Sisiba Namona be Edeseni Oi Abia Diba?
Lagani ta ta iboudiai “sisiba henia gaukarana” dekenai moni bilioni momo idia haboua. Taunimanima idia ura heduru idia abia. Darana gorere doketa tauna Heinz Lehmann ia gwau: “[Hari inai nega noho dalana ai] edukeisen dekenai bona taunimanima idia noho hebou karana ai kerere be momo. Tomadiho dekenai idia laloa bada gaudia be gunaguna bamona lasi. Ruma bese taudia idia noho hebou namonamo lasi . . . , bona unai dainai taunimanima be hekwarahi idia davaria.” Toretore tauna Eric Maisel ia gwau: “Taunimanima be guna idia lao edia iduhu ena meamea tauna, edia pasto, eiava edia doketa dekenai edia darana gorere ta, lauma hekwarahina ta bona tauanina gorere ta dainai heduru abia totona, to hari idia lao sibodia durua dalana idia sisibalaia bukadia dekenai, haere idia abia totona.”
THE American Psychological Association ese orea maragina ta idia haginia unai bada haraga gaukarana ia tahua totona. Unai gaukara tahua orea maragina taudia idia gwau “ena be dala momo idia noho taunimanima be sibodia edia kara bona ma haida edia kara idia lalo-pararalaia diba . . . , to unai program dekenai idia gwauhamatalaia gaudia bona edia ladadia be heagi kava momokani bona hereva kava gaudia sibona.” Toronto Star toretore tauna ta ia gwau: “Umui naria namonamo tomadiho bona lauma dala koikoi oreadia dekenai. . . . Umui naria namonamo be gau badana inai gaudia dekenai: oi sibona oi durua idia sisibalaia bukadia; teipi eiava kosi haida, unai kosi dekenai idia gwau gau momo do oi hanamoa haraga diba to nega be kwadogi momokani bona reana hegeregere lasi, bona idia gwau do oi hekwarahi lasi eiava oi sibona emu kara do oi biagua lasi bena emu ura gauna do oi abia.” Momokani, taunimanima momo idia ura heduru idia ura abia taudia idia durudia. To, madi, kara maoro idia badinaia lasi taudia ese sibodia idia noho dainai idia lalohisihisi taudia bona idia hisihisi taudia edia moni idia tahua, idia be heduru momokani eiava edia hekwakwanai hanaia dalana idia henia lasi.
Unai ita laloa dainai, edena heduru badana dekenai ita tabekau diba? Edeseni ita lao diba do ia namo hanaihanai sisiba ita abia totona?
Ia Moru Diba Lasi Hakaua Hereva Ena Badina
Lagani 1800-1899 C.E. lalonai America haroro tauna Henry Ward ia gwau: “Baibel be Dirava ese ia henia mapu, emu dala ia hadibaia totona, davara dekenai oi mutu lasi totona, bona bouti idia kamokau gabuna oi ia hadibaia totona, bona nadinadi eiava boe oi botaia garina dala maorona ia hahedinaraia totona.” Ma tau ta ese Baibel ia herevalaia, ia gwau: “Ena be iseda lagani idia momo idia lao to ita gwau diba lasi iseda diba Baibel dekenai be hegeregere vadaeni; ita bada noho lalonai unai buka ena anina dekenai iseda lalo-parara ia bada noho.” Badina be dahaka unai hereva ena badina oi laloa be namo?
Baibel be sibona ena namo ia gwauraia, ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, Dirava ena hereva momokani ita dekenai do ia hadibaia. Unai hereva momokani dainai, Dirava ena tau ena goada be hegeregere momokani, vadaeni kara namodia ibounai do ia karaia diba, mai kwalimu danu.” (2 Timoteo 3:16, 17) Baibel ena hereva be mauri ena Badina, Iehova Dirava, amo ia mai. (Salamo 36:9) Unai dainai, ita Ia karaia dalana ia diba momokani, Salamo 103:14 ese ita ia hadibaia lou hegeregerena, ia gwau: “Dirava ia diba, ita be kahu sibona.” Unai dainai, Baibel ena namo dekenai ita tabekau momokani diba.
