekenai idia pau dobi, bena ena ranu do ia parara idia vairanai. Davara dekenai idia pau dobi taudia momo idia maloa mase, bona unai mesia tauna koikoina ia heau boio.
2 Lagani 1100 murinai, Yemen dekenai, “mesia” tauna ta ia hedinarai. Lohia tauna ese ia noia toa ta amo iena “mesia” dagina do ia hamomokania. Unai mesia ia gwau iena kwarana do idia utua oho. Ia peroveta do ia toreisi lou haraga dainai, ia hedinarai momokani ia be mesia. Unai lohia tauna ia gwau do ia karaia—bena unai “mesia” tauna ia mase.
3. Mesia korikorina be daika, bona ena haroro gaukara ese dahaka ia hamomokania?
3 Mesia koikoidia bona edia peroveta herevadia idia kwalimu lasi, to Dirava ena peroveta herevana ita kamonai namonamo dainai do ita lalohisihisi lasi. Mesia korikorina, Iesu Keriso, ena mauri ese Baibel ena peroveta herevadia momo ia hagugurua. Hegeregere, Evanelia bukana ia torea tauna Mataio be Isaia ena peroveta herevana ia torea hanai, ia gwau: “ ‘Sebuluno tano bona Napatali tano, gohu ena dalana, Ioridane Sinavai unai kahana dekenai, Galilea, bese idauidau edia tano. Dibura dekenai idia noho taudia be, diari badana idia itaia vadaeni. Bona mase laulauna ena dibura dekenai idia helai noho taudia edia latanai, diari ia hedinarai vadaeni.’ Unai negana ia lao, Iesu ese ia haroro hamatamaia, ia gwau, ‘Emui lalona umui giroa, badina Guba Basileia be kahirakahira ia mai vadaeni.’ ” (Mataio 4:15-17; Isaia 9:1, 2) Iesu be unai “diari badana,” bona iena haroro gaukara ese ia hamomokania ia be Mose ese ia gwauraia Peroveta tauna. Iesu idia kamonai henia lasi taudia be do idia mase.—Deuteronomi 18:18, 19; Kara 3:22, 23.
4. Iesu ese Isaia 53:12 be edena bamona ia hagugurua?
4 Iesu ese Isaia 53:12 ena peroveta herevana ia hagugurua danu, ia gwau: “Ia ese iena mauri ia dogoatao lasi, to mai abidadama danu, iena mauri ia atoa diho, bona kerere taudia danu ia mase hebou. Ia ese taunimanima momo edia kara dika davana ia karaia, bona ia guriguri, idia edia kerere be lau Dirava ese do lau gwauatao totona.” Iesu ia diba kahirakahira iena mauri do ia henia mauri davalaia gauna ta bamona, bona iena hahediba taudia edia abidadama ia hagoadaia. (Mareko 10:45) Ena toana ia idau neganai, unai be dala badana ai ia karaia.
