Hahemauri Gaukarana Robinson Crusoe Motumotuna Dekenai

PACIFIC DAVARANA dekenai, Juan Fernández motumotudia toi amo Robinson Crusoe be ta, Chile ena kone amo ena daudau be kilomita 640 bamona.a Lagani 1700 murinai England toretore tauna Daniel Defoe ese buka ta ladana Robinson Crusoe ia torea, bona unai sikoea kilomita 93 motumotuna be unai buka amo ena ladana ia abia. Unai buka ena sivarai be Scotland tauna Alexander Selkirk, lagani hani lalodiai ia sibona be unai motumotu ia noholaia tauna, ena sivarai hegeregerena sisina.

Unai motumotu dekenai au amo idia karaia saini ena hereva ia gwau: “Inai gabu ai, lagani hani mai kahana lalodiai, Scotland tauna Alexander Selkirk be dina ta ta ai, mai ena lalo-hekwarahi ida bouti ia naria, ena noho gabuna amo ia idia ruhaia totona.” Gabeai, Selkirk idia davaria bona iena hanua korikorina dekenai idia abia lao, iena paradaiso maragina lalonai ia noho murinai ena hanua ia moalelaia diba lasi. Gabeai ia gwau: “O, lauegu lalokau motumotuna! Lau laloa oi lau rakatania lasi be namo!”

Nega ia hanaia lao murinai, unai motumotu be dibura gabuna ai idia halaoa bona Katolik Dubu taudia edia “abidadama karana idia gwau-edeede henia” taudia haida be unai gabu dekenai idia atoa. Unai paradaiso motumotuna, Selkirk ia dibaia gabuna, be ia idau momokani! To, hari inai negai unai motumotu idia noholaia taudia be tanobada kahadia taudia momo ese idia diba lasi mainona idia moalelaia. Motumotu momo edia noho dalana bamona, unai motumotu dekenai taunimanima be hanaihanai idia karaharaga lasi bona taunimanima idauidau oi hereva henia diba.

Robinson Crusoe dekenai, taunimanima ibounai be 500 bamona, to lagani ibounai lalonai taunimanima 400 bamona sibona be unai motumotu idia noholaia. Ena badina ta be sikuli laganina ia matamaia neganai, sinana haida bona edia natudia be Chile tanobada dekenai idia lao, to holide huadia sibona lalonai, unai motumotu idia lou henia bona edia ruma bese ida idia noho.

Ena be Robinson Crusoe be gabu mai hairaina, to motumotu taudia haida be lauma dalana ai idia dabu bona haere idia tahua. Haida idia laloa lauma dalanai hahemauri idia abia be namo.

Hahemauri Lauma Dalanai

Lagani 1979 bamona lalonai, unai bamona lauma dalanai taunimanima hamauria gaukarana ia matamaia. Santiago, Chile dekenai, hahine ta be Iehova ena Witnes taudia ida Baibel ia stadilaia, bena motumotu dekenai ia giroa lou bona ia diba gaudia be ma haida dekenai ia hadibaia matamaia. Gabeai, kongregesen elda ta be moni gaukara dainai unai motumotu ia vadivadi henia neganai, unai hahine be Baibel stiuden taudia haida ia durua bena lauma dalanai idia goada dainai, ia hoa bada. Hua toi murinai unai elda tadikaka ese unai motumotu ia vadivadi henia lou neganai, unai Baibel hadibaia hahinena bona iena stiuden taudia rua idia hegeregere vadaeni bapatiso idia abia totona, unai dainai elda tadikakana ese edia bapatiso karana ia naria. Gabeai, unai Keristani bapatiso matamata taihu ta ia headava, bona ena adavana ida lauma dalanai hahemauri idia ura henia taudia idia tahua hebou. Iena adavana be Kingdom Hall maragina haginia gaukarana ia gunalaia, bona unai motumotu dekenai ia noho grup maragina ese idia gaukaralaia. Gabeai, moni abia dalana ia auka dainai, Robinson Crusoe idia rakatania, bona Chile ena huana kahanai kongregesen ta ai Iehova idia hesiai henia noho.