Herevana oiemu noho be edena bamona, to Baibel lalonai idia noho hahegani bona hakaua herevadia momo oi badinaia neganai namo do oi davaria diba. Baibel amo Dirava ese ita ia hadibaia, ia gwau: “Dala be inai, ia dekenai do umui raka lao.” (Isaia 30:21) Hari inai nega taunimanima durua gaudia be Baibel ese ia henia diba, a? Mani ita itaia.
Baibel be Durua Gaudia Ia Henia . . .
Lalo-hekwarahi Ita Haheaukalaia Totona. Baibel be ita ia hadibaia: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Dirava ena maino ese emui laloa gaudia, bona emui kudouna idia mamia gaudia ibounai do ia gimaia namonamo.” (Filipi 4:6, 7) Guriguri ese haida ia durudia dainai moni ena metau idauidau, mahuta hebou dalanai bona dagedage hereva amo idia hadikaia karadia, eiava lalokau tauna ta ia mase dainai idia vara lalohisihisi idia haheaukalaia, a? Mani inai ekspiriens oi laloa.
Jackie ia davaria ta ese mahuta hebou dalanai iena natuna kekeni ia hadikaia murinai, ia gwau: “Egu mamina be egu natuna lau naria diba lasi dainai lau kerere bona egu hereva be hegeregere lasi lau gwauraia totona. Lau hekwarahi bada egu hemami dikana, egu lalohisihisi, bona egu badu lau hanaia totona. Unai hemami ese egu mauri idia hadikaia matamaia. Iehova ese egu kudouna ia gimaia be gau badana.” Filipi 4:6, 7 ia duahia loulou murinai, ia gaukara goada unai sisiba ia badinaia totona. Jackie ia gwau: “Dina iboudiai lau guriguri, bona dika laloa karana ese lau ia hadikaia lasi totona lau noinoi hanaihanai, bona Iehova ese lau ia durua egu lalona ia hekwarahi lasi bona lau moale totona. Egu mamina be maino momokani lau abia.”
Oi danu be oi biagua diba lasi eiava oi hanamoa diba lasi hekwakwanai oi davaria diba, bona emu lalona do ia hekwarahi bada. Baibel ena sisiba oi badinaia bona oi guriguri neganai, unai hekwakwanai do oi haheaukalaia diba. Salamo torea tauna be inai hereva amo ita ia hagoadaia, ia gwau: “Oiemu mauri be [Iehova] ena imana dekenai do oi atoa. Ia dekenai do oi abidadama, vadaeni ia ese oi do ia durua.”—Salamo 37:5.
Goada Abia Totona. Salamo torea tauna be unai namo ia moalelaia inai bamona: “[Iehova] e, oi noho Ruma, be lau ura henia noho. Oiemu bese taudia, edia hebou badana lalonai, lau ese oi do lau hanamoa bada.” (Salamo 26:8, 12) Baibel ese ita ia hagoadaia ita hebou hanaihanai Iehova ita tomadiho henia totona. Unai hebamo be edena bamona oi durua gaudia ia henia diba? Haida be dahaka idia davaria?
Becky ia gwau: “Egu tamana bona sinana be Iehova idia hesiai henia lasi, unai dainai Dirava ena hesiai gaukara ta lau ura karaia neganai lau idia inai henia. Lau hekwarahi bada hebou lau lao henia totona.” Becky ia laloa hahenamo momo ia davaria badina ia hekwarahi bada Keristani heboudia dekenai ia mai hanaihanai totona. “Lau be stiuden, lau be natuna kekeni, bona lau be Iehova ena hesiai kekenina dainai dina iboudiai lau davaria hekwakwanai dekenai lau gini auka totona hebou ese egu abidadama idia hagoadaia. Kingdom Hall ai idia noho taudia be sikuli stiuden amo idia idau momokani! Lau idia laloa bada bona idia heduru, bona emai herevahereva ese hanaihanai lau idia hagoadaia. Idia be turadia momokani.”