Iesu Ena Toana Ia Idau Karana ese Abidadama Ia Hagoadaia
5. Sibona emu hereva amo Iesu ena toana ia idau karana be edena bamona oi gwauraia diba?
5 Iesu ena toana ia idau karana ese peroveta herevana ia hagugurua. Iesu ia gwau: “Taunimanima ena Natuna be iena Tamana ena diaridiari dekenai do ia mai, mai ena aneru momo danu . . . Umui lau hamaoroa momokani, haida idia gini inai, be do idia mase lasi, ela bona Taunimanima ena Natuna do idia itaia, mai ena Basileia danu do ia mai.” (Mataio 16:27, 28) Aposetolo taudia haida ese Iesu idia itaia mai ena Basileia danu ia mai, a? Mataio 17:1-7 ia gwau: “Dina 6 murinai, Iesu ese Petero bona Iamesi bona ena tadina Ioane ia abia lao, ororo badana ta dekenai idia daekau. Vadaeni idia edia vairana dekenai Iesu ena toana ia idau.” Unai be hoa bada negana! “Iena vairana be ia diaridiari dina bamona, iena dabua ia kurokuro momokani, diari bada bamona. Vadaeni Mose bona Elia be idia edia vairana dekenai idia hedinarai, Iesu danu idia herevahereva.” Danu, “ori mai diaridiari danu ese idia ia koua,” bona Dirava ena gado idia kamonai, ia gwau: “ ‘Egu Natuna be inai, lauegu lalokau Tauna. Lauegu lalona ia moale ia dekenai. Iena hereva do umui kamonai henia.’ Diba tahua taudia idia kamonai, vadaeni edia vairana idia atoa diho, idia gari dikadika dainai. To Iesu be ia lao idia dekenai, edia kopina dekenai ena imana ia atoa, ia gwau, ‘Umui toreisi, umui gari lasi.’ ”
6. (a) Dahaka dainai Iesu ia gwau ena toana ia idau karana be matahanai ta? (b) Iesu ena toana ia idau karana ese gabeai do ia vara gauna totona dahaka ia hahedinaraia?
6 Unai hoa karana be Heremona Ororo ena dorina ta dekenai ia vara, unuseniai Iesu bona ena aposetolo taudia toi idia mahuta. Ena toana ia idau karana be hanuaboi ai ia vara, bona unai dainai idia itaia namonamo. Iesu ia gwau unai be matahanai ta, badina idaunegai idia mase taudia Mose bona Elia be unuseniai idia noho momokani lasi. Iesu sibona ia noho momokani. (Mataio 17:8, 9) Unai bamona karana mai hairaina ese Petero, Iamesi, bona Ioane dekenai gabeai Iesu do ia abia Basileia ena siahu ia hahedinaraia. Mose bona Elia ese Iesu ida Basileia do idia abia horoa taudia idia laulaulaia, bona unai matahanai ese ia hahedinaraia goevagoeva Iesu ena Basileia bona gabeai do ia lohia sivaraina be ia momokani.
7. Edena bamona ita diba Petero ese Iesu ena toana ia idau karana ia laloa goada noho?
7 Iesu ena toana ia idau karana ese unai aposetolo taudia toi edia abidadama ia hagoadaia, bona idia ese Keristani kongregesen idia durua bada. Keriso ena vairana ia diaridiari bada, iena dabua idia kurokuro momokani, bona Dirava ena gadona ia gwau Iesu be Iena lalokau Natuna, bona ia idia kamonai henia be namo—unai ibounai be ena anina ia hagugurua namonamo. To aposetolo taudia ese unai matahanai herevana be tau ta do idia hamaoroa lasi ela bona Iesu be mase dekena amo do ia toreisi lou. Lagani 32 murinai, Petero ese unai matahanai ia do laloa goada noho. Unai matahanai bona ena anina ia herevalaia, ia gwau: “Iseda Lohiabada Iesu Keriso ena siahu, bona do ia mai sivaraina umui dekenai ai hamaoroa neganai, ai be gori kava ai gwauraia lasi. Lasi momokani. Badina korikori be, aiemai matana dekena amo iena hairaina ai itaia. Oibe, Tamana Dirava ese Keriso ena ladana ia hanamoa bada, bona hairai ia henia neganai, ai danu be unuseni ai noho. Unai neganai, hairai bada gabuna dekena amo Dirava ia hereva, ia gwau, ‘Inai be lauegu Natuna, lauegu lalokau, lau ese ia lau ura henia bada.’ Inai gado guba dekena amo ia diho, be ai ese ai kamonaia. Inai kara ia vara, be Iesu danu ororo helagana dekenai ai noho neganai.”—2 Petero 1:16-18.
8. (a) Dirava ese ena Natuna ia gwauraia herevana be dahaka ia hahedinaraia? (b) Iesu ena toana ia idau karana lalonai ia hedinaraia ori ese dahaka ia hahedinaraia?