Motumotu dekenai, unai grup maragina be metairametaira ia tubu daekau badina taunimanima ma haida be tomadiho koikoi amo idia hamauria. To, stiuden taudia be haisikuli totona motumotu idia rakatania bona tanobada dekenai idia lao dainai, idia bapatiso vadaeni taihu rua bona kekeni ta sibona be unai grup dekenai idia noho. Holide negadiai sinadia haida be motumotu dekenai idia giroa lou bona grup ena namba ia bada daekau. Unai ese lagani ibounai lalonai unuseniai idia noho Keristani taihu toi be lauma dalanai ia hagoadaia. Unai taihu idia gaukara goadagoada dainai, Robinson Crusoe dekenai taunimanima ibounai be Iehova ena Witnes taudia idia diba. Momokani, unai motumotu taudia haida ese edia gaukara idia koua toho, bona ma haida edia lalona idia ania Basileia sivaraina idia dadaraia totona. To, kamonai taudia edia kudouna dekenai idia hadoa Baibel ena hereva momokani be ia tubu noho.

Hahemauri Idia Abia Taudia Idia Hagoadaia

Lagani ta ta lalonai, sekit naria tauna be nega tamona unai motumotu ia vadivadi henia. Motumotu daudauna ai, Witnes taudia haida sibona vadivadi henia karana be edena bamona? Sekit naria tauna ta be nega ginigunana Robinson Crusoe ia vadivadi henia karana ia herevalaia, ia gwau:

“Unai vadivadi negana be namo herea momokani. Daba 7:00 a.m. ia matamaia neganai, Valparaiso hanuana ai rakatania bona Santiago ena Cerrillos Airport dekenai ai lao. Taunimanima 7 idia guia diba peleini maragina ta dekenai ai guia. Hora rua bona miniti 45 murinai, daudau gabuna amo ori ia hanaia ororo dorina ai itaia. Ai lao kahirakahira neganai, unai motumotu ena toana ai itaia diba​​—⁠nadi badana ta davara ena huanai. Ena toana be davara latanai ia hure, bouti ta be davara dekenai ia hure boio bamona.

“Ai diho murinai, bouti ta ese hanua dekenai ai ia abia lao. Davara ena kahana kahana ai, nadi motumotu maragidia idia hedinarai, bona idia be Juan Fernández ena fur seal edia laga-ani gabuna namona. Fur seal edia namba ia diho, unai dainai gavamani ese hamasedia karana ia taravatua. Karaharaga, bouti kahirakahira dekenai gau ta ia roho daekau bena davara lalonai ia boio lou. Unai be ia roho diba gwarume ta mai ena apena. Toana be mai ena moale ida davara amo ia roho daekau, manumanu maragidia ia ania totona. To momokani, nega haida ma gwarume ta ese unai gwarume do ia ania; iena roho ese dagedage gwarume ma haida ia veria, bona davara dekenai ia diho lou neganai, idia hegaegae ia idia ania totona.

“Dokonai, San Juan Bautista (Saint Ioane Bapatiso) hanuana dekenai ai ginidae. Bouti atoa gabuna dekenai motumotu taudia momo idia gini noho, edia vadivadi taudia idia naria eiava idia ura itaia daika be hari idia ginidae. Ai itaia gaudia hairaidia dainai ai hoa​​—⁠nadi momo ororo badana ladana El Yunque (The Anvil) ia noho, ena kala be hegeregere grin dabuana amo idia koua, ena murinai guba be bulu bona goeva momokani, bona ori idia kurokuro.

“Karaharaga bouti atoa gabuna dekenai, ai idia naria noho Keristani taihudia bona edia natudia ai itaia. Unai be holide negana dainai, unai grup ena namba ia bada daekau. Idia ai hedavari henia murinai, noho gabuna ta mai hairaina dekenai ai idia hakaua lao, bona pura ta lalonai unai be aiemai noho gabuna.

