Basileia Haroro Ripoti

“Umui be Baibel Umui Diba Namonamo”

IERUSALEMA dekenai, lagani 12 merona Iesu be mai gari lasi ida dubu gunalaia taudia danu ia herevahereva neganai, “iena hereva idia kamonai taudia ibounai be iena diba bona iena haere dekenai idia hoa bada.” (Luka 2:​47) Hari inai negai danu, Iehova idia hesiai henia matamata taudia momo herea be mai gari lasi ida edia tisa taudia bona sikuli turadia dekenai Dirava bona Baibel idia herevalaia, bona nega momo moale bada gaudia idia vara.

Tiffany, iena mauri lagani be 14, be klas ta ai ia noho, unuseniai idia be Baibel ena peroveta herevana, pura eiava lagani 70, Daniela 9:​24-​27 ai, idia kikilaia. Tisa ese unai siri edia hereva haida sibona ia kikilaia bona ena hereva ia haorea haraga.

Matamanai, Tiffany ia daradara ena imana do ia abia isi eiava. Ia gwau: “To unai siri ibounai ia hahedinaraia namonamo lasi dainai, lau lalo-hekwarahi. Bena karaharaga egu imana lau abia isi.” Tisa ia hoa bada, badina stiuden momo be idia hekwarahi unai gauna idia lalo-pararalaia totona, to idia ta ia ura haere ta do ia henia.

Tiffany ese unai peroveta herevana ena anina ia herevalaia totona dala ia kehoa neganai, ia toreisi bona ia laloatao gauna ia hahedinaraia goevagoeva. Ena hereva ia haorea murinai, klas dekenai regerege ia doko. Tiffany ia gari sisina. Vadaeni, klas taudia be idia moale dainai edia imana idia patapataia.

Tisa ia hereva loulou, ia gwau: “Tiffany, unai be namo herea, namo herea momokani.” Ia gwau guna ia laloa unai siri be mai edia anina, to Tiffany be ia dekenai edia anina ia hahedinarai goevagoeva tauna ginigunana. Klas ia ore neganai, tisa ese Tiffany ia nanadaia edena bamona Baibel ia diba namonamo.

Ia gwau: “Badina lau be Iehova ena Witnes kekeni ta. Egu tama sina ese lau dekenai unai peroveta herevana be idia gwauraia loulou ela bona lau lalo-pararalaia.”

Iena klas turadia danu idia hoa bada, badina iena diba Baibel dekenai be bada. Stiuden kekeni ta be Tiffany dekenai ia gwau: “Harihari lau lalo-parara dahaka dainai umui Iehova ena Witnes taudia be ruma ta ruma ta dekenai umui lao; badina be umui be Baibel umui diba namonamo.” Ma haida idia gwauhamata ena abidadama dainai ia do idia kirikirilaia lou lasi.

Tiffany ese ena tama sina dekenai ia davaria ekspiriens ia kikilaia neganai, idia hamaoroa namona be iena tisa dekenai Diba ese Mauri Dekenai Ita Ia Hakaua Lao bukana ia hahedinaraia. Unai ia karaia, buka dekenai Daniela ena peroveta herevadia ia kikilaia kahana ia hahedinaraia neganai, tisa ese unai buka ia ura abia bona ia tanikiu henia.

Momokani, bema Keristani matamata taudia be edia tama sina ese idia dekenai Dirava bona Baibel idia hadibalaia herevadia be ma haida dekenai idia gwauraia, Iehova idia abia isi bona idia hanamoa bona idia sibona dekenai hahenamo idia mailaia.​​—⁠Mataio 21:​15, 16.