8 Mai anina bada kahana be Dirava ena hadibaia herevana, ia gwau: “Egu Natuna be inai, lauegu lalokau Tauna. Lauegu lalona ia moale ia dekenai. Iena hereva do umui kamonai henia.” Unai hereva ese ia hahedinaraia Iesu be Dirava ena King, bona mauri gaudia ibounai ese ia do idia kamonai henia be namo. Unai ori ese ia hahedinaraia unai matahanai be taunimanima ese matana amo do idia itaia diba lasi dalana dekenai do ia guguru. Iesu ena noho Basileia siahuna lalonai “ena toana” idia lalo-pararalaia taudia sibona ese do idia itaia bamona. (Mataio 24:3) Momokani, Iesu ena hereva, matahanai herevana be tau ta do idia hamaoroa lasi ela bona mase amo do ia toreisi, ese ia hahedinaraia ena siahu bona hairai be ena toreisi lou negana murinai do ia abia.
9. Dahaka dainai Iesu ena toana ia idau karana ese iseda abidadama ia hagoadaia be namo?
9 Petero be Iesu ena toana ia idau karana ia herevalaia murinai, ia gwau: “Unai dainai ai daradara lasi momokani, to ai diba peroveta taudia edia hereva be momokani. Umui danu peroveta taudia edia hereva do umui badinaia be namo. Edia hereva be lamepa, dibura gabuna ia hadiaria bamona, ela bona daba ia rere, bona daba ena hisiu bada ese emui kudouna lalonai do ia toreisi. To inai umui diba guna be namo: Tau ta ese sibona ena laloa dekena amo peroveta hereva Buka Helaga lalonai ena anina do ia gwauraia lasi. Badina be peroveta hereva gunadia be tau ta ese sibona ena ura dekenai ia gwauraia lasi. Lasi momokani. To Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.” (2 Petero 1:19-21) Iesu ena toana ia idau karana ese Dirava ena peroveta herevana ia hamomokania. Namona be unai hereva ita kamonai namonamo bona Dirava ese ia hamomokania bona abia dae lasi “gori kava” herevadia ita badinaia lasi. Namona be Iesu ena toana ia idau karana ese iseda abidadama ia hagoadaia, badina unai mahatanai lalonai ia hedinarai Iesu ena hairai bona Basileia siahuna be hari ia abia momokani vadaeni. Oibe, ta ese ia hakoikoia diba lasi hari Keriso be King mai ena siahu bada guba dekenai.
Daba Ena Hisiu Bada Ia Daekau Dalana
10. Petero ese ia gwauraia “daba ena hisiu bada” be daika eiava dahaka, bona dahaka dainai unai bamona oi haere?
10 Petero ia gwau: “Umui danu peroveta taudia edia hereva do umui badinaia be namo. Edia hereva be lamepa, dibura gabuna ia hadiaria bamona, ela bona daba ia rere, bona daba ena hisiu bada . . . do ia toreisi.” Unai “daba ena hisiu bada” be daika eiava dahaka? Baibel lalonai, inai hereva “daba ena hisiu bada” be nega tamona sibona ia hedinarai, bona ena anina be “hisiu bada, daba rere neganai” ena bamona. Apokalupo 22:16 be Iesu Keriso ia gwauraia “hisiu bada, daba rere neganai ia diaridiari gauna.” Lagani ena hua haida lalonai, unai bamona hisiu be ist kahana dekenai idia daekau hisiu ginigabedia. Dina ia hedinarai gwauraia neganai idia daekau, bona dina matamatana ia matamaia negana idia hahedinaraia. Petero ese unai hereva “daba ena hisiu bada” ia gaukaralaia Iesu be Basileia siahuna ia abia vadaeni negana ia herevalaia totona. Unai nega lalonai, Iesu be tanobada bona guba ataiai ia toreisi! Unai Daba ena Hisiu Bada Mesiana ese ia hahedinaraia dina, o nega, matamatana ta kamonai taudia ibounai totona be ia matamaia.