“Unai be pura idauna, bona ai lalo-parara unai nega do ia ore haraga. Ai ura emai nega do ai gaukaralaia namonamo. Unai dina tamona lalonai, aniani ai ania murinai, Baibel stiuden ta ai vadivadi henia, kahirakahira ia be iseda lauma taihuna bona Dirava ena lauma Paradaisona ena kahana ta ai do ia lao. Ena toana be ia moale bada, to ia gari sisina danu. Nega daudau ia tahua gauna bapatiso be kahirakahira momokani. Ia ida mai anina bada gaudia haida ai kikilaia, sivarai namona harorolaia pablisa ai ia lao diba totona. Dina ta murinai, haroro gaukara ia hamatamaia. Dina ihatoina ai, bapatiso totona ia ida mai anina bada gaudia ai kikilaia matamaia. Unai pura ia do ore lasi lalonai, bapatiso ia abia.

“Pura lalonai ai karaia hebou ibounai dekenai taunimanima momo idia mai, idia ibounai be 14. Dina ta ta ai, dala ai karaia haroro gaukara totona, lou henia totona, Baibel stadi totona, bona mamoe naria gaukarana totona. Unai ese lagani ibounai lalonai idia sibona ese hesiai gaukara idia karaia taihudia ia hagoadaia momokani!”

Unai motumotu dekenai, tatau ese hereva momokani idia abia dae be auka, reana edia moni gaukara be auka dainai. Edia gaukara badana be haoda gaukarana, ura idia abia totona, bona nega bada idia gaukaralaia. Danu, lalo-dika henia kava karana dainai haida be hereva momokani idia dadaraia. To, eda ura be vaira neganai unai motumotu taudia, tatau bona hahine, ma momo ese hereva momokani do idia abia dae.

Ema bona hari, unai motumotu dekenai taunimanima 10 ese hahemauri idia abia vadaeni, hereva momokani bona Iehova Dirava ena ura idia dibaia karana amo. Idia haida be badina idauidau dainai unai motumotu idia rakatania. Herevana idia noho eiava lasi, to lauma dalanai idia abia hahemauri ena anina ese Alexander Selkirk idia hamauria karana ia hanaia momokani. Hari, herevana edeseniai idia noho, idia be lauma Paradaisona idia moalelaia. Unai motumotu ai idia do mauri noho taihudia bona edia natudia be unai gabu mai hairaina idia moalelaia bada, to unai sibona lasi, edia helaro be tanobada ibounai be paradaiso ai ia lao neganai, ena namo ibounai do idia moalelaia.

Hahemauri Gaukarana Idia Karaia Noho

Robinson Crusoe dekenai idia noho Iehova ena Witnes taudia edia grup maragina edia noho gabuna be edia tadikaka bona taihu amo ia daudau momokani. To, Scotland tauna Selkirk bamona, idia laloa lasi ma haida ese idia rakatanidia. Hanaihanai idia abia tiokratik buka bona magasin, lagani ta ta lalonai nega toi Watch Tower Society ena brens opesi Chile dekenai ese ia siaia hebouhebou badadia bona maragidia edia vidio, bona lagani iboudiai sekit naria tauna ena vadivadi dainai, idia be Iehova ena orea ida idia noho hebou bamona. Unai dainai idia be ‘tanobada ena kahana ibounai idia noho Keristani tadikaka’ huanai idia gaukara noho.​​—⁠1 Petero 5:⁠9.

[Footnote]

[Maps/Picture on page 9]

(For fully formatted text, see publication)

CHILE

Santiago

ROBINSON CRUSOE MOTUMOTUNA

San Juan Bautista

El Yunque

PACIFIC DAVARANA

SANTA CLARA MOTUMOTUNA

[Picture]

Unai motumotu ia kahirakahira neganai, ta ese nadi badana ta ia itaia diba davara ena huanai

[Credit Line]

Map of Chile: Mountain High Maps® Copyright © 1997 Digital Wisdom, Inc.

[Picture on page 8, 9]

Nadi momo ororo badana ladana El Yunque (The Anvil)

[Picture on page 9]

San Juan Bautista (Saint Ioane Bapatiso) hanuana

[Picture on page 9]

Motumotu maragidia be “fur seal” bona “sea lion” edia laga-ani gabudia

[Picture on page 10]

Santiago, Chile dekenai peleini maragina ta ai abia

[Picture on page 10]

Robinson Crusoe Motumotuna ena nadi konena

[Picture on page 10]

Motumotu dekenai idia haginia Kingdom Hall maragina