Oi Itaia Diba Lasi Gauna Oi Abidadama Henia Diba, A?

BEMA ta ia gwau, ‘Lau itaia diba gauna sibona lau abidadama henia,’ iena hereva ena anina be tamona lasi. Momokani, ita ibounai ese ita itaia diba lasi gaudia ita abidadama henia.

Hegeregere, sikuli gabunai reana magnetik siahuna ena noho hamomokania totona tahua gaukara ta oi karaia vadaeni. Reana inai bamona oi karaia: Auri ena momoru be pepa ta latanai oi atoa. Bena pepa be magnet latanai oi atoa. Unai pepa oi hamarerea neganai, auri ena momoru be hoa dalanai do ia hebou magnet ena matana ia noho gabuna dekenai bona magnetik siahuna hegeregerena toana ta do ia karaia. Bema unai oi karaia, magnetik siahuna oi itaia, a? Lasi, to unai auri ena momoru dekenai ia karaia gauna oi itaia, ia hamomokania magnetik siahuna ia noho.

Ita itaia diba lasi gaudia ma haida be daradara lasi ida ita abia dae. Laulau hairaina ta eiava koroa gauna namo hereana ta ita itaia neganai, laulau penia tauna eiava koroa tauna ena noho ita daradaralaia lasi. Unai dainai ranu be ororo amo ia moru eiava dina ena diho ita itaia neganai, namona be eda lalona idia veria bena ita laloa reana idia be Laulau Penia Tauna Badana eiava Koroa Tauna Badana ena gaukara, ani?

Dahaka Dainai Haida Idia Abidadama Lasi

To, haida ese dubu ena hadibaia herevadia dainai edia abidadama Dirava dekenai idia haboioa. Unai be ia momokani Norway tauna ta dekenai, guna idia hadibaia Dirava ese kara dika taudia be hel ena lahi lalonai ia gabua. Unai tau ia lalo-parara lasi edena bamona Diravana ese unai dala amo taunimanima ia hahisidia diba, unai dainai Dirava ia noho lasi lalohadaina ia abia dae.

To gabeai, Baibel stadi ia abia dae bona Iehova ena Witnes tauna ta ese ia durua. Ia hoa badina ia dibaia Baibel ese kara dika taudia be hel ena lahi lalonai hisihisi idia ania herevana ia hadibaia lasi. Baibel ese mase be mahuta danu ia hahegeregerea. Mase gabunai, hisihisi ita ania lasi; gau ta ita diba lasi. (Hadibaia Tauna 9:​5, 10) Danu ia diba edia kara dika amo idia helalo-kerehai lasi kara dika taudia be gara gabunai do idia noho ela bona hanaihanai. (Mataio 12:​31, 32) Dirava ena nega korikori ai mase taudia oredia do idia toreisi lou, Paradaiso ai mauri hanaihanai do idia abia totona. (Ioane 5:​28, 29; 17:⁠3) Unai hereva ese lalo-parara ia havaraia. Baibel ena hereva “Dirava be lalokau” ida ia hegeregere. (1 Ioane 4:⁠8) Unai lalo-momokani tauna ese Dirava ena Hereva ia stadilaia noho, bona gabeai, Baibel ese ia gwauraia Diravana ia lalokau henia matamaia.[1]

Haida idia ura lasi abia dae lalokau Havaraia Tauna ia noho badina lalohisihisi bona hahemaoro kerere karadia idia vara noho. Edia lalohadai be Sweden tauna ta ena lalohadai hegeregerena, nega ta guba ia duduia bona ia henanadai: “Reana Siahu Ibounai, harihari bada Dirava be unuseniai ia noho lasi badina iniseniai ita be kara gageva bona kara dika bada ita davaria, ani?” Ta ese ena henanadai ia haerelaia diba lasi dainai, ia danu be Dirava ia noho lasi lalohadaina ia abia dae. Gabeai Iehova ena Witnes taudia danu Baibel ia stadilaia. Ia davaria Dirava ena Hereva ese lagani momo lalonai ia noho henanadaina, Dahaka dainai Dirava ese kara dika ia koua lasi?, ena haere namona ia henia.a