11. (a) Dahaka dainai 2 Petero 1:19 ese ia hahedinaraia lasi “daba ena hisiu bada” be taunimanima edia kudouna korikorina lalonai ia toreisi? (b) Petero Iharuana 1:19 be edena bamona oi gwauraia diba?
11 Baibel momo ese idia hahedinaraia toho, aposetolo Petero ena hereva 2 Petero 1:19 ai, be taunimanima edia kudouna korikorina lalonai ia vara gauna ia gwauraia. Tau o hahine ena kudouna ena metau be 250 ia lao 300 gram sibona. Edena dala ai Iesu Keriso—hari mase diba lasi lauma tauna mai hairaina guba dekenai—be taunimanima edia kudouna maragina lalonai do ia toreisi diba, a? Dala be lasi. (1 Timoteo 6:16) To iseda kudouna be mai anina bada unai gauna dekenai, badina iseda kudouna amo Dirava ena peroveta herevana ita kamonai namonamo. To, bema 2 Petero 1:19 ena hereva New World Translation Baibel lalonai oi itaia namonamo, do oi itaia inai hereva ‘ela bona daba ia rere bona daba ena hisiu bada do ia toreisi’ murinai maka ta ia noho bona unai amo inai hereva “emui kudouna lalonai” amo ia hapararaia. Reana unai siri be inai dala ai ita gwauraia diba: ‘Ita daradara lasi to ita diba peroveta herevana be momokani; bona namona be umui kamonai namonamo dibura gabuna, emui kudouna, lalonai ia diari lamepa bamona, ela bona daba ia rere bona daba ena hisiu bada do ia toreisi.’
12. Taunimanima edia kudouna be edena bamona, to Keristani taudia korikoridia be edena bamona?
12 Kara dika taudia edia kudouna be edena bamona? Momokani, lauma dalanai edia kudouna be ia dibura! To, bema ita be Keristani taudia korikoridia, unai be hegeregere iseda kudouna lalonai lamepa ia diari, bema lasi ia be dibura. Petero ena hereva bamona, Keristani taudia ese edia lalona ia hadiaria Dirava ena peroveta herevana idia kamonai namonamo, bona unai dala amo idia lalo-parara dina matamata be do ia matamaia bona ia idia naria noho. Idia lalo-parara Daba ena Hisiu Bada be taunimanima edia kudouna lalonai lasi, to mauri gaudia ibounai edia vairanai ia toreisi vadaeni.
13. (a) Dahaka dainai ita diba momokani Daba ena Hisiu Bada be ia toreisi vadaeni? (b) Dahaka dainai Iesu ia perovetalaia nega aukana lalonai Keristani taudia idia haheauka diba?
13 Daba ena Hisiu Bada ia toreisi vadaeni! Unai ita diba momokani bema Iesu ena noho toana ena peroveta herevana badana ita kamonai namonamo. Hari inai negai, tuari badadia, hitolo, tano mareremarere, bona tanobada ibounai dekenai sivarai namona idia harorolaia dainai ita itaia unai peroveta herevana be ia guguru. (Mataio 24:3-14) Ena be Iesu ia perovetalaia nega aukana ese ita Keristani taudia eda mauri ia ha-aukaia danu, to do ita haheauka diba mai maino bona moale ida. Dahaka dainai? Badina Dirava ena peroveta herevana ita kamonai namonamo noho bona nega vaira totona ia gwauhamatalaia gauna ita abidadama henia. Ita diba nega namona be kahirakahira badina ita be “dokona negana” ai ita noho! (Daniela 12:4) Inai tanobada dekenai be Isaia 60:2 ese ia herevalaia nega aukana ia vara, ia gwau: “Bese idauidau be dibura ese do ia koudia.” Inai dibura dekenai, ta ese ia tahua dalana be edena bamona do ia davaria diba? Namona be harihari, nega ia do noho neganai, mai manau ida Dirava ena peroveta herevana do ia kamonai namonamo. Kudou-maoro taudia be Iehova Dirava, mauri bona diari ena Badina, dekenai idia lao be namo. (Salamo 36:9; Kara 17:28) Unai dala sibona amo, ta ese lalo-parara do ia abia, bona Dirava ese kamonai taudia totona ia hegaegaelaia vaira negana ena helaro do ia moalelaia bada.—Apokalupo 21:1-5.