Oibe, Baibel ena hakaua hereva ita hebou hanaihanai ita badinaia neganai, Iehova be goada ita abia totona durua gauna ia henia diba. Unai dala ai salamo torea tauna ena hereva ia momokani ita mamia diba, ia gwau: “Dirava be iseda heau mauri gabuna, bona ia ese ita dekenai goada ia henia. Iseda nega dika negadia ibounai ita dekenai ia noho, ita do ia durua totona.”—Salamo 46:1.
Ita Moalelaia Bona mai Anina Gaukarana Abia Totona. Baibel ia gwau inai ita karaia: “Unai dainai, lauegu varavara taudia e, egu lalokau, do umui gini goada, do umui marere lasi. Nega ibounai Lohiabada ena gaukara do umui karaia goadagoada. Badina be umui diba Lohiabada ena gaukara lalonai, emui hekwarahi be hekwarahi kava lasi momokani.” (1 Korinto 15:58) Momokani “Lohiabada ena gaukara” ita moalelaia diba, a? Keristani hesiai gaukarana ese mai anina gaudia ia havaraia, a?
Amelia ena lalohadai be inai bamona: “Tau ta bona ena adavana ida Baibel lau stadilaia; idia ura idia parara. Danu, hahine ta lau durua, iena natuna kekenina be dagedage dalanai haida ese idia hamasea. Unai hahine ia lalohisihisi bada badina mase taudia dekenai dahaka ia vara ia daradaralaia. Unai stadi rua dekenai, Baibel ena hahegani idia badinaia dainai edia mauri lalonai maino bona helaro idia abia. Lau moale bada bona egu mamina be ia hegeregere badina durudia karana ta lau karaia dainai.” Scott ia gwau: “Bema haroro gaukara dekenai ekspiriens namona oi davaria, Baibel stadi oi hamatamaia, eiava nega bona dala idaudia ai oi haroro neganai namo oi davaria, lagani momo lalonai do oi herevalaia. Oi gwauraia lou negadia iboudiai mamina namona bona moale oi davaria lou! Haroro gaukara dekenai ia noho daudau moalena oi davaria.”
Ia hedinarai goevagoeva, Baibel ena hakaua hereva idia badinaia neganai haroro gaukara taudia ai idia lao dainai unai taudia edia mamina be ia hegeregere bona mai anina gaukara idia davaria. Oi danu idia boiria unai gaukara karaia totona, ma haida be Dirava ena dala bona ena hahegani dekenai oi hadibadia, bona unai neganai oi danu be namo do oi davaria.—Isaia 48:17; Mataio 28:19, 20.
Dirava Ena Hereva amo Namo Oi Davaria
Ita daradara lasi, hari inai tanobada ai Baibel ena hereva dekenai ita tabekau diba badina ena hakaua herevadia be ita badinaia diba. Ia dekena amo namo ita davaria totona, namona be hanaihanai ita gaukara goada. Namona be hanaihanai ita duahia, ita stadilaia, bona ena hereva ita laloa dobu. Paulo ena sisiba be inai: “Oiemu diba bona goada do oi gaukaralaia, mai oiemu lalona ibounai. Vadaeni taunimanima ibounai ese oiemu goada do idia itaia, ia bada lao noho.” (1 Timoteo 4:15; Deuteronomi 11;18-21) Dirava ia gwau bema Baibel lalonai oi davaria sisiba oi badinaia neganai, do oi kwalimu. Ia gwauhamata: “[Iehova] do oi abidadama henia . . . Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”—Aonega Herevadia 3:5, 6.
[Pictures on page 31]
Baibel ena sisiba badinaia karana dainai emu mamina be do ia hegeregere bona do oi moale