Unai lalo-momokani tauna ia lalo-parara kara dika ia noho ese ia hamomokania lasi Dirava ia noho lasi. Haheitalai be inai: Tau ta ese vamu utua totona kaia ta ia karaia. Hoihoi tauna ta ese ia hoia bona ia gaukaralaia, vamu utua totona lasi, to ta ia alaia totona. Unai kaia ia gaukaralaia namonamo lasi dainai ita gwau diba lasi ia karaia tauna ia noho lasi. Unai hegeregerena, tanobada ia karaia ena badina hegeregerena idia gaukaralaia lasi ese ia hahedinaraia lasi Havaraia Tauna ia noho lasi.

Baibel ese ita ia hadibaia Dirava ena gaukara be hereadae. “Iena kota be momokani. . . . Ia be momokani bona maoromaoro.” (Deuteronomi 32:⁠4) Dirava ese harihari gaudia namodia taunimanima dekenai ia henia, to harihari gaudia haida idia gaukaralaia namonamo lasi dainai hisihisi bada ia vara. (Iamesi 1:​17) To, Dirava ese hisihisi do ia haorea. Unai murinai, “manau taudia ese noho gabuna tano do idia abia, . . . tano dekenai do idia noho ela bona hanaihanai.”​​—⁠Salamo 37:​11, 29.

Guna ai herevalaia Sweden tauna ese taunimanima edia hisihisi ia itaia neganai unai ese ena kudouna ia hamarerea. Momokani, mai hebogahisi ida ma haida ia laloa karana ese ia hamomokania Dirava ia noho. Edena dala amo?

Taunimanima momo idia laloa dala rua sibona idia noho, Dirava idia abidadama henia eiava evolusen idia abia dae. Evolusen idia abia dae taudia edia hahediba herevana be “goada gaudia idia mauri”​​—⁠anina be taunimanima bona animal be edia bese huanai idia kara helulu idia roho mauri totona. Goada gaudia idia mauri; manoka gaudia idia mase. Idia gwau unai be vaia mauri gaudia edia mauri dalana. To bema manoka gaudia idia mase goada gaudia idia mauri diba totona be “vaia mauri gaudia edia mauri dalana,” edena bamona unai Sweden tauna hegeregerena goada taudia haida be edia bamodia edia hisihisi idia itaia neganai unai ese edia kudouna ia hamarerea?

Dirava Oi Dibaia Matamaia Dalana

Dirava ita itaia diba lasi badina taunimanima edia tauanina ia abia lasi. To, Dirava ia ura ia ita diba. Dirava ita dibaia dalana ta be iena gaukara idau hereadia​​—⁠ia havaraia “laulau” bona “koroa gaudia”​​—⁠ita tahua namonamo. Roma 1:​20 ai, Baibel ia gwau: “Dirava ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani. Inai bamona idia diba, badina be edia matana dekenai Dirava ese ia karaia gaudia ibounai idia itaia vadaeni. Inai gaudia idia itaia dainai, idia be Dirava ena hunia gaudia idia kamonai diba danu.” Oibe, idia penia eiava koroa gauna ta ita tahua ese ita ia durua ia karaia tauna ena kara ita dibaia hegeregerena, Dirava ena gaukara hereadia oi laloa dobu karana ese oi ia durua iena kara oi dibaia namonamo totona.

Momokani, Dirava ese ia havaraia gaudia ita itaia sibona amo mauri lalonai taunimanima edia henanadai ibounai edia haere ita abia diba lasi. To ita ese unai henanadai edia haere be Dirava ena Hereva, Baibel, lalonai ita davaria diba. Mai edia lalona ibounai ida Baibel idia duahia dainai guna ai gwauraia tatau ruaosi ese idia abia dae Dirava ia noho bona ita dekenai idia vara gaudia ia laloa.

[Footnote]

[Picture Credit Line on page 28]

J. Hester and P. Scowen (AZ State Univ.), NASA▸