“Diari be Tanobada Dekenai Ia Mai Vadaeni”
14. Baibel ena peroveta hereva hereadaedia idia guguru negana ita itaia totona dahaka ita karaia be namo?
14 Baibel ese ia hahedinaraia goevagoeva, Iesu Keriso be hari ia lohia King ta bamona. Lagani 1914 ai siahu ia abia dainai, peroveta hereva hereadaedia edia anina be do idia guguru. Idia guguru negana do ita itaia totona, namona be ita hamomokania ita be Iesu Keriso ita abidadama henia manau taudia, diba ita do abia lasi neganai ita karaia kara dika amo ita helalo-kerehai. Dibura idia ura henia taudia ese mauri hanaihanai do idia abia lasi. Iesu ia gwau: “Kota henia ena badina be inai, diari be tanobada dekenai ia mai vadaeni, to taunimanima ese dibura idia ura henia bada, diari be idia ura henia maragi, badina edia kara be ia dika. Badina be kara dika taudia ibounai ese diari idia ura lasi, diari gabuna dekenai idia lao lasi, edia kara do idia hedinaraia garina. To kara momokani idia badinaia taudia ese diari dekenai idia lao, vadaeni diari ese ia hedinaraia, idia ese kara namodia idia karaia, Dirava idia kamonai henia dainai.”—Ioane 3:19-21.
15. Bema Dirava ese iena Natuna amo ia henia hamauria dalana ita dadaraia, dahaka do ia vara?
15 Lauma diarina be Iesu amo tanobada dekenai ia mai, bona ia ita kamonai henia be gau badana. Paulo ia gwau: “Idaunegai Dirava ese dala idauidau momo dekena amo iseda sene taudia dekenai ia hereva henidia, peroveta taudia dekena amo. To inai dina dokodia neganai ia ese iena Natuna dekena amo ita ia hereva henia. . . . Bona Dirava ese iena Natuna ia abia hidi, vadaeni inai nega dokona neganai, gau ibounai be ia ese ia biagua noho.” (Heberu 1:1, 2) Bema Dirava ese iena Natuna amo ia henia hamauria dalana ita dadaraia, dahaka do ia vara? Paulo be ma ia gwau: “Gunaguna Dirava ese iena aneru dekena amo, iena hereva ia gwauraia, bona unai aneru edia hereva be mai siahu bada. Edia hereva idia utua taudia ibounai be edia kerere davana idia davaria momokani, ani? Vadaeni, edena bamona ita heau mauri diba, bema Lohiabada ena hamauria ita negea neganai? Lohiabada sibona ese inai hamauria ia gwauraia, bona inai iena hereva idia kamonai taudia ese ita dekenai idia gwauraia gauna, be ita diba ia momokani. Dirava ese danu hoa bona toa karadia dekena amo inai hamauria ia hamomokania. Ia ese siahu karadia idauidau ia hedinaraia, bona Lauma Helaga ena harihari gaudia, be abidadama taudia dekenai Dirava ese ia henia, iena ura hegeregerena.” (Heberu 2:2-4) Oibe, peroveta herevana harorolaia gaukarana lalonai Iesu be mai anina bada.—Apokalupo 19:10.
16. Dahaka dainai Iehova Dirava ena peroveta herevadia ibounai ita abidadama henia diba?
16 Ita itaia vadaeni, Petero ia gwau: “Tau ta ese sibona ena laloa dekena amo peroveta hereva Buka Helaga lalonai ena anina do ia gwauraia lasi.” Taunimanima ese peroveta hereva momokanina idia gwauraia diba lasi, to Dirava ena peroveta herevadia ita abidadama henia diba. Iehova Dirava sibona ese ia henidia. Lauma helaga amo ena hesiai taudia ia durua Baibel ena peroveta herevadia idia guguru dalana idia lalo-pararalaia totona. Momokani, Iehova ita tanikiu henia badina ita itaia unai bamona peroveta herevadia momo be lagani 1914 amo ema bona hari idia guguru noho. Bona ita diba momokani idia do vara lasi peroveta herevadia ibounai, inai tanobada dikana ena dokona idia perovetalaia herevadia unai, be do idia guguru. Gau badana be iseda diari ita hahedinaraia noho neganai, Dirava ia henia peroveta herevadia ita kamonai namonamo noho. (Mataio 5:16) Ita moale bada herea badina Iehova ese inai tanobada ena ‘dibura be diari dekenai ia halaoa’ ita totona!—Isaia 58:10.
17. Dahaka dainai Dirava ena amo lauma diarina ita abia be namo?
17 Dina ena diari dainai, gau ta ita itaia diba. Danu, aniani idauidau ita abia badina diari ese tubutubu gaudia ia hatubua. Bema dina ena diari be lasi, do ita mase. Lauma diarina be edena bamona? Ia ese ita ia hakaua bona Dirava ena Hereva, Baibel, dekenai ia gwauraia vaira negana be ita dekenai ia hahedinaraia. (Salamo 119:105) Iehova Dirava be mai lalokau ida ‘iena diari bona iena hereva momokani ia siaia.’ (Salamo 43:3) Namona be ita hahedinaraia unai bamona gaudia ita laloa bada. Unai dainai namona be ita hekwarahi Dirava ena diba ena hairai ese iseda kudouna ia hadiaria noho totona.—2 Korinto 4:6; Efeso 1:18.
18. Hari Iehova ena Daba ena Hisiu Bada ia gini hegaegae dahaka do ia karaia totona?
18 Lagani 1914 ai, Iesu Keriso, Daba ena Hisiu Bada, be tanobada bona guba ataiai ia toreisi bona iena toana ia idau matahanaina ena anina ia hagugurua karana ita diba be hahenamo badana! Hari, Iehova ena Daba ena Hisiu Bada ia noho, ia gini hegaegae ena toana ia idau karana ena kahana ma ta—“Siahu Ibounai Diravana ena Dina Badana”—ia guguru lalonai Dirava ena ura do ia karaia totona. (Apokalupo 16:14, 16) Inai tanobada dikana ena oromana ibounai ia dahua oho murinai, Iehova ese ia gwauhamatalaia “guba matamata bona tanobada matamata” do ia mailaia, bona unai peroveta momokani Diravana, tanobada bona guba edia Atai Herea Lohiabadana unai, do ita hanamoa diba ela bona hanaihanai. (2 Petero 3:13) Ela bona unai dina badana ia ginidae, namona be Dirava ena peroveta herevana ita kamonai namonamo karana amo Dirava ena diari ai ita raka noho.
Edena Bamona Do Oi Haere?
• Iesu ena toana ia idau karana be edena bamona oi gwauraia diba?
• Edena dala ai Iesu ena toana ia idau karana ese abidadama ia hagoadaia?
• Iehova ena Daba ena Hisiu Bada be daika eiava dahaka, bona edena negai ia toreisi?
• Dahaka dainai Dirava ena peroveta herevana ita kamonai namonamo be namo?
[Picture on page 13]
Iesu ena toana ia idau karana ena anina oi gwauraia diba, a?
[Picture on page 15]
Dina ena Hisiu Bada ia toreisi vadaeni. Oi diba edena bamona bona edena negai, a?